Vatesalonika Wo Sungula

5 Vamakwerhu loko ku ri ta mikarhi ni tinguva, a mi lavi ku tsaleriwa nchumu hi mhaka yoleyo. 2 Hikuva mi swi tiva kahle leswaku siku ra Yehovha*+ ri ta ku fana ni khamba nivusiku.+ 3 Loko va ku, “Ku ni ku rhula ni nsirhelelo,” kutani va ta lovisiwa hi xitshuketa+ ku fana ni switlhavi swa ku veleka eka wansati la tikeke, naswona a va nge baleki nikatsongo. 4 Kambe n’wina vamakwerhu, a mi le munyameni lerova siku rero ri nga mi juma hilaha ku tlhava ka dyambu ku jumaka makhamba ha kona, 5 hikuva hinkwenu mi vana va ku vonakala ni vana va nhlikanhi.+ Hina a hi vana va vusiku kumbe va munyama.+

6 Hikwalaho, hi nga etleli ku fana ni lavan’wana hinkwavo lava etlelaka,+ kambe a hi tshameni hi xalamukile+ hi tirhisa mianakanyo ya hina.+ 7 Hikuva lava etlelaka va etlela nivusiku ni lava dakwaka va dakwa nivusiku.+ 8 Kambe loko ku ri hina va nhlikanhi, a hi tirhiseni mianakanyo ya hina naswona hi ambala xisirhelelo xa xifuva xa ripfumelo ni rirhandzu, kutani ntshembo wa ku ponisiwa wu va xihuku* xa hina+ 9 hikuva Xikwembu a xi hi hlawulelanga ku hi xupula* kambe xi hi hlawule leswaku hi ponisiwa+ hi ku tirhisa Hosi ya hina Yesu Kreste. 10 U hi ferile,+ leswaku hambi hi hanya kumbe hi file, hi fanele hi hanya swin’we na yena.+ 11 Hikwalaho, yanani emahlweni mi khutazana* ni ku akana,+ hilaha mi endlaka hakona.

12 Kutani ha mi kombela vamakwerhu, leswaku mi xixima lava tirhaka hi matimba exikarhi ka n’wina, lava va mi kongomisaka eHosini, lava va mi tsundzuxaka; 13 ni ku va xixima swinene hi rirhandzu hikwalaho ka ntirho wa vona.+ Hinkwenu mi hanyisana hi ku rhula.+ 14 Ha mi kombela vamakwerhu, tsundzuxani lava nga hlelekangiki,+ chavelelani lava karhatekeke,* seketelani lava tsaneke, mi va lehisela mbilu hinkwavo.+ 15 Tiyisekani leswaku a ku na munhu loyi a tlheriselaka swo biha hi swo biha eka van’wana,+ kambe mikarhi hinkwayo mi endlelana leswinene mi tlhela mi endlela ni lavan’wana hinkwavo.+

16 Tshamani mi tsakile.+ 17 Khongelani mikarhi hinkwayo.+ 18 Khensani swilo hinkwaswo.+ Leswi i ku rhandza ka Xikwembu ha n’wina eka Kreste Yesu. 19 Mi nga siveli moya wa Xikwembu ku tirha eka n’wina.+ 20 Mi nga sandzi vuprofeta.+ 21 Kambisisani swilo hinkwaswo;+ khomelelani swi tiya eka leswinene. 22 Papalatani swilo hinkwaswo swo homboloka.+

23 Onge Xikwembu xa ku rhula xi nga mi kwetsimisa hi ku helela. Naswona onge timfanelo hinkwato letinene leti mi ti kombisaka ni vutomi bya n’wina ni miri wa n’wina swi nga hlayisiwa swi tshama swi nga ri na xisolo ku fikela enkarhini wa ku vuya ka Hosi ya hina Yesu Kreste.+ 24 Loyi a mi vitanaka wa tshembeka naswona u ta endla tano hakunene.

25 Vamakwerhu, mi nga tshiki ku hi khongelela.+

26 Xewetani vamakwerhu hinkwavo hi ku tswontswana.*

27 Ndza mi kombela swinene hi vito ra Hosi leswaku papila leri ri hlayeriwa vamakwerhu hinkwavo.+

28 Musa lowukulu wa Hosi ya hina Yesu Kreste a wu ve na n’wina.