Yohane
16 “Ndzi mi byele swilo leswi leswaku mi nga khunguvanyeki. 2 Vanhu va ta mi hlongola emasinagogeni.+ Nkarhi wa ta lowu loyi a nga ta mi dlaya+ a nga ta vona onge u endlele Xikwembu ntirho wo kwetsima. 3 Kambe va ta mi endla swilo leswi hikuva a va n’wi tivi Tatana kumbe mina.+ 4 Nilokoswiritano, ndzi mi byela swilo leswi leswaku loko ku fika nkarhi wa leswaku swi endleka, mi ta tsundzuka leswaku ndzi mi byerile.+
“A ndzi mi byelanga swona eku sunguleni hikuva a ndzi ri na n’wina. 5 Sweswi ndzi tlhelela eka Loyi a ndzi rhumeke;+ kambe a nga kona ni un’we wa n’wina loyi a ndzi vutisaka a ku, ‘U ya kwihi?’ 6 Kambe mi tsanile hikwalaho ka leswi ndzi mi byeleke swilo leswi.+ 7 Nilokoswiritano, ndzi mi byela ntiyiso, ku famba ka mina ku pfuna n’wina. Hikuva loko ndzi nga fambi, mupfuni+ a nge ti eka n’wina; kambe loko ndzi famba, ndzi ta mi rhumela yena. 8 Kutani loko a fika u ta komba misava vumbhoni lebyi nga erivaleni mayelana ni xidyoho, mayelana ni vululami ni mayelana ni vuavanyisi. 9 U ta komba misava xidyoho xa yona+ hikuva a yi na ripfumelo eka mina.+ 10 Loko swi ta eka vululami, ndzi tlhelela eka Tatana naswona a mi nge he ndzi voni. 11 Loko swi ta eka vuavanyisi, mufumi wa misava leyi se u avanyisiwile.+
12 “Ndza ha ri ni swilo swo tala leswi ndzi lavaka ku mi byela swona kambe a mi nge swi twisisi sweswi. 13 Hambiswiritano, loko mupfuni yoloye a fika, ku nga moya lowo kwetsima lowu paluxaka ntiyiso,+ wu ta mi pfuna leswaku mi twisisa ntiyiso hikuva a wu nge vulavuli hi ku tisungulela kambe wu ta vula swilo leswi wu swi twaka naswona wu ta mi byela swilo leswi nga ta endleka.+ 14 Wu ta ndzi dzunisa+ hikuva wu ta mi byela swilo leswi wu swi tweke eka mina.+ 15 Swilo hinkwaswo leswi Tatana a nga na swona i swa mina.+ Hi yona mhaka ndzi vuleke leswaku wu ta mi byela swilo leswi wu swi tweke eka mina. 16 Ku nga ri khale a mi nge he ndzi voni+ kambe mi ta tlhela mi ndzi vona ku nga ri khale.”
17 Hiloko van’wana va vadyondzisiwa vakwe va vutisana va ku: “Xana u vula yini leswi a nge, ‘Ku nga ri khale a mi nge he ndzi voni kambe mi ta tlhela mi ndzi vona ku nga ri khale,’ ni leswi a nge, ‘hikuva ndzi tlhelela eka Tatana’?” 18 Kutani va ku: “Xana u vula yini leswi a nge, ‘ku nga ri khale’? A hi swi tivi leswi a vulaka swona.” 19 Yesu a a swi tiva leswaku va lava ku n’wi vutisa, hiloko a ku: “Xana mi vutisana hi leswi ndzi nga te: ‘Ku nga ri khale a mi nge he ndzi voni kambe mi ta tlhela mi ndzi vona ku nga ri khale’? 20 Hakunene ndzi tiyisile ndzi ri eka n’wina, mi ta rila mi kalakala kambe misava yi ta tsaka; mi ta twa ku vava kambe ku vava koloko ku ta hundzuka ntsako.+ 21 Loko wansati a veleka u twa ku vava, hileswi nkarhi wakwe wu fikeke kambe loko se a velekile, a nga ha ma tsundzuki maxangu wolawo hikwalaho ka ku tsaka hileswi ku velekiweke munhu emisaveni. 22 Na n’wina mi twa ku vava sweswi; kambe ndzi ta tlhela ndzi mi vona kutani mi ta tsaka+ naswona a nga kona loyi a nga ta mi tekela ntsako wa n’wina. 23 Hi siku rero a mi nge ndzi vutisi nchumu. Hakunene ndzi tiyisile ndzi ri eka n’wina, xin’wana ni xin’wana lexi mi nga ta xi kombela+ eka Tatana hi vito ra mina,+ u ta mi nyika xona. 24 Ku ta fikela sweswi, a mi si kombela nchumu hi vito ra mina. Kombelani mi ta swi kuma, leswaku mi ta tsaka swinene.
25 “Ndzi tirhise swifaniso loko ndzi vulavula na n’wina. Kambe nkarhi wa ta lowu ndzi nga ta ka ndzi nga ha swi tirhisi loko ndzi mi byela hi Tatana. 26 Hi siku rero mi ta kombela eka Tatana hi vito ra mina; kambe a ndzi vuli swona leswaku ndzi ta mi kombelela eka yena. 27 Tatana wa mi rhandza hikuva na n’wina mi ndzi rhandzile+ mi tlhela mi tshemba leswaku ndzi tile ndzi ri muyimeri wa yena.+ 28 Ndzi te emisaveni ndzi ri muyimeri wa Tatana. Sweswi ndza famba ndzi tlhelela eka Tatana.”+
29 Vadyondzisiwa vakwe va ku: “Se ha ku twisisa hikuva a wa ha tirhisi swifaniso. 30 Se ha swi tiva leswaku u tiva swilo hinkwaswo naswona a swi lavi u kala u vutisiwa. Hikwalaho ha tshemba leswaku u huma eka Xikwembu.” 31 Yesu a ku: “Xana sweswi se ma tshemba? 32 Yingisani! Nkarhi wa ta naswona se wu fikile, laha hinkwenu ka n’wina mi nga ta balekela etindlwini ta n’wina mi ndzi siya ndzi ri ndzexe.+ Kambe a ndzi ndzexe hikuva Tatana u na mina.+ 33 Ndzi mi byele swilo leswi, leswaku mi va ni ku rhula hikwalaho ka mina.+ Misava yi ta mi xanisa kambe vanani ni xivindzi! Misava ndzi yi hlurile.”+