Vaheveru
4 Hikwalaho, leswi ka ha riki ni xitshembiso xo nghena eku wiseni ka xona, a hi tivoneleni hi ku chava leswaku un’wana wa n’wina a nga tsandzeka ku fika kona.+ 2 Hikuva na hina hi byeriwe mahungu lamanene+ hilaha na vona va byeriweke wona; kambe rito leri va ri tweke a ri va pfunanga, hikuva a va nga ri na ripfumelo leri fanaka ni ra lava yingiseke. 3 Hikuva hina lava kombiseke ripfumelo ha nghena eku wiseni, hilaha xi vuleke hakona xi ku: “Hikwalaho ndzi hlambanyile ndzi hlundzukile ndzi ku, ‘A va nge ngheni eku wiseni ka mina,’”+ hambileswi mitirho ya xona a yi hetisekile hi mpfhuka misava yi va kona.+ 4 Hikuva endhawini yin’wana xi vule leswi landzelaka mayelana ni siku ra vunkombo: “Kutani Xikwembu xi wisa hi siku ra vunkombo emitirhweni ya xona hinkwayo,”+ 5 nakambe endhawini yin’wana xi ri: “A va nge ngheni eku wiseni ka mina.”+
6 Hikwalaho, tanihi leswi swi saleleke van’wana leswaku va nghena kona, naswona lava byeriweke mahungu lamanene ku sungula va nga nghenangiki hikwalaho ka ku nga yingisi,+ 7 xi tlhela xi fungha siku rin’wana hi ku vula endzhaku ka nkarhi wo leha swinene eka pisalema ya Davhida xi ku, “Namuntlha”; hilaha swi vuriweke hakona hala henhla, “Loko namuntlha mi yingisa rito rakwe, mi nga nonon’hwisi timbilu ta n’wina.”+ 8 Hikuva loko Yoxuwa+ a a va yise endhawini yo wisela eka yona, Xikwembu a xi ta va xi nga vulavulanga hi siku rin’wana endzhaku ka sweswo. 9 Kutani ku sale ku wisa hi savata ka vanhu va Xikwembu.+ 10 Hikuva munhu loyi a ngheneke eku wiseni ka Xikwembu na yena u wisile emitirhweni yakwe, tanihi leswi Xikwembu na xona xi wiseke emitirhweni ya xona.+
11 Hikwalaho a hi ringeteni hi matimba leswaku hi nghena eku wiseni koloko, leswaku ku nga vi ni munhu loyi a waka ivi a landzela xikombiso lexi fanaka xa ku nga yingisi.+ 12 Hikuva rito ra Xikwembu ra hanya naswona ri ni matimba,+ ri kariha ku tlula banga rin’wana ni rin’wana leri tsemaka hi matlhelo mambirhi,+ ri nghena endzeni ka munhu lerova ri kombisa leswi munhu a nga swona endzeni ni le handle, ri nghena emahlanganweni ni le ka mongo wa munhu naswona ra swi kota ku twisisa miehleketo ni makungu ya mbilu. 13 A ku na nchumu lowu tumbuluxiweke lowu nga vonakiki emahlweni ka xona,+ kambe swilo hinkwaswo swi lo dla, swi le rivaleni ematihlweni ya loyi hi faneleke hi tihlamulela eka yena.+
14 Hikwalaho, leswi hi nga ni muprista lonkulu swinene loyi a tsemakanyeke matilo, ku nga Yesu N’wana wa Xikwembu,+ a hi yeni emahlweni hi twarisa ripfumelo ra hina eka yena.+ 15 Hikuva muprista lonkulu loyi hi nga na yena a nge tsandzeki ku hi twela vusiwana eku tsaneni ka hina,+ hikuva u ringiwile hi tindlela hinkwato ku fana na hina kambe a nga dyohanga.+ 16 Kutani, a hi tshineleni ekusuhi ni xiluvelo xa musa lowukulu naswona hi khongela eka Xikwembu hi tshunxekile,+ leswaku hi ta kuma tintswalo ni musa lowukulu leswi nga ta hi pfuna loko hi lava mpfuno.