Mitirho

10 A ku ri ni wanuna un’wana eKhezariya la vuriwaka Korneliyo, loyi a a ri ndhuna* ya masocha* ya le Italiya. 2 A a ri munhu la tinyiketeleke, la chavaka Xikwembu swin’we ni ndyangu wakwe hinkwawo, a a hanana swinene naswona nkarhi ni nkarhi a a khongela eka Xikwembu. 3 Siku rin’wana kwalomu ka awara ya vukaye ya siku,*+ u vone ntsumi ya Xikwembu exivonweni yi ta eka yena yi fika yi ku: “Korneliyo!” 4 Korneliyo a yi languta a chuhile a ku: “Swi lo yini, Hosi?” Ntsumi yi ku: “Xikwembu xi ku tsundzukile hikwalaho ka swikhongelo swa wena ni ku hanana ka wena.+ 5 Kutani sweswi rhumela vanhu eYopa leswaku va ya vitana Simoni loyi a tiviwaka hi vito ra Petro. 6 Wanuna loyi u endzele Simoni, mutlhuvutsi wa madzovo, loyi a nga ni yindlu ekusuhi ni lwandle.” 7 Hi ku hatlisa loko ntsumi leyi vulavuleke na yena yi sukile, a vitana malandza yakwe mambirhi ni socha leri chavaka Xikwembu leri a ri tirha ni malandza yakwe, 8 a va rungulela hinkwaswo leswi humeleleke kutani a va rhuma eYopa.

9 Hi siku leri landzelaka loko va ri endleni naswona va ri ekusuhi ni ku fika emutini, Petro a ya ehenhla ka lwangu kwalomu ka awara ya vutsevu* a ya khongela. 10 Kambe a khomiwa hi ndlala swinene a lava swo dya. Loko va ha lunghiselela swakudya, a biwa hi riphume+ 11 kutani a vona tilo ri pfuleka hiloko ku xika nchumu lowu fanaka ni lapi lerikulu ri ehliseriwa emisaveni hi tikhona ta rona ta mune; 12 endzeni ka rona a ku ri ni mixaka hinkwayo ya swiharhi leswi nga ni milenge ya mune, swiharhi leswi kokovaka ni swinyenyana. 13 Kutani rito ri ku eka yena: “Petro, suka u yima, u tlhava u dya!” 14 Kambe Petro a ku: “A ndzi nge swi koti, Hosi, hikuva a ndzi si tshama ndzi dya nchumu lowu nyameke ni lowu nga basangiki.”+ 15 Rito ri tlhela ri vulavula na yena ra vumbirhi ri ku: “Tshika ku vula leswaku swilo leswi Xikwembu xi swi basiseke swi nyamile.” 16 Leswi swi humelele ra vunharhu, kutani lapi ri tlheriseriwa etilweni hi ku hatlisa.

17 Loko Petro a ha pfilunganyekile mayelana ni leswi xivono lexi a xi voneke xi nga vaka xi vula swona, hi nkarhi wolowo, vavanuna lava rhumiweke hi Korneliyo va vutisa leswaku yindlu ya Simoni yi kwihi kutani va yima kwalaho egedeni.+ 18 Va huwelela va vutisa loko Simoni loyi a vitaniwaka Petro a rhurheriwe kwalaho. 19 Loko Petro a ha anakanyisisa hi xivono, moya+ wu ku: “Languta! Ku ni vavanuna vanharhu lava ku lavaka. 20 Kutani tlakuka, u ehla u famba na vona, u nga kanakani hikuva va rhumiwe hi mina.” 21 Hiloko Petro a ehla a ya eka vona a fika a ku: “Munhu loyi mi n’wi lavaka hi mina loyi. Xana mi te hi xivangelo xihi?” 22 Va ku: “Korneliyo,+ loyi a nga ndhuna ya masocha, wanuna wo lulama la chavaka Xikwembu, loyi tiko hinkwaro ra Vayuda ri vulavulaka kahle ha yena, u nyikiwe swiletelo leswi humaka eka Xikwembu hi ntsumi yo kwetsima leswaku a rhuma vanhu va ku vitana u ya endlwini yakwe leswaku a ta twa leswi u nga ta n’wi byela swona.” 23 Hiloko a va byela leswaku va nghena, ivi a va rhurhela.

Hi xa mundzuku xa kona a famba na vona, swin’we ni vapfumerikulobye van’wana va le Yopa. 24 Hi siku leri landzelaka a fika eKhezariya. Korneliyo a a va rindzile naswona a a rhambe maxaka yakwe ni vanghana vakwe lavakulu. 25 Loko Petro a nghena, Korneliyo a n’wi hlanganisa, a fika a khinsama emahlweni ka yena. 26 Kambe Petro a n’wi tlakusa, a ku: “Tlakuka; na mina ndzo va munhu ntsena.”+ 27 Loko a ri karhi a burisana na yena, a nghena endlwini kutani a kuma vanhu vo tala va hlengeletanile. 28 A ku eka vona: “Mi swi tiva kahle leswaku a swi pfumeleriwi ku va Muyuda a tihlanganisa kumbe a tshinelela munhu wa rixaka rin’wana,+ kambe Xikwembu xi ndzi kombisile leswaku ndzi nga vuli leswaku munhu u nyamile kumbe a nga basanga.+ 29 Kutani a ndzi kanakananga loko ndzi vitaniwa. Hikwalaho, ndzi kombela mi ndzi byela leswaku mi ndzi lavela yini.”

30 Hiloko Korneliyo a ku: “Emasikwini ya mune lama hundzeke ku sukela enkarhini lowu, a ndzi khongela endlwini ya mina hi awara ya vukaye;* kutani hi nkarhi wolowo wanuna loyi a ambaleke swiambalo swo hatima a yima emahlweni ka mina 31 a ku: ‘Korneliyo, xikhongelo xa wena xi twiwile ni ku hanana ka wena ku tsundzukiwile hi Xikwembu. 32 Kutani rhumela vanhu eYopa leswaku va ya vitana Simoni loyi a tiviwaka hi vito ra Petro. Wanuna loyi u rhurheriwe endlwini ya Simoni mutlhuvutsi wa madzovo, loyi a tshamaka ekusuhi ni lwandle.’+ 33 Hiloko ndzi rhuma vanhu leswaku va ku landza naswona u endle kahle hi ku ta laha. Kutani sweswi hinkwerhu hi hlengeletanile emahlweni ka Xikwembu leswaku hi ta twa swilo hinkwaswo leswi Yehovha* a ku leriseke leswaku u hi byela swona.”

34 Loko Petro a twa sweswo a ku: “Se ndza swi twisisa leswaku Xikwembu a xi na xihlawuhlawu,+ 35 kambe eka tiko rin’wana ni rin’wana munhu loyi a xi chavaka a tlhela a endla leswinene wa amukeleka eka xona.+ 36 Xi rhumele rito ra xona eka vana va Israyele leswaku xi va byela mahungu lamanene ya ku rhula+ hi ku tirhisa Yesu Kreste, loyi i Hosi ya vanhu hinkwavo.+ 37 Ma yi tiva mhaka leyi a ku vulavuriwa ha yona eYudiya hinkwaro, ku sukela eGaleliya+ endzhaku ka loko Yohane a dyondzise hi ta nkhuvulo: 38 mayelana na Yesu loyi a a huma eNazareta, ndlela leyi Xikwembu xi n’wi hlawuleke ha yona hi moya lowo kwetsima+ xi tlhela xi n’wi nyika matimba naswona u fambe tiko hinkwaro a endla mitirho leyinene ni ku horisa hinkwavo lava a va tshikileriwe hi Diyavulosi,+ hikuva Xikwembu a xi ri na yena.+ 39 Hina hi timbhoni ta swilo hinkwaswo leswi a swi endleke etikweni ra Vayuda ni le Yerusalema; kambe va n’wi dlayile hi ku n’wi hayeka emhandzini.* 40 Xikwembu xi n’wi pfuxile hi siku ra vunharhu+ leswaku a ta voniwa, 41 ku nga ri hi vanhu hinkwavo, kambe hi timbhoni leti hlawuriweke hi Xikwembu khale, ku nga hina lava dyeke ni ku nwa na yena endzhaku ka loko a pfuxiwile eka lava feke.+ 42 U tlhele a hi lerisa leswaku hi chumayela vanhu ni ku nyikela vumbhoni lebyi heleleke+ bya leswaku hi yena loyi Xikwembu xi n’wi hlawuleke ku va muavanyisi wa lava hanyaka ni lava feke.+ 43 Vaprofeta hinkwavo va yi tiyisekisile+ mhaka ya leswaku loyi a pfumelaka eka yena u ta rivaleriwa swidyoho swakwe hikwalaho ka vito ra yena.”+

44 Loko Petro a ha vulavula hi timhaka leti, moya lowo kwetsima wu xikela ehenhla ka hinkwavo lava twaka leswi a a swi vula.+ 45 Vapfumeri* lava yimbeke lava teke na Petro va hlamala, hikuva nyiko ya mahala ya moya lowo kwetsima a yi nyikiwa ni vanhu va matiko. 46 Hikuva a va va twa va vulavula hi tindzimi va dzunisa Xikwembu.+ Hiloko Petro a ku: 47 “Xana u kona loyi a nga alaka ni mati ku sivela vanhu lava, lava amukeleke moya lowo kwetsima ku fana na hina leswaku va nga khuvuriwi?”+ 48 Hiloko a lerisa leswaku va khuvuriwa hi vito ra Yesu Kreste.+ Kutani va n’wi kombela ku tshama masikunyana na vona.