Mathwasana Ya Le Giliyadi Ma Khutaziwe Ku Vulavula “Swilo Leswikulu Ngopfu”
ENONGONOKWENI wa ku thwasa ka ntlawa wa vu-115 wa Xikolo xa Bibele xa Giliyadi xa Watchtower lowu veke kona hi September 13, 2003, a ku ri ni ntshungu lowu tsakeke wa vanhu va 6 635 vo huma ematikweni ya 52.
Va yingisele xikhutazo lexi humaka eBibeleni lexi a xi kongomisiwe eka swichudeni swa 48 swa ntlawa lowu, xa ku yisa “swilo leswikulu ngopfu swa Xikwembu” eka vanhu va le matikweni ya 17. (Mintirho 2:11) Kwalaho hi laha mathwasana lawa ma nga ta va ma endla ntirho wa vurhumiwa kona.
Eka xingheniso xakwe, Stephen Lett, loyi a nga xirho xa Huvo leyi Fumaka ya Timbhoni ta Yehovha, loyi a veke mutshama-xitulu eka nongonoko lowu wa ku thwasa, u tsundzuxe swichudeni a ku: “Loko mi ya eswiavelweni swa n’wina, ku nga khathariseki lomu mi yaka kona ni swiyimo swihi ni swihi leswi mi nga ta tikuma mi langutane na swona, lava yimaka na n’wina va ta va va tele ku tlula lava lwisanaka na n’wina.” Loko a vulavula hi ndzima 6 ya Tihosi ta Vumbirhi, Makwerhu Lett u tsundzuxe swichudeni leswi leswaku loko swi ri karhi swi twarisa “swilo leswikulu ngopfu swa Xikwembu,” swi fanele swi tiyiseka leswaku swi ta kuma nseketelo wa Yehovha Xikwembu ni wa tintsumi to tala swinene. (2 Tihosi 6:15, 16) Vakreste va lembe-xidzana ro sungula a va kanetiwa entirhweni wa vona wa ku chumayela ni wa ku dyondzisa, naswona Vakreste lava nga varhumiwa va langutana ni xiyimo lexi fanaka namuntlha. Kambe va fanele va tiyiseka leswaku nhlengeletano ya Yehovha ya le tilweni ni ya laha misaveni ya va seketela.—Pisalema 34:7; Matewu 24:45.
Vulavula “Swilo Leswikulu Ngopfu Swa Xikwembu”
Endzhaku ka xingheniso xa mutshama-xitulu, Harold Corkern loyi a nga xirho xa Komiti ya Rhavi ya le United States, u vulavule hi nhloko-mhaka leyi nge “Ku Langutela Swilo Swa Xiviri Swi Hi Pfuna Ku Va Lava Tsakeke Ni Lava Humelelaka eVutirhelini.” Makwerhu Corkern u kombise leswaku ku langutela swilo kambe u nga swi kumi swi nga ku heta matimba, hilaha Swivuriso 13:12 yi vulaka hakona. Kambe hakanyingi ku hela matimba swi vangiwa hi ku langutela ku kuma swilo leswi nga kotekiki. Mathwasana ma fanele ma tilanguta hi tihlo leri faneleke ra xitswatsi, ma tlhela ma languta van’wana hi ndlela yoleyo. Ma fanele ma swi tiva leswaku ma ta swi endla swihoxo, kambe swihoxo a swi fanelanga swi ma karhata ku tlula mpimo loko ma ri karhi ma ringeta ku pfuna van’wana leswaku va twisisa “swilo leswikulu ngopfu swa Xikwembu.” Makwerhu Corkern u khutaze varhumiwa lavantshwa leswaku va titshega hi Yehovha, “muhakeri wa lava va [n’wi] lavaka hi mbilu hinkwayo.”—Vaheveru 11:6.
Endzhaku ku landzele Daniel Sydlik loyi a nga xirho xa Huvo leyi Fumaka, loyi a vulavuleke hi nhloko-mhaka leyi nge “Ntshembo Wa Vakreste—I Yini Xana?” U te: “Ntshembo i mfanelo leyi Vakreste va faneleke va va na yona. I mfanelo leyi endlaka leswaku munhu a va ni vuxaka lebyinene na Xikwembu. A swi koteki leswaku munhu loyi a nga riki Mukreste a va ni ntshembo lowu hi nga na wona.” Makwerhu Sydlik u ye emahlweni a hlamusela swilo swo hambana-hambana leswi fambisanaka ni ntshembo wa Vakreste, leswi va pfunaka leswaku va nga heli matimba hambiloko va langutane ni swiyimo swo tika. “Loko hi ri ni ntshembo siku ni siku hi nga langutana ni timhaka ta vutomi hi ku tiyimisela lokukulu ni hi moya wa ku hlula.” Ntshembo wa Mukreste wu n’wi pfuna ku vona Yehovha a ri Xikwembu xa xikongomelo, wu tlhela wu endla leswaku a n’wi tirhela a tsakile.—Varhoma 12:12.
Wallace Liverance, mutsarisi wa swichudeni swa Xikolo xa Giliyadi, u swi khutaze hi nhloko-mhaka leyi nge “Hambetani Mi Famba Hi Moya.” (Vagalatiya 5:16) U kombise ndlela leyi Baruku matsalana wa Yeremiya a laveke ku tshika ku famba hi moya ha yona. Enkarhini wun’wana, Baruku u hele mongo kutani a sungula ku tilavela swilo leswikulu. (Yeremiya 45:3, 5) Makwerhu Liverance u kombise leswaku van’wana va tshike ku va valandzeri va Yesu va tlhela va fularhela ntiyiso wa timhaka ta moya, lowu lavekaka leswaku vanhu va ponisiwa. Va endle tano hileswi a va nga swi twisisi leswi a a va dyondzisa swona, naswona va hele matimba hileswi va nga kumangiki swilo swa nyama leswi a va swi languterile hi nkarhi wolowo. (Yohane 6:26, 27, 51, 66) Xana varhumiwa, lava ntirho wa vona ku nga ku kongomisa mianakanyo ya vanhu eka Muvumbi ni xikongomelo xa yena, va nga dyondza yini etimhakeni leti? Swichudeni swi khutaziwe leswaku swi nga lavi swikhundlha, ku tiendlela vito evanhwini kumbe ku tirhisa xiavelo xa timhaka ta moya leswaku ku vuyeriwa swona.
Mark Noumair loyi a nga mudyondzisi wa le Giliyadi u vutise xivutiso lexi nge “Xana U Ta Va Munyiki Kumbe Muamukeri?” Nkulumo yakwe a yi sekeriwe eka Vaavanyisi 5:2, laha Vaisrayele vo karhi va bumabumeriweke hileswi va tinyiketeleke hi ku swi rhandza leswaku va va swirho swa vuthu ra Baraka. Swichudeni swa Giliyadi swi bumabumeriwile hikwalaho ka moya lowu swi veke na wona wa ku amukela xirhambo xa Baraka Lonkulu, ku nga Yesu Kreste, xa ku hlanganyela hi xitalo enyimpini ya moya. Masocha ya Kreste ma fanele ma tsakela ku amukeleka eka loyi a ma nyikeke ntirho wa wona. Makwerhu Noumair u tsundzuxe swichudeni a ku: “Loko hi sungula ku ngheniwa hi moya wa vutianakanyi, hi ta tikuma hi tshike ku lwisana ni nala. . . . Ntirho wa vurhumiwa a wu endliwi hikwalaho ka wena. Wu endliwa hikwalaho ka Yehovha, vuhosi byakwe ni ku hetisisa ku rhandza ka yena. Xikongomelo xa hina xa ku va varhumiwa a hi ku lava leswaku Yehovha a hi nyika ntsako, kambe hi n’wi tirhela hileswi hi n’wi rhandzaka.”—2 Timotiya 2:4.
Endzhaku, mudyondzisi wa le Giliyadi la vuriwaka Lawrence Bowen u kongomise bulo ra nkulumo leyi a yi ku: “Va Kwetsimise Hi Ntiyiso.” (Yohane 17:17) U kombise leswaku swichudeni swa ntlawa wa vu-115 i vatirheli va Xikwembu lava kwetsimaka. Loko va ha ri exikolweni lexi, na vona a va hlanganyela entirhweni wa nsimu, va lavisisa vanhu lava rhandzaka ntiyiso hi mbilu hinkwayo. Ku fana na Yesu ni vadyondzisiwa vakwe vo sungula, swichudeni leswi a swi nga vulavuli “hi ku tisungulela” ka swona. (Yohane 12:49, 50) A swi chivirika eku twariseni ka rito ra ntiyiso leri huhuteriweke ni leri nyikaka vutomi. Minkombiso ya swilo leswi endlekeke hi xiviri ni mintokoto ya swichudeni yi kombise ndlela leyi Bibele yi va khumbeke ha yona vanhu lava swi vulavuleke na vona.
Xitsundzuxo Ni Ntokoto Lowu Khutazaka
Anthony Pérez na Anthony Griffin, lava nga swirho swa Ndzawulo ya Ntirho erhavini ra le United States, va vulavurisane ni swirho swa Tikomiti ta Marhavi ta le matikweni man’wana ya misava. Vavanuna lava va vulavule hi swiphiqo leswi varhumiwa lavantshwa va langutanaka na swona va tlhela va nyikela xitsundzuxo lexinene hi ku ya hi leswi va swi tokoteke evuton’wini. Swiphiqo swin’wana swi katsa mindhavuko leyi hambanaka, ndhawu leyi hisaka lembe hinkwaro kumbe xiyimo xa vukhongeri ni xa politiki lexi hambanaka ni lexi swichudeni a swi tolovele xona. I yini lexi nga pfunaka varhumiwa lavantshwa leswaku va kota ku langutana ni swiyimo swo tano leswintshwa? I ku rhandza Yehovha ni vanhu-kulobye, ku papalata ku anakanya swa le ndzhaku kumbe ku tsutsumela ku endla swiboho. Xirho xin’wana xa komiti ya rhavi xi te: “Vanhu lava nga endhawini leyi hi averiweke eka yona hi fike hi va kuma va ri ni malembe va tshama kona. Kutani na hina hi kote ku tshama kwalaho hi tlhela hi tolovela ndhawu. Nkarhi na nkarhi loko hi langutana ni swiphiqo, a hi va teka va ri vanhu lava nga hi pfunaka ku antswisa vumunhu bya hina. Hi boheka ku titshega hi xikhongelo ni moya wa Yehovha, naswona hi vona ndlela leyi ma tiyiseke ha yona marito ya Yesu lama nge, ‘Ndzi na n’wina.’”—Matewu 28:20.
Samuel Herd loyi a nga xirho xa Huvo leyi Fumaka u teke nongonoko lowu a wu veka emaninginingini hi nkulumo leyi nge, “Hambetani Mi Vulavula Hi Swilo Leswikulu Ngopfu Swa Xikwembu.” Ku chuluriwa ka moya lowo kwetsima hi siku ra Pentekosta ya 33 C.E. ku nyike vadyondzisiwa va Yesu matimba yo vulavula hi “swilo leswikulu ngopfu swa Xikwembu.” I yini lexi nga pfunaka varhumiwa lavantshwa namuntlha leswaku na vona va vulavula hi Mfumo wa Xikwembu hi ku hiseka? I moya wolowo lowo kwetsima. Makwerhu Herd u khutaze swichudeni leswi thwasaka leswaku swi “pfurha hi moya,” swi tsaka hi swiavelo swa swona, swi tlhela swi tsundzuka vuleteri lebyi swi byi kumeke. (Varhoma 12:11) Makwerhu Herd u te: “Bibele i buku ya nkoka swinene ya Xikwembu. Mi nga yi tekeli ehansi. Rungula ra yona ra hanya. Ri dzika ri fika etshakwini ra mbilu ya munhu. Ri tirhiseni leswaku mi lulamisa timhaka ta vutomi bya n’wina. Ri pfumeleleni leswaku ri hundzula mianakanyo ya n’wina. Hlayisani matimba ya n’wina ya ku anakanya hi ku kambisisa Matsalwa, mi ma hlaya ni ku anakanyisisa ha wona . . . Tinyiketeleni ku tirhisa vuleteri bya le Giliyadi leswaku mi hambeta mi vulavula ‘swilo leswikulu ngopfu swa Xikwembu.’”
Endzhaku ko hlaya marungula yo huma emisaveni hinkwayo lama kongomisiweke eka swichudeni leswi, ni loko lava thwaseke va kume tidiploma ta vona, un’wana wa vona u hlaye papila leri humaka eka ntlawa lowu, leri phofulaka ku tlangela ka wona vuleteri lebyi wu byi kumeke. Kutani Makwerhu Lett u gimete nongonoko lowu wo tsakisa hi ndlela leyinene loko a vulavula hi tsalwa ra 2 Tikronika 32:7 ni ra Deteronoma 20:1, 4. Eka mahetelelo yakwe u phindhe marito ya xingheniso xakwe, a gimeta hi ku: “Kutani n’wina mathwasana lama rhandzekaka, loko mi ri karhi mi gwirima mi ya enyimpini ya moya eswiavelweni swa n’wina leswintshwa, tsundzukani leswaku Yehovha u ta va a ri karhi a famba na n’wina. Mi nga tshuki mi rivala leswaku lava yimaka na n’wina va tele ku tlula lava lwisanaka na n’wina.”
[Bokisi leri nga eka tluka 25]
VUXOKOXOKO BYA NTLAWA
Nhlayo ya matiko lama yimeriweke: 7
Nhlayo ya matiko lawa va averiweke eka wona: 17
Nhlayo ya swichudeni: 48
Xiringaniso xa malembe: 33,7
Xiringaniso xa malembe entiyisweni: 17,8
Xiringaniso xa malembe evutirhelini bya nkarhi hinkwawo: 13,5
[Xifaniso lexi nga eka tluka 26]
Ntlawa Wa Vu-115 Lowu Thwasaka Wa Xikolo Xa Bibele Xa Giliyadi Xa Watchtower
Eka nxaxamelo lowu nga laha hansi, tilayeni ti hlayeriwa ku suka emahlweni ku ya endzhaku, naswona mavito ma xaxametiwe ku suka eximatsini ku ya exineneni eka layeni yin’wana ni yin’wana.
(1) Brown, T.; Goller, C.; Hoffman, A.; Bruzzese, J.; Trahan, S. (2) Smart, N.; Cashman, F.; Garcia, K.; Lojan, M.; Seyfert, S.; Gray, K. (3) Beckett, M.; Nichols, S.; Smith, K.; Gugliara, A.; Rappenecker, A. (4) Gray, S.; Vacek, K.; Fleming, M.; Bethel, L.; Hermansson, T.; Hermansson, P. (5) Rappenecker, G.; Lojan, D.; Dickey, S.; Kim, C.; Trahan, A.; Washington, A.; Smart, S. (6) Goller, L.; Burghoffer, T.; Gugliara, D.; Nichols, R.; Washington, S.; Kim, J. (7) Beckett, M.; Dickey, J.; Smith, R.; Garcia, R.; Hoffman, A.; Seyfert, R.; Brown, H. (8) Fleming, S.; Bruzzese, P.; Burghoffer, W.; Bethel, T.; Cashman, J.; Vacek, K.