Varhoma

2 Hikwalaho, a wu nge swi koti ku tiyimelela wena munhu+ loko u avanyisa; hikuva loko u avanyisa un’wana hi swilo leswi na wena u swi endlaka wa tigweva.+ 2 Ha swi tiva leswaku ku avanyisa ka Xikwembu i ka ntiyiso, ku lwisana ni lava endlaka swilo swo tano.

3 Kambe wena munhu, xana u anakanya leswaku loko u avanyisa lava endlaka swilo swo tano leswi na wena u swi endlaka, u ta balekela ku avanyisiwa hi Xikwembu? 4 Kumbe, xana a wu wu tekeli enhlokweni musa wa xona lowukulu+ ni ku tiyisela+ ka xona ni ku lehisa mbilu ka xona,+ hileswi u nga swi tiviki leswaku Xikwembu hi musa xi lava ku ku pfuna leswaku u hundzuka?+ 5 Kambe loko u tiomisa nhloko u tlhela u ala ku hundzuka, u ti hlayisela vukarhi hi siku ra vukarhi ni ra ku kombisiwa ka vuavanyisi bya Xikwembu byo lulama.+ 6 Xi ta hakela un’wana ni un’wana hi ku ya hi mitirho yakwe:+ 7 lava tiyiselaka emitirhweni leyinene hi ku lava ku vangama,+ ku xiximeka ni ku nga fi xi ta va nyika vutomi lebyi nga heriki; 8 hambiswiritano, lava rhandzaka timholovo ni lava nga wu yingisiki ntiyiso kambe va yingisaka leswi nga lulamangiki va ta weriwa hi vukarhi ni ku hlundzuka ka Xikwembu.+ 9 Vanhu hinkwavo lava endlaka swilo swo biha va ta va ni nhlomulo ni maxangu, ku sungula hi Muyuda ku ya eka Mugriki; 10 kambe hinkwavo lava endlaka leswinene va ta kuma ku vangama, ku xiximeka ni ku rhula, ku sungula hi Muyuda+ ku ya eka Mugriki.+ 11 Hikuva Xikwembu a xi na xihlawuhlawu.+

12 Hikuva hinkwavo lava dyoheke va nga ri na nawu va ta lova va nga ri na nawu;+ kambe hinkwavo lava dyoheke va ri ehansi ka nawu va ta avanyisiwa hi nawu.+ 13 Hikuva lava twaka nawu a hi vona lava lulameke emahlweni ka Xikwembu kambe lava endlaka leswi nawu wu swi vulaka va ta vuriwa lava lulameke.+ 14 Hikuva loko vanhu va matiko lava nga riki na nawu,+ va swi endla hi ntumbuluko swilo swa nawu, vanhu lava hambileswi va nga riki na nawu, va endla swilo hi ku ya hi nawu. 15 Va kombisa leswaku leswi vuriwaka hi nawu swi tsariwile etimbilwini ta vona, kasi ripfalo ra vona i mbhoni ya vona naswona mianakanyo ya vona ya va hehla kumbe yi va yimelela. 16 Leswi swi ta endleka hi siku leri Xikwembu xi nga ta avanyisa swihundla swa vanhu ha Kreste Yesu+ hi ku ya hi mahungu lamanene lawa ndzi ma chumayelaka.

17 Loko u tivula Muyuda+ naswona u tshemba nawu ni ku tinyungubyisa hi ku va ni vuxaka ni Xikwembu, 18 u tiva ku rhandza ka Xikwembu u tlhela u amukela swilo leswi nga swinene hikuva u dyondzisiwa hi Nawu,+ 19 u tshemba leswaku u nga kongomisa lava feke matihlo naswona u ku vonakala eka lava nga emunyameni, 20 u mululamisi wa swiphukuphuku ni mudyondzisi wa swihlangi hikuva u twisisa swilo swa masungulo ni ntiyiso lowu nga eNawini— 21 kambe, xana wena loyi u dyondzisaka van’wana, hikwalaho ka yini u nga tidyondzisi?+ Wena loyi u chumayelaka u ku, “U nga tshuki u yiva,”+ xana wa yiva? 22 Wena loyi u nge, “U nga tshuki u endla vuoswi,”+ xana wa byi endla vuoswi? Wena loyi u vengaka swikwembu swa mavunwa, xana wa yiva etitempeleni? 23 Wena loyi u tinyungubyisaka hi nawu, xana a wu xi khomisi tingana Xikwembu hi ku tlula Nawu? 24 Hikuva “vito ra Xikwembu ra sandziwa exikarhi ka matiko hikwalaho ka n’wina,” hilaha swi tsariweke hakona.+

25 Entiyisweni, ku yimba+ swa pfuna ntsena loko u hanya hi nawu;+ kambe loko u tlula nawu, ku yimba ka wena ku fana niloko u nga yimbanga. 26 Hikwalaho, loko munhu loyi a nga yimbangiki+ a endla swilo leswi lulameke hi ku ya hi Nawu, xana ku nga yimbi ka yena a ku nge tekiwi tanihi ku yimba?+ 27 Munhu loyi a nga yimbangiki, leswi a endlaka leswi Nawu wu vulaka swona, u ta ku avanyisa wena loyi u tlulaka nawu, hambileswi u nga ni nawu lowu tsariweke u tlhela u yimba. 28 Hikuva a nga vonaki ehandle leswaku i Muyuda+ naswona ku yimba a hi nchumu lowu endliwaka ehandle, enyameni ntsena.+ 29 Kambe i Muyuda wa xiviri hileswi a nga swona endzeni,+ naswona u yimbe embilwini+ hi moya lowo kwetsima ku nga ri hi ku landza nawu lowu tsariweke.+ Munhu yoloye u dzunisiwa hi Xikwembu ku nga ri hi vanhu.+