Tsakela Ku Rindza Yehovha

XANA u tshama u dya mihandzu leyi nga vupfangiki? A swi kanakanisi leswaku a yi nga nandzihi. Mihandzu yi teka nkarhi ku vupfa, naswona ku yi rindza leswaku yi vupfa a hi ku tlanga hi nkarhi. Ku na swiyimo swin’wana leswi nga ku vuyerisaka loko u rindza ehansi ka swona. Bibele yi ri: “I swinene leswaku munhu a rindzela ku ponisa ka Yehovha, a miyerile.” (Swirilo 3:26; Tito 2:13) Hi tihi tindlela leti Vakreste va faneleke va rindza Yehovha ha tona? Hi ta vuyeriwa hi yini loko hi n’wi rindza?

Ku Rindza Yehovha Swi Katsa Yini?

Leswi hi nga Vakreste, hi “rindzela ni ku hamba [hi] tsundzuka vukona bya siku ra Yehovha.” Hi wu langutele hi mahlo-ngati ntshunxeko lowu a nga ta hi nyika wona loko a “[lovisa] vanhu lava va nga xi xiximiki Xikwembu.” (2 Petro 3:7, 12) Yehovha u tiyimisele ku herisa vubihi hinkwabyo, kambe u lehisa mbilu leswaku a ta kutsula Vakreste hi ndlela leyi nga ta vangamisa vito ra yena. Bibele yi ri: “Xikwembu, hambileswi xi rhandzaka ku kombisa vukarhi bya xona ni ku tivisa matimba ya xona, xi swi tiyiselele hi mbilu yo leha swinene swibya swa vukarhi leswi endliweke swi faneriwa hi ku lovisiwa, leswaku xi ta tivisa ku fuwa ka ku vangama ka xona ehenhla ka swibya swa tintswalo.” (Varhoma 9:22, 23) Hilaha a endleke hakona emasikwini ya Nowa, Yehovha u tiva nkarhi lowunene wo ponisa vanhu va yena namuntlha. (1 Petro 3:20) Xisweswo, ku rindza Xikwembu swi katsa ku rindza nkarhi lowu xi nga ta teka goza ha wona.

Loko hi rindzele siku ra Yehovha, minkarhi yin’wana hi nga hlundzukisiwa hi ku vona mahanyelo ya misava leyi hi hanyaka eka yona ma ya ma nyanya ku biha. Loko hi titwa hi hlundzukile, swi kahle ku anakanya hi marito ya muprofeta wa Xikwembu Mikiya, loyi a tsaleke a ku: “Lowo tshembeka u lovile emisaveni, naswona ku hava lowo tshembeka exikarhi ka vanhu.” Loko a ya emahlweni u te: “Loko ku ri mina, ndzi ta tshama ndzi rindzele Yehovha. Ndzi ta kombisa moya wo rindza eka Xikwembu lexi xi ndzi ponisaka.” (Mikiya 7:2, 7) I yini “moya wo rindza” lowu hi faneleke hi wu hlakulela? Tanihi leswi ku rindza minkarhi yin’wana ku hi hetaka matimba, hi nga wu kuma njhani ntsako loko hi rindzele Xikwembu?

Ku Rindza U Tsakile

Hi nga dyondza ku va ni langutelo lerinene eka Yehovha. U tshama a ri “Xikwembu lexi tsakeke.” (1 Timotiya 1:11) U rindza a tsakile hikuva u ya emahlweni a endla malunghiselelo yo hetisisa xikongomelo xa yena xo endla leswaku vanhu lava n’wi rhandzaka va va lava hetisekeke, hilaha a a lava hakona loko a va vumba. (Varhoma 5:12; 6:23) Eka ntirho wa yena, u vona vuyelo lebyinene—timiliyoni ta vanhu ti kokiwe hi vugandzeri bya ntiyiso. Yesu u te: “Tata wa mina u ya emahlweni a tirha ku fikela sweswi, na mina ndzi ya emahlweni ndzi tirha.” (Yohane 5:17) Ku endlela vanhu van’wana swilo i swa nkoka leswaku hi kuma ntsako. (Mintirho 20:35) Hilaha ku fanaka, Vakreste va ntiyiso a va rindzanga va tshame hi mavoko. Ematshan’weni ya sweswo, va ya emahlweni va tirha leswaku va pfuna van’wana ku dyondza xikongomelo xa Xikwembu hi vanhu.

Vanhu lava tshembekaka minkarhi hinkwayo va eneriseka hi ku dzunisa Xikwembu loko va ha rindzele nkarhi wa leswaku xi teka goza. Xiya xikombiso xa mupisalema Davhida. Davhida u xanisiwe hi hosi yakwe, a xengiwa hi munghana wakwe lonkulu, kutani a xandzukeriwa hi n’wana wakwe wa jaha. Eka swiendlakalo leswi hinkwaswo, xana Davhida a a ta tsaka loko a rindzele leswaku Yehovha a n’wi wisisa hi nkarhi lowu faneleke? Pisalema 71 leyi handle ko kanakana yi tsariweke hi Davhida, yi ri: “Loko ku ri mina, ndzi ta rindza nkarhi hinkwawo, ndzi ta engetela eku ku dzuniseni hinkwako. Nomu wa mina wu ta rungula ku lulama ka wena, ni ku ponisa ka wena siku hinkwaro.” (Pisalema 71:14, 15) Ematshan’weni yo rindza a tshoveke mbilu, Davhida u phofule ntsako wa yena hikuva a a khomekile hi ku vangamisa Yehovha ni ku tiyisa van’wana evugandzerini bya ntiyiso.—Pisalema 71:23.

Ku rindza Yehovha a swi dyisi mbitsi ku fana ni ku rindza bazi leri hlwelaka ku fika. Swi fana ni loko vatswari va rindza n’wana wa vona a kula leswaku a va munhu lonkulu loyi va nga ta tibuma hi yena. A va khondli mavoko—va n’wi letela, va n’wi dyondzisa ni ku n’wi tshinya—hinkwaswo va swi endlela ku fikelela vuyelo lebyi navelekaka. Hilaha ku fanaka, hina lava hi rindzelaka Yehovha hi kuma ntsako hi ku pfuna van’wana leswaku va tshinela eka Xikwembu. Na hina hi lava ku amukeriwa hi Xikwembu, kutani eku heteleleni hi ponisiwa.

Hi Nga Heleriwi Hi Ntshembo

Ku rindza Yehovha swi vula ku hambeta hi n’wi rhandza ni ku n’wi tirhela hi nga heleriwi hi ntshembo. Leswi swi nga va ntlhontlho. Malandza yo tala ya Xikwembu namuntlha ma tshama etindhawini leti munhu loyi a hanyaka hi ku ya hi ripfumelo leri a nga na rona eka switshembiso swa Xikwembu a hlekuriwaka. Kambe xiya xikombiso xa Vaisrayele lava tshembekaka lava va tshameke va ri ni ntshembo evuhlongeni bya le Babilona lebyi heteke malembe ya 70. I yini lexi va pfuneke ku endla tano? A swi kanakanisi leswaku ku hlaya ka vona tipisalema swi va tiyisile. Pisalema yin’wana leyi khutazaka leyi nga ha vaka yi tsariwe hi nkarhi wolowo yi ri: “Ndzi rindze rito rakwe. Moya-xiviri wa mina wu rindze Yehovha ku tlula varindzi va nimixo, lava rindzeke mixo. Israyele a a tshame a rindze Yehovha.”—Pisalema 130:5-7.

Vayuda lava tshameke va ri ni ntshembo hi ku hlaya pisalema leyi ni ku vulavula ha yona va pfunekile loko muti wa Babilona wu lovisiwa hi vahlaseri. Vayuda lava tshembekeke va magidi va ye eYerusalema hi ku hatlisa. Malunghana ni nkarhi wolowo, ku tsariwile: “Loko Yehovha a tlherisa lava a va ri makhumbi ya Siyoni, . . . nomu wa hina wu tale ku hleka.” (Pisalema 126:1, 2) Vayuda volavo a va tshikanga ku tiyisa ripfumelo ra vona. Naswona a va tshikanga ku yimbelelela Yehovha swidzuniso.

Hi ndlela leyi fanaka, Vakreste va ntiyiso lava rindzelaka Xikwembu enkarhini lowu wa “makumu ya mafambiselo ya swilo” va ringeta hi matimba leswaku va tshama va ri na ripfumelo leri tiyeke. Va dyondza Rito ra Xikwembu, va khutazana ni ku tshama va ri eku dzuniseni Yehovha hi ku chumayela mahungu lamanene ya Mfumo wa yena.—Matewu 24:3, 14.

Ku Rindza Vuyelo Bya Ndzayo

Yeremiya muprofeta wa Xikwembu u tsarile: “I swinene leswaku munhu a rindzela ku ponisa ka Yehovha, a miyerile.” (Swirilo 3:26) Yeremiya a a vula leswaku a swi ta va swinene eka vanhu va Xikwembu loko va nga gunguli hi ndlela leyi Yehovha a va tshinyeke ha yona loko a pfumelele muti wa Yerusalema wu lovisiwa. Ematshan’weni ya sweswo, a va fanele va vuyeriwa eka xiendlakalo xexo hi ku yingisa ni ku lava ku cinca langutelo ra vona.—Swirilo 3:40, 42.

Ndlela leyi ku tshinyiwa hi Yehovha swi hi pfunaka ha yona yi nga fanisiwa ni ndlela leyi mihandzu yi vupfaka ha yona. Malunghana ni ku tshinyiwa hi Xikwembu, Bibele yi ri: “Ku veka mbhandzu wo rhula eka lava leteriweke hi kona, ku nga ku lulama.” (Vaheveru 12:11) Tanihi leswi mihandzu yi lavaka nkarhi leswaku yi vupfa, na hina hi lava nkarhi leswaku hi cinca langutelo ra hina, hi amukela ndlela leyi Xikwembu xi hi letelaka ha yona. Hi xikombiso, loko hi endle xihoxo ivi hi lahlekeriwa hi malunghelo evandlheni, ku tiyimisela ka hina ku rindza Xikwembu ku ta hi pfuna leswaku hi nga heli matimba. Eka swiyimo swo tano, marito lawa Davhida a nga huhuteriwa wona ma hi tiyisa: “Ku langutana ni ku hlundzuka [ka Xikwembu] i swa nkarhinyana, ku kuma vunene [bya xona] i swa vutomi hinkwabyo. Nimadyambu ku nga ha ririwa, kambe nimixo ku ni ku huwelela ka ku tsaka.” (Pisalema 30:5) Loko hi hlakulela moya wo rindza kutani hi tirhisa ndzayo leyi hi yi kumaka eka Rito ra Xikwembu ni le nhlengeletanweni ya xona, nkarhi wa hina wa ku “huwelela ka ku tsaka” wu ta ta.

Ku Va La Vupfeke Swi Teka Nkarhi

Loko wa ha ri ntsongo kumbe wa ha ku khuvuriwa, u nga navela ku va ni malunghelo yo karhi evandlheni ra Vukreste. Kambe swi teka nkarhi leswaku munhu a kula hi tlhelo ra moya ivi a fanelekela ku va ni vutihlamuleri byebyo. Hikokwalaho, tirhisa nkarhi wa vuntshwa bya wena leswaku u kula hi tlhelo ra moya. Hi xikombiso, nkarhi wa vuntshwa i wunene leswaku u hlaya Bibele hinkwayo, u hlakulela timfanelo ta Vukreste ni ku dyondza ndlela yo endla vadyondzisiwa. (Eklesiasta 12:1) Loko u kombisa moya wa ku rindza hi ku titsongahata, wu ta fika nkarhi wa Yehovha wa leswaku u va ni vutihlamuleri.

Ntirho wo endla vadyondzisiwa na wona wu lava munhu a lehisa mbilu. Tanihi leswi murimi a fanelaka a hambeta a cheleta ku kondza Xikwembu xi mirisa mbewu, swi tano ni hi ntirho wo endla vadyondzisiwa. (1 Vakorinto 3:7; Yakobo 5:7) Ku hlakulela ripfumelo ni ku byala moya wa ku tlangela Yehovha etimbilwini ta van’wana swi lava tin’hweti kumbe malembe, u va dyondzisa Bibele hi ku lehisa mbilu. Ku rindzela Yehovha swi lava ku phikelela, hambiloko swichudeni swi nga tirhisi leswi swi swi dyondzaka eku sunguleni. Loko ntsena swi kombisa ku khensa, sweswo swi nga va xikombiso xa leswaku swi pfumela ku kongomisiwa hi moya wa Yehovha. Hi ku lehisa mbilu, swi nga ku tsakisa ku vona Yehovha a endla leswaku xichudeni xa wena xi va mudyondzisiwa wa Kreste.—Matewu 28:20.

Ku Kombisa Rirhandzu Hi Ku Rindza

Leswaku u vona ndlela leyi ku rindza ku nga vaka xikombiso xa rirhandzu ni ku tiyiseka ha yona, xiya xiyimo xa makwerhu wa xisati la dyuhaleke la tshamaka emananga ya le Andes, eAmerika Dzonga. Yena ni makwerhu un’wana wa xisati hi vona ntsena Timbhoni ta Yehovha endhawini ya ka vona. Handle ko kanakana a va tshama va swi langutele hi mahlo-ngati ku endzeriwa hi Vakreste-kulobye. Siku rin’wana mulanguteri la famba-fambaka a a ri endleleni yo va endzela loko a lahleka. U boheke ku tlhelela endzhaku leswaku a vona ndlela leyi a teke hi yona kutani u hlwerile hi tiawara to hlayanyana. A ku ri exikarhi ka vusiku loko eku heteleleni a vona ximutana xexo a ri ekule. Tanihi leswi a ku nga ri na gezi endhawini yoleyo, u hlamarisiwe hi ku vona rivoni. A a tsake ngopfu loko eku heteleleni a fika eximutanini xexo ivi a kuma leswaku rivoni leri ra pharafini a ri khomiwe hi makwerhu wa xisati la dyuhaleke, a ri tlakusele ehenhla! A a tiyiseka leswaku mulanguteri la famba-fambaka u le ndleleni, kutani u n’wi rindzile.

Loko hi ri ni moya lowu fanaka wa ku rindza, hi ta tsakela ku rindza Yehovha. Ha tiyiseka leswaku u ta hetisisa switshembiso swa yena. Ku fana ni mulanguteri la famba-fambaka, ha va tlangela lava hi rindzaka hi rirhandzu. Hikokwalaho a swi hlamarisi leswi Xikwembu xi tlangelaka lava va xi rindzaka. Bibele yi ri: “Yehovha u tsakisiwa hi . . . lava va rindzelaka musa wakwe wa rirhandzu.”—Pisalema 147:11.

[Xifaniso lexi nga eka tluka 18]

Vanhu lava tshamaka va khomekile hi ku dzunisa Xikwembu va tsakela ku rindza Yehovha