Rhuti
1 Enkarhini lowu a ku fuma* vaavanyisi,+ ku ve ni ndlala etikweni. Hiloko wanuna un’wana a rhurha eBetlehema+ le Yuda a ya tshama etikweni ra Mowabu,+ yena ni nsati wakwe ni vana vakwe vambirhi va majaha. 2 Vito ra wanuna yoloye a ku ri Elimeleke,* nsati wakwe a ku ri Nawomi,* kasi vana vakwe a ku ri Mahaloni* na Khiliyoni.* A va huma emutini wa Efurata ku nga Betlehema le Yuda. Va fike va tshama etikweni ra Mowabu.
3 Hi ku famba ka nkarhi Elimeleke nuna wa Nawomi a fa, Nawomi a sala ni majaha yakwe mambirhi. 4 Majaha lawa ma teke vavasati va Vamowabu. Mavito ya vavasati lava a ku ri Orpa na Rhuti.+ Va tshame kwalaho malembe ya kwalomu ka khume. 5 Hiloko Mahaloni na Khiliyoni na vona va fa. Kutani Nawomi a va a feriwe hi vana vambirhi ni nuna. 6 Hiloko Nawomi a suka etikweni ra Mowabu ni vingi vakwe, hikuva a a swi twile a ri eMowabu leswaku Yehovha u pfune vanhu vakwe hi ku va nyika swakudya.*
7 U suke endhawini leyi a a tshama eka yona ni vingi vakwe. Loko va ri karhi va tlhelela etikweni ra Yuda, 8 Nawomi a byela vingi vakwe a ku: “Un’wana ni un’wana wa n’wina a a tlhelele eka mana wakwe. Onge Yehovha a nga mi rhandza+ hilaha mi va rhandzeke hakona vanuna va n’wina lava nga fa, ni hi ndlela leyi mi ndzi rhandzeke ha yona. 9 Onge Yehovha a nga mi hlayisa hi ku nyika un’wana ni un’wana wa n’wina nuna ni kaya.”+ Hiloko a va tswontswa kutani va sungula ku rila swinene. 10 Va phikelela va ku eka yena: “Hi ta famba na wena eka rikwenu.” 11 Kambe Nawomi a ku: “Tlhelani vana vanga. Mi nga fambi na mina. Xana ndzi nga ha swi kota ku va ni vana lava nga ta mi teka?+ 12 Mukani vana vanga. Fambani hikuva se ndzi dyuharile, a swi nge he koteki leswaku ndzi tekiwa. Hambiloko a ndzi ri ni ntshembo wa leswaku ndzi nga tekiwa vusiku lebyi, ndzi kuma vana, 13 xana a mi ta va rindza va kondza va kula? Xana a mi ta tshama mi nga ha tekiwi hi vavanuna van’wana mi rindze vona? Ndza mi twela vana vanga, hikuva Yehovha u ndzi fularherile.”+
14 Hiloko va tlhela va rila swinene, endzhaku ka sweswo Orpa a tswontswa n’wingi wakwe kutani a muka. Kambe Rhuti a nga mukangi. 15 Nawomi a ku: “Orpa loyi na yena a feriweke u tlhelele eka rikwavo ni le ka swikwembu swakwe. Famba na yena.”
16 Kambe Rhuti a ku: “U nga ndzi tlherisi; hikuva laha u yaka kona, ndzi ta ya kona, laha u etlelaka kona ndzi ta etlela kona. Vanhu va ka n’wina va ta va vanhu va ka hina ni Xikwembu xa wena xi ta va Xikwembu xa mina.+ 17 Laha u nga ta fela kona, ndzi ta fela kona, ndzi tlhela ndzi lahliwa kona. Yehovha a ndzi xupule loko ho hambanisiwa hi swin’wana handle ka rifu.”
18 Loko Nawomi a vona leswaku Rhuti a a ala ku tlhela, a nga ha vulanga nchumu. 19 Hiloko havambirhi va khoma ndlela va ya eBetlehema.+ Loko va fika eBetlehema, vanhu hinkwavo va va hlamala, kutani vavasati va ku: “Xana i Nawomi loyi?” 20 Yena a hlamula vavasati lava a ku: “Mi nga ndzi vitani Nawomi.* Ndzi viteni Mara,* hikuva Lowa Matimba Hinkwawo u ndzi tikisele vutomi.+ 21 Loko ndzi famba a ndzi ri na hinkwaswo kambe Yehovha u endle leswaku ndzi vuya ximandlamandla. Hikwalaho ka yini ma ha ndzi vitana Nawomi, kasi i Yehovha Lowa Matimba Hinkwawo loyi a ndzi fularheleke, a ndzi vangela khombo?”+
22 Nawomi a vuya hi ndlela yoleyo ku suka etikweni ra Mowabu,+ a ri ni n’wingi wakwe Rhuti wa Mumowabu. Va fike eBetlehema eku sunguleni ka ntshovelo wa maxalana.+