Mitirho
1 Eka Teyofilo, ebukwini ya mina yo sungula ndzi tsale swilo hinkwaswo leswi Yesu a sunguleke ku swi endla ni ku swi dyondzisa+ 2 ku ya fika esikwini leri a tlhandlukisiweke ha rona,+ endzhaku ka loko a nyike vaapostola lava a va hlawuleke swileriso hi moya lowo kwetsima.+ 3 Endzhaku ka loko a xanisekile, u humelele eka vona ko tala leswaku va ta swi tiva leswaku hakunene wa hanya.+ Va n’wi vone ku ringana masiku ya 40 naswona a a vulavula hi Mfumo wa Xikwembu.+ 4 Loko a hlangana na vona u va lerisile a ku: “Mi nga suki eYerusalema,+ kambe tshamani mi rindzela leswi Tatana a swi tshembiseke,+ leswi mi swi tweke eka mina; 5 hikuva Yohane hakunene u khuvule hi mati, kambe n’wina mi ta khuvuriwa hi moya lowo kwetsima+ endzhaku ka masiku ma nga ri mangani.”
6 Kutani loko va hlengeletanile, va n’wi vutisa va ku: “Hosi, xana u ta pfuxa mfumo eIsrayele sweswi?”+ 7 A va hlamula a ku: “A swi mi fanelanga ku tiva mikarhi kumbe tinguva leswi lawuriwaka hi Tatana.+ 8 Kambe mi ta amukela matimba loko moya lowo kwetsima wu fika ehenhla ka n’wina,+ naswona mi ta va timbhoni+ ta mina eYerusalema,+ etikweni hinkwaro ra Yudiya ni le Samariya+ ni ku ya fika emakumu ka misava.”+ 9 Endzhaku ko vula swilo leswi, a tlakuseriwa ehenhla va n’wi langutile kutani papa ri n’wi pfala va nga ha n’wi voni.+ 10 Loko va ha langute ehenhla loko a ri karhi a tlhandluka, ku humelela vavanuna vambirhi lava a va ambale swiambalo swo basa+ va fika va yima etlhelo ka vona 11 va ku: “Vavanuna va Galeliya, hikwalaho ka yini mi yima mi languta ehenhla? Yesu loyi, loyi a tlhandlukeke a suka eka n’wina u ta vuya hi ndlela leyi fanaka ni leyi mi n’wi voneke a tlhandluka ha yona.”
12 Hiloko va tlhelela eYerusalema+ va suka entshaveni leyi vuriwaka Ntshava ya Mitlhwari, leyi nga ekusuhi na Yerusalema, leyi swi tekaka kwalomu ka khilomitara ku ya kona.* 13 Loko va fika, va ye ekamareni ra le henhla laha a va tshama kona. A ku ri Petro, Yohane, Yakobo, Andriya, Filipi, Tomasi, Bartolomi, Matewu, Yakobo n’wana wa Alfiya na Simoni loyi a a tiviwa hi ku gingiriteka na Yudasi n’wana wa Yakobo.+ 14 Lava hinkwavo a va phikelela exikhongelweni hi xikongomelo xin’we va ri ni vavasati van’wana+ na Mariya mana wa Yesu ni vamakwavo.+
15 Siku rin’wana loko va hlengeletanile Petro a suka a yima exikarhi ka vamakwavo (hinkwavo ka vona a va ri 120) a ku: 16 “Vavanuna, vamakwerhu, a swi fanela leswaku tsalwa ri hetiseka, leri moya lowo kwetsima wu profeteke hi ku tirhisa Davhida leswaku a vulavula leswi khumbaka Yudasi,+ loyi a rhangeleke lava khomeke Yesu.+ 17 Hikuva a a ri un’wana wa hina+ naswona a a hlawuriwe leswaku a endla ntirho lowu na hina. 18 (Hikwalaho, yena wanuna loyi u xave nsimu hi mali ya leswi nga lulamangiki,+ kutani a wa hi nhloko a pandzeka hi le xikarhi, marhumbu yakwe hinkwawo ma humela ehandle.+ 19 Mhaka leyi yi tiviwe hi vaaki hinkwavo va Yerusalema, lerova nsimu yoleyo yi vitaniwe Hakeldama hi ririmi ra vona, leswi vulaka “Nsimu Ya Ngati.”) 20 Hikuva ebukwini ya Tipisalema ku tsariwe leswi, ‘Ndhawu yakwe a yi hundzuke rhumbi, ku nga ha tshami munhu eka yona,’+ ni leswi nge, ‘Ntirho wakwe wo rhangela a wu tekiwe hi un’wana.’+ 21 Hikokwalaho swi fanerile leswaku un’wana wa vavanuna loyi a a ri na hina nkarhi hinkwawo lowu Hosi Yesu a a endla mitirho yakwe, 22 ku sukela eku khuvuriweni kakwe hi Yohane+ ku ya fika esikwini leri a tlhandlukeke ha rona,+ un’we eka vavanuna lava u fanele a ri mbhoni na hina emhakeni ya ku pfuxiwa kakwe.”+
23 Hiloko va humesa vambirhi ku nga Yosefa la vuriwaka Barsaba, loyi vito rakwe rin’wana a ku ri Yusto na Matiyasi. 24 Kutani va khongela va ku: “Yehovha,* wena la tivaka timbilu ta vanhu hinkwavo,+ hi kombe leswaku i mani eka vavanuna lava vambirhi loyi u n’wi hlawuleke 25 leswaku a ta teka ntirho lowu a tlhela a va muapostola, leswi Yudasi a nga hambuka eka swona a tiendlela swa yena.”+ 26 Hiloko va hoxa vuhlolotwana,*+ vuhlolotwana byi komba Matiyasi, kutani a joyina vaapostola va 11.*