Varhoma
13 Munhu un’wana ni un’wana a yingise lava fumaka,+ hikuva va pfumeleriwe hi Xikwembu.+ Vafumi lava nga kona va vekiwe hi Xikwembu eswikhundlheni swa vona.+ 2 Loyi a lwisanaka ni vafumi u lwisana ni lunghiselelo ra Xikwembu; lava lwisanaka na rona va ta avanyisiwa. 3 Vafumi a va chaviwi hi lava endlaka leswinene kambe va chaviwa hi lava endlaka swo biha.+ Xana wa swi lava ku hanya handle ko chava vafumi? Yana emahlweni u endla leswinene+ kutani va ta ku dzunisa; 4 hikuva vafumi lava i malandza ya Xikwembu lama endlaka leswi ku vuyerisaka. Kambe loko u endla swo biha, u ni xivangelo xo chava, hikuva va ni matimba yo xupula naswona a va nyikiwanga wona ku nga ri na xivangelo. I malandza ya Xikwembu lama xupulaka lava endlaka leswo biha.
5 Swi fanerile leswaku mi va yingisa, ku nga ri ntsena hikwalaho ko chava ku xupuriwa kambe ni hikwalaho ka ripfalo ra n’wina.+ 6 Hi yona mhaka leyi mi hakelaka swibalo; hikuva i malandza ya Xikwembu lama tirhelaka vanhu, lama tirhaka nkarhi hinkwawo hikwalaho ka xikongomelo lexi. 7 Nyikani hinkwavo timfanelo ta vona: loyi a lavaka xibalo n’wi nyikeni xibalo;+ loyi a lavaka muthelo n’wi nyikeni muthelo; loyi a lavaka ku kombiwa xichavo n’wi kombeni xichavo;+ loyi a lavaka ku xiximiwa n’wi xiximeni.+
8 Mi nga kolotani nchumu loko ku nga ri ku rhandzana;+ hikuva loyi a rhandzaka munhu un’wana u endla leswi nawu wu vulaka swona.+ 9 Hikuva nxaxamelo wa milawu leyi nge, “U nga tshuki u oswa,+ u nga tshuki u dlaya,+ u nga tshuki u yiva,+ u nga tshuki u navela swa van’wana,”+ ni nawu wun’wana ni wun’wana lowu nga kona, yi katsakanyiwa hi nawu lowu nge: “U fanele u rhandza warikwenu hi ndlela leyi u tirhandzaka ha yona.”+ 10 Rirhandzu a ri endleli munhu un’wana swo biha;+ hikwalaho, rirhandzu i ku hetiseka ka nawu.+
11 Nakambe endlani leswi, hikuva mi tiva nguva ya kona leswaku se i nkarhi wo xalamuka evurhongweni,+ hikuva sweswi ku ponisiwa ka hina ku le kusuhi swinene ku tlula nkarhi lowu hi veke vapfumeri ha wona. 12 Vusiku byi fambile swinene; siku ri tshinele. Hikwalaho a hi hluvuleni mitirho ya munyama,+ hi ambala matlhari ya ku vonakala.+ 13 A hi fambeni hi ndlela leyinene+ ku fana niloko ku ri nhlikanhi, hi nga yi emikhubyeni leyi nga lawulekiki, hi nga vi swidakwa, hi nga tikhomi ku biha hi swa masangu ni ku endla manyala,*+ hi nga vi ni timholovo ni mavondzo.+ 14 Kambe tekelelani Hosi Yesu Kreste*+ naswona mi nga kunguhati ku endla xidyoho.+