Hagayi
2 Hi siku ra vu-21 ra n’hweti ya vunkombo, Yehovha a vulavula na muprofeta Hagayi+ a ku, 2 “Ndzi kombela u vutisa Zerubabele+ n’wana wa Salatiyele, ndhunankulu ya Yuda+ na Yoxuwa+ n’wana wa Yohozadaki,+ muprista lonkulu ni vanhu lavan’wana hinkwavo u ku: 3 ‘I mani exikarhi ka n’wina loyi a voneke yindlu* leyi eku vangameni ka yona ko sungula?+ Xana mi yi vonisa ku yini sweswi? Xana a yi tluriwi hi leyo sungula hi ku vangama?’+
4 “‘Kambe vana ni xivindzi wena Zerubabele,’ ku vula Yehovha, ‘u va ni xivindzi wena Yoxuwa n’wana wa Yohozadaki muprista lonkulu.’
“‘Vanani ni xivindzi, n’wina hinkwenu vanhu va tiko,+ mi tirha,’ ku vula Yehovha.
“‘Hikuva ndzi na n’wina,’+ ku vula Yehovha wa mavuthu. 5 ‘Tsundzukani leswi ndzi mi tshembiseke swona loko mi huma eEgipta+ ni sweswi ndza ha ri na n’wina.+ Mi nga chavi.’”+
6 “Hikuva Yehovha wa mavuthu u ri, ‘Hi nkarhi lowu nga hetiki mbilu, ndzi ta tlhela ndzi tsekatsekisa matilo ni misava ni lwandle ni ndhawu leyi omeke.’+
7 “‘Ndzi ta ninginisa matiko hinkwawo, kutani swilo swa risima* swa matiko hinkwawo swi ta nghena;+ ndzi ta tata yindlu leyi hi ku vangama,’+ ku vula Yehovha wa mavuthu.
8 “‘Silivhere i ya mina ni nsuku i wa mina,’ ku vula Yehovha wa mavuthu.
9 “‘Ku vangama ka le nkarhini lowu taka ka yindlu leyi ku ta va kukulu ku tlula ka leyo sungula,’+ ku vula Yehovha wa mavuthu.
“‘Kutani endhawini leyi ndzi ta endla leswaku ku va ni ku rhula,’+ ku vula Yehovha wa mavuthu.”
10 Hi siku ra vu-24 ra n’hweti ya vukaye, hi lembe ra vumbirhi ra ku fuma ka Dariyosi, rito ra Yehovha ri fika eka muprofeta Hagayi,+ ri ku: 11 “Yehovha wa mavuthu u ri, ‘Ndzi kombela u vutisa vaprista mayelana ni nawu,+ u ku: 12 “Loko munhu o phutsela nyama yo kwetsima hi xiambalo xakwe, kutani xiambalo xakwe xi khumba xinkwa kumbe xiculu kumbe vhinyo kumbe mafurha kumbe muxaka wihi ni wihi wa swakudya, xana swi ta kwetsima?”’”
Vaprista va hlamula va ku: “E-e!”
13 Hiloko Hagayi a va vutisa a ku: “Loko munhu la nga basangiki hikwalaho ko khumba ntsumbu o khumba xin’wana xa swilo leswi, xana xi ta va lexi nga basangiki?”+
Vaprista va hlamula va ku: “Xi ta va lexi nga basangiki.”
14 Kutani Hagayi a ku: “‘Vanhu lava va tano ni tiko leri ri tano emahlweni ka mina,’ ku vula Yehovha, ‘ni swiendlo swa vona hinkwaswo swi tano; xin’wana ni xin’wana lexi va xi nyikelaka kwalaho a xi basanga.’
15 “‘Kambe ndzi kombela mi anakanyisisa hi mhaka leyi ku sukela sweswi: Loko tempele ya Yehovha+ yi nga si akiwa, 16 xana a yi ri njhani? Loko munhu a fika enhulwini ya mavele a lava mimpimo ya 20, a a kuma mimpimo ya khume ntsena; naswona loko munhu a ya laha ku endliwaka kona vhinyo leswaku a ya ka mimpimo ya 50, a a kuma mimpimo ya 20 ntsena;+ 17 ndzi onhe mitirho ya n’wina hinkwayo hi mumu, hi mfurho*+ ni hi xihangu, kambe a nga kona eka n’wina la hundzukeke,’ ku vula Yehovha.
18 “‘Ndzi kombela mi anakanyisisa hi mhaka leyi ku sukela sweswi, ku sukela hi siku ra vu-24 ra n’hweti ya vukaye, ku sukela hi siku leri masungulo ya tempele ya Yehovha ma vekiweke ha rona;+ anakanyisisani hi mhaka leyi: 19 Xana ya ha ri kona mbewu exitlatini?*+ Xana murhi wa madiriva, nkuwa, murhi wa grenada ni wa mutlhwari a yi si tswala mihandzu, a swi tano ke? Ku sukela namuntlha ndzi ta mi katekisa.’”+
20 Yehovha a tlhela a vulavula na Hagayi ra vumbirhi hi siku ra vu-24 ra n’hweti,+ a ku: 21 “Byela Zerubabele ndhunankulu ya Yuda u ku, ‘Ndzi ta ninginisa matilo ni misava.+ 22 Ndzi ta hlula swiluvelo swa mifumo, ndzi herisa matimba ya mifumo ya matiko;+ ndzi ta wisa kalichi ni vagadi va yona, tihanci ni vagadi va tona va ta dlayana hi banga.’”+
23 “‘Hi siku rero,’ ku vula Yehovha wa mavuthu, ‘ndzi ta ku teka wena nandza wa mina Zerubabele+ n’wana wa Salatiyele,’+ ku vula Yehovha, ‘ndzi ta ku endla xingwavila xo fungha ha xona, hikuva ndzi ku hlawurile,’ ku vula Yehovha wa mavuthu.”