Esaya
64 Loko a wu lo handzula matilo u xika,
Leswaku tintshava ti ta tsekatseka hikwalaho ka wena,
2 Ku fana ni ndzilo loko wu hisa mavivi,
Ni ndzilo wu virisa mati,
Kutani valala va wena a va ta tiva vito ra wena,
Ni matiko a ma ta rhurhumela emahlweni ka wena!
3 Loko u endla swilo swo hlamarisa leswi a hi nga swi langutelanga,+
U xikile, tintshava ti tsekatseka hikwalaho ka wena.+
4 Ku sukela khale swinene a ku si tshama ku va ni loyi a tweke kumbe ku yingisa,
Kumbe ku vona Xikwembu xo fana na wena,
Lexi kotaka ku pfuna lava xi rindzeleke.+
5 U hlangane ni lava endlaka swo lulama va tsakile,+
Lava ku tsundzukaka va tlhela va hanya hi milawu ya wena.
U hi hlundzukerile loko hi tshamela ku dyoha,+
Hi dyohe nkarhi wo leha.
Xana sweswi swa hi fanela ku ponisiwa?
6 Hinkwerhu hi fana ni munhu loyi a nga basangiki,
Mitirho ya hina hinkwayo yo lulama yi fana ni xilapana lexi tirhisiwaka hi wansati loko a ri enkarhini.+
Hinkwerhu hi ta vuna ku fana ni tluka,
Naswona swihoxo swa hina swi ta hi pewulela ekule ku fana ni moya.
7 A nga kona loyi a vitanaka vito ra wena,
A nga kona loyi a pfukaka a ku khoma,
Hikuva u hi tumbetele xikandza xa wena,+
Naswona u hi tshika hi lova hikwalaho ka swidyoho swa hina.
8 Kambe Yehovha Xikwembu xa hina, hi wena Tata wa hina.+
Hina hi vumba, wena u Muvumbi wa hina;+
Hinkwerhu hi endliwe hi mavoko ya wena.
9 Yehovha Xikwembu xa hina, u nga hi hlundzukeli ngopfu,+
Naswona u nga ha swi tsundzuki swihoxo swa hina.
Hi kombela u hi tsundzuka hikuva hinkwerhu hi vanhu va wena.
10 Miti ya wena yo kwetsima yi hundzuke mananga.
Siyoni wu hundzuke mananga,
Yerusalema wu hundzuke rhumbi.+
11 Tempele ya hina yo kwetsima leyo saseka,
Leyi vakokwa wa hina a va ku dzunisa eka yona,
Yi hisiwile hi ndzilo,+
Naswona hinkwaswo swilo leswi a hi swi rhandza swi lovile.
12 Yehovha, xana u ta hi tshika hambiloko u twe timhaka leti?
Xana u ta miyela u hi tshika hi xanisiwa hi tihanyi?+