Ezekiyele

1 Hi lembe ra vu-30, hi siku ra vuntlhanu hi n’hweti ya vumune, matilo ma pfulekile loko ndza ha ri exikarhi ka vanhu lava yisiweke evuhlongeni+ ekusuhi ni nambu wa Kebari,+ hiloko ndzi sungula ku vona swivono swa Xikwembu. 2 Hi siku ra vuntlhanu ra n’hweti, ku nga lembe ra vuntlhanu ra ku yisiwa ka Hosi Yoyakini+ evuhlongeni, 3 Yehovha a vulavula na Ezekiyele,* n’wana wa Buzi loyi a a ri muprista, ekusuhi ni nambu wa Kebari etikweni ra Vakalidiya.+ Loko a ri kwalaho matimba* ya Yehovha ma sungule ku tirha eka yena.+

4 Loko ndzi ri karhi ndzi languta, ndzi vona moya wa matimba+ lowu humaka en’walungwini naswona a ku ri ni papa lerikulu ni rihati+ leswi a swi rhendzeriwe hi ku vonakala lokukulu, naswona exikarhi ka rihati a ku ri ni nchumu lowu langutekaka ku fana ni nsuku lowu hlanganisiweke ni silivhere.+ 5 Exikarhi ka rona a ku ri ni leswi a swi languteka ku fana ni swivumbiwa swa mune+ leswi hanyaka naswona ha xin’we xa swona a xi fana ni munhu. 6 Xin’wana ni xin’wana a xi ri ni swikandza swa mune ni timpapa ta mune.+ 7 A swi ri ni milenge yo ololoka naswona mikondzo ya swona a yi fana ni ya rhole, a yi hatima ku fana ni koporo leyi hatimisiweke.+ 8 A swi ri ni mavoko ya vanhu ehansi ka timpapa ta swona eka matlhelo hinkwawo ya mune naswona hi mune ka swona a swi ri ni swikandza ni timpapa. 9 Timpapa ta swona a ti khumbana. A swi nga hundzuluki loko swi famba; hinkwaswo a swi ya emahlweni.+

10 Swikandza swa swona a swi languteka hi ndlela leyi: Hi mune ka swona a swi ri ni xikandza xa munhu ni xa nghala+ exineneni, xikandza xa nkuzi+ eximatsini naswona hi mune ka swona a swi ri ni xikandza+ xa gama.+ 11 Swikandza swa swona a swi ri hi ndlela yoleyo. A swi phurumule timpapa ta swona ehenhla. Xin’wana ni xin’wana a xi ri ni timpapa timbirhi leti a ti khumbanile ni timpapa timbirhi leti a ti funengete mimiri ya swona.+

12 Hinkwaswo a swi ya emahlweni, a swi ya kun’wana ni kun’wana laha moya a wu swi kongomisa ku ya kona.+ A swi nga hundzuluki loko swi famba. 13 Swivumbiwa leswi hanyaka a swi languteka ku fana ni makala ya ndzilo lama pfurhaka naswona nchumu lowu fanaka ni swisana swa ndzilo lowu vangamaka a wu ya emahlweni ni le ndzhaku exikarhi ka swivumbiwa leswi hanyaka naswona a ku huma rihati endzilweni.+ 14 Loko swivumbiwa leswi hanyaka swi famba,* ndlela leyi a swi famba ha yona a yi fana ni ku voninga ka rihati.

15 Loko ndzi langute swivumbiwa leswi hanyaka, ndzi vone vhilwa rin’we emisaveni etlhelo ka xivumbiwa xin’wana ni xin’wana lexi hanyaka lexi nga ni swikandza swa mune.+ 16 Xivumbeko xa mavhilwa a xi hatima ku fana ni ribye ra nkoka leri vuriwaka krisolita naswona hi mune ka wona a ma fana. Xivumbeko xa wona a xi fana ni loko vhilwa ri nghenisiwe exikarhi ka vhilwa rin’wana. 17 Loko ma famba, a ma swi kota ku ya ematlhelweni hinkwawo ya mune ma nga jikanga. 18 Mavhilwa a ma tlakuke hi ndlela leyi chavisaka naswona hi mune ka wona a ma ri ni matihlo ehandle ka wona matlhelo hinkwawo.+ 19 Loko swivumbiwa leswi hanyaka swi famba, mavhilwa a ma famba na swona naswona loko swivumbiwa leswi hanyaka swi tlakuka ehenhla ka misava, mavhilwa na wona a ma tlakuka.+ 20 A swi ya laha moya wu swi kongomisaka ku ya kona, kun’wana ni kun’wana laha moya wu yaka kona. Mavhilwa a ma tlakuka ni swivumbiwa leswi hanyaka hikuva moya lowu a wu tirha eka swona* a wu tirha ni le ka wona. 21 Loko swi famba, na wona a ma famba; loko swi yima, na wona a ma yima; loko swi tlakuka ehenhla ka misava, mavhilwa a ma tlakuka ni swivumbiwa leswi hanyaka hikuva moya lowu a wu tirha eka swona a wu tirha ni le ka wona.

22 Ehenhla ka tinhloko ta swivumbiwa leswi hanyaka a ku ri ni nchumu lowu fanaka ni lwangu leri hatimaka ku fana ni ayisi naswona a wu hlamarisa.+ 23 A swi yimise timpapa ta swona ti khumbana ehansi ka lwangu leri hatimaka. Xin’wana ni xin’wana a xi ri ni timpapa timbirhi leti funengetaka tlhelo rin’we ra miri wa swona ni timpapa timbirhi leti a ti funengeta tlhelo lerin’wana ra miri wa swona. 24 Loko ndzi twa mpfumawulo wa timpapa ta swona, a wu fana ni wa mati lama khulukaka, ku fana ni mpfumawulo wa Lowa Matimba Hinkwawo.+ Loko swi famba, mpfumawulo wa swona a wu fana ni wa masocha. Loko swi yima, a swi pfala timpapa ta swona.

25 A ku twakala rito ehenhla ka lwangu leri hatimaka leri a ri ri ehenhla ka tinhloko ta swona. (Loko swi yima, a swi pfala timpapa ta swona.) 26 Ehenhla ka lwangu leri hatimaka leri a ri ri ehenhla ka tinhloko ta swona a ku ri ni nchumu lowu fanaka ni ribye ra safiri,+ lowu a wu languteka ku fana ni xiluvelo.+ Loyi a tshameke exiluvelweni xexo a a languteka ku fana ni munhu.+ 27 Ndzi vone nchumu lowu hatimaka ku fana ni nsuku lowu hlanganisiweke ni silivhere lowu a wu fana ni ndzilo,+ wu huma eka nchumu lowu fanaka ni masenge yakwe ku ya ehenhla; kutani ku suka emasengeni yakwe ku ya ehansi, ndzi vone nchumu lowu fanaka ni ndzilo.+ A a rhendzeriwe hi ku vangama 28 loku fanaka ni nkwangulatilo+ epapeni hi siku leri ku naka mpfula. Yoleyo a ku ri ndlela leyi ku vangama koloko a ku languteka ha yona. A ku fana ni ku vangama ka Yehovha.+ Loko ndzi ku vona, hiloko ndzi wa xikandza xa mina xi languta ehansi kutani ndzi sungula ku twa rito ra un’wana a vulavula.