Mpfuno Lowu Humaka Eka ‘Xikwembu Xa Nchavelelo’

HOSI DAVHIDA a a ri wanuna la xanisekeke swinene a tlhela a va ni ‘miehleketo yo tala leyi karhataka.’ Kambe, a a tiyiseka leswaku Muvumbi wa hina wa hi twisisa hi tindlela hinkwato. U tsarile: “Oho Yehovha, u ndzi lavisisile, naswona wa ndzi tiva. Wena u tiva ku tshama ka mina ni ku yima ka mina. U ehleketisise hi miehleketo ya mina u ri ekule. Hikuva a ri kona rito eririmini ra mina, kambe waswivo, Wena Yehovha, ana se u swi tiva hinkwaswo.”—Pisalema 139:1, 2, 4, 23.

Na hina hi nga tiyiseka leswaku Muvumbi wa hina wa hi twisisa a tlhela a twisisa vuyelo lebyi hetaka matimba lebyi ntshikilelo wa mianakanyo wu nga vaka na byona emianakanyweni ni le mimirini ya hina leyi nga hetisekangiki. Wa swi tiva leswi vangaka ntshikilelo wa mianakanyo ni leswaku hi nga langutana njhani ni swiyimo sweswo. Ku tlula kwalaho, u paluxe ndlela leyi a nga ta herisa ntshikilelo wa mianakanyo ha yona hilaha ku nga heriki. A ku na munhu un’wana la nga hi pfunaka ku tlula “Xikwembu [xa hina lexi nga ni ntwela-vusiwana], lexi chavelelaka xi tlhela xi khutaza ni ku phyuphyisa ni ku nyika lava nga ni ntshikilelo wa mianakanyo ntshembo.”—2 Vakorinto 7:6, The Amplified Bible.

Kambe lava tshikilelekeke emianakanyweni va nga ha tivutisa leswaku Xikwembu xi nga va pfuna njhani loko va titwa va karhatekile.

◼ Xana lava tshikilelekeke emianakanyweni va nga swi kota ku tshinela eka Xikwembu?

Xikwembu xi le kusuhi swinene ni malandza ya xona lama tshikilelekeke emianakanyweni, onge hiloko xi tshama ni lava “pfotlokeke ni lava va moya wo titsongahata, leswaku [xi] hanyanyisa moya wa lava va titsongahataka ni ku hanyanyisa mbilu ya lava va pfotlosiwaka.” (Esaya 57:15) Hakunene swa chavelela ku tiva leswaku “Yehovha u le kusuhi ni lava va tshovekeke mbilu; ni lava va pfotlokeke emoyeni wa va ponisa.”—Pisalema 34:18.

◼ Lava tshikilelekeke emianakanyweni va nga chaveleriwa njhani hi Xikwembu?

Malandza ya Xikwembu ma nga khongela nkarhi wun’wana ni wun’wana eka “Mutwi wa xikhongelo,” loyi a nga hi pfunaka leswaku hi langutana ni maxangu ni swiyimo leswi tshikilelaka. (Pisalema 65:2) Bibele yi hi khutaza leswaku hi chulula timbilu ta hina eka xona yi ku: “Mi nga vileli ha nchumu, kambe eka hinkwaswo tivisani Xikwembu swikombelo swa n’wina hi xikhongelo ni xikombelo swin’we ni ku nkhensa swikombelo swa n’wina; kutani ku rhula ka Xikwembu loku tlulaka miehleketo hinkwayo ku ta rindza timbilu ta n’wina ni matimba ya n’wina ya mianakanyo ha Kreste Yesu.”—Vafilipiya 4:6, 7.

◼ Hi nga endla yini loko hi ehleketa leswaku Xikwembu a xi swi yingisi swikhongelo swa hina hileswi hi titwaka hi nga pfuni nchumu?

Ntshikilelo wa mianakanyo wu nga ha endla leswaku hi gimeta hi ku vula leswaku matshalatshala lawa hi ma endlaka yo tsakisa Xikwembu a ma pfuni nchumu. Hambiswiritano, Tata wa hina wa le tilweni wa yi twisisa ndlela leyi hi titwaka ha yona, “wa tsundzuka leswaku hi ntshuri.” (Pisalema 103:14) Hambiloko ‘timbilu ta hina ti nga hi sola,’ hi nga ‘khorwisa timbilu ta hina’ leswaku “Xikwembu i xikulu eka timbilu ta hina naswona xi tiva swilo hinkwaswo.” (1 Yohane 3:19, 20) Hikwalaho, eswikhongelweni swa wena u nga tirhisa swiga leswi u swi hlayeke etindzimaneni ta Bibele to tanihi Pisalema 9:9, 10; 10:12, 14, 17; na 25:17.

◼ Hi nga endla yini loko hi tshikileleke ngopfu lerova hi tsandzeka ku phofula ndlela leyi hi titwaka ha yona?

Loko u karhateke swinene lerova u tsandzeka ku vulavula mhaka leyi twalaka, u nga heli matimba! Tshama u ri karhi u vulavurisana ni “Tatana la nga ni tintswalo letikulu tlhelo Xikwembu xa nchavelelo hinkwawo,” u ri karhi u swi tiva leswaku wa yi twisisa ndlela leyi u titwaka ha yona ni leswi u swi lavaka. (2 Vakorinto 1:3) Maria, loyi ku vulavuriweke ha yena exihlokweni xo sungula xa nxaxamelo lowu, u ri: “Minkarhi yin’wana, loko ndzi pfilunganyekile swinene a ndzi swi tivi leswaku ndzi ta khongela ndzi ku yini. Kambe ndza swi tiva leswaku Xikwembu xa twisisa naswona xa ndzi pfuna.”

◼ Xikwembu xi swi hlamula njhani swikhongelo swa hina?

Bibele a yi vuli leswaku Xikwembu xi ta susa swiphiqo swa hina hinkwaswo sweswi. Hambiswiritano, Xikwembu xi hi nyika matimba yo tiyisela “swilo hinkwaswo”—ku katsa ni ntshikilelo wa mianakanyo. (Vafilipiya 4:13) Martina u ri: “Loko ndzi khomiwa hi ntshikilelo wa mianakanyo ro sungula, ndzi khongele eka Yehovha leswaku a ndzi tshungula hi nkarhi wolowo hikuva a ndzi anakanya leswaku a ndzi nga ta swi kota ku wu tiyiselela. Kambe sweswi ndzi khongelela matimba yo wu tiyiselela siku ni siku.”

Matsalwa ma ni matimba lama humaka eka Xikwembu, lama pfunaka vanhu lava khomiweke hi ntshikilelo wa mianakanyo leswaku va wu tiyiselela. Sarah, loyi a tiyiseleke ntshikilelo wa mianakanyo ku ringana malembe ya 35, u vone swi pfuna swinene ku hlaya Bibele siku ni siku. U ri: “Ndzi swi tlangela swinene leswi madokodela ma ndzi endleleke swona. Kambe, xa nkoka ngopfu ndzi xiye ndlela leyi ku hlaya Rito ra Xikwembu swi ndzi pfuneke ha yona ku va ni vuxaka lebyikulu na Yehovha ni ku tiyiselela vuvabyi lebyi. Ndzi titolovete ku ri hlaya.”

Ntshikilelo Wa Mianakanyo Wu Ta Heriseriwa Makumu!

Loko Yesu Kreste a ri laha misaveni u kombise matimba lawa a nyikiweke hi Xikwembu yo tshungula mavabyi lama vavaka. Yesu a a tiyimiserile ku hanyisa vanhu lava a va ri ni mavabyi lama chavisaka. Ku engetela kwalaho, u swi tiva kahle leswaku swi njhani ku tshikileleka emianakanyweni. Hi vusiku bya le mahlweni ka siku leri a a ta dlayiwa ha rona hi ndlela yo vava, “Kreste u endle swikombelo ni swikhongelo eka Loyi a a swi kota ku n’wi ponisa eku feni, hi swirilo swa matimba ni mihloti.” (Vaheveru 5:7) Hambileswi Yesu a a tshikilelekile hi nkarhi wolowo, ha vuyeriwa sweswi hikuva “wa swi kota ku ta pfuna lava ringiwaka.”—Vaheveru 2:18; 1 Yohane 2:1, 2.

Bibele yi paluxa leswaku Xikwembu xi tiyimisele ku herisa swiyimo hinkwaswo leswi tshikilelaka leswi endlaka leswaku vanhu va va ni ntshikilelo wa mianakanyo. Xa tshembisa: “Ndzi tumbuluxa matilo lamantshwa ni misava leyintshwa; swilo swo sungula a swi nge tsundzukiwi, hambi embilwini a swi nge ti. Kambe khanani, mi tsaka hi masiku hikwalaho ka leswi ndzi swi tumbuluxaka.” (Esaya 65:17, 18) “Matilo lamantshwa,” ku nga Mfumo wa Xikwembu, wu ta vuyetela “misava leyintshwa,” ku nga vanhu vo lulama emisaveni, leswaku va va ni mimiri, mintlhaveko ni vuxaka lebyi hetisekeke ni Xikwembu. Mavabyi hinkwawo ma ta heriseriwa makumu.

[Marito lama tshahiweke exihlokweni lama nga eka tluka 9]

“Oho Yehovha, ndzi huwelele vito ra wena ndzi ri emugodini lowu enteke ngopfu. U fanele u twa rito ra mina. U nga fihli ndleve ya wena leswaku u ndzi wisisa, u ndzi twa loko ndzi kombela ku pfuniwa. U tshinerile esikwini leri ndzi ku vitaneke ha rona. U te: ‘U nga chavi.’”—Swirilo 3:55-57

[Bokisi/Swifaniso leswi nga eka tluka 7]

‘VULAVULANI HI KU CHAVELELA EKA LAVA TSHIKILELEKEKE’

Loko Barbara swi n’wi tikela ku tiyisela ntshikilelo wa mianakanyo ni ku titwa a nga pfuni nchumu, yena ni nuna wa yena va bela Gerard riqingho, loyi a nga munghana wa vona tlhelo mulanguteri la nga Mukreste. Minkarhi hinkwayo u yingisela hi mbilu hinkwayo loko Barbara a ri karhi a rila hi mbitsi a tlhela a phindha swilo leswi n’wi karhataka leswi a tshameke a swi vula.

Gerard u dyondze ku yingisela handle ko avanyisa, ku kaneta kumbe ku sola. (Yakobo 1:19) U dyondze ku ‘vulavula hi ku chavelela eka lava tshikilelekeke’ hilaha Bibele yi tsundzuxaka hakona. (1 Vatesalonika 5:14) U lehisa mbilu a tiyisekisa Barbara leswaku i wa risima swinene eka Yehovha Xikwembu, eka ndyangu wa yena ni le ka vanghana va yena. Hi ntolovelo u hlaya ndzimana yin’we kumbe timbirhi leti chavelelaka ta le Bibeleni, hambiloko a tshame a n’wi hlayela tona. Minkarhi hinkwayo u kombela ku khongela na yena swin’we ni nuna wa yena eriqinghweni, ku nga nchumu lowu minkarhi hinkwayo wu va khutazaka swinene.—Yakobo 5:14, 15.

Gerard u swi tiva kahle leswaku yena a hi dokodela, naswona a nga ringeti ku endla ntirho wa madokodela ya Barbara. Kambe yena u engetela eka vutshunguri bya yena nchumu lowu ku nga madokodela ma nga ri mangani lama nga wu endlaka, ku nga matsalwa lama khutazaka ni swikhongelo leswi chavelelaka.

Ku ‘vulavula hi ku chavelela eka lava tshikilelekeke’

U nga ha ku: “A ndzi lava ku ku byela leswaku a ndzi ri karhi ndzi anakanya ha wena. Ndza swi tiva leswaku minkarhi yo tala a wu titwi kahle. Xana u titwa njhani masiku lawa?”

Tsundzuka: Vulavula swi huma embilwini naswona u yingisela u ri ni ntwela-vusiwana, hambiloko munhu la nga ni ntshikilelo wa mianakanyo a vula swilo leswi a tshameke a swi vula.

U nga ha ku: “Ndzi hlamarisiwa hi swilo leswi u kotaka ku swi endla (kumbe “Ndzi tsakisiwa hi timfanelo ta Vukreste leti u ti kombisaka”) hambileswi u nga ni swiphiqo swa rihanyo. Hambileswi u navelaka onge u nga endla leswi engetelekeke, Yehovha wa ku rhandza naswona u wa nkoka eka yena, na hina ha ku rhandza naswona u wa nkoka eka hina.”

Tsundzuka: Vana ni ntwela-vusiwana ni musa.

U nga ha ku: “Ndzi hlaye tsalwa leri leri khutazaka.” Kumbe “A ndzi anakanya hi wena loko ndzi ri karhi ndzi hlaya hi ku phindha-phindha ndzimana leyi ndzi yi rhandzaka swinene ya le Bibeleni.” Kutani yi hlaye ndzimana ya kona kumbe u yi tshaha kunene.

Tsundzuka: Papalata ku vulavula hi rito leri kombisaka onge u le ku nyikeleni ka ndzayo.

[Bokisi leri nga eka tluka 9]

Nchavelelo Lowu Humaka eMatsalweni

Lorraine u tiyisiwe hi xitshembiso xa Yehovha lexi kumekaka eka Esaya 41:10, lexi nge: “U nga chavi, hikuva ndzi na wena. U nga languti ematlhelweni, hikuva mina ndzi Xikwembu xa wena. Ndzi ta ku nyika matimba. Kunene ndzi ta ku pfuna. Kunene ndzi ta ku khoma swi tiya hi voko ra mina ra xinene ra ku lulama.”

Álvaro u vule leswaku minkarhi yo tala a a chaveleriwa hi marito ya Pisalema 34:4, 6 lama nge: “Ndzi vutise Yehovha, kutani a ndzi hlamula, u ndzi kutsurile eku chaveni ka mina hinkwako. Loyi a xanisekaka u vitanile, Yehovha a n’wi twa. Kutani U n’wi ponisile emaxangwini yakwe hinkwawo.”

Naoya u vula leswaku minkarhi hinkwayo loko a hlaya Pisalema 40:1, 2 a yi n’wi chavelela: “Ndzi tshemba Yehovha hi mbilu ya mina hinkwayo, kutani u voyamisele ndleve yakwe eka mina, a yingisa loko ndzi kombela ku pfuniwa. . . . A simeka milenge ya mina yi tiya.”

Pisalema 147:3 yi tiyisekise Naoko leswaku Yehovha “u horisa vanhu lava timbilu ta vona ti vavisekeke, naswona u boha timbanga ta vona leti vavaka.”

Marito ya Yesu lama kumekaka eka Luka 12:6, 7 ma pfune Eliz ku tshemba leswaku Yehovha u ta n’wi khathalela: “Ntlhanu wa swindzingiri swi xavisiwa hi timali timbirhi ta nsimbi ta risima leritsongo, a hi swona ke? Kambe ku hava ni xin’we xa swona lexi rivalekaka emahlweni ka Xikwembu. Kambe ni misisi ya tinhloko ta n’wina yi hlayiwile hinkwayo. Mi nga chavi; mi ni risima ro tlula swindzingiri swo tala.”

Tindzimana tin’wana ta Bibele:

Pisalema 39:12: “Oho Yehovha, yingisa xikhongelo xa mina, naswona ndzi yingise loko ndzi kombela ku pfuniwa. U nga miyeli loko ndzi rila.”

2 Vakorinto 7:6: Xikwembu xi “chavelela lava tshikilelekeke.”—“New American Standard Bible.”

1 Petro 5:7: “Mi lahlela ku vilela hinkwako ka n’wina eka [Xikwembu], hikuva xa mi khathalela.”