Yeremiya

29 Lawa i marito ya papila leri muprofeta Yeremiya a ri rhumeleke a ri eYerusalema ri ya eka vakulukumba hinkwavo lava nga exikarhi ka vanhu lava nga evuhlongeni, vaprista, vaprofeta ni vanhu hinkwavo lava Nebukadnetsara a va tekeke eYerusalema a va yisa evuhlongeni le Babilona, 2 endzhaku ka loko Hosi Yekoniya,+ mana wa hosi,+ vatirhi va le hubyeni, tihosana ta le Yuda ni ta le Yerusalema, lava tivaka ntirho wa mavoko ni lava kotaka ku endla swilo hi nsimbhi va humile eYerusalema.+ 3 Papila ra kona u ri fambise na Elasa n’wana wa Xafani+ na Gemariya n’wana wa Hilkiya, loyi Hosi Sedekiyasi+ wa le Yuda a n’wi rhumeke eBabilona eka Hosi Nebukadnetsara wa le Babilona. Ri ku:

4 “Yehovha wa mavuthu, Xikwembu xa Israyele, u byela vanhu hinkwavo lava nga evuhlongeni, lava a va yiseke evuhlongeni va suka eYerusalema va ya eBabilona a ku, 5 ‘Akani tiyindlu mi tshama eka tona. Byalani mirhi leyi vekaka mihandzu mi dya mihandzu ya yona. 6 Titekeleni vasati mi tswala vana va majaha ni va vanhwanyana; tekelani vana va n’wina va majaha vasati mi catisa vana va n’wina va vanhwanyana, leswaku na vona va ta va ni vana va majaha ni va vanhwanyana. Mi tala kwalaho mi nga hunguteki. 7 Wu laveleni ku rhula muti lowu ndzi mi yiseke evuhlongeni eka wona, mi wu khongelela eka Yehovha, hikuva loko wu va ni ku rhula na n’wina mi ta va ni ku rhula.+ 8 Hikuva Yehovha wa mavuthu, Xikwembu xa Israyele u ri: “Mi nga pfumeli ku xisiwa hi vaprofeta va n’wina ni vanhu va n’wina lava hlahluvaka lava nga exikarhi ka n’wina+ naswona mi nga yi yingiseli milorho ya vona leyi va yi lorhaka. 9 Hikuva ‘va mi profetela mavunwa hi vito ra mina. A ndzi va rhumanga,’+ ku vula Yehovha.”’”

10 “Hikuva Yehovha u ri, ‘Loko ku hela malembe ya 70 mi ri eBabilona ndzi ta ta ndzi ta mi pfuna+ naswona ndzi ta endla leswi ndzi mi tshembiseke swona hi ku mi tlherisela endhawini leyi.’+

11 “‘Hikuva ndzi swi tiva kahle leswi ndzi swi ehleketaka hi n’wina,’ ku vula Yehovha, ‘ndzi lava mi va ni ku rhula ku nga ri khombo,+ ndzi lava ku mi nyika vumundzuku lebyi mi byi languteleke.+ 12 Mi ta ndzi vitana, mi ta, mi tlhela mi khongela eka mina naswona ndzi ta mi yingisa.’+

13 “‘Mi ta ndzi lava mi ndzi kuma,+ hikuva mi ta ndzi lavisisa hi mbilu ya n’wina hinkwayo.+ 14 Kutani ndzi ta endla leswaku mi ndzi kuma,’+ ku vula Yehovha. ‘Ndzi ta mi vuyisa evuhlongeni, ndzi mi hlengeleta mi huma ematikweni hinkwawo ni le tindhawini hinkwato leti ndzi mi hangalaseleke eka tona,’+ ku vula Yehovha. ‘Ndzi ta mi tlherisela endhawini leyi a mi ri eka yona loko ndzi mi yisa evuhlongeni.’+

15 “Kambe mi te, ‘Yehovha u hi vekele vaprofeta eBabilona.’

16 “Hikuva Yehovha u byele hosi leyi tshameke exiluvelweni xa Davhida+ ni vanhu hinkwavo lava tshamaka emutini lowu, vamakwenu lava nga fambangiki na n’wina evuhlongeni a ku, 17 ‘Yehovha wa mavuthu u ri: “Ndzi va rhumela banga, ndlala ni ntungu*+ naswona ndzi ta va endla va fana ni makuwa yo bola* lama nga dyekiki hikwalaho ko biha.”’+

18 “‘Ndzi ta va hlongorisa hi banga,+ hi ndlala ni hi ntungu, ndzi ta endla leswaku mifumo hinkwayo ya misava yi chava+ hikwalaho ka leswi nga ta va humelela, va ta rhukaniwa, va hlamariwa, va va nchumu wo beriwa noti+ ni ku sandziwa exikarhi ka matiko hinkwawo lawa ndzi nga ta va hangalasela eka wona,+ 19 hikuva a va ma yingisanga marito ya mina lawa ndzi ma rhumeleke eka vona hi ku tirhisa malandza ya mina ku nga vaprofeta,’ ku vula Yehovha, ‘ndzi va rhume hi ku phindhaphindha.’*+

“‘Kambe a mi yingisanga,’+ ku vula Yehovha.

20 “Hikwalaho, yingisani rito ra Yehovha n’wina hinkwenu lava nga evuhlongeni, lava ndzi mi suseke eYerusalema ndzi mi yisa eBabilona. 21 Yehovha wa mavuthu, Xikwembu xa Israyele u vula leswi mayelana na Akabu n’wana wa Kolaya na Sedekiyasi n’wana wa Maseya, lava mi profetelaka mavunwa hi vito ra mina+ u ri, ‘Ndzi va nyiketa evokweni ra Hosi Nebukadnetsara* wa le Babilona, u ta va dlaya emahlweni ka n’wina. 22 Leswi nga ta endleka eka vona, swi ta tirhisiwa hi mahlonga hinkwawo ya le Yuda lama nga le Babilona loko ma rhukana van’wana, ma ku: “Onge Yehovha a nga endla eka n’wina hilaha a endleke hakona eka Sedekiyasi na Akabu, lava hosi ya le Babilona yi va hiseke hi ndzilo,” 23 hikuva va endle swilo leswi khomisaka tingana eIsrayele,+ va endla vuoswi ni vasati va vanuna van’wana naswona va vulavula mavunwa hi vito ra mina, ku nga nchumu lowu ndzi nga va lerisangiki wona.+

“‘“Hi mina Loyi a swi tivaka naswona ndzi mbhoni ya swona,”+ ku vula Yehovha.’”

24 “Kutani u ta byela Xemaya+ wa le Nehelamu u ku, 25 ‘Yehovha wa mavuthu, Xikwembu xa Israyele u ri: “Hikwalaho ka leswi u rhumeleke mapapila hi vito ra wena ma ya eka vanhu hinkwavo lava nga eYerusalema, eka Sofaniya+ n’wana wa muprista Maseya ni le ka vaprista hinkwavo u ku, 26 ‘Yehovha u ku endle muprista ematshan’weni ya muprista Yoyada leswaku u va mulanguteri wa yindlu ya Yehovha, u rindza munhu un’wana ni un’wana la pengaka loyi a tiendlaka muprofeta u n’wi boha mavoko, nhamu ni nhloko hi tingole* ni hi tinketana;+ 27 kutani hikwalaho ka yini u nga n’wi tshinyanga Yeremiya wa le Anathoti,+ loyi a tiendlaka muprofeta eka n’wina?+ 28 Hikuva u hi rhumele papila eBabilona, a ku: “Ma ha ta tshama nkarhi wo leha! Akani tiyindlu mi tshama eka tona. Byalani mirhi ya mihandzu mi dya mihandzu ya yona,+—”’”’”

29 Loko muprista Sofaniya+ a hlaya papila leri emahlweni ka muprofeta Yeremiya, 30 Yehovha a vulavula na Yeremiya, a ku: 31 “Rhumela rungula eka vanhu hinkwavo lava nga evuhlongeni u ku, ‘Yehovha u vula leswi mayelana na Xemaya wa le Nehelamu: “Hikwalaho ka leswi Xemaya a mi profeteleke, hambileswi ndzi nga n’wi rhumangiki naswona a ringeteke ku endla leswaku mi tshemba mavunwa,+ 32 Yehovha u ri, ‘Ndzi xupula Xemaya wa le Nehelamu ni vana va yena. A ku nge poni munhu ni un’we endyangwini wa yena exikarhi ka vanhu lava naswona a nge swi voni swilo leswinene leswi ndzi nga ta swi endlela vanhu va mina,’ ku vula Yehovha, ‘hikuva u khutaze vanhu ku xandzukela Yehovha.’”’”