Vagalatiya
5 Kreste u hi tshunxile hikwalaho ka ntshunxeko wolowo. Hikwalaho, yimani mi tiyile+ naswona mi nga pfumeli ku tlhelela ejokweni ra vuhlonga.+
2 Vonani! Mina Pawulo, ndza mi byela leswaku loko mo yimbisiwa, Kreste u ta va a nga pfuni nchumu eka n’wina.+ 3 Nakambe ndzi tsundzuxa munhu un’wana ni un’wana loyi a yimbisiwaka leswaku u boheka ku yingisa Nawu hinkwawo.+ 4 Mi hambane na Kreste n’wina lava ringetaka ku vuriwa lava lulameke hi ku ya hi nawu;+ mi sukile eka musa wa yena lowukulu. 5 Loko ku ri hina, hi matimba ya Xikwembu ni ripfumelo , hi swi rindzele hi mahlongati naswona hi ni ntshembo wa leswaku hi ta vuriwa lava lulameke. 6 Eka lava hanyaka hi vun’we na Kreste Yesu, ku va munhu a yimbile kumbe a nga yimbanga a hi swa nkoka,+ kambe ripfumelo leri fambisanaka ni rirhandzu hi rona ri nga ra nkoka.
7 A mi tsutsuma kahle.+ I mani loyi a mi siveleke ku ya emahlweni mi yingisa ntiyiso? 8 Dyondzo ya muxaka lowu a yi humi eka yena Loyi a mi vitanaka. 9 Comela lexitsongo xi kukumuxa mbila hinkwayo.+ 10 Ndza tiyiseka leswaku n’wina lava nga ni vun’we ni Hosi+ mi ta pfumelelana na mina; kambe un’wana ni un’wana loyi a mi karhataka,+ u ta avanyisiwa hi ndlela leyi n’wi fanelaka. 11 Loko ku ri mina, vamakwerhu, loko ku ri leswaku ni sweswi ndza ha chumayela hi ku yimba, hikwalaho ka yini ndzi xanisiwa? Loko swi ri tano, mhandzi ya nxaniso*+ a ya ha ri xikhunguvanyiso. 12 Ndzi navela onge vanhu lava ringetaka ku mi pfilunganya va nga titshena.*
13 Vamakwerhu, mi vitaneriwe etshunxekweni; kambe mi nga tirhisi tshunxeko wolowo leswaku mi endla leswi naveriwaka hi miri lowu dyohaka,+ kambe tirhelanani hi rirhandzu.+ 14 Hikuva Nawu hinkwawo wu hetisisiwe* hi xileriso xin’we lexi nge: “U fanele u rhandza warikwenu hi ndlela leyi u tirhandzaka ha yona.”+ 15 Kambe, loko mi tshamela ku lwa,+ tivoneleni leswaku mi nga lovisani.+
16 Kambe ndzi ri, Tshamani mi ri karhi mi famba hi moya+ kutani a mi nge endli leswi naveriwaka hi miri lowu dyohaka.+ 17 Hikuva miri ni ku navela ka wona wu lwisana ni moya wo kwetsima naswona moya wu lwisana ni miri; swilo leswi swa lwa leswaku mi nga endli leswi mi lavaka ku swi endla.+ 18 Ku tlula kwalaho, loko mi kongomisiwa hi moya a mi le hansi ka nawu.
19 Mitirho ya nyama ya vonaka, i ku tikhoma ko biha hi swa masangu,*+ thyaka, manyala,*+ 20 ku gandzela swikwembu swa hava, vungoma,*+ rivengo, timholovo, mavondzo, swifafa, ku kanetana, ku avana, ku landzela tidyondzo ta vanhu, 21 mona, vudakwa,+ mikhuvo leyi nga lawulekiki ni swilo swo fana ni sweswo.+ Ndza mi lemukisa hi swilo leswi hilaha se ndzi mi lemukiseke hakona, leswaku lava endlaka swilo swo tano a va nge dyi ndzhaka ya Mfumo wa Xikwembu.+
22 Hi hala tlhelo, mihandzu ya moya lowo kwetsima i rirhandzu, ntsako, ku rhula, ku lehisa mbilu, musa, vunene,+ ripfumelo, 23 ku olova ni ku tikhoma.+ A ku na nawu lowu lwisanaka ni swilo sweswo. 24 Ku tlula kwalaho, lava nga va Kreste Yesu va belele miri wa vona emhandzini swin’we ni ku navela ka wona loko biha.+
25 Loko hi hanya hi moya, a hi yeni emahlweni hi landzela nkongomiso wa moya.+ 26 Hi nga tshuki hi tikukumuxa,+ hi phikizana ni van’wana+ ni ku vondzoka van’wana.