Vakorinto Wo Sungula

9 Xana a ndzi tshunxekanga? Xana a ndzi muapostola? Xana a ndzi n’wi vonanga Yesu Hosi ya hina?+ Xana n’wina a mi vuyelo bya ntirho wa mina eHosini? 2 Hambiloko ndzi nga ri muapostola eka van’wana, ndzi yena eka n’wina! Hikuva mi xikombiso xa leswaku ndzi muapostola eHosini.

3 Lava ndzi solaka ndzi va hlamula hi ndlela leyi: 4 Xana a hi na mfanelo yo dya ni ku nwa? 5 Xana a hi na mfanelo yo fambafamba ni nsati loyi a nga Mukreste,*+ hilaha vaapostola lavan’wana hinkwavo ni vamakwavo va Hosi+ na Khefasi*+ va endlaka hakona? 6 Kumbe, xana hi mina na Barnaba+ ntsena lava hi faneleke ku tirha leswaku hi tihanyisa? 7 Xana ri kona socha leri tihakelelaka loko ri ri evusocheni? I mani loyi a rimaka nsimu ya madiriva kambe a nga dyi mihandzu ya yona?+ Kumbe, i mani loyi a risaka ntlhambi kambe a nga nwi ntswamba wa ntlhambi wa kona?

8 Xana ndzi vulavula swilo leswi hi ku ya hi mavonelo ya vanhu? Kumbe, xana Nawu a wu swi vuli swilo leswi? 9 Hikuva eNawini wa Muxe ku tsariwe leswi: “U nga tshuki u pfala nomu wa nkuzi loko yi ri karhi yi hula mavele.”+ Xana Xikwembu xi karhateka hi tinkuzi? 10 Kumbe, xana xi vula sweswo hikwalaho ka hina? Kunene swi tsariwe hikwalaho ka hina, hikuva munhu loyi a rimaka ni munhu loyi a hulaka va fanele ku tirha va ri ni ntshembo wo kuma mavele.

11 Loko hi byale swilo leswi humaka eka Xikwembu eka n’wina, xana swi hoxile ku amukela swo karhi eka n’wina?+ 12 Loko van’wana va ri ni mfanelo ya leswaku mi va wundla, xana hina a hi na mfanelo yo tlula ya vona? Nilokoswiritano, a hi yi tirhisanga mfanelo+ leyi kambe hi tiyisela swilo hinkwaswo, leswaku hi nga siveli mahungu lamanene hi ta Kreste hi ndlela yo karhi.+ 13 Xana a mi swi tivi leswaku vanhu lava endlaka mitirho yo kwetsima va dya swilo leswi humaka etempeleni, ni leswaku lava tirhaka ealtarini nkarhi ni nkarhi va kuma swin’wana swa swilo leswi nyikeriweke ealtarini?+ 14 Hi ndlela yoleyo, Hosi yi lerise lava chumayelaka mahungu lamanene leswaku va kuma swo tihanyisa ha swona eka wona.+

15 Hambiswiritano, mina a ndzi kombelanga nchumu eka n’wina.+ Kahlekahle, a ndzi tsalanga swilo leswi leswaku ndzi endleriwa swona, hikuva a swi ta antswa leswaku ndzi fa ku ri ni ku va ndzi tekeriwa mfanelo ya mina ya ku tibuma!+ 16 Kutani loko ndzi chumayela mahungu lamanene a ndzi na xivangelo xo tibuma, hikuva ndzi boheka ku ma chumayela. Kunene ndzi le khombyeni loko ndzi nga ma chumayeli mahungu lamanene!+ 17 Loko leswi ndzi swi endla hi ku swi rhandza, ndzi ta kuma hakelo; kambe niloko ndzi swi endla ku nga ri hi ku swi rhandza, ndza ha nyikiwe vutihlamuleri.+ 18 Kutani hakelo ya mina i yini? Hileswaku loko ndzi chumayela mahungu lamanene, ndzi chumayela mahungu lamanene ndzi nga lavi ku hakeriwa, leswaku ndzi nga yi tirhisi hi ndlela yo biha mfanelo ya mina yo va muchumayeri wa mahungu lamanene.

19 Hambileswi ndzi tshunxekeke eka vanhu hinkwavo, ndzi tiendle hlonga ra hinkwavo leswaku ndzi ta koka vanhu vo tala swinene hilaha swi nga kotekaka hakona. 20 Eka Vayuda ndzi tiendle Muyuda leswaku ndzi ta koka Vayuda;+ eka lava nga ehansi ka nawu ndzi tiendle loyi a nga ehansi ka nawu, hambileswi mina ndzi nga riki ehansi ka nawu, leswaku ndzi ta koka lava nga ehansi ka nawu.+ 21 Eka lava nga riki na nawu ndzi tiendle la nga riki na nawu, hambileswi mina ndzi nga riki ehandle ka nawu wa Xikwembu, kambe ndzi nga ehansi ka nawu wa Kreste,+ leswaku ndzi ta koka lava nga riki na nawu. 22 Eka lava tsaneke ndzi ve loyi a tsaneke, leswaku ndzi ta koka lava tsaneke.+ Ndzi ve swilo hinkwaswo eka vanhu va mixaka hinkwayo, leswaku ku va ni lava ndzi va ponisaka hi tindlela hinkwato. 23 Kambe swilo hinkwaswo ndzi swi endla hikwalaho ka mahungu lamanene, leswaku ndzi ma byela van’wana.+

24 Xana a mi swi tivi leswaku lava tsutsumaka emphikizanweni va tsutsuma hinkwavo, kambe i un’we ntsena loyi a kumaka hakelo? Tsutsumani hi ndlela leyi nga ta endla leswaku mi yi kuma.+ 25 Kutani un’wana ni un’wana loyi a nghenelaka mphikizano wa tikhoma eka swilo hinkwaswo. Va swi endlela ku kuma harhi leyi onhakaka,+ kambe hina hi swi endlela ku kuma harhi leyi nga onhakiki.+ 26 Hikwalaho, ndzi tsutsuma ndzi ri ni xikongomelo;+ swibakela swa mina ndzi swi kongomisa hi ndlela leyi nga ta endla leswaku ndzi nga bi moya; 27 kambe ndzi ba miri wa mina,+ ndzi wu endla hlonga, leswaku loko ndzi chumayela van’wana, ndzi nga vi loyi a nga amukelekiki hi ndlela yo karhi.