Yana Emahlweni Ni Ntirho Wo Tshovela!

“Lava va byalaka mbewu hi mihloti va ta tshovela hi ku huwelela ka ku tsaka.”—PISALEMA 126:5.

 1. Hikwalaho ka yini ku fanele ku ‘komberiwa N’wini wa ntshovelo leswaku a rhumela vatirhi’ namuntlha?

ENDZHAKU ka riendzo ra yena ra vunharhu ra ku ya chumayela le Galeliya, Yesu Kreste u byele vadyondzisiwa vakwe a ku: “Ntshovelo i wukulu, kambe vatirhi a hi vangani.” (Matewu 9:37) Xiyimo a xi ri tano ni le Yudiya. (Luka 10:2) Leswi xiyimo a xi ri tano emalembeni ya kwalomu ka 2 000 lama hundzeke, se xi njhani namuntlha? Phela, hi lembe ra ntirho leri hundzeke, Timbhoni ta Yehovha to tlula 6 000 000 ti ye emahlweni ni ntirho wo tshovela hi ndlela yo fanekisela, eka vanhu va le misaveni hinkwayo va 6 000 000 000, lava vunyingi bya vona va “[vavisiweke] ni ku tsalangana ku fana ni tinyimpfu leti nga riki na murisi.” Kutani ke, xikhutazo xa Yesu xo ‘kombela N’wini wa ntshovelo leswaku a rhumela vatirhi entshovelweni wakwe,’ i xa nkoka sweswi hilaha a xi ri hakona eka malembe-xidzana lama hundzeke.—Matewu 9:36, 38.

 2. I yini lexi endlaka vanhu va hi tiva?

² Yehovha Xikwembu, N’wini wa ntshovelo, u xi hlamurile xikombelo xa ku rhumela vatirhi lava engetelekeke. Naswona ha tsaka swinene leswi hi hoxaka xandla eka ntirho lowu wo tshovela lowu kongomisiwaka hi Xikwembu! Hambileswi hi nga nyawuliki hi nhlayo loko hi pimanisiwa ni vaaki va misava, ku hiseka ka hina entirhweni wo chumayela hi Mfumo ni ku endla vadyondzisiwa, ku hi endla hi xiyeka emisaveni. Ematikweni yo tala ku vulavuriwa hi hina emahungwini nkarhi ni nkarhi. Eka ntlango wa le ka thelevhixini loko munhu a gongondza vatlangi va kona va ri va ehleketa leswaku i Timbhoni ta Yehovha leti gongondzaka. Ina, ntirho wa hina wa Vukreste tanihi vatshoveri vo fanekisela wu tiveka kahle eka lembe-xidzana ra vu-21.

 3. (a) Hi swi tivisa ku yini leswaku ntirho wa ku chumayela hi Mfumo a wu xiyiwa hi lembe-xidzana ro sungula? (b) Ha yini hi nga vulaka leswaku tintsumi ta wu seketela ntirho wa hina?

³ Misava a yi wu xiya ntirho wo chumayela hi Mfumo hi lembe-xidzana ro sungula naswona yi xanise vahuweleri va mahungu lamanene. Xisweswo muapostola Pawulo u tsale a ku: “Ndzi vona onge Xikwembu xi kombise hina vaapostola eku heteleleni hi ri vanhu lava nga ta fa, hikuva [hina vaapostola] hi ve xihlekiso endlwini ya mintlango emisaveni, ni le ka tintsumi ni le vanhwini.” (1 Vakorinto 4:9) Hilaha ku fanaka, ku tiyisela ka hina tanihi vahuweleri va Mfumo ku nga khathariseki nxaniso, ku hi endla hi xiyeka emisaveni naswona leswi i swa nkoka eka tintsumi. Nhlavutelo 14:6 yi ri: “[Mina muapostola Yohane] ndzi vona ntsumi yin’wana yi haha empfhukeni, yi ri ni mahungu lamanene lama nga heriki leswaku yi ma vula tanihi marungula lama tsakisaka eka lava tshamaka emisaveni, ni le ka matiko hinkwawo ni tinyimba hinkwato ni tindzimi hinkwato ni vanhu hinkwavo.” Ina, ntirho wa hina wo tshovela wu seketeriwa hi tintsumi!—Vaheveru 1:13, 14.

“Mi Ta Vengiwa”

4, 5. (a) Hi xihi xitsundzuxo lexi Yesu a xi nyikeke vadyondzisiwa vakwe? (b) Hikwalaho ka yini malandza ya Xikwembu ya namuntlha ma “vengiwa”?

⁴ Loko vaapostola va Yesu va rhumiwa tanihi vatshoveri, va xi yingisile xitsundzuxo xakwe lexi nge, “vanani ni vuxiyaxiya kukota tinyoka naswona mi kala nandzu kukota matuva.” Yesu u engeterile: “Tivoneleni vanhu; hikuva va ta mi nyiketa etihubyeni ta rikwavo, naswona va ta mi ba emasinagogeni ya vona. Ina, mi ta huduleriwa emahlweni ka tindhuna-nkulu ni tihosi hikwalaho ka mina, leswaku byi va vumbhoni eka vona ni le ka matiko. . . . Naswona mi ta vengiwa hi vanhu hinkwavo hikwalaho ka vito ra mina; kambe loyi a tiyiselaka ku ya fika emakumu hi yena loyi a nga ta ponisiwa.”—Matewu 10:16-22.

⁵ Ha “vengiwa” namuntlha hikuva “misava hinkwayo yi le hansi ka matimba ya lowo homboloka,” Sathana Diyavulosi, loyi a nga nala lonkulu wa Xikwembu ni vanhu va xona. (1 Yohane 5:19) Valala va hina va ku vona ku katekisiwa ka hina hi tlhelo ra moya kambe a va swi lavi ku yisa ku dzuneka eka Yehovha. Vakaneti va swi vona swikandza swa hina leswi n’wayitelaka, loko hi ri karhi hi endla ntirho wo tshovela hi tsakile. Va hlamala ku vona vun’we lebyi hi nga na byona! Ina, va nga ha byi xiyanyana loko va endzela tiko rin’wana va fika va kuma Timbhoni ta Yehovha ti ri karhi ti endla ntirho lowu fanaka ni lowu endliwaka etikweni ra ka vona. Ina, ha swi tiva leswaku hi nkarhi wa kona, Yehovha, museketeri wa hina ni xihlovo xa vun’we bya hina, u ta tiviwa na hi valala vakwe.—Ezekiyele 38:10-12, 23.

 6. I xitiyisekiso xihi lexi hi nga na xona loko hi ri karhi hi endla ntirho wo tshovela, kambe i xivutiso xihi lexi tlakukaka?

⁶ N’wini wa ntshovelo u teke “vulawuri hinkwabyo etilweni ni le misaveni,” a byi nyika N’wana wakwe, Yesu Kreste. (Matewu 28:18) Xisweswo Yehovha u tirhisa Yesu leswaku a kongomisa ntirho wo tshovela hi ku tirhisa tintsumi ta le tilweni ni vatotiwa lava nga “hlonga ro tshembeka ni ro tlhariha” lava nga laha misaveni. (Matewu 24:45-47; Nhlavutelo 14:6, 7) Kambe, xana hi nga langutana njhani ni nkaneto wa valala ivi hi tshama hi tsakile loko hi ri karhi hi ya emahlweni ni ntirho wo tshovela?

 7. I langutelo rihi leri hi faneleke hi lwela ku tshama hi ri na rona loko hi kanetiwa kumbe loko hi xanisiwa?

⁷ Loko hi langutane ni nkaneto kumbe nxaniso, a hi laveni mpfuno wa Xikwembu leswaku hi ta kota ku tshama hi ri ni langutelo leri fanaka ni ra Pawulo. U tsarile: “Loko hi tseketseriwa, ha katekisa; loko hi xanisiwa, ha tiyisela; loko hi susiwa xindzhuti, ha khongotela.” (1 Vakorinto 4:12, 13) Langutelo leri, swin’we ni vutirheli bya hina bya le rivaleni bya vukheta, minkarhi yin’wana swi nga hundzula langutelo ra vakaneti va hina.

 8. I xitiyisekiso xihi lexi u xi kumaka eka marito ya Yesu lama kumekaka eka Matewu 10:28?

⁸ Ni nxungeto wa rifu a wu ku hunguti ku hiseka ka hina tanihi vatshoveri. Hi twarisa rungula ra Mfumo handle ko chava erivaleni hilaha hi nga kotaka hakona. Naswona hi kuma xitiyisekiso lexi khutazaka eka marito ya Yesu: “Mi nga va chavi lava dlayaka miri kambe va nga swi kotiki ku dlaya moya-xiviri; kambe ku ri na sweswo chavani loyi a nga lovisaka moya-xiviri ni miri eGehena.” (Matewu 10:28) Ha swi tiva leswaku Tata wa hina wa le tilweni i Munyiki wa vutomi. U hakela lava tshamaka va tshembekile eka yena naswona va yaka emahlweni ni ntirho wo tshovela va tshembekile.

Rungula Leri Ponisaka Vutomi

 9. Van’wana va angurise ku yini eka marito ya Ezekiyele, naswona i nchumu wihi lowu fanaka lowu humelelaka namuntlha?

⁹ Loko muprofeta Ezekiyele a twarisa marungula ya Yehovha hi xivindzi eka “matiko lama xandzukeke”—ku nga mfumo wa Israyele ni wa Yuda—vanhu van’wana va tsakisiwe hi leswi a a swi vula. (Ezekiyele 2:3) Yehovha u te: “Waswivo, eka vona u kotisa risimu leri khutazaka rirhandzu, ku fana ni loyi a nga ni rito ro saseka, loyi a xi chayaka kahle xitende.” (Ezekiyele 33:32) Hambileswi a va ma tsakela marito ya Ezekiyele, va tsandzekile ku teka goza. Ku humelela yini namuntlha? Loko masalela lama totiweke swin’we ni vanakulobye va wona va twarisa marungula ya Yehovha hi xivindzi, van’wana va swi tsakela ku twa hi mikateko ya Mfumo, kambe a va anguli hi ndlela yo kombisa ku tlangela, kutani va va vadyondzisiwa ivi va hlanganyela entirhweni wo tshovela.

10, 11. Eka hafu yo sungula ya lembe-xidzana ra vu-20, i yini leswi a swi endliwa leswaku ku twarisiwa rungula ra hina leri ponisaka vutomi, naswona vuyelo byi ve byihi?

¹⁰ Hi hala tlhelo, vo tala va angule kahle eka ntirho wo tshovela naswona va hlanganyele eku twariseni ka marungula ya Xikwembu. Hi xikombiso, eka mintsombano ya Vukreste leyi a yi tlhandlamana ku sukela hi 1922 ku ya eka 1928, marungula ya ku avanyisa mafambiselo ya swilo yo homboloka ya Sathana ma twarisiwe kahle. Switichi swa swiya-ni-moya a swi twarisa ku avanyisa loku a ku hlamuseriwa etinhlengeletanweni toleto. Endzhaku ka sweswo, vanhu va Xikwembu va hangalase tikopi ta timiliyoni ta mhaka yoleyo leyi kandziyisiweke.

¹¹ Eku heleni ka va-1930, ku sunguriwe xivumbeko xin’wana xa ntirho wa ku nyikela vumbhoni—ku macha hi rhwale marungula. Eku sunguleni, vanhu va Yehovha a va hakarha makhadi lawa a ma tivisa tinkulumo ta le rivaleni. Endzhakunyana, va hakarhe makhadi lawa a ma ri ni marito lama nge “Vukhongeri i ntlhamu ni bindzu” ni lama nge “Tirhela Xikwembu na Kreste Hosi.” Loko va ri karhi va famba eswitarateni, a va koka nyingiso wa vahundzi va ndlela. Makwerhu loyi a a hlanganyela swinene entirhweni lowu eswitarateni leswi nga bizi swa le London, eNghilandhi, u vule leswaku ‘leswi swi kokele nyingiso lowukulu eka Timbhoni ta Yehovha swi tlhela swi ti nyika xivindzi.’

12. Ku engetela eka marungula ya ku avanyisa ya Xikwembu, i yini lexi hi kokeleke nyingiso eka xona evutirhelini bya hina, naswona i vamani lava sweswi va tirhaka hi vun’we eku chumayeleni ka mahungu lamanene?

¹² Loko hi ri karhi hi twarisa marungula ya ku avanyisa ka Xikwembu, hi tlhela hi kokela nyingiso eka swilo leswinene leswi nga xiphemu xa rungula ra Mfumo. Ku nyikela ka hina vumbhoni hi xivindzi emisaveni swi hi pfuna ku lavisisa lava swi va fanelaka. (Matewu 10:11) Swirho swo tala swo hetelela swa ntlawa wa vatotiwa swi amukele xirhambo lexi twalaka xa ntshovelo hi va-1920 na va-1930. Kutani, entsombanweni wun’wana hi 1935, ku twiwe mahungu lama tsakisaka ya vumundzuku lebyi tsakisaka bya “ntshungu lowukulu” wa “tinyimpfu tin’wana” emisaveni leyi nga paradeyisi. (Nhlavutelo 7:9; Yohane 10:16) Va yingise marungula ya ku avanyisa ya Xikwembu naswona va tirhe hi vun’we ni vatotiwa eku chumayeleni ka mahungu lamanene lama ponisaka vutomi.

13, 14. (a) I nchavelelo wihi lowu nga kumiwaka eka Pisalema 126:5, 6? (b) Loko hi hambeta hi byala hi tlhela hi cheleta, ku ta humelela yini?

¹³ Nchumu lowu va chavelelaka swinene vatshoveri va Xikwembu, naswona ngopfu-ngopfu lava xanisiwaka, i marito ya Pisalema 126:5, 6: “Lava va byalaka mbewu hi mihloti va ta tshovela hi ku huwelela ka ku tsaka. Kunene loyi a humaka, a ri karhi a rila, a rhwale nkwama lowu teleke mbewu, kunene u ta nghena hi ku huwelela ka ku tsaka, a rhwale tinyandza takwe.” Marito ya mupisalema ya ku byala ni ku tshovela ma kombisa nkhathalelo wa Yehovha eka masalela lama vuyeke evuhlongeni le Babilona wa khale, swin’we ni nkateko wa yena eka vona. A va tsakile swinene loko va ntshunxiwa, kambe va nga ha va va ririle loko va byala mbewu emisaveni leyi a yi nga ri na vaaki naswona yi nga rimiwangiki ku ringana malembe ya 70 lawa va ma heteke evuhlongeni. Hambiswiritano, lava va yeke emahlweni va byala va tlhela va aka va tiphine hi mihandzu ya kona ni ku eneriseka eka ku tikarhata ka vona.

¹⁴ Hi nga ha rila loko hi ri endzingweni kumbe loko hina kumbe vapfumeri-kulorhi va xaniseriwa vululami. (1 Petro 3:14) Entirhweni wa hina wo tshovela, hi nga ha rhanga hi tikeriwa hi leswi hi nga riki na vumbhoni bya leswaku hi ta humelela eka matshalatshala ya hina evutirhelini. Kambe loko hi hambeta hi byala hi tlhela hi cheleta, Xikwembu xi ta endla leswaku swi kula, hakanyingi hi ndlela leyi a hi nga yi langutelanga. (1 Vakorinto 3:6) Leswi swi kombisiwa kahle hi vuyelo bya ku fambisa ka hina Tibibele ni tibuku leti sekeriweke eMatsalweni.

15. Nyika xikombiso xa ku tirha ka tibuku ta Vukreste entirhweni wo tshovela.

¹⁵ Xiya xikombiso xa wanuna la vitaniwaka Jim. Loko mana wa yena a fa, enhundzwini ya yena u kume buku leyi nge Life—How Did It Get Here? By Evolution or by Creation?a U swi tsakele swinene ku yi hlaya. Jim u pfumerile leswaku Mbhoni leyi vulavuleke na yena exitarateni yi n’wi endzela, naswona leswi swi yise eka dyondzo ya Bibele. Jim u endle nhluvuko hi xihatla hi tlhelo ra moya, a tinyiketela eka Yehovha ivi a khuvuriwa. U byele swirho leswin’wana swa ndyangu wa ka vona malunghana ni leswi a swi dyondzeke. Hikwalaho ka sweswo, sesi wa yena na buti wa yena va ve Timbhoni ta Yehovha, naswona endzhakunyana Jim u ve ni lunghelo ra ku ya va mutirhi wo tirhandzela wa nkarhi hinkwawo eBethele ya le London.

Va Xanisiwa Kambe Va Tsakile

16. (a) Ha yini ku ve ni ku humelela entirhweni wo tshovela? (b) I xitsundzuxo xihi lexi Yesu a xi nyikeleke malunghana ni vuyelo bya mahungu lamanene, kambe hi vulavurisana ni vanhu hi ndlela yihi?

¹⁶ Ha yini ntirho wo tshovela wu humelerile swinene? Hikuva Vakreste lava totiweke swin’we ni vanakulobye va vona va yingise swileriso swa Yesu leswi nge: “Leswi ndzi mi byelaka swona emunyameni, swi vuleni eku vonakaleni; naswona leswi mi swi twaka swi hleveteriwa, swi chumayeleni mi ri ehenhla ka tindlu.” (Matewu 10:27) Hambiswiritano, ha swi tiva leswaku hi ta xanisiwa, hikuva Yesu u lemukisile: “Makwavo u ta nyiketa makwavo leswaku a dlawa, tatana a nyiketa n’wana wakwe, kasi vana va ta pfukela vatswari va endla leswaku va dlayiwa.” Yesu u ye emahlweni a ku: “Mi nga ehleketi leswaku ndzi tise ku rhula emisaveni; a ndzi tisanga ku rhula, kambe ndzi tise banga.” (Matewu 10:21, 34) Xikongomelo xa Yesu a ku nga ri ku hahlula mindyangu. Kambe, mahungu lamanene minkarhi yin’wana hi wona lawa a ma ta endla sweswo. Swi tano ni hi malandza ya Xikwembu namuntlha. Loko hi endzela mindyangu, a hi yi hi xikongomelo xo yi hahlula. Hi navela leswaku un’wana ni un’wana a amukela mahungu lamanene. Hikwalaho, hi ringeta ku vulavula ni swirho hinkwaswo swa ndyangu hi ndlela ya tintswalo, ya ntwela-vusiwana leyi endlaka rungula ra hina ri va tsakisa lava nga ni “mboyamelo lowunene eka vutomi lebyi nga heriki.”—Mintirho 13:48.

17. Lava va seketelaka vuhosi bya Xikwembu va hambana hi ndlela yihi ni vanhu van’wana, naswona hi xihi xikombiso xin’wana xa leswi?

¹⁷ Rungula ra Mfumo ri hlawula lava va seketelaka vuhosi bya Xikwembu. Hi xikombiso, xiya ndlela leyi vagandzeri-kulorhi va seleke va hlawulekile ha yona hi leswi va ‘hakeleke swilo swa Khezari eka Khezari kambe swilo swa Xikwembu eka Xikwembu’ emasikwini ya Vusoxalisi bya Tiko eJarimani. (Luka 20:25) Ku hambana ni varhangeri va vukhongeri ni lava va tivulaka Vakreste swin’we ni tikereke ta Vujagana, malandza ya Yehovha ma yime ma tiyile, ma ala ku tlula misinya ya milawu ya Bibele. (Esaya 2:4; Matewu 4:10; Yohane 17:16) Profesa Christine King, mutsari wa buku leyi nge The Nazi State and the New Religions, u te: “Hulumendhe ya [Manazi] yi tsandzeke eka Timbhoni ntsena, hikuva hambileswi yi dlayeke magidi, ntirho wu ye emahlweni naswona hi May 1945 nhlangano wa Timbhoni ta Yehovha a wa ha ri kona, kasi Vusoxalisi bya Tiko a byi nga ha ri kona.”

18. I langutelo rihi leri vanhu va Yehovha va ri kombisaka ku nga khathariseki nxaniso?

¹⁸ Xa nkoka swinene i langutelo leri kombisiwaka hi vanhu va Yehovha loko va xanisiwa. Hambiloko valawuri va misava va tsakisiwa hi ripfumelo ra hina, va hlamarisiwa hi leswi hi nga riki na tihanyi kumbe hi nga va vengiki. Hi xikombiso, Timbhoni leti poneke Ku Dlayiwa Ka Vayuda Va Le Yuropa Hi Manazi hakanyingi ti tala ku kombisa ntsako ni ku eneriseka loko ti anakanyisisa hi leswi ti humeleleke. Ta swi tiva leswaku Yehovha u ti nyike “matimba lama tlulaka lama tolovelekeke.” (2 Vakorinto 4:7) Vatotiwa lava nga exikarhi ka hina va tiyiseka leswaku “mavito ya [vona] ma tsariwile etilweni.” (Luka 10:20) Ku tiyisela ka vona ku tswala ntshembo lowu nga khomisiki tingana, naswona vatshoveri vo tshembeka lava nga ni ntshembo wa laha misaveni va ni ripfumelo leri fanaka.—Varhoma 5:4, 5.

Tiyisela eNtirhweni Wo Tshovela

19. I maendlelo wahi lama tirhaka lama tirhisiweke evutirhelini bya Vukreste?

¹⁹ Leswaku Yehovha u ta hi tshika ku fikela rini hi hlanganyela entirhweni lowu wo tshovela wo fanekisela swi ta tikomba. Sweswi hi fanele hi tsundzuka leswaku vatshoveri va ni maendlelo yo karhi yo endla ntirho wa vona. Hilaha ku fanaka, hi nga tiyiseka leswaku ku tshembeka ka hina eku tirhiseni ka tindlela leti ringetiweke to chumayela swi ta vuyerisa. Pawulo u byele Vakreste-kulobye a ku: “Ndza mi kombela, vanani vatekeleri va mina.” (1 Vakorinto 4:16) Loko Pawulo a hlangana ni vakulu va le Efesa le Mileta, u va tsundzuxe leswaku a nga tshikanga ku va dyondzisa “erivaleni ni hi yindlu ni yindlu.” (Mintirho 20:20, 21) Timotiya nakulobye wa Pawulo u dyondze maendlelo ya muapostola loyi, hikwalaho a a ta ma dyondzisa Vakorinto. (1 Vakorinto 4:17) Xikwembu xi katekise madyondziselo ya Pawulo, hilaha xi nga ta katekisa ku tiyisela ka hina eku chumayeleni ka mahungu lamanene erivaleni ni hi yindlu ni yindlu, loko hi endla maendzo yo vuyela, loko hi fambisa tidyondzo ta Bibele ni kun’wana ni kun’wana laha vanhu va nga kumiwaka kona.—Mintirho 17:17.

20. Yesu u swi kombise njhani leswaku ntshovelo wa moya lowukulu wu tshinele, naswona leswi swi tikombe swi ri ntiyiso emalembeni ya sweswinyana hi ndlela yihi?

²⁰ Endzhaku ko chumayela wansati wa Musamariya ekusuhi ni le Sikari hi 30 C.E., Yesu u vulavule hi ntshovelo wa moya. U byele vadyondzisiwa vakwe a ku: “Tlakusani mahlo ya n’wina mi languta masimu, ma basile leswaku ma tshoveriwa. Ana mutshoveri u amukela hakelo ni ku hlengeleta mihandzu ya vutomi lebyi nga heriki, leswaku muhaxi ni mutshoveri va tsaka swin’we.” (Yohane 4:34-36) Kumbexana Yesu ana se a vone vuyelo bya ku chumayela ka yena eka wansati wa Musamariya, hikuva vo tala a va pfumela eka yena hikwalaho ka vumbhoni bya wansati loyi. (Yohane 4:39) Emalembeni ya sweswinyana, matiko yo hambana-hambana ma suse minsivelo eka Timbhoni ta Yehovha kumbe ma ti amukele ximfumo, xisweswo ku pfuleka masimu lamantshwa yo tshovela. Vuyelo bya kona hi leswaku ntshovelo lowukulu wa moya wu ya emahlweni. Kahle-kahle, emisaveni hinkwayo, hi karhi hi kuma mikateko leyi fuweke loko hi ya emahlweni hi hlanganyela entshovelweni wa moya hi tsakile.

21. Ha yini hi ri ni xivangelo xo ya emahlweni tanihi vatshoveri lava tsakeke?

²¹ Loko mintshovelo yi wupfile naswona yi lunghekele ku tshoveriwa, vatirhi va fanele va teka goza hi xihatla. A va fanelanga va yima-yima, va fanele va tirha. Namuntlha, hi fanele hi tirha hi ku gingiriteka naswona hi xihatla hikuva hi hanya “enkarhini wa makumu.” (Daniyele 12:4) Ina, hi hlangavetana ni miringo, kambe ku ni ntshovelo lowukulu wa vagandzeri va Yehovha ku tlula rini na rini. Hikwalaho leri i siku ro tsaka. (Esaya 9:3) Kutani, tanihi vatirhi lava tsakeke, a hi yeni mahlweni ni ntirho wo tshovela!

[Nhlamuselo ya le hansi]

A Wu Ta Hlamurisa Ku Yini?

• N’wini wa ntshovelo u xi hlamule njhani xikombelo xa ku lava vatirhi lava engetelekeke?

• Hambileswi hi ‘vengiwaka,’ i langutelo rihi leri hi tshamaka hi ri na rona?

• Ha yini hi tsaka hambiloko hi xanisiwa?

• Ha yini hi fanele hi tiyisela entirhweni wo tshovela naswona hi wu endla hi xihatla?

[Swifaniso eka tluka 16, 17]

Lava va hlanganyelaka entshovelweni wa moya va seketeriwa hi tintsumi

[Xifaniso eka tluka 18]

Ku macha va hakarhe rungula ku kokele nyingiso wa vo tala eka rungula ra Mfumo

[Xifaniso eka tluka 18]

Hina ha byala hi tlhela hi cheleta, kambe Xikwembu hi xona xi mirisaka