Mitirho
24 Endzhaku ka masiku ya ntlhanu muprista lonkulu Ananiya+ a ta ni vakulukumba van’wana ni gqweta leri a va ku i Tertulo, kutani va fika va andlala mhaka leyi va hehlaka Pawulo ha yona eka ndhunankulu.+ 2 Loko a byeriwe leswaku a vulavula, Tertulo a sungula ku hehla Pawulo a ku:
“Ha ku khensa leswi hi tshameke hi ku rhula hikuva u fuma hi ndlela leyinene naswona tiko leri ri ya ri hluvuka hikwalaho ka vutlhari bya wena, 3 hi tshama hi ri karhi hi ku tsundzuka hinkwako laha hi nga kona, wena Muchaviseki Felikisi naswona ha ku khensa swinene. 4 Kambe leswaku ndzi nga ku dyeli nkarhi ndzi kombela u hi lehisela mbilu hi ku hlamusela mhaka leyi hi nga na yona. 5 Hikuva hi kume leswaku wanuna loyi i ntungu,+ u vanga hasahasa+ a tlhela a kucetela Vayuda hinkwavo emisaveni hinkwayo ku pfukela mfumo, naswona i murhangeri wa ntlawa wa Vanazareta.+ 6 U tlhele a ringeta ku thyakisa tempele hiloko hi n’wi khoma.+ 7* —— 8 Loko wo n’wi konanisa u ta swi kuma swilo hinkwaswo leswi hi n’wi hehlaka ha swona.”
9 Hiloko Vayuda na vona va nghenelela va seketela mhaka leyi va vula leswaku swilo sweswo i ntiyiso. 10 Loko ndhunankulu yi kowete Pawulo hi nhloko leswaku a vulavula, u te:
“Hi ku tiva leswaku se u ni malembe yo tala u ri muavanyisi etikweni leri, swa ndzi olovela ku tihlamulela emahlweni ka wena.+ 11 Hilaha u nga swi kumisisaka hakona hi wexe, a ku si hundza masiku ya 12 ndzi ye eYerusalema ndzi ya gandzela kona;+ 12 naswona a va ndzi kumanga ndzi ri eku holoveni na munhu etempeleni kumbe ku hlohlotela vanhu leswaku va endla hasahasa emasinagogeni kumbe emutini hinkwawo. 13 Nakambe a va nge swi koti ku ku komba vumbhoni bya swilo leswi va ndzi hehlaka ha swona. 14 Kambe ndza pfumela eka wena leswaku vanhu lava va ndzi hehla hi leswaku ndlela leyi ndzi gandzelaka Xikwembu xa vakokwa wa mina+ ha yona yi hambukile hileswi ndzi tshembaka swilo hinkwaswo leswi vuriwaka hi Nawu ni leswi tsariweke hi Vaprofeta.+ 15 Naswona ndzi ni ntshembo eka Xikwembu, ntshembo lowu vanhu lava na vona va nga na wona wa leswaku ku ta va ni ku pfuxiwa+ ka lava lulameke ni ka lava nga lulamangiki.+ 16 Hikwalaho ka leswi ndzi tshama ndzi ri karhi ndzi tikarhatela ku va ni ripfalo leri baseke eka Xikwembu ni le ka vanhu.+ 17 Kutani endzhaku ka malembe yo hlaya swinene, ndzi fikile ndzi tisa tinyiko+ etikweni ra ka hina ni ku ta endla magandzelo. 18 Loko ndza ha khathalela timhaka leti va ndzi kume ndzi tibasisile hi ku ya hi mukhuva wa kona etempeleni,+ a ndzi nga ri na ntshungu naswona a ndzi nga vangi hasahasa. Kambe a ku ri ni Vayuda van’wana lava humaka eAsiya 19 lava faneleke ku va kona emahlweni ka wena leswaku va ta ndzi hehla loko hakunene va ri na xo ndzi hehla ha xona.+ 20 Kumbe, pfumelela vavanuna lava nga laha va vula xihoxo lexi va xi kumeke eka mina loko ndzi yime emahlweni ka Sanedri, 21 handle ka marito lawa ndzi ma vuleke loko ndzi yime exikarhi ka vona lama nge: ‘Namuntlha ndza avanyisiwa emahlweni ka n’wina hikwalaho ka leswi ndzi tshembaka leswaku vafi va ta pfuxiwa!’”+
22 Hambiswiritano, leswi Felikisi a ti tiva kahle timhaka leti khumbaka Ndlela+ leyi u yimise mhaka yoleyo kwalaho a ku: “Ndzi ta endla xiboho etimhakeni leti ta n’wina loko Lisiya ndhuna ya nyimpi a ta haleno.” 23 Hiloko a lerisa ndhuna ya masocha leswaku Pawulo a pfaleriwa kambe a nyikiwa ntshunxeko wo karhi ni leswaku vanghana vakwe va pfumeleriwa ku n’wi pfuna.
24 Endzhaku ka masikunyana Felikisi a ta ni nsati wakwe Drusila, loyi a a ri Muyuda, hiloko a vitana Pawulo kutani a n’wi yingisela loko a ri karhi a n’wi hlamusela hi ta ku pfumela eka Kreste Yesu.+ 25 Kambe loko Pawulo a vulavula hi ta vululami, ku tikhoma ni vuavanyisi lebyi nga ta ta,+ Felikisi a sungula ku chava kutani a ku: “Pfana u fambilenyana ndzi ta tlhela ndzi ku vitana loko ndzi kuma nkarhi.” 26 Hi nkarhi lowu fanaka a a ehleketa leswaku Pawulo u ta n’wi nyika mali. Hikwalaho, a a tshamela ku n’wi vitana a bula na yena. 27 Kambe loko ku hundze malembe mambirhi, Felikisi u tlhandlamiwe hi Porkiyo Festo; naswona leswi Felikisi a a lava ku rhandziwa hi Vayuda,+ a nga n’wi tshunxanga Pawulo ekhotsweni.