Yeremiya

36 Hi lembe ra vumune ra ku fuma ka Yoyakimi+ n’wana wa Yosiya hosi ya le Yuda, ku fike rito leri eka Yeremiya ri huma eka Yehovha ri ku: 2 “Teka buku* u tsala eka yona marito hinkwawo lawa ndzi ku byeleke wona mayelana ni ku avanyisiwa ka Israyele na Yuda+ ni matiko hinkwawo,+ ku sukela hi siku ro sungula leri ndzi vulavuleke na wena emasikwini ya Yosiya ku ta fikela namuntlha.+ 3 Kumbexana loko vanhu va yindlu ya Yuda va twa hi khombo leri ndzi tiyimiseleke ku va tisela rona, va nga ha tshika tindlela ta vona to homboloka leswaku ndzi ta va rivalela xihoxo xa vona ni xidyoho xa vona.”+

4 Kutani Yeremiya a vitana Baruku+ n’wana wa Neriya, a n’wi byela marito hinkwawo lawa Yehovha a n’wi byeleke wona, kutani Baruku a ma tsala ebukwini leyi songiwaka.+ 5 Hiloko Yeremiya a lerisa Baruku a ku: “Ndzi pfaleriwile, a ndzi swi koti ku nghena endlwini ya Yehovha. 6 Kutani hi wena u faneleke u nghena u ma hlayela ehenhla marito ya Yehovha lawa ndzi ku byeleke wona lama nga ebukwini leyi u yi tsaleke. Ma hlaye ma twiwa hi vanhu lava nga endlwini ya Yehovha hi siku ra ku titsona swakudya; hikwalaho u ta ma hlayela vanhu hinkwavo va Yuda lava humaka emitini ya vona. 7 Kumbexana Yehovha u ta twa xikombelo xa vona xo kombela ku kombiwa tintswalo kutani un’wana ni un’wana a tshika tindlela takwe to homboloka, hikuva Yehovha u vule leswaku u va hlundzukele ngopfu vanhu lava.”

8 Hiloko Baruku n’wana wa Neriya a endla hinkwaswo leswi muprofeta Yeremiya a n’wi leriseke swona; a ma hlayela ehenhla marito ya Yehovha lawa a ma ri ebukwini a ri endlwini ya Yehovha.+

9 Hi lembe ra vuntlhanu ra ku fuma ka Yoyakimi+ n’wana wa Yosiya hosi ya le Yuda, hi n’hweti ya vukaye, vanhu hinkwavo eYerusalema ni vanhu hinkwavo lava teke eYerusalema va huma emitini ya le Yuda va sungule ku titsona swakudya emahlweni ka Yehovha.+ 10 Hiloko Baruku a ma hlayela ehenhla marito ya Yeremiya lawa a ma ri ebukwini a ri endlwini ya Yehovha, a ri karhi a twiwa hi vanhu hinkwavo, ekamareni ro dyela eka rona ra Gemariya+ n’wana wa Xafani+ matsalana, exivaveni* xa le henhla, enyangweni ya gede leyintshwa ya yindlu ya Yehovha.+

11 Loko Mikaya n’wana wa Gemariya n’wana wa Xafani a twa marito hinkwawo ya Yehovha lawa a ma ri ebukwini, 12 a ya endlwini ya hosi ekamareni ra matsalana. Tihosana* hinkwato a ti tshame kwalaho: Elixama+ matsalana, Delaya n’wana wa Xemaya, Elinathani+ n’wana wa Akibora,+ Gemariya n’wana wa Xafani, Sedekiyasi n’wana wa Hananiya ni tihosana letin’wana hinkwato. 13 Mikaya a va byela marito hinkwawo lawa a ma tweke loko Baruku a hlaya ebukwini, a ri karhi a twiwa hi vanhu.

14 Kutani tihosana hinkwato ti rhuma Yehudi n’wana wa Nethaniya n’wana wa Xelemiya n’wana wa Khuxi leswaku a ya eka Baruku, ti ku: “Tana ni buku leyi u yi hlayeke u ri karhi u twiwa hi vanhu.” Hiloko Baruku n’wana wa Neriya a teka buku a ya eka tona. 15 Ti n’wi byela ti ku: “Hi kombela u tshama ehansi, u yi hlayela ehenhla hi ri karhi hi ku twa.” Hiloko Baruku a yi hlayela ehenhla ti ri karhi ti swi twa.

16 Loko ti heta ku twa marito wolawo hinkwawo, ti langutana hi ku chava kutani ti byela Baruku ti ku: “Hi fanele hi byela hosi marito lawa hinkwawo.” 17 Hiloko ti vutisa Baruku ti ku: “Hi kombela u hi byela ndlela leyi u ma tsaleke ha yona marito lawa hinkwawo. Xana u lo ku byela wona?” 18 Baruku a ti hlamula a ku: “U ndzi byele marito lawa hinkwawo kutani mina ndzi ma tsala ehansi hi inki ebukwini leyi songiwaka.” 19 Tihosana ti byela Baruku ti ku: “Famba u ya tumbela wena na Yeremiya naswona mi nga byeli munhu leswaku mi tumbele kwihi.”+

20 Kutani ti fika ti nghena eka hosi exivaveni, ti veka buku ekamareni ra Elixama lowa matsalana, kutani ti byela hosi swilo hinkwaswo leswi ti swi tweke.

21 Hiloko hosi yi rhuma Yehudi+ leswaku a ya teka buku ekamareni ra matsalana Elixama a vuya na yona. Yehudi a sungula ku yi hlaya a ri karhi a twiwa hi hosi ni hi tihosana hinkwato leti yimeke ekusuhi na yona. 22 Hosi a yi tshame endlwini ya vuxika hi n’hweti ya vukaye,* emahlweni ka yona a ku ri ni ndhawu leyi a ku tshiveriwa ndzilo leswaku yi tikufumeta. 23 Loko Yehudi a hlaye swiphemu swinharhu kumbe swa mune, hosi yi handzula xiphemu xexo hi mukwana wa matsalana yi xi hoxa endzilweni lowu a wu pfurha endhawini leyi a ku tshiveriwe ndzilo eka yona, kukondza buku leyi songiwaka yi helela endzilweni. 24 A va chavanga; hambi ku ri hosi kumbe malandza ya yona hinkwawo lama tweke marito lawa hinkwawo a va swi handzulanga swiambalo swa vona hi le xikarhi. 25 Hambileswi Elinathani,+ Delaya+ na Gemariya+ va kombeleke hosi leswaku yi nga yi hisi buku, a yi va yingisanga. 26 Ku tlula kwalaho, hosi yi lerise Yeramiyele n’wana wa hosi, Seraya n’wana wa Aziriyele na Xelemiya n’wana wa Abideli leswaku va ya khoma Baruku lowa matsalana na muprofeta Yeremiya, kambe Yehovha u va tumbetile.+

27 Kutani Yehovha a tlhela a vulavula na Yeremiya endzhaku ka loko hosi yi hise buku leyi nga ni marito lawa Baruku a ma tsaleke a byeriwa hi Yeremiya,+ a ku: 28 “Teka buku yin’wana u tsala marito hinkwawo lawa a ma ri eka buku yo sungula leyi hisiweke hi Hosi Yoyakimi wa le Yuda.+ 29 U fanele u byela Hosi Yoyakimi wa le Yuda u ku, ‘Yehovha u ri: “U hise buku leyi u ku, ‘Hikwalaho ka yini u tsale u ku: “Hosi ya le Babilona yi ta ta kutani yi lovisa tiko leri yi ri siya ri nga ha ri na munhu kumbe xiharhi”?’+ 30 Hikwalaho Yehovha u vula leswi hi Hosi Yoyakimi wa le Yuda, ‘A nge vi na munhu loyi a nga ta tshama exiluvelweni xa Davhida+ naswona ntsumbu wa yena wu ta hisiwa hi dyambu ninhlikanhi wu biwa hi xirhami nivusiku.+ 31 Ndzi ta n’wi xupula yena ni vatukulu va yena ni malandza yakwe hikwalaho ka xihoxo xa vona naswona vona ni vaaki va Yerusalema ni vanhu va le Yuda ndzi ta va tisela khombo leri ndzi vuleke leswaku ndzi ta va tisela rona,+ kambe a va yingisanga.’”’”+

32 Kutani Yeremiya a teka buku yin’wana a yi nyika Baruku n’wana wa Neriya, lowa matsalana,+ kutani a tsala eka yona leswi Yeremiya a n’wi byeleke swona, ku nga marito hinkwawo lawa a ma ri ebukwini leyi Hosi Yoyakimi wa le Yuda a yi hiseke hi ndzilo.+ Ku engeteriwe marito man’wana yo tala yo fana na wona.