Eklesiasta
3 Xilo xin’wana ni xin’wana xi ni nkarhi wa xona,
Nkarhi wa ntirho wun’wana ni wun’wana laha misaveni:
2 Nkarhi wa ku velekiwa ni nkarhi wa ku fa;
Nkarhi wa ku byala ni nkarhi wa ku tsuvula leswi byariweke;
3 Nkarhi wa ku dlaya ni nkarhi wa ku horisa;
Nkarhi wa ku mbundzumuxa ni nkarhi wa ku aka;
4 Nkarhi wa ku rila ni nkarhi wa ku hleka;
Nkarhi wa ku kolola ni nkarhi wa ku cina;
5 Nkarhi wa ku cukumeta maribye ni nkarhi wa ku ma hlengeleta;
Nkarhi wa ku angarha ni nkarhi wa ku tshika ku angarha;
6 Nkarhi wa ku lava ni nkarhi wa ku pfumela ku lahlekeriwa;
Nkarhi wa ku hlayisa ni nkarhi wa ku cukumeta;
7 Nkarhi wa ku handzula+ ni nkarhi wa ku rhunga;
Nkarhi wa ku miyela+ ni nkarhi wa ku vulavula;+
8 Nkarhi wa ku rhandza ni nkarhi wa ku venga;+
Nkarhi wa nyimpi ni nkarhi wa ku rhula.
9 Xana mutirhi u vuyeriwa hi yini eka mitirho yakwe hinkwayo?+ 10 Ndzi wu vonile ntirho lowu Xikwembu xi wu nyikeke vanhu leswaku va wu endla. 11 Xi endle swilo hinkwaswo swi saseka hi nkarhi wa swona.+ Xi tlhele xi endla leswaku vanhu va navela ku hanya hilaha ku nga heriki; nilokoswiritano vanhu a va nge pfuki va wu twisisile ntirho lowu Xikwembu xa ntiyiso xi wu endleke ku sukela eku sunguleni ku ya fika emakumu.
12 Ndzi gimete hileswaku a ku na nchumu wo antswa eka vona ku tlula ku tsaka ni ku endla leswinene loko va ha hanya,+ 13 nileswaku un’wana ni un’wana u fanele a dya a tlhela a nwa ni ku tsaka hikwalaho ka ntirho wakwe hinkwawo wa matimba. I nyiko leyi humaka eka Xikwembu.+
14 Se ndza swi tiva leswaku hinkwaswo leswi Xikwembu xa ntiyiso xi swi endlaka swi ta va kona hilaha ku nga heriki. A swi koteki ku engetela kumbe ku hunguta swo karhi eka swona. Xikwembu xa ntiyiso xi swi endle tano leswaku vanhu va ta xi chava.+
15 Leswi swi endlekaka se swi endlekile ni leswi swa ha taka swi tshame swi va kona;+ kambe Xikwembu xa ntiyiso xi kambisisa leswi vanhu va swi hlongorisaka.
16 Ndzi tlhele ndzi xiya leswi laha misaveni: Ematshan’wini ya vululami a ku ri ni vuhomboloki naswona ematshan’wini ya ku lulama a ku ri ni vuhomboloki.+ 17 Hiloko ndzi tibyela ndzi ku: “Xikwembu xa ntiyiso xi ta avanyisa lavo lulama ni lavo homboloka,+ hikuva xin’wana ni xin’wana lexi endlekaka xi ni nkarhi wa xona.”
18 Ndzi tlhele ndzi tibyela mayelana ni vanhu leswaku Xikwembu xa ntiyiso xi ta va kambela, xi va komba leswaku a va hambananga ni swiharhi, 19 hikuva laha vanhu va helelaka kona ni swiharhi swi helela kona; hinkwaswo swi fikeriwa hi makumu lama fanaka.+ Hilaha xin’wana xi faka hakona ni lexin’wana xi fisa sweswo; hinkwaswo swi ni moya wun’we.+ Hikwalaho munhu a nga swi tluli swiharhi, hikuva hinkwaswo a swi pfuni nchumu. 20 Hinkwaswo swi ya endhawini yin’we.+ Hinkwaswo swi huma entshurini+ naswona hinkwaswo swi tlhelela entshurini.+ 21 I mani la swi tivaka loko ku ri hileswaku moya wa vanhu wu tlhandlukela ehenhla nileswaku moya wa swiharhi wu rhelela ehansi?+ 22 Ndzi tlhele ndzi swi vona leswaku a ku na nchumu wo antswa ku tlula ku va munhu a tiphina hi ntirho wakwe,+ yoleyo i hakelo yakwe; hikuva i mani la nga n’wi endlaka a kota ku vona leswi nga ta humelela loko a nga ha ri kona?+