Langutelo Ra Bibele

Xana Ku Va Ni Ripfumelo Swi Titshege Hi Vuyimburi?

Hi 1873, Samuel Manning mufundhisi wa Munghezi u tsale leswi malunghana na Yerusalema: “Vanhu va ta eka yona va huma evugima-musi bya misava, va kokiwa hi ku xonga ka yona. Vanhu va timiliyoni va xixima makhumbi lama waka, switarata leswi nga lo mpyii, hi thyaka ni marhumbi ya kona tanihi xivandla xo kwetsima ku tlula hinkwaswo emisaveni.”

KU XONGA ka Tiko ro Kwetsima ku koke vanhu ku sukela hi nkarhi wa Constantine, Mufumi wa le Rhoma.a Se ku hundze malembe ya 1 500, vanhu va ri karhi va ta va tlhela va famba va ta gandzela eTikweni leri ro Kwetsima. Kambe lexi hlamarisaka, swidyondzi swi sungule ku ta eku sunguleni ka lembe-xidzana ra vu-19, ku ri kona swi sungulaka vuyimburi bya swilo swa le Bibeleni—ku nga ku dyondza ndhavuko, vanhu, ndhawu ni ririmi ra khale ka Tiko ro Kwetsima.

Leswi vayimburi va swi pfumbuleke swi pfunile leswaku swilo swo tala swa le nkarhini wa Bibele swi twisiseka. Hakanyingi rungula ra vayimburi ri pfumelelane ni leswi Bibele yi swi vulaka. Kambe, xana vutivi byebyo i bya nkoka eka ripfumelo ra Mukreste? Leswaku hi hlamula xivutiso lexi, a hi rhangeni hi kambisisa ndhawu leyi ceriweke hi vayimburi vo tala—ku nga muti wa Yerusalema ni tempele ya wona.

‘A Ku Na Ribye Leri Nga Ta Siyiwa eHenhla Ka Ribye Rin’wana’

Loko Yesu Kreste a huma etempeleni ya le Yerusalema ni van’wana va vadyondzisiwa va yena, hi Nisan 11, hi ku landza khalendara ya Xiyuda, hi ximun’wana xa 33 C.E., a nga ha tlhelanga a nghena eka yona. Loko va khome ndlela leyi yaka eNtshaveni ya Mitlhwari, un’wana wa vadyondzisiwa va yena u te: “Mudyondzisi, vona, muxaka wonghasi wa maribye ni muxaka wonghasi wa miako!”—Marka 13:1.

Vayuda lava vo tshembeka a va rhandza Xikwembu ni tempele ya xona hi timbilu ta vona hinkwato. A va tinyungubyisa hi miako leyi yo xonga swonghasi ni leswi a yi yimela ndhavuko wa malembe-xidzana ya 15. Nhlamulo ya Yesu yi n’wi tseme nhlana mudyondzisiwa wakwe, u te: “Xana wa yi vona miako leyi leyikulu? Laha a swi nge endleki leswaku ku siyiwa ribye ehenhla ka ribye rin’wana ri nga wisiwanga.”—Marka 13:2.

Leswi Mesiya la tshembisiweke a fikeke, xana Xikwembu a xi ta pfumerisa ku yini leswaku tempele ya xona yi lovisiwa? Hi ku pfuniwa hi moya wo kwetsima vadyondzisiwa va Yesu a va ta swi twisisa hakatsongo-tsongo leswi a a vula swona. Kambe marito ya Yesu ma byi khumba hi ndlela yihi vuyimburi bya le Bibeleni?

“Muti” Lowuntshwa

Hi Pentekosta ya 33 C.E., tiko ra Yuda a ri nga ha amukeleki emahlweni ka Xikwembu. (Matewu 21:43) Hiloko ri siviwa hi nchumu wa nkoka—ku nga hulumendhe ya le tilweni leyi nga ta tisela vanhu hinkwavo mikateko. (Matewu 10:7) Vuprofeta bya Yesu byi hetisekile loko Yerusalema ni tempele ya yona swi lovisiwa hi 70 C.E. Vuyimburi byi seketela leswi Bibele yi swi vuleke hi xiendlakalo xexo. Kambe ripfumelo ra Vakreste a ri titsheganga hi ku yimburiwa ka tempele yoleyo ya khale. Ri titshege hi Yerusalema yin’wana, leyi nga faniki ni le ya khale.

Hi 96 C.E., muapostola Yohane loyi a a ri kona loko Yesu a vula vuprofeta bya yena malunghana ni ku lovisiwa ka Yerusalema ni tempele ya yona naswona a voneke ku hetiseka ka byona, u kombiwe xivono lexi landzelaka: “Ndzi vona ni muti wo kwetsima, Yerusalema Lowuntshwa, wu xika hi le tilweni wu huma eka Xikwembu.” Ku twale rito ri huma exiluvelweni ri ku: “Xi ta tshama [ni vanhu], naswona vona va ta va vanhu va xona. Xikwembu hi xiviri xi ta va na vona. Kutani xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona.”—Nhlavutelo 21:2-4.

Vaaki va “muti” lowu i Vakreste vo tshembeka lava nga ta va tihosi na Kreste etilweni. Va vumba hulumendhe ya le tilweni—ku nga Mfumo wa Xikwembu—lowu nga ta fuma misava, wu vuyisela vanhu eku hetisekeni hi nkarhi wa Ku Fuma ka Kreste ka Gidi ra Malembe. (Matewu 6:10; 2 Petro 3:13) Vakreste va lembe-xidzana ro sungula lava a va ri Vayuda, lava a va ta va swirho swa hulumendhe yoleyo, va swi xiyile leswaku a ku nga ri na nchumu lowu a va ri na wona eka fambiselo ra swilo ra Xiyuda, lowu a wu ta pimanisiwa ni lunghelo ra ku fuma na Kreste etilweni.

Hinkwavo a va titwa hi ndlela leyi fanaka ni leyi muapostola Pawulo a titweke ha yona loko a tsala malunghana ni xikhundla lexi tlakukeke lexi a a ri na xona eka vukhongeri bya Xiyuda: “Swilo leswi veke mpindzulo eka mina, ndzi swi teke ku ri ku lahlekeriwa hikwalaho ka Kreste. Phela, hikwalaho ka sweswo, hakunene ndzi tlhela ndzi teka swilo hinkwaswo ku ri ku lahlekeriwa hikwalaho ka ntikelo lowu tlurisaka wa ku tiva Kreste Yesu Hosi ya mina.”—Vafilipiya 3:7, 8.

Tanihi leswi muapostola Pawulo a a wu xixima ngopfu Nawu wa Xikwembu ni lunghiselelo ra tempele, swi le rivaleni leswaku marito yakwe a ma vuli swona leswaku malunghiselelo lawa ya le tilweni ma fanele ma tekeriwa ehansi.b (Mintirho 21:20-24) Pawulo a a kombisa ntsena leswaku lunghiselelo ra Vukreste ra antswa ku ri ni fambiselo ra Xiyuda.

Swi le rivaleni leswaku Pawulo ni Vakreste van’wana va Vayuda va lembe-xidzana ro sungula, a va tiva swilo swin’wana swo tala leswinene swa fambiselo ra swilo ra Xiyuda. Tanihi leswi vuyimburi byi hi pfunaka leswaku hi tiva swilo swin’wana swa khale, swin’wana swa swona swi nga pfuna Vakreste leswaku va va ni vutivi. Kambe, xiya leswaku hi swihi leswi Pawulo a byeleke Timotiya leswaku a dzikisa mianakanyo ya yena eka swona: “Anakanyisisa hi swilo leswi [leswi khumbaka vandlha ra Vukreste]; u dzika eka swona, leswaku ku ya emahlweni ka wena ku vonaka eka vanhu hinkwavo.”—1 Timotiya 4:15.

Lexi tsakisaka, vuyimburi bya swilo swa le Bibeleni byi hi pfunile leswaku hi twisisa leswi a swi endleka loko ku tsariwa Bibele. Hambiswiritano, Vakreste va swi xiya leswaku ripfumelo ra vona a ri titsheganga hi vumbhoni lebyi yimburiweke hi vanhu kambe ri titshege hi Rito ra Xikwembu, ku nga Bibele.—1 Vatesalonika 2:13; 2 Timotiya 3:16, 17.

[Tinhlamuselo ta le hansi]

[Swifaniso leswi nga eka tluka 16]

Ehenhla: Yerusalema hi 1920; mali ya le Rhoma leyi a yi tirhisiwa hi Vayuda, 43 C.E.; grenada leyi endliweke hi rimhondzo ra ndlopfu yi ri karhi yi rhumbuka, swi nga endleka yi tekiwe etempeleni ya Solomoni, hi lembe-xidzana ra vunhungu B.C.E.

[Swihlovo Swa Kona]

Matluka 2 na 16: Coin: Photograph © Israel Museum, Jerusalem; courtesy of Israel Antiquities Authority; pomegranate: Courtesy of Israel Museum, Jerusalem