Tihosi Ta Vumbirhi
23 Hiloko hosi yi rhumela rito leswaku ku ya vitaniwa vakulukumba hinkwavo va le Yuda ni va le Yerusalema.+ 2 Endzhaku ka sweswo, hosi yi ya endlwini ya Yehovha ni vavanuna hinkwavo va le Yuda, vaakatiko hinkwavo va le Yerusalema, vaprista ni vaprofeta, vanhu hinkwavo, ku sukela eka lontsongo ku ya eka lonkulu. Yi hlayela vanhu marito hinkwawo ya buku+ ya ntwanano+ leyi kumiweke endlwini ya Yehovha.+ 3 Hosi yi yima ekusuhi ni phuphu yi endla ntwanano emahlweni ka Yehovha+ leswaku yi ta tirhela Yehovha yi tlhela yi hlayisa swileriso swakwe, switsundzuxo swakwe ni milawu yakwe hi mbilu hinkwayo ni hi vutomi bya yona hinkwabyo hi ku landzela marito ya ntwanano lowu, lama tsariweke ebukwini leyi. Hiloko vanhu hinkwavo va pfumelelana ni ntwanano lowu.+
4 Kutani hosi yi lerisa muprista lonkulu Hilkiya,+ vaprista van’wana ni valanguteri va nyangwa, leswaku va humesa swilo hinkwaswo leswi a swi ri etempeleni ya Yehovha, leswi a swi endleriwe Bali, swa mhandzi ya Axera*+ ni swa vuthu hinkwaro ra le tilweni. Kutani hosi yi swi hisa ehandle ka muti wa Yerusalema, emasin’wini ya Kedroni yi yisa nkuma wa swona eBethele.+ 5 Yi hlongole vaprista va swikwembu swa mavunwa, lava a va hlawuriwe hi tihosi ta Yuda leswaku va endla magandzelo etindhawini leti tlakukeke emitini ya Yuda ni le tindhawini leti nga ekusuhi na Yerusalema ku katsa ni lava a va endlela Bali magandzelo, va tlhela va gandzela dyambu, n’weti, tinyeleti ni vuthu hinkwaro ra le tilweni.+ 6 Yi humesa mhandzi ya Axera*+ endlwini ya Yehovha yi yi yisa ehandle ka muti wa Yerusalema, eNkoveni wa Kedroni kutani yi yi hisela+ kwalaho, yi tlhela yi yi sila yi va mapa ivi yi haxa mapa ya yona ehenhla ka masirha ya vanhu lava nga riki tihosi.+ 7 Yi tlhele yi mbundzumuxa tiyindlu ta tinghwavava ta xinuna+ ta le tempeleni, leti a ti ri endlwini ya Yehovha ni ndhawu leyi vavasati a va lukela matende lawa a ma tirhiseriwa ku gandzela mhandzi ya Axera.*
8 Hiloko yi vitana vaprista hinkwavo emitini ya Yuda, kutani yi onha tindhawu leti tlakukeke laha vaprista a va endla magandzelo kona, ku suka eGeba+ ku ya fika eBera-xeba.+ Yi tlhela yi mbundzumuxa tindhawu leti tlakukeke leti a ti ri egedeni ya Yoxuwa ndhuna ya muti, leti a ti ri eximatsini loko munhu a nghena emutini. 9 Vaprista lava a va gandzela etindhawini leti tlakukeke a va nga gandzeli ealtarini ya Yehovha eYerusalema,+ kambe a va swi dya swinkwa leswi nga riki na comela ni vamakwavo. 10 Yi tlhele yi sivela vanhu ku endla magandzelo eTofete+ leyi nga eNkoveni wa Vana va Hinomu,*+ leswaku ku nga vi na munhu loyi a hisaka n’wana wakwe wa jaha kumbe wa nhwanyana hi ndzilo a endlela Moleke+ magandzelo. 11 Nakambe, yi sivele tihanci leti tihosi ta Yuda ti nyikeleke ha tona leswaku ti tirhisiwa eka vugandzeri bya dyambu leswaku ti nga ngheni endlwini ya Yehovha hi le kamareni* ra Natani-meleke loyi a a tirha ehubyeni, leri a ri ri erikupakupeni;* naswona yi hise makalichi ya vugandzeri bya dyambu.+ 12 Hosi yi tlhele yi mbundzumuxa tialtari leti tihosi ta Yuda a ti ti ake ehenhla ka lwangu+ ra kamara ra le henhla ra Akazi, ku katsa ni tialtari leti akiweke hi Manase eswivaveni swimbirhi swa yindlu ya Yehovha.+ Hiloko yi ti mbundzumuxa yi haxa mapa ya tona eNkoveni wa Kedroni. 13 Kutani hosi yi onha tindhawu leti tlakukeke, leti a ti ri emahlweni ka Yerusalema, edzongeni* wa Ntshava ya Ndzoviso,* leti Solomoni hosi ya Israyele a ti akeleke Axitoreti, ku nga xikwembukati lexi nyenyetsaka xa Vasidoni; na Kemoxi xikwembu lexi nyenyetsaka xa Vamowabu; na Milikomo+ xikwembu lexi nyenyetsaka xa Vaamoni.+ 14 Yi wise tiphuphu leti va ti hundzuleke swikwembu ni timhandzi ta Axera*+ ivi yi tata tindhawu toleto hi marhambu ya vanhu. 15 Yi tlhele yi mbundzumuxa altari leyi a yi ri eBethele, ndhawu leyi tlakukeke leyi Yerobuwamu n’wana wa Nebati a yi endleke leswaku a dyohisa Vaisrayele.+ Endzhaku ka loko yi mbundzumuxe altari yoleyo ni ndhawu leyi tlakukeke, yi hise ndhawu leyi tlakukeke, yi yi sila yi va mapa yi tlhela yi hisa mhandzi ya Axera.*+
16 Loko Yosiya a hundzuluka kutani a vona masirha lawa a ma ri entshaveni, u lerise leswaku ku tekiwa marhambu lama nga emasirheni ma hisiwa ealtarini, leswaku ku nga ha gandzeriwi eka yona, hilaha Yehovha a vuleke hakona hi ku tirhisa nandza wa Xikwembu xa ntiyiso, loyi a profeteke leswaku swilo leswi swi ta endleka.+ 17 Kutani a ku: “Xana ribye ra sirha leri ndzi ri vonaka lahaya i ra yini?” Hiloko vavanuna va muti va ku: “I sirha ra nandza wa Xikwembu xa ntiyiso loyi a a huma eYuda+ loyi a profeteke leswi u swi endleke eka altari ya le Bethele.” 18 Kutani a ku: “N’wi tshikeni a wisa. Ku nga vi na loyi a khumbaka marhambu yakwe.” A va ma khumbanga marhambu yakwe ni ya muprofeta loyi a a huma eSamariya.+
19 Yosiya u tlhele a hirimuxa tiyindlu hinkwato to gandzela eka tona leti a ti ri etindhawini leti tlakukeke emitini ya Samariya,+ leti tihosi ta Israyele ti ti akeke leswaku ti hlundzukisa Xikwembu naswona u endle leswi fanaka ni leswi a swi endleke endhawini leyi tlakukeke eBethele.+ 20 Hiloko a endla gandzelo etialtarini hi vaprista hinkwavo lava a va gandzela etindhawini leti tlakukeke lava a va ri kwalaho, a tlhela a hisa marhambu ya vanhu eka tona.+ Endzhaku ka sweswo, a tlhelela eYerusalema.
21 Kutani hosi yi lerisa vanhu hinkwavo yi ku: “Endlelani Yehovha Xikwembu xa n’wina Paseka,+ hilaha swi tsariweke hakona ebukwini leyi ya ntwanano.”+ 22 A ku si tshama ku endliwa Paseka yo fana ni leyi ku sukela enkarhini wa vaavanyisi lava a va avanyisa Israyele, kumbe emasikwini hinkwawo ya tihosi ta Israyele ni tihosi ta Yuda.+ 23 Kambe hi lembe ra vu-18 ra ku fuma ka Hosi Yosiya, Paseka leyi, leyi endleriweke Yehovha yi tlangeriwe eYerusalema.
24 Nakambe Yosiya u suse vangoma, vavhumbhi,+ swifaniso swa terafimi,*+ swikwembu swa mavunwa leswi nyenyetsaka* ni swilo hinkwaswo leswi nyangatsaka leswi a swi ri etikweni ra Yuda ni le Yerusalema, leswaku a endla marito ya Nawu+ lawa a ma tsariwe ebukwini leyi muprista Hilkiya a yi kumeke endlwini ya Yehovha.+ 25 A yi vanga kona hosi leyi faneke na yena loko a nga si va hosi, leyi tirheleke Yehovha hi mbilu ya yona hinkwayo ni hi vutomi+ bya yona hinkwabyo ni hi matimba ya yona hinkwawo, hi ku landza Nawu hinkwawo wa Muxe; naswona a yi vanga kona hosi leyi faneke na yena endzhaku ka yena.
26 Nilokoswiritano, Yehovha a nga tshikanga ku hlundzukela Yuda hikwalaho ka swilo hinkwaswo leswi khunguvanyisaka leswi Manase a swi endleke leswaku a N’wi hlundzukisa.+ 27 Yehovha a ku: “Yuda na yena ndzi ta n’wi susa emahlweni ka mina,+ hilaha ndzi suseke Israyele hakona;+ naswona ndzi ta fularhela muti lowu, lowu ndzi wu hlawuleke, Yerusalema, ni yindlu leyi ndzi vuleke ndzi ku, ‘Vito ra mina ri ta tshama kona.’”+
28 Loko ku ri matimu ya Yosiya hinkwawo, hinkwaswo leswi a swi endleke, xana a swi tsariwanga ebukwini ya matimu ya tihosi ta Yuda? 29 Emasikwini yakwe, Faro Neko hosi ya Egipta u ye eNambyeni wa Yufrata ku ya hlangana ni hosi ya Asiriya, ivi Hosi Yosiya a huma a ya lwa na yena; kambe loko Neko a n’wi vona a n’wi dlaya eMegido.+ 30 Kutani malandza yakwe ma tisa ntsumbu wakwe eYerusalema hi kalichi ku suka eMegido, ma n’wi lahla esirheni rakwe. Hiloko vanhu va tiko va teka Yowohazi n’wana wa Yosiya va n’wi veka ku va hosi a siva tata wakwe.+
31 Yowohazi+ a a ri ni malembe ya 23 loko a va hosi naswona u fume tin’hweti tinharhu eYerusalema. Vito ra mana wakwe a ku ri Hamutala+ n’wana wa Yeremiya wa le Libna. 32 U sungule ku endla swo biha emahlweni ka Yehovha, hi ku landza hinkwaswo leswi vakokwa wakwe va swi endleke.+ 33 Faro Neko+ a n’wi pfalela eRibla,+ etikweni ra Hamati leswaku a nga fumi eYerusalema, hiloko a sindzisa tiko leswaku ri hakela titalenta* ta silivhere ta 100 ni talenta ya nsuku.+ 34 Ku tlula kwalaho, Faro Neko a endla Eliyakimi n’wana wa Yosiya hosi a siva Yosiya tata wakwe kutani a cinca vito rakwe ri va Yoyakimi; kambe a teka Yowohazi a n’wi yisa eEgipta,+ laha a heteleleke a fele kona.+ 35 Yoyakimi u nyike Faro silivhere ni nsuku, kambe u boheke ku hakerisa tiko xibalo xa silivhere leswaku a ta hakela Faro. U byele vanhu hinkwavo va tiko ku humesa silivhere ni nsuku leswaku swi ta nyikiwa Faro Neko.
36 Yoyakimi+ a a ri ni malembe ya 25 loko a va hosi naswona u fume malembe ya 11 eYerusalema.+ Vito ra mana wakwe a ku ri Zebida n’wana wa Pedaya loyi a a tshama eRhuma. 37 U ye emahlweni a endla swo biha emahlweni ka Yehovha,+ hi ku landza hinkwaswo leswi vakokwa wakwe va swi endleke.+