Yeremiya
31 “Hi nkarhi wolowo,” ku vula Yehovha, “ndzi ta va Xikwembu eka mindyangu hinkwayo ya Israyele, kutani yona yi ta va vanhu va mina.”+
2 Yehovha u ri:
“Vanhu lava poneke banga va kombiwe tintswalo emananga
Loko Israyele a ya endhawini yakwe yo wisela eka yona.”
3 Yehovha u humelele eka mina a ri ekule a ku:
“Ndzi ku rhandze hi rirhandzu leri nga heriki.
Hi yona mhaka leyi ndzi ku kokeleke eka mina hi rirhandzu.*+
4 Nakambe ndzi ta tlhela ndzi ku aka naswona u ta tlhela u akiwa.+
Wena nhwana wa Israyele, u ta tlhela u teka swingomana swa wena
5 U ta tlhela u rima masimu ya madiriva etintshaveni ta Samariya;+
Vabyari va ta byala va tlhela va tiphina hi mihandzu ya vona.+
6 Hikuva siku ra ta leri varindzi lava nga etintshaveni ta Efrayimi va nga ta huwelela va ku:
‘Pfukani, a hi tlhandlukeleni eSiyoni eka Yehovha Xikwembu xa hina.’”+
7 Hikuva Yehovha u ri:
“Yimbelelelani Yakobo hi ku tsaka.
Huwelelani hi ntsako hikwalaho ka leswi mi rhangelaka matiko.+
Swi vuleni; mi dzunisa mi ku,
‘Yehovha Xikwembu xa hina, ponisa vanhu va wena lava saleke va Israyele.’+
8 Ndzi va vuyisa ku suka etikweni ra le n’walungwini.+
Ndzi ta va hlengeleta ku suka etindhawini ta le kule swinene ta misava.+
Exikarhi ka vona ku ta va ni loyi a nga voniki ni loyi a khwitaka,+
Wansati loyi a tikeke ni loyi a velekaka, hinkwavo va ri swin’we.
Va ta vuya laha va ri nhlengeletano leyikulu.+
9 Va ta ta va ri karhi va rila.+
Ndzi ta va rhangela loko va ri karhi va kombela ku kombiwa tintswalo.
Ndzi ta va kongomisa eswinambyanini swa mati,+
Endleleni leyi va nga taka va nga khudlunyeki.
Hikuva ndzi Tatana eka Israyele kasi Efrayimi i mativula ya mina.”+
“Loyi a hangalaseke Israyele u ta n’wi hlengeleta.
U ta n’wi rindza hilaha murisi a wu rindzaka hakona ntlhambi wakwe.+
12 Va ta ta va huwelela hi ku tsaka entshaveni ya Siyoni+
Va ta vangama hikwalaho ka vunene bya* Yehovha,
Hikwalaho ka mavele ni vhinyo leyintshwa+ ni mafurha
Ni hikwalaho ka swifuwo leswitsongo swa ntlhambi wa tinyimpfu ni tihomu.+
Ndzi ta hundzula ku rila ka vona ku va ntsako.+
Ndzi ta va chavelela ndzi va endla va tsaka ematshan’weni yo va ni gome.+
14 Ndzi ta nyika vaprista swakudya swo tala,
Vanhu va mina va ta enerisiwa hi swilo leswinene leswi ndzi nga ta va nyika swona,”+ ku vula Yehovha.
15 “Yehovha u ri:
‘Ku twakala rito eRhama,+ ku rila ni ku kalakala:
Rahele u rilela vana vakwe.+
U ale ku chaveleriwa hikwalaho ka vana vakwe,
Hikuva a va ha ri kona.’”+
16 Yehovha u ri:
“‘Tshika ku rila ni ku humesa mihloti,
Hikuva ku ni hakelo ya ntirho wa wena,’ ku vula Yehovha.
‘Va ta vuya va huma etikweni ra nala.’+
17 ‘Ku ni ntshembo hi vumundzuku bya wena,’+ ku vula Yehovha.
‘Vana va wena va ta tlhelela endhawini ya vona.’”+
18 “Entiyisweni ndzi twe Efrayimi a konya a ku,
‘U ndzi lulamisile naswona ndzi lulamisekile,
Ku fana ni rhole leri nga leteriwangiki.
Ndzi tlherise, ndzi ta tlhela,
Hikuva wena Yehovha u Xikwembu xa mina.
19 Hikuva endzhaku ka loko ndzi tlherile, ndzi tisorile;+
Endzhaku ka loko ndzi pfuniwe ku twisisa ndzi tibe ndzhumbu ndzi ri ni gome.
A ndzi khomiwe hi tingana,+
Hikwalaho ka swilo leswi ndzi nga swi endla loko ndza ha ri muntshwa.’”
20 “Xana Efrayimi a hi n’wana wa risima loyi a rhandzekaka eka mina?+
Hikuva hambiloko ndzi tshamela ku n’wi tshinya ndza n’wi tsundzuka.
Hi yona mhaka leyi ndzi twaka ku vava hikwalaho ka yena.+
Hakunene ndzi ta n’wi twela vusiwana,” ku vula Yehovha.+
Xiyisisa gondzo lerikulu, gondzo leri u faneleke u famba hi rona.+
Tlhela wena nhwana wa Israyele, tlhelela emitini leyi ya wena.
22 Xana u ta kanakana ku fikela rini, wena nhwanyana loyi a nga tshembekiki?
Hikuva Yehovha u tumbuluxe nchumu lowuntshwa emisaveni:
Wansati u ta lavana ni wanuna.”
23 Yehovha wa mavuthu, Xikwembu xa Israyele u ri: “Va ta tlhela va vula marito lawa etikweni ra Yuda ni le mitini ya yena, loko ndzi hlengeleta mahlonga ya vona, va ku: ‘Onge Yehovha a nga ku katekisa, wena ndhawu yo tshama eka yona yo lulama,+ wena ntshava yo kwetsima.’+ 24 EYuda ni le mitini ya yena hinkwayo ku ta tshama vanhu, varimi ni varisi va mitlhambi.+ 25 Hikuva ndzi ta enerisa loyi a karhaleke ni ku xurhisa loyi a khomiweke hi ndlala.”+
26 Hiloko ndzi pfuka ndzi pfula matihlo naswona vurhongo bya mina a byi ndzi nandzihela.
27 “Waswivo! Masiku ma ta,” ku vula Yehovha, “laha ndzi nga ta andzisa tiko ra Israyele ni tiko ra Yuda. Ndzi ta tlhela ndzi andzisa ni swifuwo swa wona.”+
28 “Hilaha ndzi va rindzeke hakona leswaku ndzi va tsuvula, ndzi va hirimuxa, ndzi va mbundzumuxa, ndzi va lovisa ni ku va onhetela,+ ndzi ta va rindza leswaku ndzi va aka ni ku va byala,”+ ku vula Yehovha. 29 “Emasikwini wolawo a va nge he vuli va ku, ‘Vatatana va dye madiriva yo dzunga, kambe ku zazamele matino ya vana.’+ 30 Kambe munhu un’wana ni un’wana u ta fela xihoxo xakwe. Munhu un’wana ni un’wana loyi a dyaka madiriva yo dzunga ku ta zazamela matino yakwe.”
31 “Vonani! Masiku ma ta,” ku vula Yehovha, “laha ndzi nga ta endla ntwanano lowuntshwa ni vanhu va Israyele ni vanhu va Yuda.+ 32 A wu nge fani ni ntwanano lowu ndzi wu endleke ni vakokwa wa vona hi siku leri ndzi khomeke voko ra vona ndzi va humesa etikweni ra Egipta,+ ‘ntwanano wa mina lowu va wu tluleke,+ hambileswi a ndzi ri n’wini wa vona wa ntiyiso,’* ku vula Yehovha.”
33 “Hikuva lowu i ntwanano lowu ndzi nga ta wu endla ni vanhu va Israyele endzhaku ka masiku wolawo,” ku vula Yehovha. “Ndzi ta nghenisa nawu wa mina endzeni ka vona+ naswona ndzi ta wu tsala embilwini ya vona.+ Ndzi ta va Xikwembu xa vona naswona vona va ta va vanhu va mina.”+
34 “A nge he vi kona loyi a nga ta dyondzisa muakelani wakwe ni makwavo a ku, ‘Tiva Yehovha,’+ hikuva hinkwavo va ta ndzi tiva, ku sukela eka lontsongo ku ya eka lonkulu,”+ ku vula Yehovha. “Ndzi ta va rivalela xihoxo xa vona naswona a ndzi nge he xi tsundzuki xidyoho xa vona.”+
35 Yehovha loyi a endleke dyambu leswaku ri voninga ninhlikanhi,
Ni loyi a endleke milawu ya n’weti ni tinyeleti leswaku ti voninga nivusiku,
Loyi a dungaka lwandle ni ku endla leswaku magandlati ya rona ma ba huwa,
Loyi vito ra yena a nga Yehovha wa mavuthu u ri:+
36 “‘Loko milawu leyi yo ka yi nga ha vi kona,’ ku vula Yehovha,
‘Hi kona vana va Israyele va nga taka va nga ha vi tiko emahlweni ka mina nkarhi hinkwawo.’”+
37 Yehovha u ri: “‘Loko matilo mo pimiwa ni masungulo ya misava yo lavisisiwa, hi kona ndzi nga ta fularhela vana hinkwavo va Israyele hikwalaho ka swilo hinkwaswo leswi va swi endleke,’ ku vula Yehovha.”+
38 “Waswivo! Masiku ma ta,” ku vula Yehovha, “laha muti wu nga ta akeriwa+ Yehovha ku suka eXihondzweni xa Hananele+ ku ya fika eGedeni ya le Khonweni.+ 39 Ntambhu yo pima+ yi ta famba yi kongoma exintshabyanini xa Garebe naswona yi ta jika yi kongoma etlhelweni ra le Gowa. 40 Ndhawu hinkwayo ya nkova wa mitsumbu ni wa nkuma* ni masimu hinkwawo ku ya fika eNkoveni wa Kedroni,+ ni ku ya fika ekhonweni ya Gede ya Tihanci+ etlhelweni ra le vuxeni swi ta va nchumu wo kwetsima eka Yehovha.+ A swi nge he tlheli swi tsuvuriwa kumbe ku hirimuxiwa.”