Hi Fanele Hi Khongela Hi Ndlela Yihi Eka Xikwembu?

KU VULAVULA ni Lowa Matimba Hinkwawo hi n’wi byela leswi hi swi ehleketaka i lunghelo lerikulu. Kambe vanhu vo tala a va tiyiseki hi ndlela leyi va faneleke va khongela ha yona naswona van’wana va lava ku antswisa swikhongelo swa vona. Van’wana va valandzeri vo sungula va Yesu Kreste a va karhateka hi swikhongelo swa vona naswona a va lava ku swi antswisa. Un’wana wa vona u byele Yesu a ku: “Hosi, hi dyondzise ndlela ya ku khongela.” (Luka 11:1) Yesu u angule hi ku nyikela xikhongelo xa xikombiso lexi hakanyingi xi vuriwaka Xikhongelo xa Hosi. Xikhongelo lexi xo olova a xi hi pfuni ku vulavula ni Xikwembu hi ndlela leyi amukelekaka ntsena, kambe xi tlhela xi hi byela rungula ra nkoka leri nga eBibeleni.

Xikhongelo Xa Hosi

Yesu u te: “Kutani mi fanele mi khongela hi ndlela leyi: ‘Tata wa hina la nge matilweni, vito ra wena a ri kwetsimisiwe. Mfumo wa wena a wu te. Ku rhandza ka wena a ku endleke emisaveni, hilaha ku endlekaka hakona etilweni. Hi nyike namuntlha xinkwa xa hina xa siku leri; naswona hi rivalele milandzu ya hina, tanihi leswi na hina hi rivaleleke lava nga ni milandzu eka hina. Naswona u nga hi nghenisi endzingweni, kambe hi kutsule eka lowo homboloka.’”—Matewu 6:9-13.

Xiya marito lawa Yesu a ma vuleke: “Kutani mi fanele mi khongela hi ndlela leyi.” Ha yini a vule tano? Yesu a a nga swi lavi leswaku valandzeri vakwe va phindha-phindha marito yakwe. Ku nga ri khale, a ha ku wu sola mukhuva lowu. (Matewu 6:7) Xikhongelo xakwe xi hi komba swilo swa nkoka leswi hi faneleke hi swi khongelela—leswi nga swa nkoka eka Xikwembu ku nga ri eka hina. Leswaku hi tiva swilo swa nkoka leswi hi faneleke hi swi khongelela, hi fanele hi tiva leswi marito ya Yesu ma vulaka swona. Sweswi a hi kambisiseni yinhla ha yin’we ya marito yakwe.

Ku Hlamuseriwa Ka Xikhongelo Xa Hosi

“Tata wa hina la nge matilweni, vito ra wena a ri kwetsimisiwe.” Loko Yesu a vulavula hi Xikwembu u xi vitane ‘Tatana’ hikuva xi ni rirhandzu naswona xa sirhelela ku fana ni tatana lonene la nga munhu wa nyama. Hi hala tlhelo, xi ni vito—ku nga Yehovha—leri nga fanelangiki ri fanisiwa ni swithopo swa xona swo tala, swo tanihi leswi nge Lowa Matimba Hinkwawo, Xikwembu ni lexi nge Hosi.a (Pisalema 83:18) Kambe ha yini vito ra Xikwembu leri fambisanaka ni ndhuma ya xona ri fanele ri kwetsimisiwa? Hikuva ri thyakisiwile ri tlhela ri sandziwa.

Vanhu van’wana va sola Xikwembu hikwalaho ka miringo leyi va hlanganaka na yona, kasi swi nga ha endleka leswaku yi vangiwa hi swihoxo swa vanhu van’wana kumbe va tikume va ri endhawini leyi nga riki yinene hi nkarhi lowu nga riki wunene. (Swivuriso 19:3; Eklesiasta 9:11) Van’wana va hehle Xikwembu hi ku vula leswaku hi xona xi vangaka timhangu ta ntumbuluko. Kambe Bibele yi vula leswaku “Xikwembu xi nga ka xi nga ringiwi hi swilo swo biha naswona xona a xi ringi munhu.” (Yakobo 1:13) Vukhongeri byo tala byi dyondzisa leswaku Xikwembu xi xupula vanhu vo biha hi ku va xanisa hilaha ku nga heriki endzilweni wa tihele naswona dyondzo leyi ya xi hlundzukisa swinene Xikwembu xa rirhandzu. (Yeremiya 19:5; 1 Yohane 4:8) Varhoma 6:23 yi ri: “Hikuva hakelo leyi tisiwaka hi xidyoho i rifu,” ku nga ri ku xanisiwa hilaha ku nga heriki!b

“Mfumo wa wena a wu te.” Mfumo wa Xikwembu i hulumendhe leyi rhangeriwaka hi Yesu Kreste. Ku nga ri khale u ta fuma misava hinkwayo. Daniyele 7:14 yi ri: ‘U nyikiwe ku fuma ni xindzhuti ni mfumo.’ Loko Mfumo wa Xikwembu ‘wu fika’ wu ta pfuna vanhu, wu herisa vafumi lava kanetanaka na xona naswona wu ta fuma misava hinkwayo.—Daniyele 2:44.

“Ku rhandza ka wena a ku endleke emisaveni, hilaha ku endlekaka hakona etilweni.” Ehansi ka Mfumo wa Xikwembu, vanhu va ta endla ku rhandza ka xona. Kutani ku ta va ni ku rhula ka xiviri naswona vanhu hinkwavo va ta xi gandzela hi ndlela ya ntiyiso. Tipolitiki leti vangaka ku avana ni vukhongeri bya mavunwa swi ta herisiwa. Loko Nhlavutelo 21:3, 4 yi hlamusela xiyimo lexi hi ndlela yo fanekisela yi vula leswaku ‘ntsonga wa Xikwembu wu ta va ni vanhu naswona xi ta sula mihloti hinkwayo ematihlweni ya vona, rifu a ri nge he vi kona, hambi ku ri ku kolola, ni xirilo ni xitlhavi a swi nge he vi kona. Swilo swo sungula swi hundzile.’

“Hi nyike namuntlha xinkwa xa hina xa siku leri.” Endzhaku ko va Yesu a rhangise Mfumo wa Xikwembu ni ku kwetsimisa vito ra xona, u vulavule hi swilaveko swa hina. Marito yakwe ma kombisa leswaku a hi fanelanga hi lava swilo swo tlula swa “siku leri.” Ematshan’weni ya sweswo, hi fanele hi yingisa xitsundzuxo lexi nga eka Swivuriso 30:8 lexi nge: “U nga ndzi nyiki vusiwana kumbe rifuwo. Ndzi tshike ndzi dya swakudya leswi ndzi averiweke swona.”

“Hi rivalele milandzu ya hina, tanihi leswi na hina hi rivaleleke lava nga ni milandzu eka hina.” Rito leri tirhisiweke laha leri nge “milandzu” ri vula “swidyoho.”c Hinkwerhu hi fanele hi yingisa Xikwembu. Kutani loko hi nga xi yingisi kumbe hi xi dyohela, swi fana ni loko hi ri ni nandzu eka xona. Kambe Yehovha u tiyimisele ku hi rivalela nandzu wolowo ntsena loko hi musa hi rivalela lava hi dyohelaka.—Matewu 18:21-35.

“U nga hi nghenisi endzingweni, kambe hi kutsule eka lowo homboloka.” “Lowo homboloka” i Sathana Diyavulosi naswona u tlhela a vuriwa “Muringi.” (Matewu 4:3) Leswi nyama ya hina yi tsaneke, hi lava mpfuno wa Xikwembu leswaku hi lwisana na Sathana ni madimona yakwe.—Marka 14:38.

Onge Xikhongelo xa Hosi, lexi vuriweke hi Yesu xi nga ku pfuna leswaku u antswisa swikhongelo swa wena, kumbexana hi ku tiva swilo swa nkoka leswi u faneleke u swi khongelela. Xikhongelo xa Hosi xi nga hi pfuna leswaku hi twisisa rungula ra nkoka leri nga eBibeleni. Hi ku pfumelelana ni marito ya Yesu, nhloko-mhaka-nkulu ya Bibele i ku kwetsimisiwa ka vito ra Xikwembu leri kwetsimaka, ku herisiwa ka vubihi hinkwabyo ni ku tisiwa ka vulawuri lebyi nga ni ku rhula hi Mfumo wa Xikwembu. Hakunene ku ni swilo swo tala leswi hi nga swi dyondzaka eka Xikhongelo xa Hosi!

[Tinhlamuselo ta le hansi]

XANA U TSHAME U TIVUTISA?

● Xana Yesu a a vula yini loko a ku: “Kutani mi fanele mi khongela hi ndlela leyi”?—Matewu 6:9.

● Hi ntolovelo, hi swihi swilo leswi hi faneleke hi swi rhangisa loko hi khongela?—Matewu 6:9, 10.

● Hi yihi “milandzu ya hina” naswona ha yini hi fanele hi rivalela lava hi dyohelaka?—Matewu 6:12.

[Xifaniso lexi nga eka tluka 13]

Xikhongelo xa Hosi xi nga ku pfuna leswaku u rhangisa swilo leswi nga swa nkoka eka Xikwembu, ku nga ri eka wena