Varhoma

9 Leswi ndzi nga mulandzeri wa Kreste; ndzi vulavula ntiyiso a ndzi hembi naswona ripfalo ra mina leri kongomisiwaka hi moya lowo kwetsima ra ndzi yimelela, 2 leswaku ndzi ni gome lerikulu ni xitlhavi lexi nga heriki embilwini ya mina. 3 Loko a swi koteka, a ndzi ta tiendla loyi a hambanisiweke na Kreste ndzi va loyi a rhukaniweke hikwalaho ka vamakwerhu, maxaka ya mina 4 lama nga Vaisrayele. Hi vona lava Xikwembu xi va hlawuleke leswaku va ta va vana va xona,+ lava nyikiweke ku vangama, lava xi endleke mintwanano+ na vona, lava xi va nyikeke Nawu,+ ni lava kumeke nkateko wo xi endlela ntirho wo kwetsima+ va tlhela va kuma switshembiso.+ 5 I vatukulu va vakokwa wa hina+ naswona Kreste u huma erixakeni ra vona.+ Xikwembu, lexi nga ehenhla ka hinkwaswo a xi dzunisiwe hilaha ku nga heriki. Amen.

6 Hambiswiritano, a swi vuli swona leswaku rito ra Xikwembu a ri hetisekanga. Hikuva a hi hinkwavo lava humaka eka Israyele lava nga Vaisrayele va xiviri.+ 7 Nakambe a hi hinkwavo eka vana va Abrahama lava nga vana* va xiviri;+ hikuva ku tsariwe leswi, “Vana* va wena va ta huma eka Isaka.”+ 8 Hileswaku, lava nga vana va nyama a hi vana va Xikwembu va xiviri,+ kambe vana lava velekiweke hikwalaho ka xitshembiso+ hi vona vana* va xiviri. 9 Hikuva xitshembiso a xi ku: “Hi nkarhi lowu ndzi ta ta naswona Sara u ta va ni n’wana wa jaha.”+ 10 Swi ve tano ni loko Raveka a tike mahahla hi Isaka kokwa wa hina;+ 11 loko va nga si velekiwa naswona va nga si endla leswinene kumbe swo biha, Xikwembu xi swi vule khale leswaku i mani loyi a xi ta n’wi hlawula, hikuva Xikwembu xi hlawula loyi xi n’wi lavaka ku nga ri hi ku ya hi mitirho, 12 wansati loyi u byeriwe leswi: “Lonkulu u ta va hlonga ra lontsongo.”+ 13 Hilaha swi tsariweke hakona: “Ndzi rhandze Yakobo kambe Esawu ndzi n’wi vengile.”+

14 Kutani hi ta ku yini? Xana Xikwembu a xi lulamanga? A swi tano nikatsongo!+ 15 Hikuva xi byele Muxe xi ku: “Loyi ndzi lavaka ku n’wi komba tintswalo ndzi ta n’wi komba tintswalo naswona loyi ndzi lavaka ku n’wi komba ntwelavusiwana ndzi ta n’wi komba ntwelavusiwana.”+ 16 Hikwalaho, a swi titsheganga hi ku navela ka munhu kumbe hi matshalatshala yakwe, kambe swi titshege hi Xikwembu lexi nga ni tintswalo.+ 17 Hikuva tsalwa ri vula leswi hi Faro: “Ndzi ku tshike u hanya hikwalaho ka xivangelo lexi: leswaku ndzi ta tirhisa wena ku kombisa matimba ya mina ni leswaku vito ra mina ri twarisiwa emisaveni hinkwayo.”+ 18 Hikwalaho, xi ni tintswalo eka loyi xi lavaka ku n’wi komba tona, kambe loyi xi lavaka ku n’wi tshika a sihalala xa n’wi tshika.+

19 Wena u ta ku eka mina: “Hikwalaho ka yini Xikwembu xa ha va vona nandzu vanhu? Hikuva i mani loyi a nga lwisanaka ni ku rhandza ka xona?” 20 Kambe wena munhu, wo va mani leswaku u hlamula Xikwembu?+ Xana xilo lexi vumbiweke xi nga byela loyi a xi vumbeke xi ku: “Hikwalaho ka yini u ndzi endle hi ndlela leyi?”+ 21 Xana muvumbi a nga na matimba eka vumba,+ leswaku hi gavadi rin’we a endla xibya lexi xi tirhiseriwaka leswi xiximekaka, hi lerin’wana a endla xibya lexi xi tirhiseriwaka leswi nga xiximekiki? 22 Hambileswi Xikwembu a xi lava ku kombisa vukarhi bya xona eka vanhu vo biha ni ku endla leswaku matimba ya xona ma tiveka, xi va lehisele mbilu vanhu lava faneriwaka hi ku xupuriwa hi xona, lava fanaka ni swibya leswi nga ta lovisiwa. 23 Xi endle tano ku komba ku vangama ka xona lokukulu eka swibya leswi faneriwaka hi ku kombiwa tintswalo,+ leswi xi swi lunghiseleleke khale leswaku xi swi nyika ku vangama, 24 ku nga hina, lava xi nga hi hlawulangiki eka Vayuda ntsena kambe ni le ka vanhu va matiko.+ 25 Swi hilaha xi vuleke hakona ni le ka Hosiya xi ku: “Lava nga riki vanhu va mina+ ndzi ta va vitana ‘vanhu va mina,’ ni wansati loyi a a nga rhandziwi ndzi ta n’wi vitana ‘loyi a rhandzekaka’;+ 26 kutani endhawini leyi va byeriweke leswaku, ‘A mi vanhu va mina,’ kwalaho hi kona laha va nga ta vuriwa ‘vana va Xikwembu lexi hanyaka.’”+

27 Ku tlula kwalaho, Esaya u vula leswi hi Israyele: “Hambiloko nhlayo ya Vaisrayele yo fana ni sava ra lwandle, i masalela ntsena lama nga ta ponisiwa.+ 28 Hikuva Yehovha* u ta tenga timhaka ni vanhu lava tshamaka emisaveni, u ta hatla a va gweva.”+ 29 Nakambe, hilaha Esaya a profeteke hakona a ku: “Loko Yehovha* wa mavuthu a a nga hi siyelanga vana,* a hi ta fana na Sodoma naswona a hi ta fana na Gomora.”+

30 Kutani hi ta ku yini? Hambileswi vanhu va matiko va nga lavisisiki ku lulama,+ va kuma ku lulama hikwalaho ka ripfumelo ra vona;+ 31 kambe hambileswi Vaisrayele a va lavisisa nawu wa ku lulama, va tsandzeke ku yingisa nawu wolowo. 32 Hikwalaho ka yini? Hikuva a va anakanya leswaku va ta va vo lulama hikwalaho ka mitirho ya vona, ku nga ri hikwalaho ka ripfumelo. Va wile “eribyeni ra xikhunguvanyiso”;+ 33 hilaha ku tsariweke hakona: “Vonani! ESiyoni ndzi veka ribye+ ra xikhunguvanyiso ni ribye ro khudlunya, kambe loyi a pfumelaka eka rona a nge khomisiwi tingana.”+