Mitirho
28 Endzhaku ka loko hi fike eribuweni hi hlayisekile, hi byeriwe leswaku vito ra xihlala xexo i Melita.+ 2 Vanhu va kwalaho* va hi kombe musa swinene. Va hi amukele hi malwandla va hi tshivelela ni ndzilo hikuva a ku na mpfula naswona a ku titimela. 3 Kambe loko Pawulo a rhotele tihunyi kutani a ti hoxa endzilweni, ku huma mhiri* hikwalaho ka ku hisa yi fika yi titsondzela evokweni rakwe. 4 Loko vanhu va kwalaho va vona nyoka evokweni rakwe va sungula ku vulavurisana va ku: “Hakunene wanuna loyi i mudlayi, hambileswi a poneke elwandle, Vululami* a byi nge n’wi tshiki a hanya.” 5 Hambiswiritano, u dzudze nyoka yoleyo yi wela endzilweni naswona a nga vavisekanga. 6 Kambe vona a va langutele leswaku u ta pfimba kumbe a wa a fela kwalaho. Endzhaku ka nkarhi wo leha, loko va vona ku nga humeleli nchumu xo biha eka yena, va cinca mianakanyo ya vona va sungula ku vula leswaku i xikwembu.
7 Ekusuhi ni ndhawu yoleyo a ku ri ni masimu ya wanuna un’wana loyi a a ri ndhuna exihlaleni xexo, loyi a vuriwaka Publiyo, u hi amukerile a tlhela a hi khoma hi malwandla ku ringana masiku manharhu. 8 Ku kumeke leswaku tata wa Publiyo a a etlele emubedweni, miri wa yena a wu hisa naswona a a khomiwe hi le ndzeni, hiloko Pawulo a ya eka yena a fika a n’wi khongelela, a n’wi tlhandleka mavoko kutani a n’wi horisa.+ 9 Endzhaku ka sweswo, vanhu hinkwavo va le xihlaleni xexo lava a va vabya va ta eka yena leswaku a ta va horisa.+ 10 Va hi nyike ni tinyiko to tala naswona loko hi khandziya xikepe va tlhele va hi longela hinkwaswo leswi a hi swi lava.
11 Endzhaku ka tin’hweti tinharhu hi khandziye xikepe lexi a xi tsariwe marito lama nge “Vana va Zewusi.” A xi huma eAleksandriya naswona a xi tshame vuxika hinkwabyo exihlaleni xexo. 12 Hi fike hi tshama ehlalukweni ra Sirakusa masiku manharhu; 13 ku suka kwalaho hi fambe hi ya fika eRegiyo. Endzhaku ka siku, ku be xidzedze lexi humaka edzongeni kutani hi famba kukondza hi ya fika ePuteyoli hi siku ra vumbirhi. 14 Kwalaho hi fike hi kuma vamakwerhu kutani va kombela leswaku hi tshama na vona masiku ya nkombo, ku suka kwalaho hi kongome eRhoma. 15 Loko vamakwerhu va twa leswaku hi fikile, va te va ta hi hlanganisa eMakete ya Apiyo ni le ndhawini leyi vuriwaka Tihotela Tinharhu. Loko Pawulo a va vona a khensa Xikwembu, a tiya nhlana.+ 16 Loko eku heteleleni hi fike eRhoma, Pawulo u pfumeleriwe ku tshama a ri yexe a rindziwe hi socha.
17 Hambiswiritano, hi siku ra vunharhu u hlengelete vakulukumba va Vayuda. Loko va hlengeletanile a ku eka vona: “Vavanuna, vamakwerhu, ndzi khomiwile eYerusalema ndzi yisiwa eka Varhoma+ hambileswi ndzi nga endlangiki nchumu lexi lwisanaka ni vanhu kumbe mindhavuko ya vakokwana.+ 18 Endzhaku ka loko va ndzi tengisile+ a va lava ku ndzi tshunxa hikuva a va kumanga xivangelo xa leswaku ndzi dlayiwa.+ 19 Kambe loko Vayuda va lwisane ni xiboho lexi a xi endliwile, ndzi boheke ku kombela ku avanyisiwa hi Khezari+ kambe ku nga ri swona leswaku a ndzi ri ni xo karhi lexi ndzi hehlaka tiko ra ka hina hi xona. 20 Kutani hikwalaho ka sweswo ndzi kombele ku mi vona ni ku vulavula na n’wina hikuva ndzi bohiwe hi tinketana hikwalaho ka ntshembo wa Israyele.”+ 21 Va n’wi hlamula va ku: “A hi kumanga mapapila lama humaka eYudiya lama vulavulaka hi wena naswona lava fikeke laha a va vulavulanga nchumu xo biha hi wena. 22 Kambe hi ehleketa leswaku swi fanerile ku va hi ku nyika nkarhi wo vulavula hi ta twa mavonelo ya wena hikuva ha swi tiva leswaku vukhongeri lebyi lebyintshwa+ byi vulavuriwa ku biha hinkwako.”+
23 Hiloko va veka siku leri va nga ta hlangana na yena ha rona, loko siku ri fika va ya laha a a tshama kona va tele. Hiloko a va hlamusela mhaka ku sukela nimixo ku ya fika nimadyambu hi ku va komba vumbhoni lebyi heleleke hi Mfumo wa Xikwembu leswaku va ta tshemba ni ku va ni ripfumelo eka Yesu,+ hi ku tirhisa Nawu wa Muxe+ ni leswi tsariweke hi Vaprofeta.+ 24 Van’wana va sungula ku tshemba leswi a a swi vula; van’wana va nga swi tshembi. 25 Leswi a va nga twanani, va sungula ku hangalaka hiloko Pawulo a ku:
“Moya lowo kwetsima a wu tiyisile loko wu byela vakokwa wa n’wina hi ku tirhisa Esaya, 26 wu ku, ‘Famba u ya byela vanhu lava u ku: “Ku twa mi ta twa kambe a mi nge twisisi, mi ta languta kambe a mi nge voni nchumu.+ 27 Hikuva timbilu ta vanhu lava ti sihalarile naswona va swi twile hi tindleve ta vona kambe va nga vuli nchumu, va tipfale matihlo leswaku va nga tshuki va vona naswona va nga twi hi tindleve ta vona, ni ku twisisa hi timbilu ta vona kutani va hundzuka leswaku ndzi va horisa.”’+ 28 Kutani swi tiveni leswaku ndlela leyi Xikwembu xi ponisaka ha yona yi ta yisiwa eka vanhu va matiko;+ hakunene va ta yi yingisa.”+ 29* ——
30 Hiloko a tshama eka yindlu leyi a yi hirhile malembe mambirhi,+ naswona a a va amukela hi musa hinkwavo lava a va n’wi endzela, 31 a va chumayela hi Mfumo wa Xikwembu ni ku va dyondzisa swilo leswi khumbaka Hosi Yesu Kreste hi ntshunxeko lowukulu*+ ku nga ri na lexi n’wi sivelaka.