Yohane

6 Endzhaku ka swilo leswi, Yesu a tsemakanya Lwandle ra Galeliya kumbe ra Tiberiyo.+ 2 A a landzeleriwa hi ntshungu lowukulu,+ hikuva a wu vona masingita lawa a a ma endla yo horisa lava vabyaka.+ 3 Hiloko Yesu a khandziya ntshava, a fika a tshama kwalaho ni vadyondzisiwa vakwe. 4 Na yona Paseka,+ ku nga nkhuvo wa Vayuda, a yi ri kusuhi. 5 Loko Yesu a vona ntshungu wu ri karhi wu ta, hiloko a vutisa Filipi a ku: “Hi nga va xavela kwihi xinkwa vanhu lava leswaku va ta dya?”+ 6 Hambiswiritano, a n’wi vutisa hi ku lava ku tiva leswi nga emianakanyweni yakwe, hikuva Yesu a a swi tiva leswi a a lava ku swi endla. 7 Filipi a n’wi hlamula a ku: “Hambiloko ho xava swinkwa hi tidenari* ta 200 a swi nge va ringani.” 8 Andriya, un’wana wa vadyondzisiwa vakwe loyi a a ri makwavo wa Simoni Petro, a ku: 9 “Hi loyi mufana loyi a nga ni swinkwa swa maxalana swa ntlhanu ni tihlampfi timbirhi letitsongo. Kambe swi nga endla yini eka vanhu vo tarisa xileswi?”+

10 Yesu a ku: “Byelani vanhu va tshama ehansi.” Hiloko vavanuna va kwalomu ka 5 000 va tshama ehansi tanihi leswi ndhawu leyi a va ri eka yona a yi ri ni byanyi.+ 11 Hiloko Yesu a teka swinkwa, a khongela kutani a nyika lava a va tshame kwalaho; a endla hilaha ku fanaka ni hi tihlampfi letitsongo, va dya va xurha. 12 Kuteloko va xurhe, Yesu a byela vadyondzisiwa vakwe a ku: “Hlengeletani leswi saleke leswaku ku nga tlangisiwi nchumu.” 13 Hiloko va swi hlengeleta, kutani va tata tibasikiti ta 12 hi swiphemu swa swinkwa swa maxalana swa ntlhanu, leswi siyiweke hi lava a va dya.

14 Loko vanhu va vona singita leri a ri endleke, va ku: “Hakunene loyi hi yena Muprofeta loyi a a fanele ku ta emisaveni.”+ 15 Kutani, hi ku tiva leswaku a va lava ku n’wi khoma va n’wi endla hosi, Yesu a suka+ a ya entshaveni a ri yexe.+

16 Nimadyambu vadyondzisiwa vakwe va ya elwandle,+ 17 va fika va khandziya xikepe, va tsemakanya lwandle va ya eKapernawume. Se a ri phumerile naswona Yesu a a nga si hlangana na vona.+ 18 Lwandle a ri sungula ku va ni magandlati lamakulu hikwalaho ka leswi a ku ri ni xidzedze.+ 19 Hambiswiritano, kuteloko va fambe kwalomu ka ntlhanu kumbe tsevu wa tikhilomitara,* va vona Yesu a famba ehenhla ka lwandle a tshinela exikepeni, hiloko va sungula ku chava. 20 Kambe a ku eka vona: “Mi nga chavi; hi mina!”+ 21 Hiloko va n’wi amukela exikepeni, kutani va fika laha a va ya kona.+

22 Hi siku leri landzelaka, ntshungu lowu a wu sale eribuweni lerin’wana wu xiye leswaku a ku nga ri na xikepe. A ku ri ni xikepe lexitsongo kambe Yesu a nga fambanga hi xona xikepe xexo ni vadyondzisiwa vakwe hikuva vadyondzisiwa vakwe va fambe va ri voxe. 23 Hambiswiritano, ku fika swikepe leswi humaka eTiberiyo ekusuhi ni ndhawu leyi va dyeleke xinkwa eka yona endzhaku ka loko Hosi yi khongerile. 24 Loko ntshungu wu vona leswaku Yesu ni vadyondzisiwa vakwe a va nga ri kona, wu khandziya swikepe swa wona wu ya eKapernawume wu ya lavana na Yesu.

25 Loko wu n’wi kuma entsungeni wa lwandle, wu te: “Rabi,*+ u fike rini laha?” 26 Yesu a wu hlamula a ku: “Hakunene ndzi tiyisile ndzi ri eka n’wina, a mi ndzi lavi hileswi mi nga vona masingita, kambe hileswi mi dyeke swinkwa mi xurha.+ 27 Mi nga tirheli swakudya leswi bolaka, kambe tirhelani swakudya leswi nyikaka vutomi lebyi nga heriki,+ leswi N’wana wa munhu a nga ta mi nyika swona; hikuva Tatana, ku nga Xikwembu, xi n’wi tiyisekisile leswaku xa n’wi rhandza.”+

28 Hiloko wu n’wi vutisa wu ku: “Hi fanele hi endla yini leswaku mitirho ya hina yi amukeleka eka Xikwembu?” 29 Yesu a wu hlamula a ku: “Xikwembu xi lava leswaku mi va ni ripfumelo eka loyi xi n’wi rhumeke.”+ 30 Hiloko wu ku eka yena: “Hi rihi singita leri u nga ta hi komba rona+ leswaku hi ta tshemba? U ta hi endlela yini? 31 Vakokwa wa hina va dye manna emananga,+ hilaha swi tsariweke hakona va ku: ‘U va nyike xinkwa xo huma etilweni leswaku va dya.’”+ 32 Yesu a ku eka wona: “Hakunene ndzi tiyisile ndzi ri eka n’wina, Muxe a nga mi nyikanga xinkwa lexi humaka etilweni, kambe Tata wa mina u mi nyika xinkwa xa ntiyiso lexi humaka etilweni. 33 Hikuva xinkwa xa Xikwembu hi loyi a xikaka hi le tilweni, a tisa vutomi emisaveni.” 34 Hiloko wu ku: “Hosi, hi nyike xinkwa lexi hi masiku.”

35 Yesu a ku: “Hi mina xinkwa xa vutomi. Loyi a taka eka mina a nge pfuki a khomiwe hi ndlala naswona loyi a nga ni ripfumelo eka mina a nge pfuki a khomiwe hi torha.+ 36 Kambe hilaha ndzi mi byeleke hakona, a mi tshembi hambileswi mi ndzi vonaka.+ 37 Hinkwavo lava Tatana a ndzi nyikaka vona va ta ta eka mina naswona a ndzi nge va hlongoli;+ 38 hikuva ndzi xike hi le tilweni+ ku ta endla ku rhandza ka loyi a ndzi rhumeke, ku nga ri ka mina.+ 39 Loyi a ndzi rhumeke u rhandza leswaku ndzi nga lahlekeriwi ni hi un’we eka lava a ndzi nyikeke vona, kambe ndzi fanele ndzi va pfuxa eka lava feke+ hi siku ro hetelela. 40 Hikuva Tata wa mina u lava leswaku loyi a amukelaka N’wana ivi a va ni ripfumelo eka yena, a kuma vutomi lebyi nga heriki,+ kutani ndzi ta n’wi pfuxa eka lava feke+ hi siku ro hetelela.”

41 Hiloko Vayuda va sungula ku n’unun’uta hi leswi a nga te: “Hi mina xinkwa lexi humaka etilweni.”+ 42 Va ku: “Xana loyi a hi Yesu n’wana wa Yosefa, loyi vatswari vakwe hi va tivaka?+ Hikwalaho ka yini a ku, ‘Ndzi huma etilweni’?” 43 Yesu a va hlamula a ku: “Tshikani ku n’unun’uta. 44 A ku na munhu loyi a nga taka eka mina handle ka loko Tatana, loyi a ndzi rhumeke, a n’wi koka+ naswona ndzi ta n’wi pfuxa eku feni hi siku ro hetelela.+ 45 Vaprofeta va tsale va ku: ‘Hinkwavo va ta dyondzisiwa hi Yehovha.’*+ Loyi a yingiseke Tatana a tlhela a dyondza u ta eka mina. 46 A ku na loyi a voneke Tatana,+ handle ka loyi a humaka eka Xikwembu; yoloye u n’wi vonile Tatana.+ 47 Hakunene ndzi tiyisile ndzi ri eka n’wina, loyi a nga ni ripfumelo u ta kuma vutomi lebyi nga heriki.+

48 “Hi mina xinkwa xa vutomi.+ 49 Vakokwa wa n’wina va dye manna emananga kambe va file.+ 50 Lexi i xinkwa lexi humaka hi le tilweni, naswona loyi a xi dyaka a nge fi. 51 Hi mina xinkwa lexi hanyaka lexi humaka hi le tilweni. Loko munhu a dya xinkwa lexi u ta hanya hilaha ku nga heriki; naswona ku tlula kwalaho, miri wa mina i xinkwa lexi ndzi nga ta xi nyikela ku ponisa vutomi bya vanhu.”+

52 Hiloko Vayuda va sungula ku kanetana, va ku: “Xana wanuna loyi a nga hi nyika nyama yakwe hi dya hi ndlela yihi?” 53 Yesu a ku eka vona: “Hakunene ndzi tiyisile ndzi ri eka n’wina, loko mi nga dyi nyama ya N’wana wa munhu mi tlhela mi nwa ngati yakwe, a mi na vutomi.*+ 54 Loyi a dyaka nyama ya mina a tlhela a nwa ngati ya mina u ni vutomi lebyi nga heriki, naswona ndzi ta n’wi pfuxa eka lava feke+ hi siku ro hetelela; 55 hikuva nyama ya mina i swakudya swa ntiyiso ni ngati ya mina i swakunwa swa ntiyiso. 56 Loyi a dyaka nyama ya mina a tlhela a nwa ngati ya mina u ni vun’we na mina, na mina ndzi ni vun’we na yena.+ 57 Ku fana ni leswi Tatana loyi a hanyaka a ndzi rhumeke naswona ndzi hanyaka hikwalaho ka yena, ni loyi a dyaka nyama ya mina, u ta hanya hikwalaho ka mina.+ 58 Lexi i xinkwa lexi humaka etilweni. A xi fani ni xinkwa lexi vakokwa wa n’wina va xi dyeke va tlhela va fa. Loyi a dyaka xinkwa lexi u ta hanya hilaha ku nga heriki.”+ 59 Swilo leswi u swi vule loko a ri karhi a dyondzisa esinagogeni* ya le Kapernawume.

60 Vadyondzisiwa vakwe vo tala loko va twa mhaka leyi, va ku: “Mhaka leyi yi tsema nhlana; a hi swi lavi ku yi twa.” 61 Kambe leswi Yesu a a swi tiva leswaku vadyondzisiwa vakwe a va n’unun’uta hi mhaka leyi, a va vutisa a ku: “Xana mhaka leyi ya mi khunguvanyisa? 62 Hikwalaho, xana mi ta endla yini loko mi vona N’wana wa munhu a tlhandlukela laha a a ri kona eku sunguleni?+ 63 Moya lowo kwetsima hi wona lowu nyikaka vutomi;+ nyama a yi tirhi nchumu. Marito lawa ndzi mi byeleke wona ma huma eka moya lowo kwetsima naswona ma ta mi nyika vutomi.+ 64 Kambe ku ni van’wana va n’wina lava nga riki na ripfumelo.” Ku sukela eku sunguleni Yesu a a va tiva lava nga riki na ripfumelo ni loyi a a ta n’wi xavisa.+ 65 Hiloko a ya emahlweni a ku: “Hi yona mhaka leyi ndzi mi byeleke ndzi ku, a nga kona loyi a nga taka eka mina handle ka loko a pfumeleriwa hi Tatana.”+

66 Hikwalaho ka sweswo, vo tala va vadyondzisiwa vakwe va tlhelela eka swilo leswi va swi siyeke,+ va nga ha fambi na yena. 67 Hiloko Yesu a vutisa lava 12 a ku: “Xana na n’wina a mi swi lavi ku famba?” 68 Simoni Petro a n’wi hlamula a ku: “Hosi, hi ta ya eka mani?+ Hi wena loyi a nga ni marito lama nga ni vutomi lebyi nga heriki.+ 69 Ha ku tshemba naswona ha swi tiva leswaku u Mukwetsimi loyi a humaka eka Xikwembu.”+ 70 Yesu a va hlamula a ku: “Xana a hi mina ndzi nga hlawula n’wina va 12?+ Kambe un’wana wa n’wina u ta ndzi xenga.”*+ 71 Kahlekahle a a vulavula hi Yudasi n’wana wa Simoni Iskariyota, hikuva hi yena loyi a a ta n’wi xavisa, hambileswi a a ri un’wana wa lava 12.+