Tshinela Eka Xikwembu

Loko Vadyuhari Va Tlhela Va Va Lavantshwa

XANA u kona la swi tsakelaka ku langutana ni leswi ku dyuhala ku swi vangaka—nhlonge yo khwanyana, ku nga voni kahle, ku nga twi kahle ni milenge leyi vavaka? U nga ha tivutisa leswaku, ‘Ha yini Xikwembu xi hi vumbe hi ri vantshwa kambe loko hi kula hi hetelela hi dyuhala?’ Mahungu lamanene hileswaku leswi a ku nga ri xikongomelo xa Xikwembu. Xikongomelo xa xona xa rirhandzu i ku herisa vudyuhari! Xiya marito lama vuriweke hi kokwa wa hina Yobo, lama nga eka Yobo 33:24, 25.

Xiya xiyimo xa Yobo, wanuna wo tshembeka loyi a a rhandziwa hi Yehovha. Hambileswi Yobo a a nga swi tivi, Sathana u kanakane vutshembeki byakwe, a vula leswaku u tirhela Xikwembu hi swikongomelo swa vutianakanyi. Leswi Yehovha a a n’wi tshemba Yobo naswona a a swi tiva leswaku u ta n’wi kutsula, u pfumelele Sathana leswaku a n’wi ringa. Kutani Sathana u “[be] Yobo hi marhumba lama nga ni khombo ku sukela enkondzweni wakwe ku ya ethavathaveni.” (Yobo 2:7) Nyama ya Yobo yi ve ni swivungu kutani nhlonge yakwe yi oma, yi hundzuka ya ntima ivi yi dzuvuka. (Yobo 7:5; 30:17, 30) Xana wa wu vona nhlomulo lowu a a ri na wona? Kambe Yobo u tshame a tshembekile naswona u te: “Ndzi nga ka ndzi nga tshiki vutshembeki bya mina kukondza ndzi timeka!”—Yobo 27:5.

Kambe loko se xiyimo xi tika, Yobo u endle xihoxo lexikulu. Loko se a vona leswaku u le kusuhi ni ku fa, u karhateke ngopfu hi vutomi byakwe lerova a vula leswaku “moya-xiviri wakwe wu lulamile ematshan’weni ya Xikwembu.” (Yobo 32:2) Elihu loyi a a ri muvulavuleri wa Xikwembu u n’wi tshinyile. Kambe u tlhele a n’wi byela mahungu lamanene lama humaka eka Xikwembu a ku: “N’wi suseni [Yobo] a nga rheleli emugodini [sirha leri tolovelekeke]! Ndzi kume nkutsulo! Nyama yakwe a yi ve yintshwa ku tlula evuntshweni; a a vuyele emasikwini ya matimba yakwe ya vuntshwa.” (Yobo 33:24, 25) Marito wolawo ma fanele ma endle Yobo a va ni ntshembo. A a nga ta xaniseka kukondza a fa. Loko a hundzuka, Xikwembu a xi ta endla leswaku gandzelo ra nkutsulo ri n’wi pfuna naswona ri n’wi kutsula emaxangwini yakwe.a

Hi ku titsongahata, Yobo u amukele ndzayo kutani a hundzuka. (Yobo 42:6) Swi le rivaleni leswaku Yehovha u endle leswaku nkutsulo wu pfuna Yobo, wu funengeta xihoxo xakwe wu tlhela wu endla leswaku Xikwembu xi n’wi katekisa. Yehovha u “[katekise] makumu ya Yobo ku tlula masungulo yakwe.” (Yobo 42:12-17) Ehleketa ndlela leyi Yobo a titweke ha yona! Ndlela yin’wana leyi a katekisiweke ha yona hileswaku vuvabyi byakwe lebyi nyangatsaka byi horile naswona nyama yakwe yi ve “yintshwa ku tlula evuntshweni”!

Nkutsulo lowu Xikwembu xi pfuneke Yobo ha wona a wu n’wi pfunanga hilaha ku nga heriki hikuva a wu endlanga leswaku a hetiseka naswona hi ku famba ka nkarhi u file. Hina hi ni nkutsulo wo antswa ku tlula wolowo. Hi rirhandzu, Yehovha u nyikele hi N’wana wakwe Yesu, leswaku a hi kutsula. (Matewu 20:28; Yohane 3:16) Hinkwavo lava kombisaka ripfumelo eka nkutsulo wolowo va ta va ni ntshembo wo hanya hilaha ku nga heriki eparadeyisini laha misaveni. Emisaveni yoleyo leyintshwa, Xikwembu xi ta endla leswaku vanhu vo tshembeka va nga ha dyuhali. Ha yini u nga dyondzi leswi engetelekeke malunghana ni ndlela leyi u nga hanyaka ha yona leswaku u kota ku vona loko ‘nyama ya vadyuhari yi va yintshwa ku tlula evuntshweni bya vona’?

Tindzimana ta Bibele leti u nga ti hlayaka hi April:

◼ Yobo 16-37

[Nhlamuselo ya le hansi]