Tikronika Ta Vumbirhi

33 Manase+ a a ri ni malembe ya 12 loko a va hosi, u fume malembe ya 55 eYerusalema.+

2 U dyohele Yehovha, a tekelela mikhuva leyi nyenyetsaka ya matiko lawa Yehovha a ma hlongoleke emahlweni ka Vaisrayele.+ 3 U pfuxe tindhawu leti tlakukeke leti tata wakwe Hezekiya a a ti hirimuxile,+ a endlela Bali tialtari, a endla ni timhandzi ta Axera,* a tlhela a khinsamela vuthu hinkwaro ra le tilweni a ri tirhela.+ 4 U tlhele a aka tialtari endlwini ya Yehovha,+ laha Yehovha a vuleke a ku: “Vito ra mina ri ta va eYerusalema hilaha ku nga heriki.”+ 5 A akela vuthu hinkwaro ra le tilweni tialtari eswivaveni* swimbirhi swa yindlu ya Yehovha.+ 6 A hisa vana vakwe hi ndzilo+ a endla magandzelo ha vona eNkoveni wa N’wana wa Hinomu;+ a endla masalamusi,+ a hlahluva, a endla swa vuloyi ni ku tlhela a veka vangoma ni vavhumbi.+ U endle swilo swo biha swinene emahlweni ka Yehovha leswaku a n’wi hlundzukisa.

7 U veke xifaniso lexi vatliweke lexi a xi endleke endlwini ya Xikwembu+ xa ntiyiso, leyi xi byeleke Davhida na Solomoni n’wana wakwe xi ku: “Endlwini leyi ni le Yerusalema, leyi ndzi yi hlawuleke eka tinyimba hinkwato ta Israyele, ndzi ta veka vito ra mina hilaha ku nga heriki.+ 8 A ndzi nge he tlheli ndzi susa Vaisrayele va ya ekule ni tiko leri ndzi ri nyikeke vakokwa wa vona, ntsena loko vo endla hinkwaswo leswi ndzi va leriseke swona, va yingisa Nawu ni swiboho leswi Muxe a va leriseke swona.” 9 Manase a ya emahlweni a hambukisa Vayuda ni vaaki va Yerusalema, lerova va dyoha swinene ku tlula matiko lawa Yehovha a ma loviseke emahlweni ka Vaisrayele.+

10 Yehovha a a tshamela ku vulavula na Manase ni vanhu vakwe ko tala, kambe a va n’wi yingisanga.+ 11 Hiloko Yehovha a va xupula hi ku tirhisa tindhuna ta vuthu ra hosi ya Asiriya, ti khome Manase hi swiove ti n’wi boha hi tinketana timbirhi ta koporo ti n’wi yisa eBabilona. 12 Loko a twa ku vava, a kombela Yehovha Xikwembu xakwe leswaku a n’wi rivalela, kutani a tshamela ku tisola* swinene eka Xikwembu xa vakokwa wakwe. 13 A ya emahlweni a N’wi khongela kutani A khumbiwa hi xikombelo xa yena lerova A yingisa xikhongelo xakwe, kutani A n’wi tlherisela vuhosi byakwe eYerusalema.+ Hiloko Manase a swi tiva leswaku Yehovha i Xikwembu xa ntiyiso.+

14 Endzhaku ka sweswo a aka khumbi ehandle ka Muti wa Davhida+ hi le vupeladyambu bya Gihoni+ enkoveni ku ya eGedeni ya Tihlampfi,+ a ri fambisa ku ya fika eOfeli, a ri aka ri tlakuka swinene.+ Ku tlula kwalaho, a veka tindhuna ta masocha emitini hinkwayo leyi biyeriweke eYuda. 15 Endzhaku ka sweswo a susa swikwembu swa matiko ni xifaniso lexi a xi ri endlwini ya Yehovha+ ni tialtari hinkwato leti a ti akeke entshaveni leyi yindlu ya Yehovha+ yi akiweke eka yona ni le Yerusalema, a swi cukumeta ehandle ka muti. 16 A tlhela a lulamisa altari ya Yehovha,+ a sungula ku endla magandzelo yo kombela ku rhula+ ni magandzelo yo khensa+ eka yona, kutani a byela Vayuda leswaku va gandzela Yehovha Xikwembu xa Israyele. 17 Nilokoswiritano, vanhu a va ha endla magandzelo etindhawini leti tlakukeke, kambe a va endlela Yehovha Xikwembu xa vona ntsena.

18 Loko ku ri matimu ya Manase hinkwawo, xikhongelo xakwe lexi yaka eka Xikwembu xakwe, marito ya lava vonaka swivono, lava vulavuleke na yena va rhumiwe hi Yehovha Xikwembu xa Israyele, swi tsariwile eka matimu ya tihosi ta Israyele. 19 Nakambe xikhongelo+ xakwe ni ndlela leyi xikombelo xakwe xi hlamuriweke ha yona, swidyoho swakwe hinkwaswo ni ndlela leyi a hambukeke ha yona,+ laha a akeke tindhawu leti tlakukeke ivi a veka timhandzi ta Axera*+ ni swifaniso leswi vatliweke a nga si tisola, swi tsariwe hi lava a va n’wi hlamusela swivono. 20 Hiloko Manase a fa a lahliwa ni vakokwa wakwe, u lahliwe endlwini yakwe; kutani Amoni n’wana wakwe a sungula ku fuma.+

21 Amoni+ a a ri ni malembe ya 22 loko a va hosi, u fume malembe mambirhi eYerusalema.+ 22 U endle swo biha emahlweni ka Yehovha, hilaha Manase tata wakwe a endleke hakona;+ Amoni a a gandzela swifaniso hinkwaswo leswi endliweke+ hi Manase tata wakwe naswona a nga tshikanga ku swi gandzela. 23 Kambe a nga tisolanga* eka Yehovha+ ku hambana ni tata wakwe Manase loyi a tisoleke;*+ ematshan’weni ya sweswo Amoni u dyohe no tlurisa. 24 Eku heteleleni malandza yakwe ma n’wi bohela xikungu+ kutani ma n’wi dlaya endlwini yakwe. 25 Kambe vanhu va tiko va dlaya hinkwavo lava dlayeke Hosi Amoni+ kutani va veka Yosiya+ n’wana wakwe leswaku a va hosi.