Vaheveru

6 Hikwalaho, hi nga yimi eka dyondzo ya masungulo+ ya Kreste kambe a hi tikarhateleni ku va lava wupfeke.+ Hi nga ha tlheli hi veka masungulo ku nga ku hundzuka eka mitirho leyi nga pfuniki nchumu ni ku va ni ripfumelo eka Xikwembu, 2 ku dyondzisa hi ta nkhuvulo ni ku tlhandleka mavoko,+ ku pfuka ka vafi+ ni ku avanyisiwa ko hetelela. 3 Leswi hi ta swi endla ntsena loko hakunene Xikwembu xi swi pfumelela.

4 Hikuva loko ku ri lava tshameke va voningeriwa,+ lava nantsweke nyiko ya mahala ya le tilweni naswona va amukeleke moya lowo kwetsima 5 lava amukeleke rito lerinene ra Xikwembu ni mikateko* leyi fambisanaka ni misava leyintshwa leyi taka, 6 kambe va tlhelela endzhaku,+ a swi koteki ku endla leswaku va tlhela va hundzuka, hikuva va tlhele va belela N’wana wa Xikwembu emhandzini ni ku n’wi khomisa tingana exikarhi ka vanhu.+ 7 Hikuva misava yi kuma nkateko lowu humaka eka Xikwembu loko yi tswonga mpfula leyi naka nkarhi ni nkarhi kutani yi humesa swimilana leswi pfunaka lava rimeriwaka swona. 8 Kambe loko yi humesa mitwa ni mahlwehlwe, a yi pfuni nchumu naswona ku nga ri khale yi ta rhukaniwa kutani yi hetelela yi hisiwile.

9 Kambe n’wina varhandziwa, ha tshemba leswaku ma antswa swinene ku tlula lava tlheleleke endzhaku naswona mi endla swilo leswi nga ta endla leswaku Xikwembu xi mi ponisa. 10 Hikuva Xikwembu xi lulamile naswona a xi nge wu rivali ntirho wa n’wina ni rirhandzu leri mi ri kombiseke hikwalaho ka vito ra xona,+ hi ku tirhela vakwetsimi naswona ma ha ya emahlweni mi va tirhela. 11 Kambe hi navela leswaku un’wana ni un’wana wa n’wina a ya emahlweni a gingiriteka hi ndlela yoleyo leswaku ntshembo wa n’wina+ wu va lowu tiyeke ku ya fika emakumu,+ 12 leswaku mi nga lolohi+ kambe mi tekelela lava dyaka ndzhaka ya switshembiso hikwalaho ka ripfumelo ni ku lehisa mbilu.

13 Hikuva loko Xikwembu xi endla xitshembiso xa xona eka Abrahama, xi hlambanye hi xona n’wini hileswi ku nga riki na munhu un’wana lonkulu eka xona,+ 14 xi ku: “Hakunene ndzi ta ku katekisa naswona ndzi ta endla leswaku vana va wena va tala.”+ 15 Kutani endzhaku ka loko Abrahama a lehise mbilu, u kume xitshembiso lexi. 16 Hikuva vanhu va hlambanya hi munhu lonkulu naswona xihlambanyo xa vona xi komba leswaku leswi va swi vulaka i ntiyiso naswona xi endla leswaku ku nga vi na ku kanetana.+ 17 Hilaha ku fanaka, loko Xikwembu xi endla xiboho xo komba vadyandzhaka va xitshembiso+ leswaku xikongomelo* xa xona a xi nge cinci, xi tiyise xikongomelo xexo hi xihlambanyo, 18 leswaku hi swilo swimbirhi leswi nga cinciki leswi ha swona swi nga kotekiki leswaku Xikwembu xi hemba,+ hina lava balekeleke endhawini yo tumbela eka yona ha khutaziwa swinene leswaku hi khomelela swi tiya eka ntshembo lowu vekiweke emahlweni ka hina. 19 Hi ni ntshembo lowu+ tanihi nsoma* wa vutomi bya hina, wu tiyile naswona wa tshembeka, wu hi nghenisa endzeni ka khetheni leri hambanisaka makamara ya tempele,+ 20 laha Yesu+ a ngheneke kona emahlweni ka hina, a hi pfulela ni ku hi lunghisela ndlela naswona u ve muprista lonkulu hilaha ku nga heriki ku fana na Melkisedeke.+