Ku Tivona Nandzu—“Ndzi Basise Eka Xidyoho Xa Mina”

KU TIVONA nandzu ku nga ha heta munhu matimba. Hosi Davhida u tsale a ku: “Swidyoho swa mina swi hundze nhloko ya mina; swa ndzi tikela ku fana ni ndzhwalo wo tika.” (Pisalema 38:4) Vakreste van’wana va hetiwe matimba hi gome, va tibyela leswaku Yehovha a nge pfuki a va rivalerile. (2 Vakorinto 2:7) Xana sweswo i ntiyiso? Hambiloko u endle swidyoho leswikulu, xana sweswo swi vula leswaku Yehovha a nge pfuki a ku rivalerile? Doo, a nga ku rivalela!

Yehovha a nga va fularheli vadyohi lava hundzukaka. Entiyisweni, u titshineta eka vona! Exifanisweni xa n’wana wa vusopfa, Yesu u fanise Yehovha ni tatana loyi a nga ni rirhandzu loyi n’wana wakwe a fularheleke ndyangu wa ka vona kutani a ya hanya vutomi bya vusopfa. Hi ku famba ka nkarhi, n’wana yoloye u endle xiboho xo tlhelela ekaya. “Loko [n’wana] a ha ri ekulenyana, tata wakwe a n’wi vona, a va ni ntwela-vusiwana, hiloko a tsutsuma a wela enhan’wini yakwe, a n’wi ntswontswa hi rirhandzu.” (Luka 15:11-20) Xana wa swi tsakela ku tshinela eka Yehovha kambe u vona onge wa “ha ri ekulenyana” na yena? Ku fana ni tatana wa le xifanisweni xa Yesu, Yehovha u ku twela vusiwana. U swi langutele hi mahlongati ku ku amukela.

Kambe ku vuriwa yini loko u vona onge swidyoho swa wena i swikulu ngopfu kumbe swi tele swinene lerova Yehovha a nge ku rivaleli? Hi kombela u anakanyisisa hi xirhambo xa Yehovha lexi nga eka Esaya 1:18: “Tanani, sweswi, a hi lulamiseni timhaka exikarhi ka hina. Hambiloko swidyoho swa n’wina swo va swa ribungu, swi ta endliwa swi basa ku fana ni gamboko.” Yehovha wa rivalela hambiloko swidyoho swa kona swi fana ni muvala wa ribungu eka nguvu yo basa.

Yehovha a nga lavi leswaku u tshamela ku tivona nandzu. Kutani, xana u nga swi kotisa ku yini ku va u rivaleriwa hi Xikwembu ni ku va ni ripfalo leri baseke? Xiya swilo swimbirhi leswi Hosi Davhida a swi endleke. Xo sungula, u te: “Ndzi ta phofulela Yehovha ku tlula ka mina nawu.” (Pisalema 32:5) Tsundzuka, Yehovha se u ku rhambile leswaku u tshinela eka yena hi xikhongelo ni leswaku u ‘lulamisa timhaka’ na yena. Amukela xirhambo xexo. Phofulela Yehovha swidyoho swa wena ni ndlela leyi u titwaka ha yona. Davhida u khongele a ku: “Ndzi basise eka xidyoho xa mina. . . . Oho Xikwembu, mbilu leyi tshovekeke yi tlhela yi pfotloseka a wu nge yi languteli ehansi.”—Pisalema 51:2, 17.

Xa vumbirhi, Davhida u pfuniwe hi muyimeri loyi a vekiweke hi Xikwembu, ku nga muprofeta Natani. (2 Samuwele 12:13) Namuntlha, Yehovha u veke vakulu va vandlha lava leteriweke ku pfuna vadyohi lava hundzukeke leswaku va tlhela va va ni vuxaka na yena. Loko u ya eka vakulu, va ta tirhisa Matsalwa va tlhela va khongela swi huma embilwini leswaku va ku phyuphyisa, va endla leswaku u nga vi na mavonelo lama hoxeke ni ku ku pfuna u hlakarhela hi tlhelo ra moya.—Yakobo 5:14-16.

Entiyisweni, u nga ha vona onge ku phofula swidyoho swa wena eka Yehovha Xikwembu ni ku ya eka vakulu ku nga ha va nchumu wo tika swinene ku wu endla. Davhida a a titwa hi ndlela leyi fanaka. U ‘miyele’ ku ringana nkarhi wo karhi malunghana ni swidyoho swakwe. (Pisalema 32:3) Hambiswiritano, endzhakunyana u tlangele vuyelo byo phofula swidyoho swakwe kutani a lulamisa mahanyelo yakwe.

Vuyelo lebyikulu hileswaku Davhida u tlhele a va ni ntsako. U tsale a ku: “Wa tsaka loyi a rivaleriweke swiendlo swakwe swo pfukela, loyi xidyoho xakwe xi funengetiweke.” (Pisalema 32:1) Nakambe u khongele a ku: “Oho Yehovha, onge u nga pfula milomu ya mina, leswaku nomu wa mina wu twarisa ku dzuneka ka wena.” (Pisalema 51:15) Hikwalaho ka leswi a pfuniweke leswaku a nga tivoni nandzu ni leswi a a tsakile hikwalaho ka leswi Xikwembu xi n’wi rivaleleke, Davhida u susumeteleke ku byela van’wana hi Yehovha.

Yehovha u lava leswaku u va ni ripfalo leri baseke. Nakambe u lava leswaku u byela van’wana hi yena swin’we ni swikongomelo swakwe, u ri karhi u nga tivoni nandzu, kambe hi ku swi rhandza ni hi ntsako. (Pisalema 65:1-4) Tsundzuka xirhambo xakwe xa leswaku “ku hlanguriwa swidyoho swa n’wina, leswaku tinguva ta ku phyuphyisiwa ti ta ta ti huma eka Yehovha hi xiviri.”—Mintirho 3:19.

Sweswo hileswi endlekeke eka Martha. U ri: “N’wana wa mina wa jaha a a hambeta a ndzi rhumela timagazini ta Xihondzo xo Rindza ni Xalamuka! Hi ku famba ka nkarhi, ndzi tlhele ndzi va ni vuxaka na Yehovha. Nchumu wo tika swinene a ku ri ku kombela ku rivaleriwa swidyoho hinkwaswo leswi ndzi swi endleke. Kambe eku heteleleni, ndzi tshinelele Xikwembu hi xikhongelo kutani ndzi kombela leswaku xi ndzi rivalela. Swa tika ku swi tshemba leswaku ku hundze malembe ya 40 ndzi nga si tlhelela eka Yehovha. Ntokoto wa mina wu nyikela vumbhoni bya leswaku hambiloko ku hundze malembe yo tala, munhu a nga tlhela a tirhela Xikwembu ni ku tlhela a rhandziwa hi xona.”