“Tanani Eka Mina . . . Ndzi Ta Mi Phyuphyisa”
Ku Chumayela’ Swa Phyuphyisa
A A RI munhu la hetisekeke, loyi a a endla ntirho wa nkoka. Tindlela takwe ta ku dyondzisa a ti tirha swinene lerova “mintshungu yi hlamarisiwa hi ndlela yakwe yo dyondzisa.” (Matewu 7:28) Nakambe a a ri muchumayeri la phikelelaka. Ngopfu-ngopfu a a tirhisa nkarhi, matimba ni rifuwo ra yena eku chumayeleni ka Mfumo wa Xikwembu. Kunene, Yesu Kreste u famba-fambe hinkwako-nkwako etikweni ra ka vona a ri muchumayeri ni mudyondzisi lonkulu ngopfu.—Matewu 9:35.
Ntirho wa xihatla wa Yesu a ku ri ku chumayela “mahungu lamanene ya mfumo” eka vanhu lava hanyeke enkarhini wakwe ni ku letela vadyondzisiwa vakwe leswaku va endla ntirho lowu fanaka emisaveni hinkwayo. (Matewu 4:23; 24:14; 28:19, 20) Xana ntirho wo chumayela a wu ta va khwara eka vadyondzisiwa va yena lava nga hetisekangiki ni lava nga ni ntamu lowu hikiweke, hileswi wu nga wa nkoka wu tlhela wu va wa xihatla?
Nikatsongo! Loko a lerise vadyondzisiwa vakwe leswaku va khongela “N’wini wa ntshovelo,” Yehovha Xikwembu, leswaku a va nyika vatirhi lava engetelekeke, Yesu u va rhumile leswaku va ya dyondzisa vanhu. (Matewu 9:38; 10:1) Endzhaku u va tiyisekisile leswaku vutihlamuleri bya ku va mulandzeri wa yena—ku katsa ni ntirho wa ku chumayela—a byi ta nyika ntshunxeko ni nchavelelo wa xiviri. Yesu u te: “Tanani eka mina . . . ndzi ta mi phyuphyisa.”—Matewu 11:28.
Xihlovo Xa Ntsako
Xirhambo xexo xi kombisa ntwela-vusiwana, rirhandzu ni musa hakunene! Xi komba ndlela leyi Yesu a a khathala ha yona hi valandzeri vakwe. Vadyondzisiwa vakwe va phyuphyisiwa loko va hetisisa vutihlamuleri bya vona bya ku chumayela “mahungu lamanene” ya Mfumo wa Xikwembu. Sweswo swi va nyika ntsako wa ntiyiso swi tlhela swi va enerisa.—Yohane 4:36.
Loko Yesu a nga si ta emisaveni, Matsalwa ma kandziyise leswaku vanhu va fanele va kuma ntsako loko va endla ntirho wo kwetsima wa Xikwembu. Sweswo swi vekiwe erivaleni hi mupisalema loko a yimbelela a ku: “Huwelelani eka Yehovha hi ku hlula, n’wina hinkwenu vanhu va misava. Tirhelani Yehovha hi ku tsaka. Tanani emahlweni ka yena hi ku huwelela ka ku tsaka.” (Pisalema 100:1, 2) Namuntlha vanhu va matiko hinkwawo va tsaka hikwalaho ka Yehovha, naswona marito lawa va n’wi dzunisaka ha wona ma fana ni ku huwelela lokukulu ka vuthu ra nyimpi leri hluleke. Lava va tinyiketeleke eka Xikwembu va ya emahlweni ka xona “hi ku huwelela ka ku tsaka.” Naswona sweswo swi fanerile hakunene, hikuva Yehovha i “Xikwembu lexi tsakeke,” lexi lavaka leswaku malandza ya xona ma kuma ntsako loko ma ri karhi ma hetisisa ntirho lowu fambisanaka ni ku tinyiketela ka wona eka xona.—1 Timotiya 1:11.
Vatirheli Lava Phyuphyisiweke
Xana swi tisa ku yini leswaku hi tirha hi matimba ensin’wini kambe hi phyuphyisiwa ematshan’weni ya ku karhala? Eka Yesu, ku endla ntirho wa Yehovha a swi fana ni swakudya leswi nyikaka matimba. U te: “Swakudya swa mina i ku endla ku rhandza ka loyi a ndzi rhumeke ni ku heta ntirho wakwe.”—Yohane 4:34.
Hilaha ku fanaka, Vakreste lava chumayelaka hi ku hiseka namuntlha va kuma ntsako loko va “chumayela rito.” (2 Timotiya 4:2) Connie, wansati la nga Mukreste loyi a ha tiyeke naswona a hetaka tiawara to tlula 70 hi n’hweti entirhweni wo chumayela, u ri: “Loko ndzi vuya ensin’wini, ndzi titwa ndzi enerisekile ni ku tsaka, hambiloko ndzi karhele.”
Ku vuriwa yini loko vanhu va nga ri amukeli rungula ra Mfumo? Connie u ya emahlweni a ku: “Ku nga khathariseki ndlela leyi vanhu va angulaka ha yona, a ndzi si tshama ndzi tisola hi ku ya ensin’wini. Lexi ndzi xi tivaka hileswaku ndzi endla leswi rhandziwaka hi Yehovha, naswona swa ndzi tsakisa ku vulavula hi ntiyiso, hikuva loko ndzi endla tano, ntshembo wo hlawuleka lowu nga eBibeleni wa kula embilwini ya mina.”
Van’wana va kuma leswaku ku pfuna vanhu leswaku va kuma vutivi lebyi kongomeke malunghana na Xikwembu swi fuwisa vutomi bya vona. Meloney, wansati la ha tiyeke loyi a talaka ku heta tiawara to tlula 50 hi n’hweti entirhweni wo chumayela, u ri: “Vutirheli bya phyuphyisa hikuva byi endla leswaku ndzi va ni xikongomelo evuton’wini. Swiphiqo ni mintshikilelo ya siku na siku swa hunguteka loko ndzi ya ensin’wini.”
Millicent, mutirheli un’wana la hisekaka loyi a nga Mbhoni ya Yehovha, u ri: “Vutirheli byi endla leswaku siku rin’wana ni rin’wana ri va ra nkoka loko ndzi vulavula ni van’wana hi xikongomelo xa Xikwembu hi vanhu ndzi tlhela ndzi va hlamusela ndlela leyi Paradeyisi yi nga ta pfuxetiwa ha yona emisaveni. Siku na siku byi endla leswaku Yehovha a va wa xiviri eka mina naswona byi ndzi tisela ku rhula ni ntsako lowu swi nga kotekiki ku wu kuma hi tindlela tin’wana.”
Vanhu Lava Phyuphyisiweke Hi Ku Amukela Mahungu Lamanene
Vachumayeri va timhaka ta Mfumo va phyuphyisiwa hakunene hi vutirheli bya Vukreste, naswona lava va amukelaka rungula leri nyikaka vutomi va chaveleriwa hi rona. Hambileswi mudyondzisi wa xikolo xin’wana xa le Portugal a leteriweke hi tinani ni vafundhisi, u kume leswaku kereke yakwe a yi nga swi koti ku enerisa swilaveko swakwe swa moya. Swivutiso swakwe malunghana na Bibele a swi hlamuriwanga. Dyondzo ya nkarhi na nkarhi ya Bibele leyi fambisiwaka hi Mbhoni ya Yehovha yi endle leswaku a ya a twisisa Matsalwa. Mudyondzisi loyi u tsake ngopfu. U te: “A ndzi tshama ndzi langutele dyondzo ya mina hi Ravunharhu un’wana ni un’wana, tanihi leswi swivutiso swa mina a swi hlamuriwa ha xin’we-xin’we hi vumbhoni lebyi tiyeke bya Bibele.” Namuntlha wansati loyi i nandza wa Yehovha la tinyiketeleke, kasi na yena u phyuphyisa van’wana hi ntiyiso wa Bibele.
Kutani swi le rivaleni leswaku Timbhoni ta Yehovha a ti chavisiwi hi ntikelo wa ntirho wa tona wo chumayela kumbe vukulu bya nsimu ya tona leyi hlanganisaka misava hinkwayo. Naswona a va heli matimba loko vanhu va nga tsakeli kumbe va va kaneta. Va tikarhata hi matimba leswaku va hetisisa ntirho wa vona wo chumayela hi timhaka ta Mfumo. Va chumayela mahungu lamanene eka vanhu kwihi ni kwihi laha va kumekaka kona—exiticini xa tilori le United States(1), erivaleni ra swihaha-mpfhuka ra le Korea (2), etintshaveni ta Andes (3) kumbe evuxaviselweni bya le London (4). Valandzeri va Yesu va manguva lawa va hambeta va wu endla hi ntsako ntirho wa vona lowu vuyerisaka emisaveni hinkwayo. Naswona ku pfumelelana ni xitshembiso xakwe, u va phyuphyisile a tlhela a va tirhisa ku phyuphyisa van’wana vo tala.—Nhlavutelo 22:17.