Varhoma
16 Ndzi mi tivisa* Febe, makwerhu wa xisati loyi a tirhelaka* vandlha ra le Kenikreya,+ 2 leswaku mi n’wi amukela hi vito ra Hosi hi ndlela leyi fanelaka vakwetsimi, ni ku n’wi pfuna hi swin’wana ni swin’wana leswi a nga ha lavaka ku pfuniwa ha swona,+ hikuva na yena u pfune vo tala, ku katsa na mina.
3 Ndzi runguleleni Priska na Akhwila+ vatirhikulorhi eka Kreste Yesu, 4 lava vekeke vutomi bya vona ekhombyeni hikwalaho ka mina,+ lava nga khensiwiki hi mina ntsena kambe ni hi mavandlha hinkwawo ya vamatiko. 5 Nakambe rungulani vandlha leri hlengeletanaka endlwini ya vona.+ Rungulani Epayineto loyi ndzi n’wi rhandzaka, loyi a veke un’wana wa valandzeri vo sungula va Kreste eAsiya. 6 Rungulani Mariya loyi a mi tirheleke hi matimba. 7 Rungulani Androniko na Yuniya maxaka ya mina+ tlhelo vabohiwakulorhi, lava nga vavanuna lava tivekaka ngopfu eka vaapostola, ni lava veke ni vun’we na Kreste nkarhi wo leha ku tlula mina.
8 Ndzi runguleleni Ampliyato loyi ndzi n’wi rhandzaka eHosini. 9 Rungulani Urbano mutirhikulorhi eka Kreste na Stako loyi ndzi n’wi rhandzaka. 10 Rungulani Apele loyi a amukelekaka eka Kreste. Rungulani vandyangu wa Aristobulo. 11 Rungulani Herodiyoni xaka ra mina. Rungulani vandyangu wa Narkiso lava nga valandzeri va Hosi. 12 Rungulani Trayifina na Trayifosa, vavasati lava tirhaka hi matimba eHosini. Rungulani Persida loyi hi n’wi rhandzaka hikuva u tirhe hi matimba eHosini. 13 Rungulani Rhufasi loyi Hosi yi n’wi hlawuleke ni mana wakwe loyi a nga manana ni le ka mina. 14 Rungulani Asinkrito, Filego, Hermesi, Patroba, Hermasi ni vamakwerhu lava nga na vona. 15 Rungulani Filologo na Yuliya, Neriya ni makwavo wa xisati na Olimpa ni vakwetsimi hinkwavo lava nga na vona. 16 Xewetanani hi ku tswontswana.* Mavandlha hinkwawo ya Kreste ma mi xeweta.
17 Kutani ndza mi kombela vamakwerhu, leswaku mi tivonela eka lava vangaka ku avana ni ku tsanisa ripfumelo ra van’wana, va lwisana ni dyondzo leyi mi yi dyondzeke, fambelani ekule na vona.+ 18 Hikuva vanhu va muxaka wolowo a hi mahlonga ya Hosi ya hina Kreste kambe i ya ku navela* ka vona vini, naswona va kanganyisa timbilu ta lava nga riki na nandzu hi marito ya vona lama tsakisaka ni hi mavulavulelo ya vona lama vonakaka onge i manene. 19 Vanhu hinkwavo va swi tiva leswaku ma yingisa, sweswo swa ndzi tsakisa. Kambe ndzi lava leswaku mi tlhariha eka leswinene, mi kala nandzu eka leswo biha.+ 20 Ku nga ri khale Xikwembu lexi nyikaka ku rhula xi ta pfotlosa Sathana+ ehansi ka milenge ya n’wina. Onge musa lowukulu wa Hosi ya hina Yesu wu nga va na n’wina.
21 Timotiya mutirhikulorhi wa mi rungula na Lukiyo, Yaso na Sosipatro maxaka ya mina+ na vona va mi rungula.
22 Mina Tertiyo, loyi a tsaleke papila leri, ndza mi rungula hi vito ra Hosi.
23 Gayo+ loyi a ndzi rhurheleke, loyi vandlha hinkwaro ri hlanganaka endlwini yakwe wa mi rungula. Erasto mukhomi wa timali ta muti wa mi rungula, na Kwarto makwavo wa mi rungula. 24* ——
25 Xikwembu xi ta mi nyika matimba hikwalaho ka mahungu lamanene lawa ndzi mi byelaka wona, ku nga mahungu lawa ndzi ma chumayelaka ha Yesu Kreste, mayelana ni xihundla xo kwetsima+ lexi tshameke xi ri xihundla ku sukela khale ka khaleni. 26 Kambe sweswi xihundla lexi xi paluxiwile naswona xi paluxeriwe matiko hinkwawo hi ku tirhisa Matsalwa ya vuprofeta hi ku ya hi xileriso xa Xikwembu lexi hanyaka hilaha ku nga heriki lexi rhandzaka leswaku vanhu hinkwavo va va ni ripfumelo eka xona va tlhela va xi yingisa; 27 ku vangama a ku ve eka Xikwembu lexi ku nga xona ntsena lexi tlhariheke,+ ha Yesu Kreste hilaha ku nga heriki. Amen.