Esaya
22 Ku avanyisiwa ka Nkova wa Xivono:*+
Hikwalaho ka yini hinkwenu mi khandziye elwangwini?
2 A wu ri muti wa hasahasa,
A wu ri muti wa pongo, lowu tinyungubyisaka.
Vanhu va wena lava dlayiweke a va dlayiwanga hi banga,
Naswona a va felanga enyimpini.+
3 Vafumi va wena hinkwavo va baleke swin’we.+
Va khotsiwe handle ko tirhisa vurha.
Hinkwavo lava kumiweke va pfaleriwe ekhotsweni.+
Hambileswi a va balekele ekule.
Mi nga tikarhati hi ku ndzi chavelela
Hikwalaho ka leswi vanhu va mina va nga hela.+
5 Hikuva i siku ra ku pfilunganyeka, ku hluriwa ni ku chuha,+
Leri humaka eka Yehovha wa mavuthu, Hosi Leyi Tlakukeke,
ENkoveni wa Xivono.
Ku ni ku mbundzumuxiwa ka khumbi+
Ni xirilo entshaveni.
6 Elami+ u teke nkwama wa miseve,
Tihanci* ni makalichi lama khandziyiweke hi masocha,
Kiri+ u humese xitlhangu enkwameni wa xona.
7 Tindhawu ta n’wina leto saseka
Ti ta tala hi makalichi ya nyimpi,
Kasi tihanci* ti ta yima hi le gedeni,
8 Xisirhelelo xa Yuda xi ta susiwa.
“Hi siku rero mi ta languta laha ku vekiwaka kona matlhari, eka Yindlu ya Khwati,+ 9 kutani mi ta vona timbhovo to tala ekhumbini ra Muti wa Davhida.+ Mi ta hlengeleta mati exihlobyeni xa le hansi.+ 10 Mi ta hlaya tiyindlu ta le Yerusalema mi hirimuxa tin’wana ta tona leswaku mi ta tiyisa khumbi. 11 Mi ta endla xihlambelo exikarhi ka makhumbi mambirhi, laha ku nga ni mati ya xidziva xa khale, kambe a mi nge n’wi languti Muendli Lonkulu wa xona, a mi nge n’wi voni Loyi a xi endleke khale swinene.
12 Hi siku rero Yehovha wa mavuthu, Hosi Leyi Tlakukeke,
U ta langutela leswaku mi rila mi va ni gome,+
Mi byevula tinhloko mi ambala swiambalo swo khwaxa.
13 Kambe ku ni ku tlangela ni ntsako,
Ku tlhaviwa tihomu ni tinyimpfu,
Ku dyiwa nyama ku tlhela ku nwiwa vhinyo,+
‘A hi dyeni hi nwa hikuva mundzuku hi ta fa.’ ”+
14 Hiloko Yehovha wa mavuthu a ndzi byela a ku: “ ‘A mi nge rivaleriwi xidyoho xa n’wina kukondza mi fa,’+ ku vula Yehovha wa mavuthu, Hosi Leyi Tlakukeke.”
15 Yehovha wa mavuthu, Hosi Leyi Tlakukeke u ri: “Yana eka Xebina+ loyi a langutelaka yindlu* u fika u ku, 16 ‘U ehleketa leswaku hi wena mani naswona u nyikiwe hi mani mpfumelelo wo ticelela sirha laha?’ Xebina u ticelela sirha endhawini leyi tlakukeke; u kovotla sirha ehenhla ka ribye leswaku a ta lahliwa kona. 17 ‘Yingisa wena munhu, Yehovha u ta ku khoma swi tiya, a ku lahlela ehansi u ya ku mbvevee! 18 U ta ku tsondzela, a ku cukumeta ku fana ni bolo etikweni leri anameke. U ta fela kwalaho u ri ni makalichi ya wena yo saseka kutani leswi swi ta khomisa n’wini wa wena tingana. 19 Ndzi ta ku hlongola entirhweni wa wena, ndzi ta ku susa exitulwini xa wena.
20 “ ‘Esikwini rero ndzi ta vitana nandza wa mina Eliyakimi,+ n’wana wa Hilkiya, 21 ndzi ta n’wi ambexa xiambalo xa wena xo leha, ndzi n’wi boha ni bandhi ra wena,+ ndzi n’wi nyika vuhosi bya wena. U ta va tata wa vanhu hinkwavo eYerusalema ni vandyangu wa Yuda. 22 Ndzi ta n’wi nyika xikhiya xa ndyangu wa Davhida.+ Loko a pfurile a nga kona loyi a nga ta pfala; loko a pfarile a nga kona loyi a nga ta pfula. 23 Ndzi ta n’wi belela swi tiya ku fana ni mhandzi leyi beleriwaka ehansi, u ta tiya naswona u ta fana ni xiluvelo xa ku vangama endyangwini wa ka vona. 24 Ku vangama ka ndyangu wa tata wakwe ku ta va ehenhla ka yena ni le ka vana* ni vatukulu va yena, eka swibya leswitsongo, swimbitana ni le ka makhuwana lamakulu.
25 “Yehovha wa mavuthu u ri: ‘Hi siku rero, mhandzi leyi beleriweke swi tiya yi ta susiwa+ naswona yi ta tsemiwa yi wa, ndzhwalo lowu a yi wu seketela wu ta wa, hikuva Yehovha hi byakwe u swi vurile.’ ”