Esaya
66 Yehovha u ri:
“Matilo i xiluvelo xa mina, kasi misava i xitulu xa milenge ya mina.+
Kutani yi kwihi yindlu leyi mi nga ndzi akelaka yona,+
Naswona yi kwihi ndhawu leyi ndzi nga wiselaka eka yona?”+
2 “Swilo leswi hinkwaswo swi endliwe hi voko ra mina,
Swi ve kona hinkwaswo hi ndlela yoleyo,” ku vula Yehovha.+
“Kutani loyi ndzi ta n’wi languta,
Loyi a titsongahataka a tlhela a va ni gome, loyi a xiximaka* rito ra mina.+
3 Loyi a tlhavaka nkuzi u fana ni loyi a dlayaka munhu.+
Loyi a endlaka gandzelo hi nyimpfu u fana ni loyi a tshovaka nhamu ya mbyana.+
Loyi a humesaka nyiko, u fana ni loyi a nyikelaka hi ngati ya nguluve!+
Loyi a nyikelaka murhi wa risuna+ u fana ni loyi a khensaka hi marito ya masalamusi.*+
Va tiendlela ku rhandza,
Va rhandza swilo leswi nyenyetsaka.
Hikuva a ku hlamulanga munhu loko ndzi va vitana;
A va ndzi yingisanga loko ndzi vulavula.+
A va tshamela ku ndzi dyohela,
Naswona va hlawule ku endla leswi nga ndzi tsakisiki.”+
5 Twanani rito ra Yehovha, n’wina lava xiximaka* rito ra yena:
“Vamakwenu lava mi vengaka va tlhela va mi nyenya hikwalaho ka vito ra mina va te, ‘A ku dzunisiwe Yehovha!’+
Kambe U ta ta naswona mi ta tsaka loko mi n’wi vona,
Kasi vona va ta khomisiwa tingana.”+
6 Ku twala hasahasa emutini, yi huma etempeleni!
I hasahasa ya valala lava xupuriwaka hi Yehovha.
7 U veleke a nga si va ni switlhavi swa ku veleka.+
U tswale n’wana wa jaha a nga si khomiwa hi ku lun’wa ka ku veleka.
8 I mani loyi a nga tshama a twa mhaka yo tani?
I mani loyi a nga tshama a vona mhaka yo tani?
Xana tiko ri nga velekiwa hi siku rin’we?
Kumbe, xana rixaka ri nga velekiwa hi nkarhi wun’we?
Kambe hi ku hatlisa loko Siyoni a va ni switlhavi swa ku veleka, u veleke vana va yena.
9 “Xana ndzi nga endla leswaku munhu a va ekusuhi ni ku veleka, kambe a nga veleki?” ku vula Yehovha.
“Kumbe, xana ndzi nga endla leswaku wansati a sungula ku veleka ivi ndzi pfala xivelekelo?” ku vula Xikwembu xa n’wina.
10 Tsakani na Yerusalema mi khana na yena,+ n’wina hinkwenu lava n’wi rhandzaka.+
Khanani na yena, n’wina hinkwenu lava n’wi rilelaka,
11 Hikuva mi ta mama mi eneriseka emaveleni yakwe ya nchavelelo,
Naswona mi ta eneriseka mi tsaka hikwalaho ka ku tala ka ku vangama kakwe.
12 Hikuva Yehovha u ri:
“Ndzi n’wi nyika ku rhula ku fana ni nambu+
Ni ku vangama ka matiko ku fana ni xinambyana lexi khulukaka.+
Mi ta mama mi tlhela mi beburiwa,
Naswona mi ta xingiwa.
13 Ku fana ni manana loyi a chavelelaka n’wana wakwe,
Na mina ndzi ta tshama ndzi ri karhi ndzi mi chavelela;+
Naswona mi ta chaveleriwa hikwalaho ka Yerusalema.+
14 Mi ta swi vona leswi kutani mi ta tsaka,
Marhambu ya n’wina ma ta hluka ku fana ni byanyi lebyintshwa.
Malandza ya Yehovha ma ta tiva matimba yakwe,
Kambe u ta holovela valala vakwe.”+
15 “Hikuva Yehovha u ta ta ku fana ni ndzilo,+
Makalichi yakwe ma fana ni xidzedze,+
U ta xupula hi vukarhi lebyikulu
U ta tshinya hi malangavi ya ndzilo.+
16 Hikuva Yehovha u ta avanyisa hi ndzilo,
U ta avanyisa vanhu hinkwavo hi banga rakwe;
Yehovha u ta dlaya vanhu vo tala.
17 “Lava tibasisaka leswaku va ta nghena emitangeni,*+ va ri karhi va landzela loyi a nga le xikarhi, lava dyaka nyama ya tinguluve+ ni swilo leswi nyenyetsaka ni makondlo,+ hinkwavo ka vona va ta herisiwa,” ku vula Yehovha. 18 “Leswi ndzi tivaka mitirho ya vona ni leswi va swi ehleketaka, ndza ta ndzi ta hlengeleta vanhu va matiko ni tindzimi hinkwato, va ta ta va ta vona ku vangama ka mina.”
19 “Ndzi ta veka mfungho exikarhi ka vona naswona van’wana va lava nga ta baleka ndzi ta va rhumela eka vamatiko, eTaraxixi,+ ePulu ni le Ludi,+ lava lwaka hi vurha ndzi ta va rhumela eTubala ni le Yavhani+ ni le swihlaleni leswi nga ekule, lava nga si tshamaka va twa swo karhi hi mina kumbe ku vona ku vangama ka mina; va ta vulavula hi ku vangama ka mina exikarhi ka matiko.+ 20 Va ta humesa vamakwenu hinkwavo lava nga ematikweni hinkwawo+ va va nyiko eka Yehovha, va ta vuya entshaveni ya mina yo kwetsima, ku nga Yerusalema va gade tihanci, makalichi, tigolonyi leti funengetiweke, timeyila ni tikamela ta rivilo,” ku vula Yehovha, “ku fana ni loko Vaisrayele va tisa nyiko hi xibya lexi baseke endlwini ya Yehovha.”
21 “Ndzi ta tlhela ndzi teka van’wana va vona va va vaprista ni Valevhi,” ku vula Yehovha.
22 Yehovha u ri: “Hikuva ku fana ni leswi matilo lamantshwa ni misava leyintshwa+ leswi ndzi swi endlaka swi nga ta tshama swi ri kona emahlweni ka mina, hi ndlela leyi fanaka, vana* va n’wina ni vito ra n’wina swi ta tshama swi ri kona.”+