Ha Yini Hi Fanele Hi Hlangana Swin’we Leswaku Hi Gandzela?

1-3. (a) Vakreste va swi kombise njhani leswaku a va tiyimisele ku hlangana swin’we? (Vona xifaniso lexi nga eku sunguleni ka xihloko lexi.) (b) Hi ta kambisisa yini exihlokweni lexi?

LOKO Corinna a ri ni malembe ya 17, mana wakwe u khomiwile kutani a yisiwa ekule swinene ekampeni ya nxaniso. Hi ku famba ka nkarhi, Corinna na yena u yisiwe Siberia ku nga ndhawu leyi ku ya kona swi tekaka tikhilomitara ta magidi ku suka ekaya ka vona. Loko a fika kwalaho u tirhe epurasini naswona a a khomiwa tanihi hlonga. Minkarhi yin’wana a sindzisiwa ku tirha ehandle laha xirhami xa kona a xi vuyisa ni n’wana evukatini naswona a nga ambalanga swiambalo swo kufumela. Hambiswiritano, Corinna ni makwerhu un’wana wa xisati va endle xiboho xa leswaku va ta endla xin’wana ni xin’wana lexi va nga xi kotaka leswaku va baleka epurasini va ya eminhlanganweni.

² Corinna u te: “Hi suke epurasini nimadyambu hi famba tikhilomitara ta 25 hi milenge hi ya exitichini xa switimela. Xitimela xi suke hi awara ya mbirhi nimixo naswona xi teke tiawara ta tsevu ku fika laha xi helelaka kona naswona hi tlhele hi famba tikhilomitara ta khume hi milenge leswaku hi ya fika eminhlanganweni.” Corinna a tsakile leswi a koteke ku fika eminhlanganweni. U te: “Eminhlanganweni hi dyondze Xihondzo xo Rindza ni ku yimbelela tinsimu ta Mfumo. Hi khutazekile swinene ni ku tiya eripfumelweni.” Vamakwerhu lava va tlhelele epurasini endzhaku ka masiku manharhu, kambe n’wini wa purasi a nga swi xiyanga leswaku a va fambile.

³ Minkarhi hinkwayo vanhu va Yehovha va swi langutela hi mahlongati ku hlangana swin’we. Hi xikombiso, Vakreste vo sungula a va swi langutela hi mahlongati ku hlangana swin’we leswaku va gandzela Yehovha ni ku dyondza ha yena. (Mintirho 2:42) Handle ko kanakana na wena u swi langutela hi mahlongati ku ya eminhlanganweni. Kambe ku fana ni vamakwerhu emisaveni hinkwayo, swi nga ha ku tikela ku ya eminhlanganweni minkarhi hinkwayo. Kumbexana u tirha tiawara to tala kumbe u ni swo tala swo swi endla kumbe u tshama u lo lee! I yini leswi nga hi pfunaka ku endla leswi hi nga swi kotaka leswaku hi va kona eminhlanganweni?^[1] (Vona nhlamuselo ya le hansi.) Hi nga swi khutaza njhani swichudeni swa hina swa Bibele ni van’wana leswaku va va kona nkarhi ni nkarhi eminhlanganweni? Xihloko lexi xi ta hlamusela leswaku ha yini ku va kona eminhlanganweni (1) swi hi pfuna, (2) swi pfuna van’wana, ni ku (3) tsakisa Yehovha.^[2]—Vona nhlamuselo ya le hansi.

 4. Ku hlangana swin’we swi hi pfuna njhani leswaku hi dyondza hi Yehovha?

⁴ Minhlangano ya hi dyondzisa. Minhlangano hinkwayo yi hi pfuna ku dyondza swo tala hi Yehovha. Hi xikombiso, mavandlha yo tala ma ha ku dyondza buku leyi nge Tshinela Eka Yehovha eka Dyondzo ya Bibele ya Vandlha. U titwe njhani loko hi dyondza hi timfanelo ta Yehovha ni loko u twa ndlela leyi vamakwerhu va titwaka ha yona hi yena? A swi kanakanisi leswaku leswi swi endle leswaku u ya u rhandza Yehovha swinene. Eminhlanganweni, hi tlhela hi dyondza swo tala hi Bibele hi ku yingisela tinkulumo ni ku hlalela minkombiso swin’we ni ku yingiserisisa loko ku hlayiwa Bibele. (Nehemiya 8:8) Naswona anakanya hi swilo swo tala leswi hi swi dyondzaka vhiki ni vhiki loko hi lunghiselela ku hlaya ka Bibele ni leswi van’wana va swi dyondzeke.

 5. Minhlangano ya Vukreste yi ku pfune njhani leswaku u tirhisa leswi u swi dyondzeke eBibeleni ni ku antswisa ndlela leyi u chumayelaka ha yona?

⁵ Minhlangano yi hi dyondzisa ku tirhisa leswi hi swi dyondzaka eBibeleni. (1 Vatesalonika 4:9, 10) Hi xikombiso, xana u tshame u va kona eka Dyondzo ya Xihondzo xo Rindza leyi endleke u titwa u lava ku endla swo tala entirhweni wa Yehovha, u antswisa swikhongelo swa wena, kumbe ku rivalela makwerhu wo karhi? Minhlangano ya le xikarhi ka vhiki yi nga hi dyondzisa ndlela yo chumayela mahungu lamanene ni ndlela yo pfuna vanhu ku twisisa ntiyiso wa le Bibeleni.—Matewu 28:19, 20.

 6. Xana minhlangano ya hina yi hi khutaza ni ku hi tiyisa hi ndlela yihi?

⁶ Minhlangano ya hi khutaza. Misava ya Sathana yi ringeta ku hi tsanisa ripfumelo ni ku hi heta matimba. Kambe minhlangano ya hi khutaza ni ku hi nyika matimba leswaku hi ya emahlweni hi tirhela Yehovha. (Hlaya Mintirho 15:30-32.) Minkarhi yo tala, hi dyondza hi ndlela leyi vuprofeta bya le Bibeleni byi hetisekeke ha yona. Leswi swi nga hi pfuna leswaku hi ya hi tiyiseka leswaku switshembiso swa Yehovha swi ta hetiseka. Vamakwerhu a va hi khutazi loko va nyikela tinkulumo ntsena kambe ni loko va hlamula ni ku dzunisa Yehovha hi ku yimbelela swi huma embilwini. (1 Vakorinto 14:26) Loko hi bula na vona emahlweni ni le ndzhaku ka minhlangano ha phyuphya hikuva hi ni vanghana vo tala lava khathalaka hi hina.—1 Vakorinto 16:17, 18.

 7. Ha yini swi ri swa nkoka swinene ku va kona eminhlanganweni?

⁷ Eminhlanganweni, hi kuma mpfuno wa moya lowo kwetsima wa Xikwembu. Yesu u tirhisa moya wolowo wo kwetsima ku kongomisa mavandlha. Entiyisweni, u vule leswaku hi fanele hi “[yingisa] leswi moya wu swi byelaka mavandlha.” (Nhlavutelo 2:7) Moya lowo kwetsima wu nga hi pfuna ku lwisana ni miringo ni ku chumayela hi xivindzi. Wu nga tlhela wu hi pfuna ku endla swiboho leswinene. Hi yona mhaka hi faneleke hi endla hinkwaswo leswi hi nga swi kotaka leswaku hi va kona eminhlanganweni leswaku hi kuma mpfuno wa moya lowo kwetsima wa Xikwembu.

 8. Loko vamakwerhu va hi vona eminhlanganweni, va twa loko hi hlamula ni ku yimbelela, xana sweswo swi va vuyerisa njhani? (Nakambe vona bokisi leri nge “Minkarhi Hinkwayo U Titwa A Antswa Endzhaku Ka Minhlangano.”)

⁸ Eminhlanganweni, hi kuma nkarhi wo komba vamakwerhu leswaku ha va rhandza. Vamakwerhu vo tala evandlheni ra hina va tiyisela miringo yo tika swinene. Muapostola Pawulo u tsale a ku: “A hi khathalelaneni.” (Vaheveru 10:24, 25) Hi nga kombisa leswaku ha khathala hi vamakwerhu hi ku va kona eminhlanganweni leswaku hi khutazana. Loko hi ya eminhlanganweni, hi komba vamakwerhu leswaku hi lava ku va na vona ni ku bula na vona nileswaku ha khathala hi ndlela leyi va titwaka ha yona. Hi tlhela hi va khutaza loko va hi twa hi hlamula ni ku yimbelela swi huma embilwini.—Vakolosa 3:16.

9, 10. (a) Hlamusela ndlela leyi marito ya Yesu lama nga eka Yohane 10:16 ma hi pfunaka ha yona ku twisisa leswaku ha yini swi ri swa nkoka ku hlangana swin’we. (b) Loko hi va kona eminhlanganweni nkarhi ni nkarhi swi nga n’wi pfuna njhani munhu loyi a tshikiweke hi ndyangu wa ka vona?

⁹ Loko hi va kona eminhlanganweni, hi pfuna vandlha leswaku ri va ni vun’we. (Hlaya Yohane 10:16.) Yesu u tifanise ni murisi kasi valandzeri vakwe u va fanise ni ntlhambi wa tinyimpfu. Ehleketa hi mhaka leyi: Loko tinyimpfu timbirhi ti ri entshaveni, timbirhi ti ri ehansi ka ntshava kasi yin’wana yi ri kun’wana, xana hi nga vula leswaku i ntlhambi? Doo! Hikuva ntlhambi wu tshama swin’we naswona wu landzela murisi. Hi ndlela leyi fanaka, a hi fanelanga hi tihambanisa ni vamakwerhu hi ku nga vi kona eminhlanganweni. Hi fanele hi va kona eminhlanganweni leswaku hi va “ntlhambi wun’we” ni ku landzela “murisi . . . un’we.”

¹⁰ Minhlangano yi hi pfuna leswaku hi va ni vun’we tanihi ndyangu lowu rhandzanaka. (Pisalema 133:1) Van’wana evandlheni va fularheriwe hi mindyangu ya vona, ku nga ha va vatswari kumbe vamakwavo. Kambe Yesu u tshembise ku va nyika ndyangu lowu nga ta va rhandza ni ku va khathalela. (Marka 10:29, 30) Loko nkarhi ni nkarhi u va kona eminhlanganweni, u nga va tatana, manana, makwerhu wa xinuna kumbe wa xisati eka un’wana evandlheni. Loko hi anakanyisisa hi sweswo, swi ta endla leswaku hi lava ku endla leswi hi nga swi kotaka leswaku hi va kona eminhlanganweni hinkwayo.

11. Ku va kona eminhlanganweni swi hi pfuna njhani leswaku hi gandzela Yehovha?

¹¹ Loko hi ri eminhlanganweni, hi gandzela Yehovha. Tanihi leswi a nga Muvumbi wa hina, hi fanele hi n’wi nkhensa, hi n’wi xixima ni ku n’wi dzunisa. (Hlaya Nhlavutelo 7:12.) Leswi hi swi endla hi ku khongela, hi ku yimbelela ni ku vulavula hi Yehovha eminhlanganweni. Mawaku lunghelo leri hi nga na rona ro gandzela Yehovha vhiki ni vhiki!

12. Yehovha u titwa njhani loko hi yingisa xileriso xakwe xa leswaku hi va kona eminhlanganweni?

¹² Leswi hi vumbiweke hi Yehovha hi fanele hi n’wi yingisa. U hi lerise ku hambeta hi hlangana swin’we, ngopfungopfu leswi makumu ma nga ekusuhi. Hikwalaho loko hi yingisa xileriso lexi Yehovha wa tsaka. (1 Yohane 3:22) Matshalatshala hinkwawo lawa hi ma endlaka leswaku hi va kona eminhlanganweni wa ma xiya ni ku ma tlangela.—Vaheveru 6:10.

13, 14. Loko hi ri eminhlanganweni hi tshinela njhani eka Yehovha na Yesu?

¹³ Loko hi ya eminhlanganweni, hi komba Yehovha leswaku hi lava ku tshinela eka yena ni N’wana wakwe. Loko hi ri eminhlanganweni, hi dyondza Bibele ni ku dyondza eka Yehovha leswi hi faneleke hi swi endla ni ndlela leyi hi faneleke hi hanya ha yona. (Esaya 30:20, 21) Hambi ku ri vanhu lava nga riki Timbhoni loko va ta eminhlanganweni, va swi xiya leswaku hi kongomisiwa hi Xikwembu. (1 Vakorinto 14:23-25) Yehovha u kongomisa minhlangano ya hina hi moya lowo kwetsima naswona leswi hi swi dyondzaka swi huma eka yena. Loko hi ya eminhlanganweni, hi yingisa leswi Yehovha a swi vulaka, hi vona ndlela leyi a hi rhandzaka ha yona ni ku tshinela eka yena.

¹⁴ Yesu, Nhloko ya vandlha u te: “Laha ku nga na vambirhi kumbe vanharhu lava hlengeletaneke swin’we hi vito ra mina, ndzi kona exikarhi ka vona.” (Matewu 18:20) Nakambe Bibele yi vula leswaku Yesu u “[famba] exikarhi” ka mavandlha. (Nhlavutelo 1:20–2:1) Swi le rivaleni leswaku Yehovha na Yesu va na hina naswona va hi tiyisa loko hi ri eminhlanganweni. U anakanya leswaku Yehovha u titwa njhani loko u endla hinkwaswo leswi u nga swi kotaka leswaku u tshinela eka yena ni N’wana wakwe?

15. Xana ku va kona ka hina eminhlanganweni swi xi kombisa njhani Xikwembu leswaku hi lava ku xi yingisa?

¹⁵ Loko hi va kona eminhlanganweni, hi komba Yehovha leswaku hi lava ku n’wi yingisa. Yehovha a nga hi sindzisi ku endla leswi a hi byelaka swona. (Esaya 43:23) Kutani loko hi hlawula ku yingisa xileriso xakwe xo va kona eminhlanganweni, hi kombisa leswaku ha n’wi rhandza naswona ha pfumela leswaku u ni mfanelo yo hi byela leswi hi faneleke hi swi endla. (Varhoma 6:17) Hi xikombiso, hi ta endla yini loko muthori wa hina a lava leswaku hi tirha nkarhi wo tala lerova hi nga swi koti ku va kona minkarhi hinkwayo eminhlanganweni? Kumbexana, mfumo wu vula leswaku loko ko kumeka munhu loyi a gandzelaka Yehovha, u ta hakela ndziho, a khomiwa kumbe a xupuriwa hi ndlela yo vava swinene. Minkarhi yin’wana hi nga ha tsakela ku endla swin’wana ku ri ni ku ya eminhlanganweni. Eka swiyimo leswi hinkwaswo, hi fanele hi endla xiboho xa leswi hi nga ta swi endla. (Mintirho 5:29) Kambe nkarhi ni nkarhi loko hi hlawula ku yingisa Yehovha, ha n’wi tsakisa.—Swivuriso 27:11.

16, 17. (a) Hi swi tivisa ku yini leswaku minhlangano a yi ri ya nkoka eka Vakreste va le minkarhini ya vaapostola? (b) Makwerhu George Gangas a a titwa njhani hi minhlangano ya Vukreste?

¹⁶ Endzhaku ka loko Vakreste va hlangane hi Pentekosta ya lembe ra 33, va hlangane nkarhi ni nkarhi leswaku va gandzela Yehovha. Va ‘hambete va khathalelana va nga fularheli ku hlengeletana.’ (Vaheveru 10:24, 25) Naswona a va tshikanga ku hlangana hambiloko va xanisiwa hi mfumo wa Varhoma ni varhangeri va vukhongeri va Vayuda. Hambileswi a swi nga olovi, va endle hinkwaswo leswi va nga swi kotaka leswaku va hambeta va hlangana swin’we.

¹⁷ Ninamuntlha, malandza ya Yehovha ma yi tlangela swinene minhlangano naswona ma tiphina loko ma ri kwalaho. George Gangas, loyi a a ri xirho xa Huvo leyi Fumaka ku ringana malembe yo tlula 22, u te: “Eka mina, ku hlangana ni vamakwerhu i nchumu lowu ndzi tsakisa swinene naswona ndza khutazeka loko ndzi ri na vona. Ndzi rhandza ku rhanga ndzi fika eHolweni ya Mfumo ndzi tlhela ndzi va wo hetelela, loko swi koteka. Ndza tsaka swinene loko ndzi vulavula ni vanhu va Xikwembu. Loko ndzi ri exikarhi ka vona ndzi titwa ndzi sirhelelekile ndzi ri ni ndyangu wa ka hina, hi ri eparadeyisini ya moya.” U ye emahlweni a ku: “Lexi ndzi ehleketaka ha xona ni lexi ndzi xi lavaka swinene i ku va kona eminhlanganweni.”

18. U titwa njhani hi minhlangano ya hina naswona u tiyimisele ku endla yini?

¹⁸ Xana na wena u titwa hi ndlela leyi fanaka hi ku gandzela Yehovha? Loko swi ri tano, hambeta u endla leswi u nga swi kotaka leswaku u va ni vamakwerhu eminhlanganweni, hambiloko swi tika. Komba Yehovha leswaku u titwa ku fana na Hosi Davhida, loyi a vuleke a ku: “Yehovha, ndzi swi rhandzile ku tshama endlwini ya wena.”—Pisalema 26:8.