Mitirho
14 Kuteloko va ri eIkoniya va nghena esinagogeni ya Vayuda kutani va vulavula hi ndlela leyi endleke leswaku Vayuda vo tala ni Magriki yo tala va va vapfumeri. 2 Kambe Vayuda lava nga pfumelangiki va hlohlotela vanhu va matiko ni ku va endla va venga Pawulo na Barnaba.+ 3 Hiloko va heta nkarhi wo leha va vulavula hi vurhena hikwalaho ka matimba lawa Yehovha* a va nyikeke wona, loyi a nyikeleke vumbhoni mayelana ni rito ra musa wakwe lowukulu hi ku pfumelela leswaku va endla masingita ni swikombiso.+ 4 Hambiswiritano, vanhu vo tala va le mutini a va avanile; van’wana a va yima ni Vayuda kasi van’wanyana a va yima ni vaapostola. 5 Loko vanhu va matiko ni Vayuda ku katsa ni vafumi va vona va ringete ku va endla swo biha ni ku va khandla hi maribye,+ 6 va lumiwe ndleve hi mhaka leyi, kutani va balekela emitini ya Likawoniya, Listra ni le Derbe swin’we ni le tindhawini leti nga ekusuhi.+ 7 Va ye emahlweni va chumayela mahungu lamanene kwalaho.
8 EListra a ku ri ni wanuna un’wana loyi a tshame ehansi loyi a a lamale milenge. U tswariwe a lamarile naswona a a nga si tshama a famba. 9 Wanuna loyi a a yingisele Pawulo loko a ri karhi a vulavula. Pawulo a n’wi langutisisa kutani a vona leswaku a a ri ni ripfumelo ra leswaku u ta horisiwa,+ 10 a vulavula hi rito lerikulu a ku: “Suka u yima hi milenge ya wena.” Kutani wanuna loyi a tlula a sungula ku famba.+ 11 Loko mitshungu yi vona leswi Pawulo a swi endleke, yi huwelela hi ririmi ra Valikawoniya yi ku: “Swikwembu se swi fana ni vanhu naswona swi xikele eka hina!”+ 12 Hiloko va sungula ku vitana Barnaba va ku i Zewusi, kasi Pawulo va ku i Hermesi, hikuva hi yena loyi a a rhangela eku vulavuleni. 13 Muprista wa Zewusi, loyi tempele yakwe a yi ri enyangweni ya muti, a tisa tinkuzi ni tiharhi* to saseka etigedeni naswona a a lava ku endla magandzelo ni mitshungu.
14 Hambiswiritano, loko muapostola Barnaba na muapostola Pawulo va swi twa, va handzula swiambalo swa vona va nghena exikarhi ka ntshungu va huwelela va ku: 15 “Vavanuna, xana mi swi endlela yini swilo leswi? Na hina hi vanhu lava nga ni vulema lebyi fanaka ni bya n’wina.+ Hi mi byela mahungu lamanene leswaku mi ta tshika swilo leswi, leswi nga pfuniki nchumu mi tlhelela eka Xikwembu lexi hanyaka, lexi endleke tilo ni misava ni lwandle ni swilo hinkwaswo leswi nga eka swona.+ 16 Enkarhini lowu hundzeke xi pfumelele matiko hinkwawo ma famba hi tindlela ta wona,+ 17 hambileswi xi nga titshikangiki xi nga ri na vumbhoni+ bya leswaku xi endle leswinene, xi mi nisela timpfula ni ku mi nyika tinguva ta ndzalo,+ xi mi phamela mi xurha ni ku tsakisa timbilu ta n’wina.”+ 18 Kambe hambiloko va vule swilo leswi, a va swi kotanga ku sivela mitshungu leswaku yi nga va endleli magandzelo.
19 Kambe ku fika Vayuda lava humaka eAntiyoka ni le Ikoniya va kucetela mitshungu,+ hiloko yi khandla Pawulo hi maribye yi n’wi kokakokela ehandle ka muti, yi ehleketa leswaku u file.+ 20 Hambiswiritano, loko vadyondzisiwa va n’wi rhendzerile a tlakuka a nghena emutini. Hi siku leri landzelaka a famba na Barnaba va ya eDerbe.+ 21 Endzhaku ko chumayela mahungu lamanene emutini wolowo ni ku endla vanhu vo hlayanyana vadyondzisiwa, va tlhelele eListra, Ikoniya ni le Antiyoka. 22 Loko va ri kwalaho va tiyise vadyondzisiwa,+ va va khutaza ku tshama va ri ni ripfumelo leri tiyeke va ku: “Hi fanele ku nghena eMfun’weni wa Xikwembu hi maxangu yo tala.”+ 23 Va tlhela va va hlawulela vakulu eka vandlha ha rin’we,+ va khongela ni ku titsona swakudya,+ va va nyikela eka Yehovha* loyi va veke vapfumeri eka yena.
24 Kutani va tsemakanya hi le Pisidiya va ya fika ePamfiliya,+ 25 endzhaku ko chumayela rito ra Xikwembu ePerge, va ye eAtaliya. 26 Ku suka kwalaho va khandziye xikepe va ya eAntiyoka, laha Xikwembu xi va kombeke musa lowukulu hikwalaho ka ntirho lowu se a va wu endlile.+
27 Endzhaku ka loko va fikile naswona va hlengelete vandlha, va ri byele swilo swo tala leswi Xikwembu xi swi endleke hi ku tirhisa vona ni leswaku xi pfulele vamatiko ndlela* leswaku va va vapfumeri.+ 28 Hiloko va tshama nkarhi wo leha ni vadyondzisiwa.