Yohane
14 “Mi nga karhateki.+ Vanani ni ripfumelo eka Xikwembu;+ mi va ni ripfumelo ni le ka mina. 2 Endlwini ya Tatana ku ni tindhawu to tala to tshama. Loko a swi nga ri tano, a ndzi ta va ndzi mi byerile, hikuva ndzi ya mi lulamisela yona.+ 3 Ndzi ta famba ndzi ya mi lunghisela ndhawu kambe ndzi ta tlhela ndzi vuya ndzi ta mi teka leswaku mi ta va na mina ekaya, leswaku laha ndzi nga kona na n’wina mi va kona.+ 4 Ma yi tiva ndlela yo ya laha ndzi yaka kona.”
5 Hiloko Tomasi+ a ku: “Hosi, a hi ku tivi laha u yaka kona. Xana hi ta yi tivisa ku yini ndlela?”
6 Yesu a ku: “Hi mina ndlela+ ni ntiyiso+ ni vutomi.+ A nga kona loyi a nga yaka eka Tatana handle ko ya hi mina.+ 7 Loko a mi ndzi tiva, a mi ta tiva na Tatana; ku sukela sweswi ma n’wi tiva naswona mi n’wi vonile.”+
8 Filipi a ku: “Hosi, hi kombe Tatana, swi ta va swi ringene eka hina.”
9 Yesu a ku: “Hambileswi ndzi heteke nkarhi wo leha ndzi ri na n’wina, xana a wu si ndzi tiva Filipi? Loyi a ndzi voneke u vone na Tatana.+ U vurisa ku yini u ku, ‘Hi kombe Tatana’? 10 Xana a wu tshembi leswaku ndzi ni vun’we na Tatana ni leswaku yena u ni vun’we na mina?+ Swilo leswi ndzi mi byelaka swona a ndzi lo tisungulela;+ kambe Tatana loyi a tshamaka a ri ni vun’we na mina u tirhisa mina ku endla mitirho yakwe. 11 Ndzi tshembeni loko ndzi ku, ndzi ni vun’we na Tatana ni leswaku Tatana u ni vun’we na mina; loko mi nga ndzi tshembi, tshembani mitirho leyi ndzi yi endlaka.+ 12 Hakunene ndzi tiyisile ndzi ri eka n’wina, loyi a nga ni ripfumelo eka mina u ta endla mitirho leyi ndzi yi endlaka; naswona u ta endla mitirho leyikulu ku tlula leyi,+ hikuva ndza famba ndzi ya eka Tatana.+ 13 Xin’wana ni xin’wana lexi mi xi kombelaka hi vito ra mina ndzi ta xi endla leswaku Tatana a ta dzunisiwa hikwalaho ka N’wana.+ 14 Lexi mi xi kombelaka hi vito ra mina ndzi ta xi endla.
15 “Loko mi ndzi rhandza, mi ta yingisa swileriso swa mina.+ 16 Ndzi ta kombela Tatana kutani u ta mi nyika mupfuni* un’wana leswaku a va na n’wina hilaha ku nga heriki,+ 17 ku nga moya lowo kwetsima+ lowu paluxaka ntiyiso, lowu misava yi nga ta ka yi nga wu kumi hikuva a yi wu voni kumbe ku wu tiva.+ N’wina ma wu tiva hikuva mi na wona naswona wu tshama na n’wina. 18 A ndzi nge mi siyi mi ri swisiwana.* Ndzi ta tlhela ndzi vuya eka n’wina.+ 19 Ku nga ri khale misava a yi nge he ndzi voni kambe n’wina mi ta ndzi vona,+ hikuva ndza hanya na n’wina mi ta hanya. 20 Hi siku rero mi ta swi tiva leswaku ndzi ni vun’we na Tatana, na n’wina mi ni vun’we na mina naswona ndzi ni vun’we na n’wina.+ 21 Loyi a amukelaka swileriso swa mina a tlhela a swi landzela wa ndzi rhandza. Hilaha ku fanaka, loyi a ndzi rhandzaka u ta rhandziwa hi Tatana naswona ndzi ta n’wi rhandza, ndzi ta tikombisa eka yena.”
22 Yudasi,+ ku nga ri yena Iskariyota a ku: “Hosi, xana ku endleke yini leswi endlaka u lava ku tikombisa eka hina, ku nga ri eka misava?”
23 Yesu a n’wi hlamula a ku: “Loko munhu a ndzi rhandza u ta yingisa rito ra mina+ naswona Tatana u ta n’wi rhandza, kutani hi ta ta eka yena hi tshama na yena.+ 24 Loyi a nga ndzi rhandziki a nga ma yingisi marito ya mina. Rito leri mi ri twaka a hi ra mina kambe ri huma eka Tatana loyi a ndzi rhumeke.+
25 “Ndzi mi byele swilo leswi loko ndza ha ri na n’wina. 26 Kambe mupfuni, ku nga moya lowo kwetsima, lowu Tatana a nga ta wu rhumela hi vito ra mina, wu ta mi dyondzisa swilo hinkwaswo ni ku mi tsundzuxa swilo hinkwaswo leswi ndzi mi byeleke swona.+ 27 Ndzi mi siya ni ku rhula; ndzi mi nyika ku rhula ka mina.+ A ndzi mi nyiki hi ndlela leyi misava yi ku nyikaka ha yona. Mi nga karhateki hambi ku ri ku chava. 28 Mi swi twile leswi ndzi mi byeleke swona loko ndzi ku, ‘Ndza famba naswona ndzi ta vuya eka n’wina.’ Loko a mi ndzi rhandza a mi ta tsaka leswi ndzi yaka eka Tatana, hikuva Tatana i nkulu eka mina.+ 29 Ndzi mi byele swi nga si endleka leswaku loko swi endleka mi ta tshemba.+ 30 A ndzi nge he vulavuli swo tala na n’wina, hikuva mufumi wa misava+ wa ta kambe a nge ndzi endli nchumu.+ 31 Ndzi endla hilaha Tatana a ndzi leriseke hakona leswaku misava yi swi tiva leswaku ndza n’wi rhandza Tatana.+ A hi fambeni.