Vanhu Lava Fambaka eMinkondzweni Ya Yesu
“Xana yena na mina a hi fambanga hi moya wun’we, ne mitileni yin’we ke?”—2 VAKORINTO 12:18.
1. Ha yini hakanyingi swi nga nonon’hwi ku tiva un’wana wa Timbhoni ta Yehova?
“TANIHI ntlawa, va ni xichavo, vutihlamuleri, naswona va tirha kahle exikolweni. Leswi swi nge vuriwi hi mintlawa leyin’wana.” Ku vule nhloko ya xikolo xa le hansi eUnited States. Xana a a vulavulela ehenhleni ka vamani? Vana va Timbhoni ta Yehova lava a va ri vadyondzi exikolweni xa yena. Hakunene, vo tala va xiye ndlela leyi Timbhoni ta Yehova, ku katsa ni vana va vona, hakanyingi va fanaka ha yona ni Timbhoni tin’wana hi tindlela to karhi. Hi malembe layo tala swi sungule ku xiyiwa swinene leswaku va ni vun’we lebyi xiyekaka malunghana ni mintshembo ni mahanyelo. Kutani a swi nonon’hwi ku xiya Timbhoni.
2. Mfanelo leyikulu ya bandlha ro sungula ra Vukriste a ku ri yihi, naswona Pawulo u boheke ku vula yini ehenhleni ka leswi?
2 Vun’we bya Timbhoni ta Yehova i nchumu lowu nga tolovelekangiki emisaveni leyi avaneke. Kambe a swi nonon’hwi ku swi twisisa loko hi tsundzuka leswaku hinkwavo ka vona va lwela ku famba emintileni ya Yesu. (1 Petro 2:21) Vun’we byo tano a byi ri mfungho wa Vakriste va lembe xidzana ro sungula. Eka khamba rin’wana, Pawulo u tsundzuxe bandlha ra le Korinto: “Ndza mi khongotela vamakwerhu, hi vito ra Hosi ya hina Yesu Kriste, ndzi ri: Twananani hinkwenu eku vulavuleni. Ku nga tshuki ku va ni ku avana exikarhi ka n’wina, kambe mi hlangana mi va van’we eku anakanyeni ne makungwini ya n’wina.” (1 Vakorinto 1:10) Pawulo u tlhele a nyika ndzayo leyi huhuteriweke ehenhleni ka ndlela ya ku hanyisana ni vanhu lava nga rhandziki ku hlayisa vun’we bya Vukriste.—Vona Varhoma 16:17; 2 Vatesalonika 3:6.
3, 4. Pawulo u hlamusele vun’we exikarhi ka yena na Tito hi ndlela yihi, naswona xana xisekelo xa vun’we lebyi a xi ri xihi?
3 Kwalomu ka lembe ra 55 C.E., Pawulo u rhumele Tito eKorinto ku ya pfuneta eku endleni ka minhlengo ya vamakwavo lava pfumalaka eYudiya naswona kumbexana ku ya vona ndlela leyi bandlha a ri yi amukela ha yona ndzayo ya Pawulo. Endzhakunyana loko a tsalela Vakorinto, Pawulo u vulavule hi rendzo leri ra ha ku hundzaka ra Tito ivi a vutisa: “Xana Tito ú mi dyelerile xana? Xana yena na mina a hi fambanga hi moya wun’we, ne mitileni yin’we ke?” (2 Vakorinto 12:18) Xana Pawulo a a vula yini hi ku famba ka vona “hi moya wun’we” ne “mitileni yin’we”?
4 A a phofula vun’we lebyi a byi ri kona exikarhi ka yena na Tito. Tito a a ri nakuloni wa Pawulo eku famba-fambeni nkarhi na nkarhi, naswona a swi kanakanisi leswaku hi ndlela leyi u dyondze swo tala eka Pawulo. Kambe vun’we lebyi a byi ri kona exikarhi ka lavambirhi a byi seketeriwe eka xin’wana xa matimba ku tlula sweswo. A byi seketeriwe eka vuxaka bya vona lebyinene na Yehova ni le mhakeni ya leswaku hinkwavo ka vona a va ri valandzeri va mintila ya Kriste. Tito u tekelele Pawulo tanihi leswi Pawulo a tekeleleke Kriste. (Luka 6:40; 1 Vakorinto 11:1) Kutani a va famba hi moya wa Yesu ni le minkondzweni ya yena.
5. Ku nga languteriwa yini eka vanhu lava namuntlha va tekelelaka Pawulo na Tito loko va ri karhi va famba “hi moya wun’we” ne “mitileni yin’we”?
5 Manuku ke, a swi hlamarisi, leswi Vakriste va lembe xidzana leri ra vu-20, va fambaka “hi moya wun’we” ni le ‘minkondzweni yin’we’ tanihi laha Petro na Tito, va tiphinaka ha kona hi vun’we lebyi nga ringanisiwiki. Entiyisweni, ku hambana ka lava tivulaka Vakriste ku va hlohlotela leswaku va va Vakriste vo kanganyisa, lava nga fambiki emintileni ya Murhangeri loyi va vulaka leswaku va n’wi landzela. (Luka 11:17) Ku hambana loku ku hlamarisaka exikarhi ka Vakriste va ntiyiso ni lavo kanganyisa ku nga kombisiwa hi tindlela to hambana-hambana. A hi boxeni mune.
Ku Kwetsima Ka Ngati
6, 7. (a) Xana langutelo lerinene hi ngati leri katsekaka eku fambeni emintileni ya Yesu hi rihi? (b) Hi kwihi ku hambana exikarhi ka Timbhoni ta Yehova ni van’wana namuntlha lava alaka ku pomperiwa ngati?
6 Kwalomu ka lembe ra 49 C.E., huvo leyi fumaka ya bandlha ra lembe xidzana ro sungula yi rhumele papila leri hlamulaka xivutiso lexi nge: Xana Vakriste lava nga riki Vayuda va fanele ku yingisa Nawu wa Muxe? Papila ri vule leswi: “Hikuva Moya lowo Kwetsima swin’we na hina, hi vonile leswaku a hi nga mi rhwexi ndzhwalo wun’wana, loko wu nga ri wa tifanelo leti: Hi leswaku mi tshika tinyama leti tlhaveriweke swikwembu swa hava, mi nga dyi ngati, ni leswi vanhu va swi dlayeke hi ku swi tlimba minkolo, mi tshika ni vuoswi.” (Mintirho 15:28, 29) Xiya leswaku exikarhi ka “tifanelo” a ku ri ni ku tshika ngati. Ku famba emintileni ya Yesu a swi ta vula ku nga amukeli ngati emirini hi ku kongoma kumbe hi ndlela yin’wana.
7 Nawu lowu wu tluriwe swinene ngopfu eVujaganini hi mukhuva wa ku tirhisiwa ka mimpompelo ya ngati. I ntiyiso, emalembeni ya sweswinyana vanhu vo tala va sungule ku xiya makhombo ya rihanyo ya mimpompelo ya ngati naswona va yi arile hi swivangelo swa vutshunguri. Leswi ngopfu-ngopfu i ntiyiso tanihi leswi vo tala va tshaheke AIDS eka ngati leyi pomperiweke. Kambe i vamani lava seketelaka ku kwetsima ka ngati hikwalaho ka ku xixima nawu wa Xikwembu, va endla tano tanihi ntlawa? Loko muvabyi a ala ku amukela mpompelo, xana hi ku hatlisa dokodela u n’wi ehleketela ku va a ri yini? Xana hi ntolovelo dokodela a nga ri: ‘U fanele u ri un’wana wa Timbhoni ta Yehova’?
8. Mbhoni eItaly yi kanetiwe hi ndlela yihi hikwalaho ko tiyimisela ku hlayisa nawu wa Xikwembu emhakeni leyi?
8 Antonietta u tshama eItaly. Kwalomu ka malembe ya nhungu lama hundzeke a a vabya swinene, naswona mpimo wa ngati ya yena a wu ri ehansi lerova vadokodela va sindzisa leswaku mimpompelo a yi laveka ku ponisa vutomi bya yena. U arile ivi a kanetiwa hi vadokodela ni maxaka. Hambi swi ri swifanyetana swa yena swimbirhi swi komberile: “Manana, loko hakunene u hi rhandza, amukela ngati.” Kambe Antonietta a a tiyimisele ku tshama a tshembekile, naswona lexi tsakisaka a nga fanga. Hambi swi ri tano, xiyimo xa yena a xi chavisa ngopfu lerova dokodela a kala a ku: “Hi nga ka hi nga hlamuseli leswaku ha yini a ha hanya.” Kambe kute loko muxaka lowu amukelekaka wa vutshunguri wu sunguriwile, u antswe hi xihatla lerova dokodela un’wana a ku: “A ndzi swi tshembi—a wu nga ta hlakarhela hi nkarhi wuntsongo hi ndlela leyi, hambi loko a hi loku pompela ngati siku hinkwaro.” Sweswi, i phayona ra nkarhi hinkwawo, naswona majaha yakwe mambirhi, lava sweswi va nga ni 12 na 14, va endla nhluvuko entiyisweni. Antonietta u xiya ‘mfanelo’ yoleyo hi xivindzi, ku kwetsima ka ngati. Timbhoni hinkwato ta Yehova ti namarhela langutelo leri fanaka loko ti ri karhi ti famba emintileni ya Yesu.
Mahanyelo Lamanene
9. I ‘mfanelo’ yihi yin’wana leyi katsekaka eku landzeleni ka mintila ya Yesu, naswona xana ku humelela yini eka lava hlulekaka ku landzela leswi?
9 ‘Mfanelo’ yin’wana leyi tshikileriweke epapileni rero ro huma eka huvo leyi fumaka ya lembe xidzana ro sungula a ku ri ku “tshika . . . vuoswi.” Eka papila rakwe ro sungula ro ya eka Vakorinto, Pawulo u ndlandlamuxe leswi, a ku: “Loko ti ri timbhisa, ni lava phahlaka swikwembu swa hava, ni vaoswi, ni vavanuna lava endlaka swa tingana ni vavanuna-kulobye . . . va nga ka va nga dyi ndzhaka ya Mfumo wa Xikwembu.” (1 Vakorinto 6:9, 10) Vakriste va pfuna vanhu lava navelaka ku tirhela Yehova ku tintshunxa eka mikhuva leyi ya thyaka. Hambi ku ri swirho swa bandlha leswi phasiwaka hi yona swa pfuniwa ku tibasisa loko swi tisola ivi swi hundzuka. (Yakobo 5:13-15) Kambe loko Mukriste un’wana ni un’wana a wela emikhuveni yo tano ya thyaka ivi a ala ku hundzuka, nawu lowu nga hundzukiki wa Bibele wa tirha. Pawulo a a huhuteriwe hi Xikwembu leswaku a ku: “Mi nga tolovelani ni loyi a vuriwaka “makwerhu” kasi i muoswi . . . hlongolani lowo biha exikarhi ka n’wina.”—1 Vakorinto 5:11, 13.
10, 11. (a) I vamani lava fanelaka ku byarha vutihlamuleri hikwalaho ka mimpimanyeto leyi nga nyawuriki ya mahanyelo eVujaganini, naswona hikwalaho ka yini? (b) Xana ntokoto wa wanuna ePhilippines wu swi kombisa njhani leswaku, tanihi ntlawa, Timbhoni ta Yehova ti hlayisa mimpimanyeto leyi tlakukeke ya mahanyelo?
10 Ku nga khathariseki dyondzo leyi yo twisiseka, Vujagani byi tele hi vunghwavava. Vafundhisi lava timulaka mimpimanyeto ya Xikwembu va fanele ku soriwa eka xiyimo lexi, ku fana ni lava vulavulaka kunene hi mimpimanyeto ya Bibele kambe va hluleka ku yi tirhisa hi xivindzi emabandlheni ya vona. Hambi swi ri tano, nakambe, eka leswi, Timbhoni ta Yehova tanihi vanhu ti famba emintileni ya Yesu.
11 Xiya Jose, la humaka ePhilippines. Loko a ri ni malembe ya 17 a a tiveka tanihi mupfuxi wa mpfhampfhampfha ni la tlangaka hi mali [gambler]. A a tshama a dakwile, a hanya vutomi bya vunghwavava, naswona hakanyingi a pfaleriwa ekhotsweni hikwalaho ka ku yiva. Endzhaku u hlangane ni Timbhoni ta Yehova. “Dyondzo ya Bibele yi hundzule vutomi bya mina hi laha ku heleleke,” ku vule yena. “A ndza ha nwi ni ku dzaha, naswona ndzi dyondze ku lawula mahanyelo ya mina. Sweswi ndzi na ripfalo leri baseke, ndzi na nsati un’we ntsena. Ndzi tlhele ndzi kuma ku xiximiwa hi vaakelani va mina, lava a va tolovele ku ndzi vitana ‘Jose, la dumeke’ na ‘Jose, xipuku.’ Sweswi va ndzi vitana ‘Jose, lowa Mbhoni ya Yehova.’ N’wana wa mina wa mufana ni ntukulu wa mina i malandza ya vutirheli ebandlheni leri sweswi ndzi tirhaka tanihi nkulu na phayona ra nkarhi hinkwawo eka rona.” Jose ni timiliyoni tin’wana ta timbhoni ta Vukriste ta Yehova va famba emintileni ya Yesu tanihi Vakriste lava baseke emahanyelweni.
Vukala-tlhelo
12. I langutelo rihi ra Vakriste va ntiyiso leri Yesu a ri tshikilelaka eka xikhongelo xa yena lexi rhekhodiweke eka Yohane ndzima 17?
12 Exikhongelweni xo leha lexi Yesu a xi nyikeleke eka madyambu yo hetelela lawa a a ri ni vadyondzisiwa va yena, u vule ndlela yin’wana leyi valandzeri va yena a va ta ‘famba eminkondzweni ya yena’ ha yona. Loko a vulavula hi vadyondzisiwa va yena, u te: “A hi va misava, tani hi leswi na mina ndzi nga riki wa misava.” (Yohane 17:16) Leswi swi vula leswaku Vakriste va ni vukala-tlhelo. Ematshan’wini ya ku katseka eka tipolitiki kumbe ku himpfilitana ka matiko, va byela van’wana hi Mfumo wa Xikwembu, ntlhantlho wu ri woxe wa swiphiqo swa misava leyi.—Matewu 6:9, 10; Yohane 18:36.
13, 14. (a) Vujagana byi hambana hi ndlela yihi ni Timbhoni ta Yehova emhakeni ya vukala-tlhelo? (b) Ku hlayisa vukala-tlhelo bya politiki ka Mbhoni eJapani ku tirhe njhani eku pfuneni ka vamakwavo hinkwavo?
13 Nawu lowu wa vukala-tlhelo wu rivariwile hi swirho swo tala swa Vujagana, leswi hi ntolovelo masungulo ya matiko ya nga ya nkoka ngopfu ku tlula vun’we bya vukhongeri eka swona. Mutsari wa tinyuziphepha loyi ku kaneriweke ha yena Mike Royko u kombisa leswaku “Vakriste” a va “tshembekanga ehenhleni ka ku tlhontlha tinyimpi eka Vakriste van’wana,” wa engetela: “Loko a va lo tshembeka, tinyimpi to tala letikulu eYuropa ingi ti nga humelelanga.” Leswaku Timbhoni ta Yehova ti hlayisa vukala-tlhelo lebyikulu bya Vukriste eminkarhini ya nyimpi i mhaka leyi tivekaka kahle. Kambe tanihi valandzeri va minkondzo ya Yesu, va tlhela va va ni vukala-tlhelo eka timhaka ta ntirhisano ni politiki. Xisweswo, ku hava lexi kavanyetaka vun’we bya vona lebyi xiyekaka bya misava hinkwayo.—1 Petro 2:17.
14 Vukala-tlhelo bya vona minkarhi yin’wana byi tisa vuyelo lebyi nga languteriwangiki. Hi xikombiso, emugangeni wa Tsugaru wa n’walungu wa Japani, ku hlawula ku khathaleriwa swinene. Kambe Toshio, mininjhere la pfunetaka eka Ndzawulo ya swa Timali ehofisini ya hulumendhe ya kwalaho, u ale hikwalaho ka swivangelo swa ripfalo ku katseka etsimeni ro tlhela ku hlawuriwa meyara. Leswi swi endle leswaku a ehliseriwa eka xiyimo xa le hansi eka Ndzawulo yo Olela Thyaka. Hambi swi ri tano, lembe rin’we endzhakunyana, meyara u khomiwile ivi a sindzisiwa ku tshika ntirho hikwalaho ka swiendlo swa vubihi. Meyara lontshwa u hlawuriwile. Loko a twa hi ku ehlisiwa ka Toshio, u n’wi vuyisele eka xiyimo xa le henhla xa vulawuri, naswona leswi swi tise minkateko eka vamakwavo va Vukriste va Toshio. Hi ndlela yihi? Toshio u hlamusela leswaku a swi nonon’hwa ngopfu ku kuma mpfumelelo wo tirhisa tijimineziyamu ku khomela tinhlengeletano handle ka swiendlakalo swa mintlangu yo tsutsuma. Kambe exiyin’weni xa yena xa sweswi, “Yehova u swi kotile ku ndzi tirhisa”—ku tshahiwa marito ya Toshio hi yexe—“ku kuma mpfumelelo wa ku tirhisela tijimineziyamu to tano mintsombano minharhu ya muganga ni tinhlengeletano ta mune ta xifundza.” Wa dlayelela: “Loko hi tshama hi tshembekile, Yehova u ta pfula tindlela leti nga anakanyekiki leswaku a hi tirhisa.”
Ekaya
15. Xana Yesu u siyele valandzeri va minkondzo ya yena ntila emhakeni ya vuxaka bya ndyangu hi ndlela yihi?
15 Ndhawu yin’wana laha Vakriste va ‘landzelaka mitila ya Yesu’ kona hi le kaya. Bibele yi nyika xikombiso xa Yesu tanihi ntila wa vuxaka bya le kaya loko yi ku: “Titsongahateni, van’wana eka van’wana, hikwalaho ka xichavo lexi mi nga na xona eka Kriste. N’wina vavasati, titsongahateni eka vanuna va n’wina, kukota loko mi titsongahata eka Hosi. Hikuva nuna i nhloko ya nsati, kukota leswi Kriste na yena a nga nhloko ya Kereke . . . kutani, tani hi leswi Kereke yi titsongahataka eka Kriste, vavasati na vona a va titsongahate eka vanuna va vona, etimhakeni hinkwato. N’wina vavanuna, rhandzani vasati va n’wina kukota leswi Kriste na yena a nga rhandza Kereke, kutani ú nyiketile vutomi bya yena hikwalaho ka yona.”—Vaefesa 5:21-25.
16, 17. (a) I xiyimo xihi lexo biha lexi nga kona eVujaganini malunghana ni vuxaka bya le makaya? (b) Xana vuxaka bya le kaya byi nga antswisiwa hi ndlela yihi ntsena, tanihi laha swi kombisiweke ha kona hi ntokoto wa mpatswa lowu tekaneke eBrazil?
16 Vujagani namuntlha hi ntolovelo byi honisa ndzayo leyi kutani xisweswo byi tele hi mindyangu leyi hohlokeke. Makaya lama hahlukeke ya tolovelekile, naswona ku himpfilitana ka vatswari ni vana hakanyingi ku ya ku nyanya. “Ndyangu wa hohloka,” ku xiye profesa wa ntivo-miehleketo malembe lama hundzeke. Vativi va miehleketo ya vana, vatsundzuxi va ta vukati ni vativi va swa vutshunguri va ve ni ku humelela loku hikiweke eku hlanganiseni ka mindyangu leyi hahlukeke. Kambe Timbhoni ta Yehova ti ringeta hi matimba ku tirhisa milawu ya Bibele naswona ti tiviwa hi vuxaka bya ndyangu lebyi antswaka ku tlula lebyi tolovelekeke.
17 Hi xikombiso, Aldemar, a a ri xandla xa maphorisa ya nyimpi ya Brazil naswona a a ri na swiphiqo swa ndyangu. Nsati wa yena u n’wi tshikile ivi a lava ku hambana ka le nawini. U sungule ku nwa ku tlula mpimo kutani a tlhela a ringeta ku tisunga. Endzhakunyana, maxaka ya yena, lava nga Timbhoni ta Yehova, va vulavule na yena hi Bibele. U tsakele leswi a swi tweke ivi a sungula ku dyondza. Hi ku lava ku twananisa vutomi bya yena ni xiyimo xa vukala-tlhelo lexi Timbhoni ta Yehova ti tiveriwaka xona, u kombele ku ntshunxiwa eka vuthu ra nyimpi. Aldemar ni nsati wakwe va lulamise ku hambana ka vukati bya vona hi ku tirhisa milawu ya Bibele leyi Aldemar a a ri eku yi dyondzeni. Namuntlha, va landzelela minkondzo ya Yesu, va tirhela Yehova swin’we tanihi maphayona ya nkarhi hinkwawo.
Ku Yingisa Hikwalaho Ka Rirhandzu
18. (a) Ha yini Timbhoni ta Yehova ti katekisiwa emoyeni namuntlha? (b) Esaya 2:2-4 yi hetiseka hi ndlela yihi sweswi?
18 Swi le rivaleni leswaku Timbhoni ta Yehova ti famba hi vun’we emoyeni ni le mintileni ya Kriste Yesu. Tanihi vanhu naswona tanihi ntlawa, va katekisiwile emoyeni hi ku endla sweswo. (Psalma 133:1-3) Vumbhoni lebyi nga erivaleni bya nkateko wa Xikwembu eka vona byi susumetele vunyingi bya vanhu va timbilu letinene ku endla hi ku twanana na vuprofeta lebyi nga eka Esaya 2:2-4. Eka malembe ya ntlhanu ntsena lama hundzeke, 987 828 va teke magoza lama faneleke ya ku tinyiketela ivi va tihumelerisa hi nkhuvulo wa mati. Hi rirhandzu, Yehova a nga vekanga makumu lama kongomeke eka nhlayo ya vanhu lava va nga endlaka leswi ‘nhlomulo lowukulu’ wu nga si hlasela!—Nhlavutelo 7:9, 14.
19. (a) Xana i mimpfuno yihi leyikulu leyi nga humelelaka eku tirheleni ka Yehova, naswona yi nga langutiwa hi ndlela yihi? (b) Xivangelo xa hina lexikulu xo yingisa swileriso swa Yehova hi xihi?
19 Tanihi laha mintokoto leyi nga laha henhla yi kombaka ha kona, minkateko ya moya leyi tsakeriwaka hi vanhu va Xikwembu hakanyingi yi fambisana ni mimpfuno leyikulu. Hi xikombiso, hi ku tshika ku dzaha, hi ku hanya vutomi lebyinene na hi ku xixima ku kwetsima ka ngati, va nga papalata ku hlaseriwa hi mavabyi man’wana. Kambe hikwalaho ko hanya hi ku fambisana na ntiyiso, va nga ha pfuneka eka ndlela ya swa ikhonomi, ya ntirhisano kumbe ya le kaya. Wun’wana ni wun’wana wa mimpfuno yo tano ya xiviri wu tekiwa tanihi nkateko lowu humaka eka Yehova, naswona yi kombisa ku tirha ka milawu ya Yehova. Kambe ku koteka ka ku kuma minkateko yo tano ya xiviri hi koxe a hi xivangelo lexikulu xa ku yingisa milawu ya Xikwembu. Vakriste va ntiyiso va yingisa Yehova hi leswi va n’wi rhandzaka, hikuva u lulameriwa hi vugandzeri bya vona, ni hikwalaho ka leswi ku endla ku rhandza ka yena ku nga nchumu wun’we ntsena lowu lulameke. (1 Yohane 5:2, 3; Nhlavutelo 4:11) I Sathana loyi a nge vanhu va tirhela Xikwembu leswaku va va ni mimpfuno ya vutianakanyi ntsena.—Vona Yobo 1:9-11; 2:4, 5.
20. Timbhoni ta Yehova ta namuntlha ti famba hi moya wun’we hi ndlela yihi ku fana na timbhoni tinharhu leti tshembekaka ta Vaheveru ta minkarhi ya khale?
20 Timbhoni ta Yehova ta manguva lawa ti famba emoyeni wun’we ku fana ni majaha manharhu lama tshembekaka ya timbhoni ta Vaheveru ta siku ra Daniyele. Loko va xungetiwe hi ku hoxiwa ekheleni leri pfurhaka ra ndzilo, vona lava va te: “Loko ŝi nga endleka, leŝaku Šikwembu ša hina leši hi ši tirelaka, ši hi ponisa, ši ta hi ponisa e kheleni ra nḍilo lo’wo lev̌a ni v̌okweni ra wena, hosi. Ni loko ŝi nga ri ŝeŝo [leswi swi vula leswaku, hambi loko xi nga hi pfumelela hi fa], tiv̌a, wena hosi, leŝaku hi nga ka hi nga tirheli ŝikwembu ŝa wena, hi nga ka hi nga nkhinsami e mahlweni ka šifaniso ša wena ša nsuku leši u ši yimiseke.” (Daniel 3:17, 18) Ku nga khathariseki hakelo ya xiviri kumbe mimbuyelo, kumbe mimpfuno ya xihatla, Timbhoni ta Yehova ti ta hambeta ti landzela minkondzo ya Yesu swinene, ti ri karhi ti tiva leswaku vutomi lebyi nga heriki emisaveni leyintshwa ya Xikwembu byi tiyile! Tanihi vanhu lava nga ni vun’we, va ta hambeta va famba “hi moya wun’we” ne “mitileni yin’we,” ku nga khathariseki leswi nga humelelaka!
Xana U Nga Hlamusela:
◻ Leswaku ha yini Timbhoni ta Yehova ti ri na vun’we?
◻ Leswaku hi le timhakeni tihi laha Timbhoni ta Yehova ti hambanaka kona ni lava tivulaka Vakriste?
◻ Leswaku hi xihi xivangelo lexikulu lexi ha xona Vakriste va tirhelaka Yehova?
◻ Leswaku vanhu va Xikwembu va yi languta njhani mimpfuno leyi humaka eku yingiseni ka Yehova?
[Xifaniso lexi nga eka tluka 16]
Loko muvabyi a ala ku amukela mpompelo wa ngati, hi ntolovelo ku ehleketiwa leswaku hi un’wana wa Timbhoni ta Yehova
[Xifaniso lexi nga eka tluka 18]
Vo tala lava tivulaka Vakriste a va tshembekangi ehenhleni ka ku tlhontlha tinyimpi eka van’wana—hi ku katekisiwa hi vafundhisi va vona