Vaefesa
5 Hikwalaho, leswi mi nga vana lava rhandzekaka tekelelani Xikwembu,+ 2 mi ya emahlweni mi rhandzana,+ ku fana ni leswi Kreste na yena a hi* rhandzeke+ a tlhela a tinyiketa hikwalaho ka hina,* a va gandzelo leri nun’hwelaka eka Xikwembu.+
3 Ku tikhoma ko biha hi swa masangu* ni thyaka ra muxaka wun’wana ni wun’wana kumbe makwanga swi nga vuriwi hambi ku ri ku vuriwa exikarhi ka n’wina,+ hilaha swi fanelaka vanhu lava kwetsimaka;+ 4 hambi ku ri ku tikhoma loku nyumisaka kumbe mavulavulelo ya vuphukuphuku kumbe mafenya lama thyakeke,+ ku nga swilo leswi nga faneliki, kambe a ku ve ni ku khensa.+ 5 Hikuva leswi ma swi tiva naswona ma swi xiya leswaku a ku na munhu la tikhomaka ku biha hi swa masangu*+ kumbe loyi a nga basangiki kumbe la nga ni makwanga,+ ku nga ku gandzela swikwembu, loyi a nga ta va ni ndzhaka eMfun’weni wa Kreste ni wa Xikwembu.+
6 Ku nga vi na munhu loyi a mi kanganyisaka hi marito lama nga riki ntiyiso, hikuva hikwalaho ka swilo sweswo vukarhi bya Xikwembu byi tela vana lava nga yingisiki. 7 Hikwalaho mi nga tikhomi ku fana na vona; 8 hikuva khale a mi ri emunyameni kambe sweswi mi le ku vonakaleni+ ka Hosi.+ Yanani emahlweni mi hanya ku fana ni vana va ku vonakala, 9 hikuva ku vonakala ku humesa muxaka wun’wana ni wun’wana wa vunene, ku lulama ni ntiyiso.+ 10 Tshamani mi ri karhi mi lava leswi tsakisaka+ Hosi; 11 naswona tshikani ku endla mitirho leyi nga pfuniki nchumu leyi fambisanaka ni munyama;+ kambe yi paluxeni erivaleni. 12 Hikuva swilo leswi va swi endlaka exihundleni swa nyumisa hambi ku ri ku swi vula. 13 Kutani swilo hinkwaswo leswi paluxiwaka* swi kombisiwa hi ku vonakala, hikuva xin’wana ni xin’wana lexi kombisiwaka i ku vonakala. 14 Hikwalaho ku vuriwa leswi: “Xalamuka, wena loyi a etleleke, u pfuka eka lava feke+ kutani Kreste u ta voninga ehenhla ka wena.”+
15 Kutani tshamani mi ri karhi mi languta leswaku ndlela leyi mi fambaka ha yona a yi fani ni ya vanhu lava nga tlharihangiki kambe yi fana ni ya vanhu vo tlhariha, 16 mi wu tirhisa kahle nkarhi wa n’wina*+ hikuva masiku ma hombolokile. 17 Hikwalaho tshikani ku fana ni vanhu lava nga tlharihangiki, kambe twisisani leswi Yehovha* a swi rhandzaka.+ 18 Nakambe mi nga nwi vhinyo mi dakwa,+ yi vanga manyala, kambe yanani emahlweni mi tala hi moya. 19 Vulavurisanani hi tipisalema, marito yo dzunisa Xikwembu ni tinsimu to dzunisa, mi yimbelela+ ni ku dzunisa+ Yehovha* etimbilwini ta n’wina,+ 20 mikarhi hinkwayo mi khensa+ Xikwembu tlhelo Tata wa hina hikwalaho ka swilo hinkwaswo evitweni ra Hosi ya hina Yesu Kreste.+
21 Titsongahateni eka van’wana+ hi ku chava Kreste. 22 Vavasati a va titsongahate eka vanuna va vona+ hilaha va endlaka hakona eHosini, 23 hikuva wanuna i nhloko ya nsati wakwe+ tanihi leswi Kreste a nga nhloko ya vandlha+ naswona i muponisi wa miri lowu. 24 Kahlekahle tanihi leswi vandlha ri titsongahataka eka Kreste, vavasati na vona va fanele va titsongahata eka vanuna va vona eka swilo hinkwaswo. 25 Vavanuna, rhandzani vasati va n’wina,+ hilaha Kreste na yena a rhandzeke vandlha hakona kutani a tinyiketa hikwalaho ka rona,+ 26 leswaku a ri kwetsimisa, a ri basisa hi ku ri hlantswa hi mati a tirhisa rito,+ 27 leswaku vandlha ri ta saseka ematihlweni ya yena, ri nga vi na xivati kumbe ku khwanyana kumbe xin’wana xa swilo swo tano,+ kambe ri kwetsima naswona ri nga vi na xisolo.+
28 Hilaha ku fanaka, vavanuna va fanele ku rhandza vasati va vona ku fana ni mimiri ya vona. Wanuna loyi a rhandzaka nsati wakwe wa tirhandza, 29 hikuva a nga kona munhu loyi a tshameke a venga miri* wakwe, kambe wa wu wundla ni ku wu hlayisa, hilaha Kreste a endlaka hakona evandlheni, 30 hikuva hi swirho swa miri wakwe.+ 31 “Hikwalaho ka sweswo, wanuna u ta siya tata wakwe ni mana wakwe kutani a namarhela* nsati wakwe naswona lavambirhi va ta va nyama yin’we.”+ 32 Xihundla lexi xo kwetsima+ i xikulu. Sweswi ndzi vulavula hi Kreste ni hi vandlha.+ 33 Nilokoswiritano, un’wana ni un’wana wa n’wina u fanele a rhandza nsati wakwe+ hilaha a tirhandzaka hakona; hi hala tlhelo, wansati u fanele a va ni xichavo xo enta eka nuna wakwe.+