Samuwele Wo Sungula
6 Areka+ ya Yehovha yi hete tin’hweti ta nkombo etikweni ra Vafilista. 2 Vafilista va vitana vaprista ni vangoma,+ va ku: “Hi fanele hi endla yini hi Areka ya Yehovha? Hi byeleni leswaku hi fanele hi yi tlherisela njhani endhawini ya yona.” 3 Va hlamula va ku: “Loko mi tlherisa areka ya ntwanano wa Yehovha Xikwembu xa Israyele, mi nga yi tlherisi yi nga ri na gandzelo. Mi fanele mi n’wi tlherisela gandzelo ra nandzu.+ Hi kona mi nga ta hola kutani mi ta swi tiva leswaku hikwalaho ka yini voko rakwe ri nga sukanga eka n’wina.” 4 Hiloko va vutisa va ku: “I gandzelo ra muxaka muni ra nandzu leri hi faneleke hi ri rhumela?” Va hlamula va ku: “Rhumelani swifaniso leswi endliweke hi nsuku swa ntlhanu swa ndhawu leyi pfimbeke ni swifaniso swa ntlhanu swa nsuku swa makondlo, hi ku ya hi nhlayo ya tihosi ta Vafilista,+ hikuva hinkwenu ka n’wina ku katsa ni tihosi ta n’wina mi weriwe hi ntungu lowu fanaka. 5 Mi fanele mi endla swifaniso swa n’wina swa ndhawu leyi pfimbeke ni swa makondlo+ lama lovisaka tiko, mi fanele mi xixima Xikwembu xa Israyele. Kumbexana xi ta vevukisa voko ra xona eka n’wina ni le ka xikwembu xa n’wina ni le ka tiko ra n’wina.+ 6 Hikwalaho ka yini mi fanele mi tinonon’hwisa timbilu hilaha Egipta na Faro va nonon’hwiseke timbilu ta vona?+ Loko xi va xupurile+ va boheke ku tshika Vaisrayele va famba.+ 7 Sweswi endlani golonyi leyintshwa mi teka ni tihomu timbirhi leti nga ni marhole, leti nga si tshamaka ti paniwa. Bohani tihomu egolonyini kambe mi tlherisa marhole ya tona ekaya, ma nga ti landzeli. 8 Tekani Areka ya Yehovha mi yi veka ehenhla ka golonyi, kutani mi hoxa swilo swa nsuku leswi mi swi rhumelaka eka yena tanihi gandzelo ra nandzu ebokisini, mi ri veka etlhelo ka yona.+ Endzhaku ka sweswo mi yi tshika yi famba 9 mi languta: Loko yo tlhandluka hi ndlela yo ya eBeta-xemexe+ lomu yi humaka kona, swi vula leswaku hi yena a hi vangeleke khombo leri lerikulu. Kambe loko swi nga ri tano, hi ta swi tiva leswaku a ku nga ri voko ra yena leri hi hlaseleke; swi lo kotlana.”
10 Vavanuna volavo va endle tano. Va teke tihomu timbirhi leti a ti ri ni marhole va ti boha egolonyini, marhole ya tona va ma pfalela ekaya. 11 Hiloko va veka Areka ya Yehovha ehenhla ka golonyi ni bokisi leri nga ni swifaniso swa makondlo ya nsuku ni swa ndhawu ya vona leyi pfimbeke. 12 Tihomu ti fambe hi ndlela leyi yaka eBeta-xemexe.+ Ti fambe hi ndlela yoleyo ti ri karhi ti bonga; a ti hambukelanga exineneni kumbe eximatsini. Nkarhi wolowo hinkwawo tihosi ta Vafilista a ti famba endzhaku ka tona ku ya fika endzilakaneni wa Beta-xemexe. 13 Vanhu va Beta-xemexe a va ri eku tshoveleni ka koroni enkoveni. Loko va tlakusa matihlo va vona Areka, a va tsake ngopfu loko va yi vona. 14 Golonyi yi fika ensin’wini ya Yoxuwa wa Mubeta-xemexe yi yima kona ekusuhi ni ribye lerikulu. Hiloko va pandzela golonyi yoleyo va endla tihunyi va nyikela tihomu+ toleto ti va gandzelo ro hisiwa eka Yehovha.
15 Valevhi+ va hawula Areka ya Yehovha ni bokisi leri a ri ri na yona, leri a ri ri ni swilo swa nsuku, va swi veka ehenhla ka ribye lerikulu. Vavanuna va Beta-xemexe+ va endlela Yehovha magandzelo yo hisiwa hi siku rero.
16 Loko tihosi ta ntlhanu ta Vafilista ti vona sweswo, ti tlhelela eEkroni hi siku rero. 17 Swifaniso swa nsuku swa ndhawu leyi pfimbeke leswi Vafilista va swi yiseke swi va gandzelo ra nandzu eka Yehovha hi leswi:+ xin’we xa Axidodo,+ xin’we xa Gaza, xin’we xa Axikeloni, xin’we xa Gati+ ni xin’we xa Ekroni.+ 18 Nhlayo ya swifaniso swa makondlo ya nsuku a yi ringana ni nhlayo ya miti hinkwayo ya tihosi ta Vafilista ta ntlhanu, ku nga miti leyi biyeriweke ni swimitana leswi nga emigangeni.
Ribye lerikulu leri a va veke Areka ya Yehovha ehenhla ka rona ensin’wini ya Yoxuwa wa Mubeta-xemexe ra ha ri mbhoni ku ta fikela namuntlha. 19 Kambe Xikwembu xi herisa vanhu va Beta-xemexe hikuva va langute Areka ya Yehovha. Xi herise vanhu va 50 070,* kutani vanhu va sungula ku rila hikuva Yehovha a a dlaye vanhu vo tala swinene.+ 20 Vavanuna va Beta-xemexe va vutisa va ku: “I mani loyi a nga swi kotaka ku yima emahlweni ka Yehovha Xikwembu lexi xo kwetsima,+ xana a swi koteki leswaku a hi tshika a ya eka van’wana?”+ 21 Kutani va rhumela vanhu eka vaaki va le Kiriyati-yeyarimi,+ va ku: “Vafilista va vuyise Areka ya Yehovha. Tanani mi ta yi teka.”+