Mitirho
8 Loko ku ri Sawulo, a a ku seketela ku dlayiwa ka yena.+
Hi siku rero vandlha leri a ri ri eYerusalema ri sungule ku xanisiwa swinene; van’wana hinkwavo handle ka vaapostola va hangalakile va ya emigangeni hinkwayo ya Yudiya na Samariya.+ 2 Kambe vavanuna lava chavaka Xikwembu va rhwale Stefano va ya n’wi lahla, kutani va n’wi rila swinene. 3 Kambe, Sawulo a sungula ku hlasela vandlha hi tihanyi. A nghena hi yindlu ni yindlu, a kokela vavanuna ni vavasati ehandle, a va yisa ekhotsweni.+
4 Hambiswiritano, lava a va hangalakile va famba etikweni hinkwaro va chumayela mahungu lamanene ya rito ra Xikwembu.+ 5 Kutani Filipi a ya emutini wa Samariya+ a sungula ku va chumayela hi Kreste. 6 Mitshungu yi yingiserisisa leswi Filipi a a swi vula hi mbilu yin’we yi tlhela yi vona masingita lawa a a ma endla. 7 Hikuva vo tala a va ri ni mimoya leyi nga basangiki naswona a yi huwelela hi rito lerikulu kutani yi huma.+ Ku tlula kwalaho, vo tala lava a va lamarile ni lava khwitaka a va hanyisiwa. 8 Hiloko ku va ni ntsako lowukulu emutini wolowo.
9 Kutani emutini wolowo a ku ri ni wanuna loyi a a vuriwa Simoni, loyi a a endla masalamusi ni ku hlamarisa tiko ra Samariya, a vula leswaku yena i munhu wo hlawuleka swinene. 10 Hinkwavo ka vona, ku sukela eka lontsongo ku ya eka lonkulu, a va n’wi yingisa va tlhela va ku: “Wanuna loyi i Matimba ya Xikwembu, lama vuriwaka Lamakulu.” 11 Hikwalaho a va n’wi yingisa hikuva a a va hlamarise ku ringana nkarhi wo lehanyana hi masalamusi yakwe. 12 Kambe loko va kholwe Filipi, loyi a a chumayela mahungu lamanene ya Mfumo wa Xikwembu+ ni ya vito ra Yesu Kreste, vavanuna ni vavasati a va khuvuriwa.+ 13 Simoni na yena u ve mupfumeri naswona endzhaku ko khuvuriwa, u ye emahlweni na Filipi;+ naswona u hlamarile loko a vona masingita ni mitirho leyikulu ya matimba yi endleka.
14 Loko vaapostola eYerusalema va twa leswaku vanhu va le Samariya va amukele rito ra Xikwembu,+ va rhuma Petro na Yohane eka vona; 15 hiloko va ya va fika va va khongelela leswaku va kuma moya lowo kwetsima.+ 16 Hikuva a wu nga si ta ni le henhla ka un’we wa vona, kambe a va lo khuvuriwa hi vito ra Hosi Yesu ntsena.+ 17 Hiloko va va tlhandleka mavoko+ kutani va sungula ku kuma moya lowo kwetsima.
18 Loko Simoni a vona leswaku moya a wu kumiwa hi ku tlhandlekiwa mavoko hi vaapostola, a va tshembisa mali, 19 a ku: “Na mina ndzi nyikeni matimba lawa, leswaku un’wana ni un’wana loyi ndzi n’wi tlhandlekaka mavoko a kuma moya lowo kwetsima.” 20 Kambe Petro a ku eka yena: “Silivhere ya wena a yi love na wena, hikuva u ehleketa leswaku u nga kuma nyiko ya mahala ya Xikwembu hi mali.+ 21 A wu nge kumi nchumu naswona a wu ngheni helo emhakeni leyi hikuva mbilu ya wena yi hume ndleleni emahlweni ka Xikwembu. 22 Kutani hundzuka eka tindlela ta wena to biha, u kombela Yehovha* u tlhela u cinca mianakanyo ya wena yo biha leswaku loko swi koteka a ta ku rivalela; 23 hikuva ndza swi vona leswaku u chefu leyi nga ni khombo ni hlonga ra leswi nga lulamangiki.” 24 Simoni a va hlamula a ku: “Ndzi kombeleleni eka Yehovha* leswaku leswi mi swi vuleke swi nga ndzi endlekeli.”
25 Hikwalaho, loko va nyikele vumbhoni hi vukheta eka vanhu hinkwavo ni ku vulavula hi rito ra Yehovha,* va tlhelela eYerusalema, va famba va ri karhi va chumayela mahungu lamanene eswimitanini swo tala swa Vasamariya.+
26 Hambiswiritano, ntsumi+ ya Yehovha* yi vulavula na Filipi, yi ku: “Suka u yima u kongoma edzongeni hi ndlela leyi sukaka eYerusalema yi ya eGaza.” (Leyi i ndlela leyi nga emananga.) 27 Hiloko a famba kutani a vona mutsheniwa* wa Muetiyopiya, ku nga wanuna loyi a a ri ni xikhundlha lexi tlakukeke emfun’weni wa Kandake hosi ya xisati ya Vaetiyopiya naswona a a langutela xuma xa yena hinkwaxo. A a ye eYerusalema a ya gandzela+ 28 naswona a a ri endleleni yo muka, a a tshame ekalichini yakwe a ri karhi a yi hlayela ehenhla buku ya muprofeta Esaya. 29 Hiloko moya wu byela Filipi wu ku: “Tshinelela kalichi leyi.” 30 Filipi a tsutsuma etlhelo ka yona kutani a twa mutsheniwa a ri karhi a yi hlayela ehenhla buku ya muprofeta Esaya, kutani a n’wi vutisa a ku: “Xana wa swi twisisa leswi u swi hlayaka?” 31 A hlamula a ku: “Ndzi nga swi twisisa njhani handle ka loko un’wana o ndzi kongomisa?” Hiloko a kombela Filipi leswaku a khandziya a tshama na yena. 32 Xiphemu xa Tsalwa lexi a a xi hlaya hi lexi nge: “U tisiwe ku fana ni nyimpfu leyi yaka eku tlhaviweni, leyi nga riliki loko yi tsemetiwa voya, a nga vulanga nchumu.+ 33 U avanyisiwe hi ndlela yo biha loko a ri karhi a khomisiwa tingana.+ I mani loyi a nga ta rungula vuxokoxoko bya matimu yakwe? Hikuva vutomi byakwe bya susiwa emisaveni.”+
34 Mutsheniwa a vutisa Filipi a ku: “Ndzi kombela u ndzi hlamusela, xana muprofeta u vulavula hi mani? Xana u vulavula hi yena n’wini kumbe hi munhu un’wana?” 35 Filipi a sungula ku hlamusela, a sungula hi tsalwa leri a n’wi byela mahungu lamanene hi Yesu. 36 Loko va ha famba, va fika laha a ku ri ni mati, kutani mutsheniwa a ku: “Languta! Hi lawa mati; i yini lexi ndzi sivelaka ku khuvuriwa?” 37 *—— 38 Hiloko mutsheniwa a lerisa leswaku kalichi yi yima, havambirhi va ya ematini, kutani Filipi a n’wi khuvula. 39 Loko va huma ematini, moya wa Yehovha* wu hatla wu fambisa Filipi naswona mutsheniwa a nga ha n’wi vonanga, kambe u tifambele a tsakile. 40 Hambiswiritano, Filipi u tikume a ri eAxidodo, naswona u fambe etikweni rero a ri karhi a chumayela mahungu lamanene emitini hinkwayo kukondza a ya fika eKhezariya.+