‘Xikwembu Xi Hi Rhandze Hi Mukhuva Wolowo’

“Leswi Xikwembu xi hi rhandzeke hi mukhuva wolowo, na hina hi fanele ku rhandzana.”—1 YOHANE 4:11.

 1. Hi March 23 endzhaku ka ku pela ka dyambu, hikwalaho ka yini timiliyoni ta vanhu ti ta va ti hlengeletanile eTiholweni ta Mfumo ni le tindhawini tin’wana to hlanganela eka tona exirhendzevutanini hinkwaxo xa misava?

HI Sonto, March 23, 1997, endzhaku ka ku pela ka dyambu, handle ko kanakana ku ta va ku ri ni vanhu vo tlula 13 000 000 emisaveni hinkwayo lava hlengeletaneke eTiholweni ta Mfumo ni le tindhawini tin’wana to hlanganela eka tona leti tirhisiwaka hi Timbhoni ta Yehovha. Hikwalaho ka yini? Hikuva timbilu ta vona ti khumbekile hi xikombiso lexikulu xa Xikwembu xa rirhandzu eka vanhu. Yesu Kreste u vulavule hi xikombiso xexo lexi hlamarisaka xa rirhandzu ra Xikwembu, a ku: “Xikwembu xi rhandzile misava swonghasi, xi ko xi nyika N’wana wa xona la nga un’we, leswaku un’wana ni un’wana la pfumelaka ka yena, a nga lovi, kambe a va ni vutomi lebyi nga heriki.”—Yohane 3:16.

 2. Hi swihi swivutiso leswi swi nga vaka swinene leswaku hinkwerhu hi tivutisa swona malunghana ni ndlela leyi hi ri tekaka ha yona rirhandzu ra Xikwembu?

² Loko hi ri karhi hi kambisisa rirhandzu leri Xikwembu xi ri kombiseke, i swinene ku tivutisa leswaku, ‘Xana ndza swi tlangela hakunene leswi Xikwembu xi swi endleke? Xana ndlela leyi ndzi hanyaka vutomi bya mina ha yona, ya swi kombisa leswaku ndzi na kona ku tlangela koloko?’

“Xikwembu I Rirhandzu”

 3. (a) Hikwalaho ka yini ku kombisa rirhandzu ku nga ri mhaka yo tika eka Xikwembu? (b) Xana matimba ni vutlhari swi vonaka njhani eka mintirho ya xona yo tumbuluxa?

³ Ku kombisa rirhandzu a hi nchumu lowu tikaka eka Xikwembu hikuva “Xikwembu i rirhandzu.” (1 Yohane 4:8) Rirhandzu i mfanelo ya xona leyikulu. Loko xa ha lulamisa misava leswaku yi ta akiwa hi vanhu, ku tumbuluxa ka xona tintshava ni ku hlengeleta ka xona mativa ya mati ni malwandle, a xi ri xikombiso lexikulu xa matimba. (Genesa 1:9, 10) Loko Xikwembu xi sungule ndzhendzheleko wa mati ni ndzhendzheleko wa okisijini, ni loko xi vumbe switsotswana swa ntsandza-vahlayi ni swimilana swo hambana-hambana leswaku swi cinca tikhemikhali leti nga emisaveni ti hundzuka swakudya leswi vanhu va nga swi dyaka leswaku va hambeta va hanya, loko xi hi endlele tiwachi ta ntumbuluko leti fambisanaka ni ku leha ka masiku ni ka tin’hweti eka pulanete ya Misava, leswi swi kombise vutlhari lebyikulu. (Pisalema 104:24; Yeremiya 10:12) Kambe, lexi xiyekaka swinene eka leswi swi tumbuluxiweke i xikombiso xa rirhandzu ra Xikwembu.

 4. Eka ntumbuluko lowu vonakaka, hi byihi vumbhoni bya rirhandzu ra Xikwembu lebyi hinkwerhu hi faneleke hi byi vona ni ku byi tlangela?

⁴ Milomo ya hina yi hi kombisa rirhandzu ra Xikwembu loko hi ri karhi hi dya mbhandzu wo nandziha, lowu wupfeke kahle lowu handle ko kanakana a wu nga endleriwanga ku hi hlayisa hi hanya ntsena kambe ni leswaku wu hi tsakisa. Mahlo ya hina ma vona xikombiso lexikulu xa rona loko ma vona ku pela ka dyambu ko saseka, matilo lama nga ni tinyeleti to tala hi vusiku lebyi nga hava mapapa, swiluva swa tinxaka-nxaka ni swa mivala yo saseka yo hambana-hambana, ku tlulatlula ka swihadyana ni ku n’wayitela lokunene ka vanghana. Tinhompfu ta hina ti hi endla hi ri vona loko hi koka nun’hwelo wa swiluva swa ximun’wana. Tindleve ta hina ta ri twa loko hi yingisa mpfumawulo wa boboma ra mati, miloti ya tinyenyana, ni marito ya varhandziwa va hina. Hi ri twa loko murhandziwa a hi angarha hi rirhandzu. Swiharhi swin’wana swi nyikiwe vuswikoti byo vona, ku twa kumbe ku nun’hwetela swilo swo karhi hi ndlela leyi tlulaka ya vanhu. Kambe vanhu va nyama, lava endliweke hi xifaniso xa Xikwembu, va ni vuswikoti byo vona rirhandzu ra Xikwembu hi ndlela leyi tlulaka ya xiharhi xihi na xihi.—Genesa 1:27.

 5. Yehovha u kombise Adamu na Evha rirhandzu lerikulu hi ndlela yihi?

⁵ Loko Yehovha Xikwembu a vumbe vanhu vo sungula, Adamu na Evha, u va nyike swilo leswi nga ta kombisa rirhandzu rakwe. U endle ntanga, ku nga paradeyisi, kutani a endla leswaku ku mila mirhi ya tinxaka hinkwato eka wona. U endle nambu leswaku wu cheleta ntanga, kutani a wu tata hi tinyenyana ni swiharhi leswi tsakisaka. Hinkwawo u wu nyike Adamu na Evha leswaku wu va kaya ra vona. (Genesa 2:8-10, 19) Yehovha u va khome tanihi vana vakwe, tanihi xiphemu xa ndyangu wakwe wa vuako hinkwabyo. (Luka 3:38) Tanihi leswi a vekeke xikombiso hi ku lunghiselela ntanga wa Edeni, Tatana wa le tilweni wa mpatswa lowu wo sungula, u va nyike xiavelo lexi enerisaka xa ku ndlandlamuxa Paradeyisi leswaku yi funengeta xirhendzevutana xa misava. Misava hinkwayo a yi ta tatiwa hi vana va vona.—Genesa 1:28.

 6. (a) Xana u titwisa ku yini hi ku xandzuka ka Adamu na Evha? (b) I yini lexi nga kombisaka leswaku hi dyondze swo karhi eka leswi humeleleke aEdeni ni leswaku hi vuyeriwile hi vutivi byebyo?

⁶ Hambiswiritano, endzhakunyana, Adamu na Evha va langutane ni ndzingo wa ku yingisa ka vona, ndzingo wa ku tshembeka. Ku sungule un’we kutani ku landzela loyi un’wana, va tsandzeke ku kombisa ku tlangela rirhandzu leri va kombisiweke rona. Leswi va swi endleke a swi chavisa. A ku nga ri na ndlela ya ku tilandzula! Hikwalaho ka sweswo, va lahlekeriwe hi vuxaka bya vona ni Xikwembu, va hlongoriwa endyangwini wa xona, kutani va humesiwa aEdeni. Hina namuntlha ha ha xanisiwa hi vuyelo bya xidyoho xa vona. (Genesa 2:16, 17; 3:1-6, 16-19, 24; Varhoma 5:12) Kambe, xana hi dyondzile eka leswi nga humelela? Xana hi ri tekisa ku yini rirhandzu ra Xikwembu? Xana swiboho leswi hi swi endlaka siku na siku swa kombisa leswaku ha ri tlangela rirhandzu ra xona?—1 Yohane 5:3.

 7. Ku nga khathariseki leswi Adamu na Evha va swi endleke, xana Yehovha u ri kombise njhani rirhandzu eka vana va vona?

⁷ Hambileswi vatswari va hina vo sungula lava nga vanhu va nyama, va kombiseke ku pfumala ku tlangela swonghasi, eka leswi Xikwembu xi nga va endlela swona, a swi ri herisanga rirhandzu ra Xikwembu. Hikwalaho ka ku twela vanhu lava hi nkarhi wolowo a va nga si velekiwa—ku katsa na hina hi hanyaka namuntlha—Xikwembu xi pfumelele Adamu na Evha leswaku va va ni ndyangu va nga si fa. (Genesa 5:1-5; Matewu 5:44, 45) Loko a xi nga swi endlanga sweswo, a nga kona eka hina loyi a ta va a velekiwile. Hi ku paluxa ku rhandza kakwe hakatsongo-tsongo, Yehovha u tlhele a nyikela xisekelo xa ntshembo eka vana hinkwavo va Adamu lava nga ta va ni ripfumelo. (Genesa 3:15; 22:18; Esaya 9:6, 7) Lunghiselelo rakwe ri katsa ndlela leyi ha yona vanhu va matiko hinkwavo va nga ta tlhela va kuma leswi Adamu a swi lahleke, ku nga vutomi lebyi hetisekeke tanihi swirho leswi amukelekaka swa ndyangu wa Xikwembu wa vuako hinkwabyo. U endle leswi hi ku lunghiselela nkutsulo.

Hikwalaho Ka Yini Nkutsulo Wu Laveka?

 8. Hikwalaho ka yini Xikwembu xi nga vulanga leswaku tanihi leswi Adamu na Evha va faneleke ku fa, a nga kona eka vana va vona, la yingisaka, loyi a nga ta fa?

⁸ Xana a swi boha leswaku ku hakeriwa nkutsulo lowu nga hi xivumbeko xa vutomi bya munhu? Xana a swi nga ta endleka leswaku Xikwembu xi vula leswaku, hambileswi Adamu na Evha va faneleke va fa hikwalaho ka vuxandzuki bya vona, vana va vona hinkwavo lava va yingisaka Xikwembu, va hanya hilaha ku nga heriki? Hi ku ya hi langutelo leritsongo leri munhu a nga na rona, sweswo swi nga ha vonaka swi twala. Hambiswiritano, Yehovha u “ranḍa ku lulama ni ku tenga.” (Pisalema 33:5) Adamu na Evha va kume vana ntsena endzhaku ka loko se va ri vadyohi; kutani a nga kona eka vana lava loyi a velekiweke a hetisekile. (Pisalema 51:5) Hinkwavo va kume ndzhaka ya vudyoho, naswona hakelo ya xidyoho i rifu. Loko Yehovha a lo swi honisa leswi, xana sweswo a swi ta va xikombiso xa njhani eka swirho swa ndyangu wa yena wa vuako hinkwabyo? A a nga ta swi kota ku honisa mimpimanyeto ya yena n’wini ya ku lulama. A a swi xixima swilaveko swa vululami. A nga kona loyi a ta va ni xivangelo lexi twalaka xo sola ndlela leyi Xikwembu xi tameleke timhaka leti ha yona.—Varhoma 3:21-23.

 9. Hi ku ya hi mpimanyeto wa Xikwembu wa vululami, xana a ku laveka nkutsulo wa muxaka muni?

⁹ Kutani ke, xana a xi ta lunghiseleriwa njhani xisekelo lexi fanelekaka xo kutsula vana va Adamu lava, hi rirhandzu, a va ta kombisa ku titsongahata eka Yehovha? Loko munhu loyi a hetisekeke o fa rifu ra gandzelo, vululami byi nga endla leswaku ntikelo wa vutomi byebyo byo hetiseka byi va hakelo ya swidyoho swa lava, hi ripfumelo, va nga ta amukela nkutsulo wolowo. Tanihi leswi xidyoho xa munhu un’we, Adamu ku nga xona xi endleke leswaku ndyangu wa vanhu hinkwawo wu va vadyohi, ku halatiwa ka ngati ya munhu un’wana la hetisekeke, leyi nga ni ntikelo lowu fanaka, yi nga swi kota ku fikelela swilaveko swa vululami. (1 Timotiya 2:5, 6) Kambe xana munhu wo tano a a ta kumiwa kwihi?

Xana Nxavo A Wu Ri Wo Tanihi Kwihi?

10. Hikwalaho ka yini vana va Adamu va nga swi kotanga ku nyikela nkutsulo lowu lavekaka?

¹⁰ Exikarhi ka vana va mudyohi, Adamu, a nga ri kona loyi a ta humesa leswi a swi laveka leswaku ku tlhela ku xaviwa ntshembo wa vutomi lowu Adamu a wu lahleke. “Munhu a nga ŝi koti ku kuṭula makwav̌o, hambi ku ri ku humesela Šikwembu e nṭengo wa yena. Nṭengo wa moya wa v̌ona wu dura ngopfu; munhu o ta ṭandzeka ku wu humesa, ni siku riṅwe; v̌a nga ka v̌a nga hanyi hi masiku la’ma nga heriki, leŝaku v̌a nga v̌oni sira.” (Pisalema 49:7-9) Ematshan’weni yo tshika vanhu va ri hava ntshembo, Yehovha hi yexe, hi musa, u endle lunghiselelo.

11. Yehovha u tirhise yini leswaku a nyikela vutomi bya munhu lebyi hetisekeke lebyi a byi laveka leswaku ku va ni nkutsulo lowu faneleke?

¹¹ Yehovha a nga rhumelanga ntsumi emisaveni leswaku yi ta tiendla onge yi file, yi siya miri lowu endliweke wu fana ni wa munhu kasi yona yi karhi ya hanya tanihi moya. Ematshan’weni ya sweswo, hi ku endla singita leri ku nga Xikwembu ntsena, Muvumbi, lexi nga ri kunguhataka, xi hundzisele matimba ya vutomi ni vumunhu bya n’wana wa le tilweni, embelekweni wa wansati, Mariya n’wana wa Heli, wa xivongo xa Yuda. Matimba ya Xikwembu lama tirhaka, ku nga moya wa xona wo kwetsima, wu sirhelele ku kula ka n’wana embelekweni wa mana wa yena, naswona u velekiwe a ri munhu la hetisekeke. (Luka 1:35; 1 Petro 2:22) Loyi yena a ri na wona nxavo lowu lavekaka leswaku a nyikela nkutsulo lowu a wu ta fikelela swilaveko swa vululami bya Xikwembu hilaha ku heleleke.—Vaheveru 10:5.

12. (a) Yesu i “N’wana la nga un’we” wa Xikwembu hi ndlela yini? (b) Ku rhumela ka Xikwembu n’wana loyi leswaku a va nkutsulo swi ri kandziyisa njhani rirhandzu ra xona eka hina?

¹² Xana Yehovha u xi nyike mani xiavelo lexi, exikarhi ka timiriyadi ta vana va yena va le tilweni? Eka loyi a hlamuseriwaka eMatsalweni tanihi “N’wana la nga un’we” wa xona. (1 Yohane 4:9) Xiga lexi xi tirhiseriwa ku hlamusela leswi a ri swona a ha ri ematilweni, ku nga ri leswi a veke swona loko a velekiwa tanihi munhu wa nyama. Hi yena ntsena la vumbiweke hi ku kongoma hi Yehovha, a nga pfuniwi hi munhu un’wana. I Mativula ya swivumbiwa hinkwaswo. Hi yena loyi a tirhisiweke hi Xikwembu ku tumbuluxa swivumbiwa leswin’wana hinkwaswo. Tintsumi i vana va Xikwembu, tanihi leswi Adamu na yena a a ri n’wana wa Xikwembu. Kambe Yesu u hlamuseriwa tanihi loyi a nga ni “ku kwetsima loku fanelaka n’wana loyi a nga yexe eka tata wa yena.” Ku vuriwa leswaku u le “xifuveni xa Tatana.” (Yohane 1:14, 18) Vuxaka bya yena na Tatana i bya le kusuhi, bya ku tshembana, lebyikulu. U rhandza vanhu ku fana ni Tata wa yena. Swivuriso 8:30, 31 (NW) yi hlamusela ndlela leyi Tata wa yena a titwaka ha yona hi N’wana loyi ni ndlela leyi N’wana a titwaka ha yona hi vanhu: “Ndzi ve loyi a tsakeriwaka hi yena [Yehovha] swinene siku na siku‚ mina ndzi ri la tsakeke emahlweni ka yena hi masiku, . . . naswona mina [Yesu, Mutirhi Lonkulu wa Yehovha, ximunuhato xa vutlhari] a ndzi tsakisiwa hi vana va vanhu.” Hi yena N’wana loyi wa risima loyi Xikwembu xi n’wi rhumeke emisaveni ku ta nyikela nkutsulo. Mawaku ndlela leyi ma fanelaka ha yona marito ya Yesu lama nge: “Xikwembu xi rhandzile misava swonghasi, xi ko xi nyika N’wana wa xona la nga un’we”!—Yohane 3:16.

13, 14. Xana rungula ra Bibele malunghana ni ku ringeta ka Abrahama ku nyikela Isaka, ri hi pfuna ku twisisa yini, hi leswi Yehovha a swi endleke? (1 Yohane 4:10)

¹³ Leswaku hi kota ku twisisa hi mpimo wo karhi, leswi sweswo swi vulaka swona, khale Yesu a nga si ta emisaveni, Xikwembu xi lerise Abrahama, kwalomu ka malembe ya 3890 lama hundzeke xi ku: “Teka ṅwana ku, loyi a nga ŝakwe ka wena, loyi u ṅwi ranḍaka, a nga Isak, u ya e tikweni ra Moriya, u ṅwi tlhav̌ela kona e ganḍelweni, e nṭhav̌eni yiṅwana leyi nḍi nga ta ku kombisa yona.” (Genesa 22:1, 2) Hi ripfumelo Abrahama u yingisile. Titeke u ri exiyin’weni xa Abrahama. Ku vuriwa yini loko yoloye a ku ri n’wana wa wena, n’wana wa wena la nga un’we loyi u n’wi rhandzaka swinene? Xana a wu ta titwisa ku yini loko u ri karhi u pandzela tihunyi ta gandzelo ro hisiwa, u teka riendzo leri hetaka masiku yo hlayanyana u ya etikweni ra Moriya, kutani u veka n’wana wa wena ealtarini?

¹⁴ Hikwalaho ka yini mutswari loyi a nga ni ntwela-vusiwana a va ni mintlhaveko yo tano? Genesa 1:27 yi vula leswaku Xikwembu xi vumbe munhu hi xifaniso xa xona. Mintlhaveko ya hina ya rirhandzu ni ya ntwela-vusiwana a yi nyawuli loko yi pimanisiwa ni rirhandzu ni ntwela-vusiwana lowu Yehovha a nga na wona. Emhakeni ya Abrahama, Xikwembu xi nghenelerile, leswaku Isaka a nga endliwi gandzelo hi xiviri. (Genesa 22:12, 13; Vaheveru 11:17-19) Kambe eka yena, Yehovha a nga tshikanga hi nkarhi wo hetelela, ku nyikela nkutsulo, hambileswi a swi endleke hi ku vaviseka lokukulu, yena ni N’wana wa yena. Leswi xi swi endleke, Xikwembu a xi nga boheki ku swi endla, kambe ematshan’weni ya sweswo, a ku ri hikwalaho ka tintswalo letikulu leti nga faneliki. Xana hi swi twisisa kahle?—Vaheveru 2:9.

Leswi Ri Swi Endlaka Swi Koteka

15. Xana nkutsulo wu byi khumbe njhani vutomi bya vanhu hambi ku ri eka mafambiselo ya sweswi ya swilo?

¹⁵ Lunghiselelo rero ra rirhandzu leri endliweke hi Xikwembu ri ni vuyelo lebyikulu evuton’wini bya lava va ri amukelaka hi ripfumelo. Khale a va hambanisiwile ni Xikwembu hikwalaho ka xidyoho. A va ri hilaha Rito ra xona ri vulaka ha kona, ‘valala hi leswi miehleketo ya vona a yi ri eka swilo swo biha.’ (Vakolosa 1:21-23) Kambe va “endliwile lava vuyelelaneke na xona hi ku fa ka N’wana wa xona.” (Varhoma 5:8-10) Leswi va cinceke ndlela leyi a va hanya ha yona, naswona va amukeleke ndzivalelo lowu Xikwembu xi endlaka leswaku wu kumeka eka lava vaka ni ripfumelo eka gandzelo ra Kreste, va nyikiwa ripfalo leri baseke.—Vaheveru 9:14; 1 Petro 3:21.

16. Hi yihi mikateko leyi nyikiwaka ntlhambinyana hikwalaho ka ku pfumela ka vona eka nkutsulo?

¹⁶ Yehovha u nyike nhlayo yitsongo ya lava, ku nga ntlhambinyana, musa lowu nga faneriwiki wa ku hlanganyela ni N’wana wa yena eMfun’weni wa le tilweni, leswaku va ta hetisisa xikongomelo xa Xikwembu xo sungula hi misava. (Luka 12:32) Vona va tekiwe “etinxakeni hinkwato, va ri va tindzimi hinkwato, ni va swivongo hinkwaswo, ni va matiko hinkwawo. U va endlile tiko, ni ku va vaprista lava tirhelaka Xikwembu xa hina, kutani va ta va tihosi emisaveni.” (Nhlavutelo 5:9, 10) Eka lava, muapostola Pawulo u tsarile: “Moya lowu mi nga nyikiwa wona . . . wu mi endla vana; hi matimba ya Moya lowu, hi huwelela hi ku: ‘Abba, Tatana!’ Moya lowu wu yima ni mimoya ya hina ku tiyisa leswaku hi vana va Xikwembu. Kutani leswi hi nga vana, naswona hi vadyandzhaka; hi vadyandzhaka va Xikwembu, ni vadyandzhaka swin’we na Kriste.” (Varhoma 8:15-17) Hi ku amukeriwa ka vona hi Xikwembu va va vana va xona, va nyikiwa vuxaka byo hlawuleka swinene lebyi Adamu a byi cukumeteke; kambe vana lava, va ta nyikiwa malunghelo lama engetelekeke ya ku tirha etilweni—ku nga nchumu lowu Adamu a nga kalangiki a wu kuma. A swi hlamarisi leswi muapostola Yohane a nga te: “Ma nga vona rirhandzu lerikulu leri Tatana a hi rhandzaka ha rona, ku fika laha hi vuriwaka vana va Xikwembu”! (1 Yohane 3:1) Eka volavo, Xikwembu a xi kombisi rirhandzu leri susumetiwaka hi misinya ya milawu ntsena (a·gaʹpe) kambe xi tlhela xi kombisa xinakulobye lexikulu (phi·liʹa), lexi fanaka ni rirhandzu leri nga kona exikarhi ka vanghana va xiviri.—Yohane 16:27.

17. (a) Hinkwavo lava pfumelaka eka nkutsulo, va nyikiwa lunghelo rihi? (b) Xana “ku ntshunxeka loko kwetsima loku nga ka vana va Xikwembu” ku vula yini eka vona?

¹⁷ Ni le ka van’wana—hinkwavo lava kombisaka ripfumelo eka lunghiselelo ra Xikwembu ra tintswalo ra ku kuma vutomi ha Yesu Kreste—Yehovha u pfula ndlela yo kuma vuxaka bya risima lebyi Adamu a byi lahleke. Muapostola Pawulo u hlamuserile: “Hikuva swivumbiwa [swivumbiwa leswi nga vanhu leswi humaka eka Adamu] hinkwaswo swi langutela, hi ku navela lokukulu, leswaku Xikwembu xi kombisa erivaleni vana va xona [hileswaku, va rindzela nkarhi lowu ha wona swi nga ta va erivaleni leswaku vana va Xikwembu, lava va nga vadyandzhaka swin’we na Kreste eMfun’weni wa le tilweni, va teka goza va yimela vanhu]. Leswi vumbiweke swi nyiketiwile eka swa hava [swi velekiwe exidyohweni naswona swi langutele ku fa, naswona a swi nga ri na ndlela yo tikutsula], ku nga ri hi ku rhandza ka swona, kambe hi ku rhandza ka Loyi a swi nyiketeke. Kambe ku langutela ku kona [loku humaka eka Xikwembu] ka leswaku swivumbiwa leswi swi ta ntshunxiwa na swona evuhlongeni bya leswo bola, ku ta amukela ku ntshunxeka loko kwetsima loku nga ka vana va Xikwembu.” (Varhoma 8:19-21) Xana ntshunxeko wolowo wu ta vula yini? Leswaku va ntshunxiwile evukhumbini bya xidyoho ni rifu. Va ta va ni mianakanyo ni miri lowu hetisekeke, kaya ra vona ri ri Paradeyisi, ni vutomi lebyi nga heriki leswaku va ta tiphina hi ku hetiseka ka vona ni ku kombisa ku tlangela ka vona Yehovha, Xikwembu xi ri xin’we xa ntiyiso. Xana hinkwaswo leswi swi endliwe swi koteka hi ndlela yihi? Hi gandzelo ra nkutsulo ra N’wana wa Xikwembu la velekiweke a ri swakwe.

18. Hi March 23 endzhaku ka ku pela ka dyambu, xana hi ta va hi endla yini, naswona hikwalaho ka yini?

¹⁸ Hi Nisan 14, 33 C.E., ekamareni ra le henhla eYerusalema, Yesu u simeke Xitsundzuxo xa rifu rakwe. Ku tlangela ku fa kakwe ka lembe na lembe ku hundzuke xiendlakalo xa nkoka evuton’wini bya Vakreste hinkwavo va ntiyiso. Yesu hi yexe u lerisile: “Endlani leswi hi ku ndzi anakanya.” (Luka 22:19) Hi 1997 Xitsundzuxo xi ta va hi March 23 endzhaku ka ku pela ka dyambu (ku nga nkarhi lowu Nisan 14 yi sungulaka ha wona). Hi siku rero, a xi kona xa nkoka ku tlula ku va kona eka xiendlakalo lexi xa Xitsundzuxo.

A Wu Ta Hlamurisa Ku Yini?

◻ Xikwembu xi kombise rirhandzu lerikulu eka vanhu hi tindlela tihi?

◻ Hikwalaho ka yini a ku laveka vutomi bya munhu la hetisekeke leswaku ku kutsuriwa vana va Adamu?

◻ Hi wihi nxavo lowukulu lowu Yehovha a lunghiseleleke nkutsulo ha wona?

◻ Xana nkutsulo wu endla leswaku ku kumeka yini?

[Xifaniso lexi nga eka tluka 10]

Xikwembu xi nyikele hi N’wana wa xona la tswariweke a ri swakwe