I Vamani Vatirheli Va Xikwembu Namuntlha?

“Ku faneleka kahle ka hina ku huma eka Xikwembu, lexi xi hi endleke hi faneleka kahle ku va vatirheli va ntwanano lowuntshwa.”—2 VAKORINTO 3:5, 6.

1, 2. I vutihlamuleri byihi lebyi Vakreste hinkwavo va lembe-xidzana ro sungula va hlanganyeleke eka byona, kambe swilo swi hundzuke hi ndlela yihi?

EKA lembe-xidzana ro sungula ra Nguva ya hina leyi Tolovelekeke, Vakreste hinkwavo a va ri ni vutihlamuleri bya nkoka—ku nga ntirho wa ku chumayela mahungu lamanene. Hinkwavo ka vona a va ri vatotiwa naswona a va ri vatirheli va ntwanano lowuntshwa. Van’wana a va ri ni vutihlamuleri lebyi engetelekeke, byo tanihi ku dyondzisa evandlheni. (1 Vakorinto 12:27-29; Vaefesa 4:11) Vatswari a va ri ni vutihlamuleri lebyikulu endyangwini. (Vakolosa 3:18-21) Kambe hinkwavo va hlanganyerile entirhweni wa ku chumayela lowu nga wa xisekelo wu tlhela wu va wa nkoka. Eka Xigriki xo sungula xa Matsalwa ya Vukreste, vutihlamuleri lebyi a ku ri di·a·ko·niʹa—ntirho, kumbe vutirheli.—Vakolosa 4:17.

² Hi ku famba ka nkarhi swilo swi hundzukile. Ku humelele ntlawa lowu tiviwaka tanihi vafundhisi, lowu wu tekeke lunghelo ra ku chumayela, ri va ra wona ntsena. (Mintirho 20:30) Vafundhisi a ku ri vanhu va nga ri vangani exikarhi ka lava a va tivitana Vakreste. Vunyingi lebyin’wana a byi tiviwa tanihi swirho swa kereke. Hambileswi swirho swa kereke a swi dyondzisiwa leswaku swi ni vutihlamuleri byo karhi, lebyi katsaka ku endla minyikelo ya ku khathalela vafundhisi, swo tala swa swona a swi nga hlanganyeli eku chumayeleni.

3, 4. (a) Xana vanhu va le Vujaganini va va vatirheli loko swi te yini? (b) I vamani lava tekiwaka va ri vatirheli eVujaganini, naswona ha yini xiyimo xi nga fani ni xexo eka Timbhoni ta Yehovha?

³ Vafundhisi va tivula vatirheli (rito leri humaka eka ra Xinghezi leri nge minister [mutirheli], vuhundzuluxeri bya Xilatini bya di·aʹko·nos, “nandza”).a Leswaku va ta va vatirheli, va ya etikholichi kumbe exikolweni xo dyondzela vufundhisi leswaku va ya thwasa ivi va vekiwa ximfumo. The International Standard Bible Encyclopedia yi ri: “‘Ku vekiwa ximfumo’ ni ‘ku veka ximfumo’ hi ntolovelo swi kombetela eka xikhundla xo hlawuleka, lexi nyikiwaka vatirheli kumbe vaprista hi ku hlawuriwa ximfumo hi ku landza mihivahivana leyi vekiweke, ni ku nyikiwa matimba ya ku twarisa Rito kumbe ku endla swilalelo, kumbe ku swi endla haswimbirhi.” I mani la vekaka vatirheli? The New Encyclopædia Britannica yi ri: “Etikerekeni leti ta ha riki ni vabixopo, minkarhi hinkwayo bixopo hi yena a vekaka mutirheli ximfumo. Etikerekeni ta Presbyterian, ntirho wo veka mutirheli ximfumo wu endliwa hi vafundhisi va kona.”

⁴ Hikwalaho, etikerekeni ta Vujagana, a hi hinkwavo lava nga ni lunghelo ra ku va vatirheli. Kambe a swi tano exikarhi ka Timbhoni ta Yehovha. Ha yini? Hikuva xiyimo a xi nga ri tano evandlheni ra Vukreste ra lembe-xidzana ro sungula.

Kahle-kahle I Vamani Vatirheli Va Xikwembu?

 5. Hi ku ya hi Bibele, lava va vaka vatirheli va katsa vamani?

⁵ Hi ku ya hi Bibele, vagandzeri hinkwavo va Yehovha—va le tilweni ni va le misaveni—i vatirheli. Tintsumi ti tirhele Yesu. (Matewu 4:11; 26:53; Luka 22:43) Tintsumi ti tlhela ti “tirhela lava nga ta dya ndzhaka ya ku ponisiwa.” (Vaheveru 1:14; Matewu 18:10) Yesu a a ri mutirheli. U te: ‘N’wana wa munhu a nga telangi ku tirheriwa, kambe u tele ku tirhela.’ (Matewu 20:28; Varhoma 15:8) Hikwalaho, tanihi leswi valandzeri va Yesu a va fanele va “landzelerisisa mikondzo yakwe,” a swi hlamarisi leswi na vona va faneleke va va vatirheli.—1 Petro 2:21.

 6. Yesu u swi kombise njhani leswaku vadyondzisiwa va yena va fanele va va vatirheli?

⁶ Emahlweninyana ka ku tlhandlukela ka yena etilweni, Yesu u byele vadyondzisiwa va yena a ku: “Fambani mi ya endla vanhu va matiko hinkwawo va va vadyondzisiwa, mi va khuvula hi vito ra Tatana ni ra N’wana ni ra moya lowo kwetsima, mi va dyondzisa ku hlayisa swilo hinkwaswo leswi ndzi mi leriseke swona.” (Matewu 28:19, 20) Vadyondzisiwa va Yesu a va fanele va va vaendli va vadyondzisiwa—vatirheli. Vadyondzisiwa lavantshwa lava va va endleke a va ta dyondza ku hlayisa swilo hinkwaswo leswi Yesu a va leriseke swona, ku katsa ni xileriso xa ku ya chumayela va endla vanhu vadyondzisiwa. Ku nga khathariseki leswaku i wanuna kumbe wansati, munhu lonkulu kumbe n’wana, mudyondzisiwa wa ntiyiso wa Yesu Kreste a a ta va mutirheli.—Yuwele 2:28, 29.

7, 8. (a) Hi wahi matsalwa lama kombisaka leswaku Vakreste hinkwavo va ntiyiso i vatirheli? (b) I swivutiso swihi leswi tlakusiwaka malunghana ni ku hlawuriwa?

⁷ Hi ku pfumelelana ni leswi, hi siku ra Pentekosta ya 33 C.E., vadyondzisiwa va Yesu hinkwavo lava a va ri kona, vavanuna ni vavasati, va hlanganyerile eku vuleni ka “swilo leswikulu ngopfu swa Xikwembu.” (Mintirho 2:1-11) Ku tlula kwalaho, muapostola Pawulo u tsarile: “Munhu u kombisa ripfumelo hi mbilu leswaku a va la lulameke, kambe u vula erivaleni hi nomu wa yena leswaku a ponisiwa.” (Varhoma 10:10) Pawulo a a nga kongomisanga marito wolawo eka ntlawa wa vafundhisi, kambe “eka hinkwavo lava [a va ri] eRhoma lava nga varhandziwa va Xikwembu.” (Varhoma 1:1, 7) Hilaha ku fanaka, ‘vakwetsimi hinkwavo lava a va ri aEfesa ni lavo tshembeka lava nga ni vun’we na Kreste Yesu’ a va fanele va endla leswaku ‘milenge ya vona yi veheriwa swihlomo swa mahungu lamanene ya ku rhula.’ (Vaefesa 1:1; 6:15) Naswona hinkwavo lava tweke leswi tsariweke epapileni leri a ri tsaleriwe Vaheveru a va fanele va ‘khoma swi tiya eku tiviseni erivaleni ka ntshembo wa vona handle ko tsekatseka.’—Vaheveru 10:23.

⁸ Kambe, xana munhu u va mutirheli loko swi te yini? Hi marito man’wana, u vekiwa rini? Naswona i mani loyi a n’wi vekaka?

Ku Vekiwa Ximfumo Leswaku U Va Mutirheli—Rini?

 9. Xana Yesu u vekiwe rini, naswona hi mani?

⁹ Leswaku munhu u vekiwa rini naswona hi mani, xiya xikombiso xa Yesu Kreste. A a nga ri na xitifiketi xa ku hlawuriwa kumbe digri ya le xikolweni xo dyondzela vufundhisi, yo kombisa leswaku a a ri mutirheli, naswona a a nga vekiwanga hi munhu wo karhi. Kutani, ha yini hi vula leswaku a a ri mutirheli? Hikuva marito lama huhuteriweke ya Esaya ma hetiseke eka yena: “Moya wa Yehovha wu le henhla ka mina, hikuva u ndzi tote leswaku ndzi vula mahungu lamanene.” (Luka 4:17-19; Esaya 61:1) Marito wolawo ma swi hlamusela kahle leswaku Yesu a a lerisiwe ku twarisa mahungu lamanene. A a lerisiwe hi mani? Tanihi leswi moya wa Yehovha wu n’wi toteke leswaku a endla ntirho wolowo, swi le rivaleni leswaku Yesu a a vekiwe hi Yehovha Xikwembu. Xana leswi swi humelele rini? Entiyisweni moya wa Yehovha wu te ehenhla ka Yesu loko a khuvuriwa. (Luka 3:21, 22) Hikwalaho, u vekiwe ximfumo hi nkarhi lowu a khuvuriweke ha wona.

 10. I mani loyi a endlaka mutirheli la nga Mukreste leswaku a “faneleka kahle”?

¹⁰ Ku vuriwa yini hi valandzeri va Yesu va lembe-xidzana ro sungula? Na vona a va vekiwe hi Yehovha leswaku va va vatirheli. Pawulo u te: “Ku faneleka kahle ka hina ku huma eka Xikwembu, lexi xi hi endleke hi faneleka kahle ku va vatirheli va ntwanano lowuntshwa.” (2 Vakorinto 3:5, 6) Xana Yehovha u va endla njhani vagandzeri va yena leswaku va fanelekela ku va vatirheli? Xiya xikombiso xa Timotiya, loyi Pawulo a n’wi vitaneke “mutirheli wa Xikwembu hi mahungu lamanene malunghana na Kreste.”—1 Vatesalonika 3:2.

11, 12. Xana Timotiya u endle nhluvuko hi ndlela yihi kukondza a fikelela ku va mutirheli?

¹¹ Marito lama landzelaka lama kongomisiweke eka Timotiya ma hi pfuna ku twisisa ndlela leyi a veke mutirheli ha yona: “Hambiswiritano, wena tshama eka swilo leswi u swi dyondzeke, leswi u susumetelekeke ku swi pfumela, u tiva vanhu lava u swi dyondzeke eka vona ni leswaku ku sukela loko wa ha ri ricece u tive matsalwa yo kwetsima, lawa ma swi kotaka ku ku tlharihisa leswaku u ta pona hi ripfumelo mayelana na Kreste Yesu.” (2 Timotiya 3:14, 15) Xisekelo xa ripfumelo ra Timotiya, leri a ri ta n’wi susumetela ku chumayela erivaleni, a ku ri ku tiva Matsalwa. Xana a ko laveka ku tihlayela wona ntsena? E-e. Timotiya a a lava mpfuno leswaku a ta kuma vutivi lebyi kongomeke ni ku twisisa ka moya ka leswi a a swi hlaya. (Vakolosa 1:9) Hikwalaho Timotiya ‘u susumeteleke ku swi pfumela.’ Tanihi leswi a tiveke Matsalwa ‘ku sukela loko a ha ri ricece,’ valeteri va yena vo sungula ku fanele ku ve mana wa yena ni kokwa wa yena wa xisati, tanihi leswi swi nga erivaleni leswaku tata wa yena a a nga ri mupfumeri.—2 Timotiya 1:5.

¹² Hambiswiritano, swi tele swilo leswi endleke Timotiya a va mutirheli. Hi xikombiso, ripfumelo ra yena ri tiyisiwile hi ku hlangana ni Vakreste va le mavandlheni ya le kusuhi. Hi swi tivisa ku yini? Hikuva loko Pawulo a hlangana ro sungula na Timotiya, jaha leri “a ku vulavuriwa kahle ha [rona] hi vamakwavo va le Listra ni le Ikoniya.” (Mintirho 16:2) Ku engetela kwalaho, emasikwini wolawo vamakwerhu vo karhi a va tsalela mavandlha mapapila leswaku va ma tiyisa. Naswona valanguteri a va va endzela leswaku va va khutaza. Malunghiselelo yo tano ma pfune Vakreste vo fana na Timotiya leswaku va endla nhluvuko hi tlhelo ra moya.—Mintirho 15:22-32; 1 Petro 1:1.

 13. Xana Timotiya u vekiwe rini leswaku a va mutirheli, naswona ha yini u nga vulaka leswaku nhluvuko wa yena wa moya a wu helelanga kwalaho?

¹³ Hi ku ya hi xileriso xa Yesu lexi tsariweke eka Matewu 28:19, 20, hi nga tiyiseka leswaku hi ndlela yo karhi ripfumelo ra Timotiya ri n’wi susumetele ku tekelela Yesu ivi a khuvuriwa. (Matewu 3:15-17; Vaheveru 10:5-9) Lexi a ku ri xikombiso xa ku tinyiketela ka Timotiya eka Xikwembu hi mbilu hinkwayo. Timotiya u ve mutirheli loko a khuvuriwa. Ku sukela hi nkarhi wolowo ku ya emahlweni, vutomi bya yena, matimba ya yena ni hinkwaswo leswi a a ri na swona a swi ri swa Xikwembu. “Ntirho wo kwetsima” a wu ri xiphemu xa nkoka xa vugandzeri bya yena. Hambiswiritano, endzhaku ka sweswo Timotiya a nga lo khondla mavoko. U hambete a kula hi tlhelo ra moya, a va mutirheli la nga Mukreste la wupfeke. Sweswo swi vange hi ku va Timotiya a a tolovelane swinene ni Vakreste lava wupfeke vo kota Pawulo, ku va ni dyondzo ya munhu hi xiyexe ni ku hisekela ka yena ntirho wo chumayela.—1 Timotiya 4:14; 2 Timotiya 2:2; Vaheveru 6:1.

 14. Namuntlha, xana munhu loyi a nga ni “mboyamelo lowunene eka vutomi lebyi nga heriki” u wu endlisa ku yini nhluvuko wa ku va mutirheli?

¹⁴ Ni namuntlha, ndlela yo veka vanhu ximfumo leswaku va va vatirheli lava nga Vakreste ya fana ni leyi. Munhu loyi a nga ni “mboyamelo lowunene eka vutomi lebyi nga heriki” u pfuniwa ku dyondza hi Xikwembu ni swikongomelo swa xona hi ku tirhisa dyondzo ya Bibele. (Mintirho 13:48) Munhu yoloye u dyondza ku tirhisa misinya ya milawu ya Bibele evuton’wini bya yena ni ku khongela eka Xikwembu hi mbilu hinkwayo. (Pisalema 1:1-3; Swivuriso 2:1-9; 1 Vatesalonika 5:17, 18) U hlanganyela ni vapfumeri van’wana ivi a tirhisa malunghiselelo lama endliwaka hi “hlonga ro tshembeka ni ro tlhariha.” (Matewu 24:45-47; Swivuriso 13:20; Vaheveru 10:23-25) Xisweswo u endla nhluvuko hi ku fambisana ni ndlela leyi simekiweke ya ku kuma dyondzo.

 15. Ku humelela yini loko munhu a khuvuriwa? (Nakambe vona nhlamuselo ya le hansi.)

¹⁵ Eku heteleleni, xichudeni xa Bibele, loko se xi rhandza Yehovha Xikwembu naswona xi ri ni ripfumelo leri tiyeke egandzelweni ra nkutsulo, xi navela ku tinyiketela hi ku helela eka Tata wa xona wa le tilweni. (Yohane 14:1) Xi tinyiketela hi ku khongela ivi xi kombisa ku tinyiketela koloko ka le xihundleni hi ku khuvuriwa erivaleni. Siku ra ku khuvuriwa ka xona i siku ra ku vekiwa ka xona hikuva wolowo hi wona nkarhi lowu xi tekiwaka tanihi nandza ximfumo, di·aʹko·nos, wa Xikwembu la tinyiketeleke hi ku helela. A xi nga fanelanga xi tihlanganisa ni misava. (Yohane 17:16; Yakobo 4:4) Xi tinyiketele hi ku helela xi va “xitlhavelo lexi hanyaka, xo kwetsima ni lexi amukelekaka eka Xikwembu” ku nga ri na swipimelo. (Varhoma 12:1)b I mutirheli wa Xikwembu, la tekelelaka Kreste.

Vutirheli Bya Vukreste I Yini?

 16. A byi ri byihi byin’wana bya vutihlamuleri bya Timotiya tanihi mutirheli?

¹⁶ Xana vutirheli bya Timotiya a byi katsa yini? A a ri ni mintirho yo hlawuleka tanihi leswi a a famba na Pawulo. Naswona loko a va nkulu, Timotiya u tirhe hi matimba a dyondzisa ni ku tlhela a tiyisa Vakreste-kulobye. Kambe xiyenge lexikulu xa vutirheli bya yena a ku ri ku chumayela mahungu lamanene ni ku endla vadyondzisiwa, hilaha Yesu na Pawulo va endleke hakona. (Matewu 4:23; 1 Vakorinto 3:5) Pawulo u byele Timotiya a ku: “Kambe wena, hlayisa mianakanyo ya wena leyi hlutekeke eka hinkwaswo, tiyiselela nhlomulo, endla ntirho wa muevhangeli, hetisisa vutirheli bya wena hi xitalo.”—2 Timotiya 4:5.

17, 18. (a) Vakreste va hlanganyela evutirhelini byihi? (b) Xana ntirho wo chumayela i wa nkoka ku fikela kwihi eka mutirheli la nga Mukreste?

¹⁷ Swa fana ni hi vatirheli lava nga Vakreste namuntlha. Va hlanganyela evutirhelini bya le rivaleni, ntirho wo vula evhangeli, va kongomisa van’wana eku ponisiweni exisekelweni xa gandzelo ra Yesu va tlhela va dyondzisa vanhu va timbilu letinene ku vitana vito ra Yehovha. (Mintirho 2:21; 4:10-12; Varhoma 10:13) Va hlamusela hi ku ya hi Bibele leswaku Mfumo hi wona ntsena ntshembo wa vanhu lava xanisekaka va tlhela va kombisa leswaku ni sweswi loko hi hanya hi misinya ya milawu ya Xikwembu swilo swi hi fambela ku antswa. (Pisalema 15:1-5; Marka 13:10) Kambe mutirheli la nga Mukreste ntirho wa yena a hi ku tirhisa misinya ya milawu ya Vukreste leswaku a tlhantlha swiphiqo swa vanhu. Ku ri na sweswo, u dyondzisa vanhu leswaku ‘ku tinyiketela eka Xikwembu ku hi khomele ntshembo wa vutomi bya sweswi ni lebyi bya ha taka.’—1 Timotiya 4:8.

¹⁸ I ntiyiso, vatirheli vo tala va endla vutirheli bya vona hi tindlela to tala, leti nga ha hambanaka ni ta Vakreste van’wana. Vo tala va ni vutihlamuleri bya ndyangu. (Vaefesa 5:21–6:4) Vakulu ni malandza ya vutirheli va ni mintirho evandlheni. (1 Timotiya 3:1, 12, 13; Tito 1:5; Vaheveru 13:7) Vakreste vo tala va pfuneta eku akiweni ka Tiholo ta Mfumo. Van’wana va ni lunghelo ro hlawuleka ro tirha hi ku tirhandzela eka man’wana ya makaya ya le Bethele ya Sosayiti ya Watch Tower. Hambiswiritano, vatirheli hinkwavo lava nga Vakreste va hlanganyela eku chumayeleni ka mahungu lamanene. A ku hlawuriwi hove ku sala ndluwa. Ku hlanganyela entirhweni lowu hi kona ku kombisaka munhu erivaleni leswaku i mutirheli wa xiviri la nga Mukreste.

Langutelo Ra Mutirheli La Nga Mukreste

19, 20. Vatirheli lava nga Vakreste va fanele va hlakulela langutelo rihi?

¹⁹ Vatirheli vo tala va le Vujaganini va langutele ku xiximiwa hi ndlela yo hlawuleka, hikwalaho va tirhisa swithopo swo tanihi “mufundhisi” na “father.” Hambiswiritano, mutirheli la nga Mukreste wa swi tiva leswaku i Yehovha ntsena loyi a faneriwaka hi ku fundzhiwa. (1 Timotiya 2:9, 10) A ku na mutirheli la nga Mukreste loyi a lavaka ku xiximiwa hi ndlela yoleyo leyi tlakukeke kumbe loyi a lavaka swithopo swoleswo swo hlawuleka. (Matewu 23:8-12) Wa swi tiva leswaku nhlamuselo ya xisekelo ya rito di·a·ko·niʹa i “ntirho.” Riendli leri fambisanaka na rona minkarhi yin’wana eBibeleni ri tirhisiwa eka mintirho ya munhu hi xiyexe, yo tanihi ku korhoka. (Luka 4:39; 17:8; Yohane 2:5) Hambileswi ndlela leyi ri tirhisiwaka ha yona malunghana ni vutirheli bya Vakreste yi tlakukeke swinene, di·aʹko·nos i nandza.

²⁰ Hikwalaho a ku na mutirheli la nga Mukreste la nga ni xivangelo xo titekela ehenhla. Vatirheli va xiviri lava nga Vakreste—hambi ku ri lava va nga ni vutihlamuleri byo hlawuleka evandlheni—i mahlonga lama titsongahataka. Yesu u te: “Mani na mani la lavaka ku va lonkulu exikarhi ka n’wina u fanele ku va mutirheli wa n’wina, naswona mani na mani la lavaka ku va wo sungula exikarhi ka n’wina u fanele ku va hlonga ra n’wina.” (Matewu 20:26, 27) Loko a kombisa vadyondzisiwa va yena langutelo lerinene leri va faneleke va ri hlakulela, Yesu u va hlambise milenge, a endla ntirho wa hlonga leri nga exiyin’weni xa le hansi. (Yohane 13:1-15) Mawaku ntirho wa ku titsongahata swonghasi! Hikwalaho, vatirheli lava nga Vakreste hi ku titsongahata va tirhela Yehovha Xikwembu na Yesu Kreste. (2 Vakorinto 6:4; 11:23) Va titsongahata loko va pfunana hi voxe. Naswona loko va chumayela mahungu lamanene, va pfuna vaakelani va vona lava nga riki vapfumeri handle ka vutianakanyi.—Varhoma 1:14, 15; Vaefesa 3:1-7.

Tiyisela eVutirhelini

 21. Xana Pawulo u hakeriwe hi ndlela yihi hikwalaho ka ku tiyisela evutirhelini?

²¹ A swi lava leswaku Pawulo a tiyisela leswaku a va mutirheli. U byele Vakolosa leswaku u xaniseke swinene leswaku a kota ku chumayela mahungu lamanene eka vona. (Vakolosa 1:24, 25) Hambiswiritano, hikwalaho ka ku tiyisela ka yena vo tala va amukele mahungu lamanene ivi va va vatirheli. Va tswariwe tanihi vana va Xikwembu tlhelo vamakwavo va Yesu Kreste, va ri ni ntshembo wa ku va swivumbiwa swa moya etlhelo ka yena etilweni. Mawaku hakelo leyi dzunekaka ya ku tiyisela!

22, 23. (a) Ha yini vatirheli lava nga Vakreste va fanele va tiyisela namuntlha? (b) I mihandzu yihi leyi hlamarisaka leyi tisiwaka hi ku tiyisela ka Mukreste?

²² Lava va nga vatirheli va Xikwembu hi xiviri namuntlha va fanele va tiyisela. Vo tala siku ni siku va karhatiwa hi vuvabyi kumbe switlhavi swa ku dyuhala. Vatswari va kulula va n’watseka—vo tala va vona va nga ri na munghana wa vukati—leswaku va kurisa vana va vona. Hi xivindzi, vana exikolweni va ala minkucetelo yo biha leyi va rhendzeleke. Vakreste vo tala va dya rikoko ra xilondza. Naswona vo tala va xanisiwa kumbe va langutana ni maxangu hikwalaho ka “minkarhi ya mangava leyi swi nonon’hwaka ku langutana na yona” namuntlha! (2 Timotiya 3:1) Ina, vatirheli va Yehovha va kwalomu ka tsevu wa timiliyoni namuntlha va nga vula hi rito rin’we na muapostola Pawulo va ku: “Hi ndlela yin’wana ni yin’wana hi tibumabumela tanihi vatirheli va Xikwembu, hi ku tiyisela swo tala.” (2 Vakorinto 6:4) Vatirheli lava nga Vakreste a va lan’wi. Va fanele va bumabumeriwa hakunene hikwalaho ka ku tiyisela ka vona.

²³ Ku tlula kwalaho, hilaha swi veke hakona eka Pawulo, ku tiyisela ku tisa vuyelo lebyi hlamarisaka. Loko hi tiyisela, hi hlayisa vuxaka bya hina byi ri byinene na Yehovha ivi hi tsakisa mbilu ya yena. (Swivuriso 27:11) Hi tiyisa ripfumelo ra hina hi tlhela hi endla vadyondzisiwa, hi engetela vamakwerhu lava nga Vakreste. (1 Timotiya 4:16) Yehovha u tiyise vatirheli va yena a tlhela a katekisa vutirheli bya vona emasikwini lawa yo hetelela. Hikwalaho, masalela ya lava 144 000 ma hlengeletiwile, naswona timiliyoni tin’wana ti ni ntshembo lowu tiyeke wa ku tiphina hi vutomi lebyi nga heriki emisaveni leyi nga paradeyisi. (Luka 23:43; Nhlavutelo 14:1) Ina, vutirheli bya Vukreste i xikombiso xa tintswalo ta Yehovha. (2 Vakorinto 4:1) Onge hinkwerhu ka hina hi nga ti teka ti ri ta risima naswona hi tlangela mihandzu ya tona leyi nga ta tshama hi masiku.—1 Yohane 2:17.

[Tinhlamuselo ta le hansi]

Xana U Nga Hlamusela?

• I vutihlamuleri byihi lebyi Vakreste hinkwavo va lembe-xidzana ro sungula a va hlanganyela eka byona?

• Xana mutirheli la nga Mukreste u vekiwa rini, naswona hi mani?

• Mutirheli la nga Mukreste u fanele a hlakulela langutelo rihi?

• Ha yini mutirheli la nga Mukreste a fanele a tiyisela hambiloko a langutane ni swiphiqo?

[Swifaniso leswi nga eka tluka 16, 17]

Timotiya u dyondzisiwe Rito ra Xikwembu ku sukela loko a ha ri ricece. U vekiwe ximfumo tanihi mutirheli loko a khuvuriwa

[Xifaniso lexi nga eka tluka 18]

Ku khuvuriwa ku kombisa ku tinyiketela eka Xikwembu naswona ku fungha ku vekiwa ka munhu tanihi mutirheli

[Xifaniso lexi nga eka tluka 20]

Vatirheli lava nga Vakreste va tiyimiserile ku endla ntirho wa vutirheli