Ha Yini Xikwembu Xi Kombele Abrahama Leswaku A Endla Gandzelo Hi N’wana Wakwe?

▪ Hilaha swi tsariweke hakona ebukwini ya Bibele ya Genesa, Yehovha Xikwembu u kombele Abrahama ku nyikela hi n’wana wakwe Isaka tanihi gandzelo. (Genesa 22:2) Vahlayi van’wana va Bibele swa va tikela ku twisisa rungula rero. Profesa la vuriwaka Carol u te: “Loko ndzi sungula ku twa rungula leri ndza ha ri ntsongo, ndzi hlundzukile. Xana i Xikwembu xa njhani lexi nga kombelaka nchumu wo tano?” Loko ku titwa hi ndlela yoleyo swi twisiseka, swi nga hi pfuna ku tsundzuka tinhla ti nga ri tingani.

Yo sungula, xiya leswi Yehovha a nga swi endlangiki. A nga n’wi pfumelelanga Abrahama leswaku a endla gandzelo hi n’wana wakwe, hambileswi Abrahama a tiyimisele ku endla tano, Xikwembu a xa ha tlhelanga xi endla xikombelo xexo eka un’wana. Yehovha u lava leswaku vagandzeri vakwe hinkwavo ku katsa ni vana, va hambeta va hanya—va tiphina hi vutomi byo leha ni lebyi enerisaka.

Ya vumbirhi, Bibele yi ringanyeta leswaku Yehovha a ri ni xivangelo xo hlawuleka hi ku kombela Abrahama leswaku a endla gandzelo hi Isaka. Xikwembu a xi swi tiva leswaku endzhaku ka malembe-xidzana, a xi ta pfumelela N’wana wa xona,a Yesu leswaku a hi fela. (Matewu 20:28) Yehovha a a lava hi twisisa ndlela leyi xitlhavelo a xi ta n’wi khumba ha yona. U hi nyike xikombiso lexinene xa xitlhavelo xa nkarhi lowu taka eka leswi a swi kombeleke eka Abrahama. Njhani?

Xiya marito lawa Yehovha a ma byeleke Abrahama: “Ndzi kombela u teka n’wana wa wena, n’wana wa wena loyi u n’wi rhandzaka swinene, Isaka, . . . u n’wi nyikela a va gandzelo ro hisiwa.” (Genesa 22:2) Xiya leswaku Yehovha u vule leswaku Isaka i n’wana “loyi [a] n’wi rhandzaka swinene.” Yehovha a yi tiva ndlela leyi Isaka a ri wa risima ha yona eka Abrahama. Nakambe Xikwembu a xi yi tiva ndlela leyi a xi titwa ha yona hi N’wana wa xona, Yesu. Yehovha u rhandze Yesu swinene a kala a vulavula ha yena kambirhi a ri etilweni, hi ku kongoma a vula leswaku Yesu i ‘N’wana wakwe, la rhandzekaka.’—Marka 1:11; 9:7.

Nakambe xiya leswaku xikombelo xa Yehovha eka Abrahama a xi katsa rito leri nge “ndza kombela.” Xidyondzi xin’wana xa Bibele xi ringanyeta leswaku ku va Xikwembu xi tirhisa rito leri swi kombisa leswaku “xi twisisa ndlela leyi Abrahama a ta lahlekeriwa ha yona loko a endla xitlhavelo hi n’wana wakwe.” Hilaha hi nga swi ehleketaka hakona, xikombelo xexo xi ta va xi endle leswaku Abrahama a rila swinene; hilaha ku fanaka, a hi nge swi koti ku twisisa ku vava lokukulu loku Yehovha a faneleke a ku twile loko a vona N’wana wakwe la rhandzekaka a xaniseka a tlhela a fa. A swi kanakanisi leswaku Yehovha u twe ku vava lokukulu loku a nga si tshamaka a ku twa kumbe loku a nga ta ka a nga pfuki a ku twile.

Kutani hambileswi hi nga ha tsemiwaka nhlana hileswi Yehovha a kombeleke Abrahama leswaku a swi endla, ku ta va ku ri vutlhari ku tsundzuka leswaku Yehovha a nga pfumelanga leswaku mupatriyaka loyi wo tshembeka a endla xitlhavelo hi n’wana wakwe. U sivele Abrahama ku endla nchumu wo biha lowu tanihi mutswari a wu ta n’wi karhata; u sirhelele Isaka leswaku a nga fi. Kutani, Yehovha a nga n’wi sirhelelanga ‘N’wana wakwe, kambe u n’wi nyikete hikwalaho ka hina hinkwerhu.’ (Varhoma 8:32) Ha yini Yehovha a tikatse eka maxangu wolawo lamakulu? U endle tano leswaku “hi ta kuma vutomi ha yena.” (1 Yohane 4:9) Hakunene lexi i xitsundzuxo xa rirhandzu ra Xikwembu eka hina! Xana na hina a swi hi susumeteli leswaku hi xi rhandza?b

[Tinhlamuselo ta le hansi]