20 Vhinyo yi endla munhu xihlekiso,+ swakunwa leswi nga ni xihoko swi endla munhu a nga lawuleki;+
Loyi a hambukisiwaka hi swona a nga tlharihanga.+
2 Ku chaviwa ka hosi ku fana ni ku bonga ka nghala;+
Un’wana ni un’wana la yi hlundzukisaka u hoxa vutomi byakwe ekhombyeni.+
3 Wa xiximiwa munhu loko a papalata mholovo,+
Kambe swiphukuphuku swi ta katseka eka yona.+
4 Lolo a ri rimi hi vuxika,
Kutani ri ta kombela hi nkarhi wa ntshovelo loko ri nga ri na nchumu.+
5 Makungu ya mbilu ya munhu ma fana ni mati yo enta,
Kambe munhu loyi a twisisaka wa ma humesa.
6 Vanhu vo tala va vula leswaku va ni rirhandzu,
Kambe i mani loyi a nga kumaka munhu wo tshembeka?
7 Munhu wo lulama u famba hi ku tshembeka.+
Va tsaka vana vakwe lava taka endzhaku ka yena.+
8 Loko hosi yi tshama exiluvelweni leswaku yi avanyisa,+
Yi xiya swilo hinkwaswo swo biha hi matihlo ya yona.+
9 I mani la nga vulaka a ku: “Ndzi basise mbilu ya mina;+
Ndzi basile exidyohweni xa mina”?+
10 Swikalo swa mavunwa ni swipimo leswi nga riki swa ntiyiso
Haswimbirhi swa n’wi nyenyetsa Yehovha.+
11 Hambi ku ri n’wana u tiveka hi mitirho yakwe,
Loko ndlela leyi a tikhomaka ha yona yi tengile ni ku lulama.+
12 Ndleve leyi twaka ni tihlo leri vonaka
Haswimbirhi swi endliwe hi Yehovha.+
13 U nga rhandzi vurhongo hikuva u ta va xisiwana.+
Pfula matihlo kutani u ta xurha hi xinkwa.+
14 Muxavi u ri, “A swi kahle, a swi kahle”;
Kutani a famba a ya tibuma.+
15 Ku ni nsuku ni tikorala to tala,
Kambe milomu leyi nga ni vutivi i ya risima.+
16 Teka xiambalo xa wanuna loko a humese xitiyisekiso hikwalaho ka mufambi;+
Teka xitiyisekiso eka yena loko a xi humesile hikwalaho ka wansati wo huma etikweni rin’wana.+
17 Xinkwa lexi kumiweke hi vukanganyisi xa n’wi nandzihela munhu,
Kambe endzhaku ka sweswo nomu wakwe wu ta tala hi sava.+
18 Makungu ma ta humelela loko ku ri ni xitsundzuxo,+
Lwana nyimpi hi nkongomiso wa vutlhari.+
19 Munhu wo hleva u famba a paluxa xihundla;+
U nga tolovelani ni loyi a rhandzaka ku hleva.
20 Loyi a rhukanaka tata wakwe ni mana wakwe,
Rivoni rakwe ri ta timiwa loko ku va ni munyama.+
21 Munhu la kumaka ndzhaka hi makwanga,
A nge kateki eku heteleleni.+
22 U nga vuli u ku: “Ndzi ta rihisela!”+
Tshemba Yehovha+ kutani u ta ku ponisa.+
23 Swikalo swa mavunwa swa n’wi nyenyetsa Yehovha,
Ni swikalo swa vukanganyisi a hi swinene.
24 Magoza ya munhu ma kongomisiwa hi Yehovha;+
Xana munhu a nga yi twisisa njhani ndlela yakwe?
25 Swi ni khombo ku va munhu a hatlisela ku huwelela a ku, “Xa kwetsima!”+
Kutani endzhaku a anakanyisisa hi leswi a swi hlambanyeke.+
26 Hosi yo tlhariha yi sefa vanhu vo homboloka+
Kutani yi va kandziyela hi vhilwa ro peperha.+
27 Ku hefemula ka munhu i rivoni ra Yehovha,
Leri lavisisaka endzenindzeni ka yena.
28 Rirhandzu ni ku tshembeka swi sirhelela hosi;+
Yi tiyisa xiluvelo xa yona hi rirhandzu.+
29 Majaha ma dzunisiwa hikwalaho ka matimba ya wona,+
Kasi vakhalabye va sasekisiwa hi misisi ya vona yo basa.+
30 Mafelangati ni timbanga swi susa leswo biha,+
Ku biwa ku fikelela mbilu.