Esaya
2 Hi leyi mhaka leyi Esaya n’wana wa Amotsi a yi voneke mayelana na Yuda na Yerusalema:+
2 Emikarhini ya makumu,
Ntshava ya yindlu ya Yehovha
Yi ta simekiwa yi tiya ehenhla ka tintshava,+
Naswona yi ta tlakusiwa yi tlula ni swintshabyana,
Matiko hinkwawo ma ta khitikanela eka yona.+
3 Vanhu vo tala va ta ya kona kutani va ku:
“Tanani, a hi tlhandlukeleni entshaveni ya Yehovha,
Endlwini ya Xikwembu xa Yakobo.+
U ta hi dyondzisa tindlela ta yena,
Kutani hi ta famba emitileni ya yena.”+
4 U ta avanyisa matiko
A lulamisa timhaka ta vanhu vo tala.
Va ta hundzula mabanga ya vona ma va swikomu
Ni matlhari ya vona ma va swikhutulo.+
Tiko a ri nge he tlakusi banga ku lwa ni tiko rin’wana,
Naswona a va nge he dyondzi nyimpi.+
6 Hikuva u fularhele vanhu va wena, ndyangu wa Yakobo,+
Hikwalaho ka leswi va tekeleleke swilo swa le Vuxeni;
Va endla masalamusi+ ku fana ni Vafilista,
Naswona va taleriwe hi vana va vanhu vamatiko.
7 Tiko ra vona ri tele hi silivhere ni nsuku,
Naswona va ni xuma xo tala.
Tiko ra vona ri tele hi tihanci,
Naswona va ni makalichi yo tala.+
8 Tiko ra vona ri tele swikwembu leswi nga pfuniki nchumu.+
Va khinsamela mitirho ya mavoko ya vona,
Leswi va nga lo tiendlela.
9 Loyi a khinsamaka u ta khomisiwa tingana,
Naswona a wu nge pfuki u va rivalerile.
10 Nghena eribyeni u tumbela emisaveni
Hikwalaho ka vukarhi bya Yehovha lebyi chavisaka
Ni vukulukumba byakwe ni ku vangama kakwe.+
I Yehovha ntsena loyi a nga ta vangamisiwa hi siku rero.
12 Hikuva i siku ra Yehovha wa mavuthu.+
Ri ta fikela hinkwavo lava titlakusaka ni lava tikukumuxaka,
Ri ta fikela hinkwavo, hambi i swifumi kumbe swisiwana,+
13 Ri ta fikela mikedari hinkwayo ya le Lebanoni leyo leha
Ni mirhi hinkwayo ya oku ya le Baxani,
14 Ni le henhla ka tintshava hinkwato to leha
Ni swintshabyana hinkwaswo swo leha,
15 Ehenhla ka swihondzo hinkwaswo swo leha ni makhumbi hinkwawo yo tiya,
16 Ehenhla ka swikepe hinkwaswo swa le Taraxixi+
Ni le henhla ka swikepe hinkwaswo swo saseka.
17 Loyi a tikurisaka u ta khomisiwa tingana,
Ni lava tivonaka va ta nyumisiwa.
I Yehovha ntsena loyi a nga ta vangamisiwa hi siku rero.
18 Swikwembu leswi nga pfuniki nchumu swi ta nyamalalela makumu.+
19 Vanhu va ta nghena emabakweni ya maribye
Ni le miceleni+
Hikwalaho ko chava vukarhi bya Yehovha
Ni vukulukumba byakwe ni ku vangama kakwe,+
Loko a ta ku ta endla leswaku misava yi rhurhumela hikwalaho ko chava.
20 Hi siku rero vanhu va ta teka swikwembu swa vona leswi nga pfuniki nchumu swa silivhere ni nsuku
Leswi va tiendleleke swona leswaku va swi gandzela
Va swi lahlela eka timfukuzana* ni vamangadyana,+
21 Leswaku va ta nghena etimbhoveni leti nga emaribyeni
Ni le mabakweni,
Hikwalaho ko chava vukarhi bya Yehovha
Ni vukulukumba byakwe ni ku vangama kakwe,
Loko a ta ku ta endla leswaku misava yi rhurhumela hikwalaho ko chava.
22 Tshikani ku tshemba munhu,
Loyi a ngo va ku hefemula ntsena.
Hikwalaho ka yini a fanele a tekeriwa enhlokweni?