Yesu Xikombiso Lexi Hetisekeke Lexi Hi Faneleke Hi Xi Tekelela

XANA wa swi lava ku va munhu wo antswa ni la tsakeke? Muapostola Petro u hlamusele leswaku hi nga swi endlisa ku yini sweswo. U tsale a ku: “Kreste u xanisekele n’wina, a mi siyela ntila leswaku mi landzelerisisa mikondzo yakwe.” (1 Petro 2:21) Leswi vutomi bya Yesu Kreste a byi hlawulekile, hi nga dyondza swilo swo tala eka swilo leswi a swi endleke. Loko hi dyondza hi Yesu hi tlhela hi n’wi tekelela, swi le rivaleni leswaku hi nga va vanhu vo antswa ni lava tsakeke. A hi kambisiseni hi vukheta tin’wana ta timfanelo leti wanuna loyi wa nkoka a a ri na tona kutani hi vona ndlela leyi hi nga vuyeriwaka ha yona hi ku n’wi tekelela.

Yesu a a ringanisela. Hambileswi Yesu a vuleke leswaku “a nga na ndhawu yo veka nhloko yakwe,” a a nga titsoni ntsako kumbe ku khutaza vanhu leswaku va nga tiphini hi vutomi. (Matewu 8:20) A a ya eminkhubyeni. (Luka 5:29) Singita rakwe ro sungula leri tsariweke eBibeleni ra ku hundzula mati ma va vhinyo enkhubyeni wa vukati, ri kombisa leswaku a a nga tiendli guwela kumbe ku titsona ntsako. (Yohane 2:1-11) Hambiswiritano, Yesu u swi veke erivaleni leswi a swi ri swa nkoka swinene evuton’wini byakwe. U te: “Swakudya swa mina i ku endla ku rhandza ka loyi a ndzi rhumeke ni ku heta ntirho wakwe.”—Yohane 4:34.

□ Xana u byi kambisisile vutomi bya wena leswaku u vona ndlela leyi u nga ringaniselaka ha yona eka ku lava swilaveko swa vutomi ni ku lava ku hlakulela vuxaka lebyikulu ni Xikwembu?

Yesu a a ngheneka. Bibele yi hlamusela Yesu tanihi munhu loyi a a ri ni xinghana. A a nga hlundzuki loko vanhu va ya eka yena va ya n’wi byela swiphiqo swa vona kumbe va n’wi vutisa swivutiso swo tika. Siku rin’wana loko a rhendzeriwe hi ntshungu, wansati un’wana loyi a a khomiwe hi vuvabyi byin’wana ku ringana malembe ya 12 u khumbe nguvu yakwe a ri ni ntshembo wa leswaku u ta hola. Yesu a nga n’wi tshinyanga hikwalaho ka xiendlo xakwe lexi van’wana a va ta va va xi teke ku ri ku delela kambe u vule leswi eka yena: “N’wananga, ripfumelo ra wena ri ku hanyisile.” (Marka 5:25-34) Vana na vona a va titwa va ntshunxekile loko va ri na yena, va nga chavi leswaku u ta va honisa. (Marka 10:13-16) Yesu ni vadyondzisiwa vakwe a va tshama va ri eku buleni va tsakile naswona va ntshunxekile. Vadyondzisiwa vakwe a va nga chavi ku tshinela eka yena.—Marka 6:30-32.

□ Xana vanhu va titwa va ntshunxekile ku ta va ta vulavula na wena?

A a ri ni ntwela-vusiwana. Yin’wana ya timfanelo letikulu ta Yesu a ku ri vuswikoti byakwe byo kota ku twisisa ndlela leyi vanhu van’wana va titwaka ha yona, kutani a va pfuna. Muapostola Yohane u vule leswaku loko Yesu a vone Mariya a ri karhi a rila hikwalaho ka rifu ra Lazaro makwavo wakwe, u “[konyile] emoyeni, a karhateka” kutani “a humesa mihloti.” Vanhu lava va n’wi voneke va swi twisise kahle leswaku Yesu a a wu rhandza swinene ndyangu wolowo naswona a nga khomiwanga hi tingana ku swi kombisa erivaleni sweswo. Nakambe u tlhele a kombisa ntwela vusiwana hi ku pfuxa munghana wakwe eku feni!—Yohane 11:33-44.

Nakambe siku rin’wana, wanuna loyi a a ri ni nhlokonho, ku nga vuvabyi lebyi nyenyetsaka lebyi n’wi endleke leswaku a nga tshami ni vanhu van’wana, u kombele Yesu a ku: “Hosi, loko u swi lava, u nga ndzi basisa.” Nhlamulo ya Yesu a yi khutaza hakunene: “A tshambuluta voko rakwe, a n’wi khumba, a ku: ‘Ndza swi lava. Basisiwa.’” (Matewu 8:2, 3) Yesu a nga hanyisanga vanhu leswaku a hetisisa vuprofeta ntsena. A a lava ku va sula mihloti ya vona. Hinkwaswo leswi a a swi endla a a susumetiwa hi marito ya yena lama tsundzukiwaka swinene lama nge: “Leswi mi lavaka vanhu va swi endla eka n’wina, swi endleni eka vona hilaha ku fanaka.”—Luka 6:31.

□ Xana swiendlo swa wena swi kombisa leswaku u va twela-vusiwana vanhu van’wana lava nga eswiyin’weni swo tika?

Yesu a a twisisa. Hambileswi Yesu a a nga swi endli swihoxo, a a nga languteli leswaku vanhu van’wana va endla swilo hi ndlela leyi hetisekeke kumbe a tivona a antswa ku tlula van’wana; hambi ku ri ku endla swilo handle ko twisisa mhaka hinkwayo. Siku rin’wana, wansati “loyi a a tiviwa emutini leswaku i mudyohi” u kombise ripfumelo rakwe ni ku nkhensa hi ku hlambisa Yesu milenge hi mihloti yakwe. Yesu u tshike wansati yoloye a n’wi hlambisa milenge naswona sweswo swi hlamarise wanuna loyi a a rhambe Yesu, loyi a a avanyise wansati yoloye hi ndlela yo biha. Leswi Yesu a a swi twisisa kahle leswaku xiendlo xa wansati loyi a xi huma embilwini, a nga n’wi gwevanga hikwalaho ka swidyoho swakwe. Kambe u te: “Ripfumelo ra wena ri ku ponisile; tifambele hi ku rhula.” Leswi Yesu a veke ni musa eka yena, swi nga ha endleka leswaku wansati yoleyo u susumeteleke ku tshika mahanyelo yakwe ya khale.—Luka 7:37-50.

□ Xana u tiviwa hi ku va la hatliselaka ku bumabumela ni la hlwelaka ku avanyisa?

A a nga yi hi nghohe naswona a a xixima vanhu. Swi nga ha endleka leswaku Yesu a a n’wi rhandza swinene Yohane hileswi a va ri ni vumunhu lebyi fanaka ni leswi kumbexana a va ri maxaka.a Nilokoswiritano, a a nga n’wi rhandzi ku tlula vadyondzisiwa lavan’wana. (Yohane 13:23) Entiyisweni, loko Yohane ni makwavo wakwe Yakobo va kombele swikhundlha swo hlawuleka eMfun’weni wa Xikwembu, Yesu u va hlamule a ku: “Loko ku ri ku tshama exineneni xa mina kumbe eximatsini xa mina a hi swa mina ku swi nyika van’wana.”—Marka 10:35-40.

Minkarhi hinkwayo Yesu a a xixima vanhu van’wana. Hambileswi vanhu va le minkarhini yakwe a va ri ni xihlawuhlawu, kambe yena a a nga ri na xona. Hi xikombiso, vavasati a va tala ku tekiwa tanihi lava nga pfuniki nchumu loko va ringanisiwa ni vavanuna. Kambe Yesu u khome vavasati hi ndlela leyi nga ni xindzhuti. U tivule ro sungula leswaku hi yena Mesiya eka wansati loyi a a nga ri Muyuda kambe a a ri Musamariya, ku nga rixaka leri Vayuda a va ri nyefula naswona a va nga ri xeweti. (Yohane 4:7-26) Nakambe Yesu u nyike vavasati lunghelo ra leswaku ku va vona vo sungula ku n’wi vona endzhaku ka loko a pfuxiwile.—Matewu 28:9, 10.

□ Xana a wu yi hi nghohe loko u tirhisana ni vanhu va rixaka rin’wana, va rimbewu leri hambaneke ni ra wena, lava vulavulaka ririmi rimbe kumbe lava humaka ematikweni mambe?

U hetisise vutihlamuleri bya yena tanihi n’wana tlhelo makwavo. Swi nga ha endleka leswaku Yosefa, tata wa Yesu wa muwundli, u fe loko Yesu a ha ri jaha. Kumbexana Yesu u ve muvatli leswaku a kota ku hlayisa mana wakwe ni vamakwavo. (Marka 6:3) Loko a ri ekusuhi ni ku fa, u byarhise mudyondzisiwa wakwe Yohane vutihlamuleri byo khathalela mana wakwe.—Yohane 19:26, 27.

□ Xana u nga tekelela Yesu hi ku va u byarha vutihlamuleri byo khathalela ndyangu wa ka n’wina?

Yesu a a ri munghana wa ntiyiso. Yesu a a ri munghana la hlamarisaka. Hi ndlela yihi? Yesu a nga va fularhelanga vanghana vakwe hileswi a va endla swihoxo, hambiloko va tshamela ku endla swihoxo leswi fanaka. A hi minkarhi hinkwayo leyi vadyondzisiwa vakwe a va endla leswi a a lava leswaku va swi endla. Kambe u va kombise leswaku a a ri munghana wa vona hi ku dzika swinene eka timfanelo ta vona letinene ematshan’weni yo ehleketa leswaku a va ri ni swikongomelo leswi hoxeke. (Marka 9:33-35; Luka 22:24-27) A a nga va sindzisi leswaku va endla swilo hi ndlela yakwe kambe a a va khutaza leswaku va vula leswi vona va swi ehleketaka.—Matewu 16:13-15.

Ku tlula kwalaho, Yesu a a rhandza vanghana vakwe. (Yohane 13:1) Hi swi tivisa ku yini? U te: “A nga kona la nga ni rirhandzu ro tlula leri, ra leswaku munhu a nyiketa moya-xiviri wakwe hikwalaho ka vanakulobye.” (Yohane 15:13) Xana u kona munhu loyi a nga felaka vanghana vakwe?

□ Xana u hambeta u va munghana wa vanhu lava ku nyangatsaka kumbe lava ku khunguvanyisaka?

A a ri wanuna la nga ni vutihlamuleri ni la nga ni xivindzi. Yesu a a nga tsananga hilaha a vonakaka hakona eswifanisweni swa vampfampfarhuti van’wana. Tibuku ta Tievhangeli ti n’wi hlamusela a ri wanuna wa matimba. Yesu u va hlongole kambirhi vaxavisi lava a va ri ni nhundzu etempeleni. (Marka 11:15-17; Yohane 2:14-17) Loko ntshungu wa vapfukeri wu tile leswaku wu ta khoma “Yesu wa Munazareta,” u ve ni xivindzi a yima emahlweni ka wona a titivisa eka vona ni ku sirhelela vadyondzisiwa vakwe. U te: “Hi mina loyi. Hikokwalaho, loko mi lava mina, tshikani lava va famba.” (Yohane 18:4-9) Endzhaku ka loko Pontiyo Pilato a vone xivindzi lexi Yesu a a ri na xona enkarhini lowu a a khomiwile ni loko a xanisiwa, a swi hlamarisi leswi a vuleke marito lama nge: “Vonani! Wanuna!”—Yohane 19:4, 5.

□ Loko u vona swilo leswi u faneleke u swi endla, xana u tiyimisela ku swi endla handle ko chava?

Timfanelo leti ni tin’wana to hlawuleka ti endla leswaku Yesu a va xikombiso lexi hetisekeke eka hina. Loko hi pfumelela mahanyelo yakwe ma kongomisa ndlela leyi hi hanyaka ha yona, hi ta va vanhu vo antswa ni lava tsakeke. Hi yona mhaka leyi muapostola Petro a khutazeke Vakreste leswaku va landzelerisisa mikondzo ya Yesu. Xana wa ringeta ku landzelerisisa mikondzo ya Yesu hilaha u nga kotaka hakona?

Ku Ni Swilo Swin’wana Leswi Hi Nga Swi Dyondzaka Eka Yesu

Hambiswiritano, ku ni swilo swin’wana leswi hi nga swi dyondzaka eka Yesu. U te: “Hi mina ndlela ni ntiyiso ni vutomi. A nga kona loyi a taka eka Tatana handle ko ta ha mina.” (Yohane 14:6) Handle ko va Yesu a tivisa vanhu ntiyiso malunghana ni Xikwembu, xisweswo a va pfulela ndlela ya leswaku va tshinela eka xona, u endle leswaku vanhu vo tshembeka va kota ku kuma vutomi.—Yohane 3:16.

Loko Yesu a hlamusela xivangelo lexi endleke leswaku a ta laha misaveni, u te: ‘N’wana wa munhu a nga telanga ku ta tirheriwa, kambe u tele ku ta tirhela ni ku nyikela moya-xiviri wakwe wu va nkutsulo wa lavo tala.’ (Matewu 20:28) Leswi Yesu a nyikeleke hi vutomi byakwe tanihi gandzelo, u va pfulele ndlela ya leswaku va kuma vutomi lebyi nga heriki. I yini leswi un’wana ni un’wana wa hina a faneleke a swi endla leswaku a kuma vutomi byebyo? Yesu u te: “Leswi swi vula vutomi lebyi nga heriki, ku nghenisa ka vona vutivi ha wena, Xikwembu xi ri xin’we xa ntiyiso, ni loyi u n’wi rhumeke, Yesu Kreste.”—Yohane 17:3.

Swilo leswi lavekaka leswaku hi kuma vutomi lebyi nga heriki i ku nghenisa vutivi hi Yesu, ku tekelela mahanyelo yakwe ni ku va ni ripfumelo eka rifu rakwe ra gandzelo. Ha ku rhamba leswaku u tinyika nkarhi wo hlaya xihlovo xa vutivi byolebyo, ku nga Bibele, u tlhela u tikarhatela ku endla leswi yi swi vulaka, hilaha Yesu a endleke hakona.b

Vutomi bya Yesu lebyi nga xikombiso lexinene eka hina byi hi dyondzisa ndlela leyi hi faneleke hi hanya ha yona. Rifu ra yena leri nga gandzelo ri nga hi ntshunxa eka xidyoho ni hakelo ya xona, ku nga rifu. (Varhoma 6:23) Hakunene vutomi bya hina a byi ta twerisa vusiwana loko a hi nga kongomisiwi hi xikombiso xa Yesu Kreste lexi pfunaka swinene! U nga tshuki u pfumelela ku vilela hi vutomi ku ku dyela nkarhi wo kambisisa ni ku landzelerisisa xikombiso xa wanuna wa nkoka la tshameke a hanya laha misaveni—Yesu Kreste.

[Tinhlamuselo ta le hansi]

[Bokisi/Swifaniso leswi nga eka tluka 7]

◼ Yesu a a nga yi hi nghohe naswona a a xixima vanhu hinkwavo

◼ A a ri munghana wa ntiyiso ku fikela loko a fa

◼ A a ri ni xivindzi

Xana wa ringeta ku landzelerisisa mikondzo ya Yesu hilaha u nga kotaka hakona?

[Swifaniso leswi nga eka tluka 5]

Yesu a a ringanisela . . . 

a a ngheneka . . . 

a a ri ni ntwela-vusiwana