Yeremiya
“Xana Israyele a nga na vana va majaha?
Xana a nga na mudyandzhaka?
Hikwalaho ka yini Malikomo+ a teke tiko ra Gadi?+
Hikwalaho ka yini vanhu vakwe va tshama emitini ya Israyele?”
2 “‘Hikwalaho, masiku ma ta,’ ku vula Yehovha,
‘Lawa ndzi nga ta endla leswaku ku twala huwa ya nyimpi* ku lwa na Rhaba+ wa Vaamoni.+
U ta hundzuka tshuka leri nga rhumbi,
Swimitana leswi nga ekusuhi na yena swi ta hisiwa hi ndzilo.’
‘Kutani Israyele u ta teka tiko ra lava tekeke tiko ra yena,’+ ku vula Yehovha.
3 ‘Rila wena Hexiboni hikuva Ayi u lovisiwile!
Huwelelani n’wina swimitana leswi nga ekusuhi na Rhaba.
Ambalani xiambalo* xo khwaxa.
Kalakalani mi fambafamba ematshangeni ya maribye,*
Hikuva Malikomo u ta ya evuhlongeni,
Swin’we ni vaprista va yena ni tihosana ta yena.+
4 Hikwalaho ka yini u tibuma hi mikova,
Hi tindhawu ta wena leti nga rivala leti khulukaka mati, wena nhwanyana loyi a nga tshembekiki,
Loyi a tshembaka xuma xa yena,
Loyi a nge: “I mani la nga ta ta a ta lwa na mina?”’”
5 “‘Ndzi ku tisela nchumu lowu chavisaka,’ ku vula Hosi Leyi Tlakukeke, Yehovha wa mavuthu,
‘Lowu humaka eka hinkwavo lava ku rhendzeleke.
Mi ta hangalaseriwa ematlhelweni hinkwawo,
A ku nge vi na munhu la nga ta hlengeleta lava balekaka.’”
6 “‘Kambe endzhaku ka sweswo ndzi ta hlengeleta mahlonga ya Vaamoni,’ ku vula Yehovha.”
7 Yehovha wa mavuthu u vula leswi eka Edomu:
“Xana a ka ha ri na vutlhari eTemani?+
Xana xitsundzuxo lexinene xi herile eka lava nga ni ku twisisa?
Xana vutlhari bya vona byi borile?
8 Balekani mi tlhela!
Fambani mi ya tshama emabakweni, n’wina vaaki va Dedani!+
Hikuva ndzi ta tisela Esawu khombo
Loko ku fika nkarhi wa mina wo n’wi xupula.
9 Loko a wu ngheneriwe hi vakhi va madiriva,
Xana a va nga ta siyanyana swo khwaja?
Loko a ku te makhamba nivusiku,
A ma ta onha hilaha ma lavaka hakona.+
10 Kambe ndzi ta hluvula Esawu a sala a nga ambalanga nchumu.
Ndzi ta funungula tindhawu takwe to tumbela eka tona,
Leswaku a nga tumbeli.
Vana vakwe, vamakwavo ni vaakelani vakwe va ta lovisiwa hinkwavo ka vona,+
Kutani yena a nge he vi kona.+
11 Siya vana va wena lava nga riki na tatana,
Ndzi ta va hlayisa va hanya,
Ni tinoni ta wena ti ta ndzi tshemba.”
12 Hikuva Yehovha u ri: “Waswivo! Loko lava nga gweviwangiki ku nwa xinwelo va fanele va xi nwa, xana u fanele u tshikiwa u nga xupuriwi? A wu nge tshikiwi u nga xupuriwi hikuva u fanele u xi nwa.”+
13 “Hikuva ndzi hlambanye hi mina,” ku vula Yehovha, “leswaku Bosira u ta chavisa,+ a hlekuriwa, a va rhumbi ni ndzhukano; naswona miti ya yena hinkwayo yi ta va marhumbi hilaha ku nga heriki.”+
14 Ndzi twe xiviko lexi humaka eka Yehovha,
Ku rhumeriwe muyimeri exikarhi ka matiko a ku:
“Hlengeletanani mi ta mi ta lwa na yena;
Tilunghiseleleni ku lwa.”+
15 “Waswivo! Ndzi ku endle u va lontsongo exikarhi ka matiko,
U languteriwa ehansi exikarhi ka vanhu.+
16 Ndlela leyi vanhu va ku chavaka ha yona ni ku tikukumuxa ka mbilu ya wena swa ku lahla,
Wena loyi a tshamaka emabakweni,
Loyi a tshamaka exintshabyanini xo leha.
Hambileswi u akaka xisaka xa wena ehenhla swinene ku fana ni gama,
Ndzi ta ku hawula,” ku vula Yehovha.
17 “Edomu u ta chavisa.+ Un’wana ni un’wana la hundzaka ekusuhi na yena u ta languta a chuhile ni ku ba noti hikwalaho ka makhombo ya yena hinkwawo. 18 Hilaha Sodoma na Gomora ni miti leyi nga ekusuhi na yona yi lovisiweke hakona,”+ ku vula Yehovha, “a ku na munhu loyi a nga ta tshama kona.+
19 “Waswivo! Ku fana ni nghala+ leyi taka yi huma emakhwatini lama tlhumeke ekusuhi na Yordani, ku ta ta un’wana a fika a hlasela madyelo lama sirhelelekeke, kambe hi ku copeta ka tihlo ndzi ta n’wi endla a n’wi balekela. Ndzi ta n’wi vekela murhangeri loyi ndzi n’wi hlawuleke. Hikuva i mani la fanaka na mina naswona i mani loyi a nga ndzi sivelaka? Hi wihi murisi loyi a nga yimaka emahlweni ka mina?+ 20 Hikwalaho twanani xiboho lexi Yehovha a xi endleke hi Edomu ni leswi a swi ehleketeke hi vaaki va le Temani:+
Entiyisweni swinyimpfana swi ta kokakokiwa.
U ta endla ndhawu ya swona yi va rhumbi hikwalaho ka vona.+
21 Mpfumawulo wa ku wa ka vona wu ta tsekatsekisa misava.
Ku ni xirilo!
Xi twakale ni le Lwandle ro Tshwuka.+
22 Waswivo! Ku fana ni gama u ta haha a ya ehenhla kutani a kongoma ehansi hi rivilo,+
U ta pfula timpapa takwe ehenhla ka Bosira.+
Hi siku rero mbilu ya tinhenha ta Edomu
Yi ta fana ni mbilu ya wansati la velekaka.”
“Hamati+ na Aripadi va khomiwe hi tingana,
Hikuva va twe xiviko xo biha.
Va hela matimba hikwalaho ko chava.
Lwandle ri karihile, a ri miyeteki.
24 Damaska a nga ha ri na xivindzi.
U hundzulukile a baleka, kambe u khomiwe hi ku chava.
U ni maxangu ni switlhavi,
Ku fana ni wansati la velekaka.
25 Hikwalaho ka yini muti lowu dzunisiwaka wu nga tshikiwanga,
Muti lowu tsakisaka?
26 Hikuva majaha yakwe ma ta dlayiwa erivaleni leri nga exikarhi ka muti,
Ni masocha hinkwawo ma ta lovisiwa hi siku rero,” ku vula Yehovha wa mavuthu.
27 “Ndzi ta hisa makhumbi ya Damaska hi ndzilo,
Wu ta hisa swihondzo leswi biyeleriweke swa Beni-hadadi.”+
28 Eka Kedari+ ni mifumo ya Hasora, leyi Hosi Nebukadnetsara* wa le Babilona a yi hluleke, Yehovha u ri:
“Sukani mi yima mi ya eKedari,
Mi fika mi lovisa vana va le Vuxeni.
29 Matende ya vona ni mitlhambi ya vona swi ta tekiwa,
Malapi ya vona ya matende ni swilo swa vona hinkwaswo.
Tikamela ta vona ti ta khayimiwa,
Va ta va huwelela va ku, ‘Vanhu va chava hinkwako!’”
30 “Balekani mi ya ekule!
Fambani mi ya tshama emabakweni, n’wina vaaki va le Hasora,” ku vula Yehovha.
“Hikuva Hosi Nebukadnetsara* wa le Babilona u mi bohele kungu,
Kungu ro lwa na n’wina.”
31 “Sukani mi yima, mi ya lwa ni tiko leri nga ni ku rhula,
Leri sirhelelekeke!” ku vula Yehovha.
“A ri na tinyangwa kumbe swo goga ha swona; va tshama va ri voxe.
32 Tikamela ta vona ti ta phangiwa,
Ni swifuwo swa vona swo tala.
Lava tsemetaka misisi leyi nga ematlhelo ka mombo,+
Ndzi ta va hangalasela ematlhelo hinkwawo,
Ndzi ta tisa khombo ra vona ri huma ematlhelo hinkwawo,” ku vula Yehovha.
33 “Hasora u ta va ndhawu leyi ku tshamaka timhungubye,
Rhumbi ra hilaha ku nga heriki.
A ku na munhu la nga ta tshama eka yena.”
34 Leri i rito ra Yehovha leri fikeke eka muprofeta Yeremiya mayelana na Elami+ eku sunguleni ka ku fuma ka Hosi Sedekiyasi+ wa le Yuda, ri ku: 35 “Yehovha wa mavuthu u ri, ‘Ndzi tshova vurha bya Elami,+ xihlovo* xa matimba ya vona. 36 Ndzi ta tisela Elami mimoya ya mune ku suka eka tikhona ta mune ta matilo naswona ndzi ta va hangalasela eka mimoya leyi. A ri nge vi kona tiko leri Vaelami lava hangalasiweke va nga ta ka va nga yi eka rona.’”
37 “Ndzi ta endla Vaelami va chava valala va vona ni lava lavaka ku va dlaya; ndzi ta va tisela khombo ndzi hlundzukile swinene,” ku vula Yehovha. “Ndzi ta va rhumela banga ku fikela loko ndzi va lovisa.”
38 “Kutani ndzi ta veka xiluvelo xa mina eElami+ naswona ndzi ta lovisa hosi ni tihosana ta kona,” ku vula Yehovha.
39 “Kambe exiphen’wini xo hetelela xa masiku, ndzi ta hlengeleta mahlonga ya Elami,” ku vula Yehovha.